ले़बि 4 - लिम्बुमे़न्नि मे़न्धा के़बोङ्बा लायोलाम् ले़प्मि खोमा सिदुङ्जभा 1 यहवे दाङ्बे़ल्ले़ मोसान् मे़त्तु, 2 “इस्राइलिहाॽ अक्खे मे़त्ते़से़ॽ—‘आल्ल यहवे दाङ्बाल्ले़ चोःक्मा मे़नुॽने़न् फाॽआङ् पाःत्तुबा कुभा पाःन्नो चोःक्मा निङ्वाॽ मे़न्इःत्ते आत्तिल्ले़ लायो चोगुॽ— 3 “‘कुभा माङ्थोःक्ना मे़बिरुबा निङ्वाॽफुसाम्बाल्ले़ लायो चोगुआङ् मनाहाॽओ आप्तिक् तारुने़भग्र खे़ल्ले़ खुने़ॽ चोगुबा लायोल्ले़ लागि कुलाङ् मे़न्छक्मनाबा मे़ङ्गाःम्मनाबा कुम्बाबा पित्सात् थिक् तारुआङ् यहवे दाङ्बाओ लायोलाम् ले़प्मि खोमा सिदुङ्जभा तोःन्दुर॥ 4 खुने़ॽ खे़न् से़गम्बान् तुम्मादे़न् साःङ्गाहिम् लाःप्मादे़न्निल्ले़ कुयाओ यहवे दाङ्बे़ल्ले़ कुदगि तारुर हे़क्क्याङ् खे़ल्ले़ कुधे़गेःक्पो कुहुक्किन् ने़स्सुआङ् खे़न् यहवे दाङ्बाल्ले़ कुदगि से़रुर॥ 5 हे़क्क्याङ् माङ्थोःक्ना मे़बिरुबा निङ्वाॽफुसाम्बाल्ले़ से़गम्बाल्ले़ कुमाक्खिन् तेॽरुआङ् तुम्मादे़न् साःङ्गाहिम्मो तारुर॥ 6 निङ्वाॽफुसाम्बाल्ले़ कुहुक्चोःन् माक्खिॽओ हुम्सुआङ् खे़न् माक्खिॽओलाम् सेसेदे़न्नोबा फोःन्दाःल्ले़ कुदगि ले़प्माङ् यहवे दाङ्बाल्ले़ कुबेसाङ् नुसिले़ङ् थारिक् साक्खुर॥ 7 खे़न् एगाङ् निङ्वाॽफुसाम्बाल्ले़ तुम्मादे़न् साःङ्गाहिम् सिगाङ् के़युङ्बा कुनाम्गे़नुॽबा सुक्पा ले़त्ति तोःन्मादे़न्नोबा ताङ्हाॽओ यहवे दाङ्बाल्ले़ कुबेसाङ् खे़न् माक्खिॽओलाम् कुभा तारुर, हे़क्क्याङ् से़गम्बाल्ले़ के़नम्बा कुमाक्खिन् तुम्मादे़न् साःङ्गाहिम्मोबा लाम्धेःत्तो मिधिङ्मनादेमनाबा सिदुङ्जभा ले़त्ति तोःम्मादे़न्निल्ले़ कुबुङ्ङो हुक्खुर॥ 8 लायोलाम् ले़प्मि खोमा सिदुङ्जभा से़गम्बाल्ले़ कुसोःत्तिन् के़रे़क् खुने़ॽ खे़प्मोनु लःत्तुर, कुहिदुत् कुधे़गाङ् के़दे़प्पा कुसोःत्तिन् नु कुहिदुःत्तिल्ले़ कुसम्धाङ्बा कुसोःत्तिन्, 9 ने़प्माङ् कुले़म्हाॽ नु खे़ल्ले़ कुसम्धाङ्बा हे़क्क्याङ् कुगे़ङ्ङोबा कुसोःत्तिन् नु कुले़म्हाॽनु सोरिक् कुलुङ्माॽ के़दे़प्पा सान् खे़ल्ले़ वे़गु लःत्तुर॥ 10 तङ्जुम् वयागे़न् सिदुङ्जभाःल्ले़ लागि से़प्मनाबा थक्साओलाम् कुसोःत्तिन् लःप्मनाबा हे़क्के निङ्वाॽफुसाम्बाल्ले़ मिधिङ्मनादेमनाबा वयागे़न् सिदुङ्जभाःल्ले़ कुसोःत्तिन् लःत्तुआङ् ले़त्ति तोःम्मादे़न्नो मिधिक्खुदेसुर, 11 कर से़गम्बाल्ले़ कुहोरिक्पान्, खे़न् के़रे़क् साःन्, कुधे़ःक्किन्, कुलाङ्हाॽ नु कुहिदुत् कुधे़गाङ् कुहिःन् सोसोरिक्, 12 के़दाङ्बा के़याःक्पा से़गम्बे़ल्ले़ कुजक्ता कुले़म्दाहाॽ साःङ्गाहिम्हाॽलाम् लाःक्कात् खाप्पु लाप्फुमा चक्खोबादे़न्नो तेॽरुर हे़क्क्याङ् सिङ्ङिल्ले़ कुसम्धाङ् ने़स्सुआङ् मिओ मिधिक्खुर—आत्तिदि खाप्पु लाप्फुमादे़न् ने़, खे़प्मोए खे़न् मिधिक्खुर॥ 13 “‘इस्राइलबा के़रे़क् सङ्जुम्भोहाॽरे़ चोःक्मा निङ्वाॽ मे़न्इःत्ते लायो मे़जोगुआङ् वाॽने़भग्र हे़क्क्याङ् यहवे दाङ्बे़ल्ले़ चोःक्मा मे़नुॽने़न् फाॽआङ् पाःत्तुबा लत्छा पान् मे़जोगुआङ् वाॽने़भग्र, खे़न् पाःन्निन् खे़न् सङ्जुम्भोबा मनाहाॽरे़ खुनिॽ मिक्साओ निमे़धाःप्ने़न्छाङ् कन्हाॽ आप्तिक्साबा मे़बोङ्ॽ॥ 14 कन्हाॽरे़ मे़जोगुबा खे़न् लत्छा लायोन् ओसेःन्धाङ् पोङ्ङिल्ले़ सङ्जुम्भोबाहाॽरे़ लायोलाम् ले़प्मि खोमा सिदुङ्जभा कुइसिक् से़गम्बान् ताःप्माआङ् तुम्मादे़न् साःङ्हिम्मिल्ले़ कुदगि तोःम्मा पोङ्ॽ॥ 15 सङ्जुम्भोबा लाम्लोबाहाॽरे़ से़गम्बाल्ले़ कुधे़गेःक्पो खे़ङ्हाॽरे़ खुन्छिॽ हुक्हाॽ यहवे दाङ्बे़ल्ले़ कुदगि मे़ने़स्सुर हे़क्क्याङ् खे़न् से़गम्बान् यहवे दाङ्बे़ल्ले़ कुदगि मे़से़रुर॥ 16 खे़न् एगाङ् माङ्थोःक्ना मे़बिरुबा निङ्वाॽफुसाम्बाल्ले़ खे़न् से़गम्बाल्ले़ कुमाक्खिलाम् कुभा याङ्सिङ्ङाङ् तुम्मादे़न् साःङ्गाहिम्मो तारुर॥ 17 निङ्वाॽफुसाम्बाल्ले़ आबाङे कुहुक्चोःन् माक्खिॽओ निःप्सुआङ् खे़न् माक्खिन् फोःन्दाःल्ले़ कुदगि ले़प्माङ् यहवे दाङ्बाल्ले़ कुदगि नुसिले़ङ् थारिक् साक्खुर॥ 18 खे़न् एगाङ् तुम्मादे़न् साःङ्गाहिम् सिगाङ् के़युङ्बा ले़त्ति तोःम्मादे़न्नोबा ताङ्हाॽओ खे़ल्ले़ यहवे दाङ्बे़ल्ले़ कुदगि खे़न् माक्खिॽओलाम् कुभा हुःत्तुर, हे़क्क्याङ् के़रे़क् के़नम्बा माक्खिन् तुम्मादे़न् साःङ्गाहिम् लाःप्मादे़न्नो मिधिङ्मनादेमनाबा सिदुङ्जभा ले़त्ति तोःम्मादे़न्निल्ले़ कुबुङ्ङो हुक्खुर॥ 19 खे़ल्ले़ के़रे़क् कुसोःत्तिन् खुने़ॽ खे़प्मोलाम् लःत्तुआङ् ले़त्ति तोःम्मादे़न्नो मिधिक्खुर॥ 20 लायोलाम् ले़प्मि खोमा सिदुङ्जभा से़गम्बाल्ले़ लागि खे़ल्ले़ थे़मा चोगुआङ् वये़ कन् से़गम्बाल्ले़ लागिआङ् खुने़ॽ हे़क्केए चोगुर॥ अक्खेलॽरिक् निङ्वाॽफुसाम्बे़ल्ले़ खे़ङ्हाॽरे़ खुन्छिॽ लागि ले़प्मि नाःक्मा याःम्बक् चोगु पिरुसिर, हे़क्क्याङ् खे़ङ्हाॽरे़ ले़प्मि मे़घोसुॽ॥ 21 खे़ल्ले़ खे़न् से़गम्बान् साःङ्गाहिम्हाॽलाम् लाःक्कात् तेॽरुआङ् तगिबान् मिधिक्खुबा हे़क्केए मिधिक्खुर॥ सङ्जुम्भोबाहाॽरे़ खुन्छिॽ लागि कन् लायोलाम् ले़प्मि खोमा सिदुङ्जभारो॥ 22 “‘आल्ल कुभा युक्साबाल्ले़ चोःक्मा निङ्वाॽ मे़न्इःत्ते लायो चोगुॽ हे़क्क्याङ् यहवे दाङ्बा खे़ल्ले़ कुनिङ्वाॽफुमाङ्ङिल्ले़ चोःक्मा मे़नुॽने़न् पाःत्तुबा पाःन्हाॽओ कुभा पान् चोगुने़भग्र, खे़न् आप्तिक्साबा पोङ्ॽ॥ 23 खे़ल्ले़ चोगुबा लायोन् खुने़ॽओ ओसेःन्धाङ् पोङ्ङिल्ले़, खे़ल्ले़ लत्छा मे़ङ्गाःम्मनाबा कुम्बाबा मे़ःन्दाधिक् सिदुङ्जभा कुइसिक् तारुर पोङ्ॽ॥ 24 खे़ल्ले़ कुम्बाबा मे़ःन्दाःल्ले़ कुधे़गेःक्पो कुहुक्किन् ने़स्सुर, हे़क्क्याङ् आत्ति यहवे दाङ्बे़ल्ले़ कुदगि थक्सान् मे़से़रुॽ, खे़प्मोए खे़न् मे़से़रुर॥ खे़न्ग लायोलाम् ले़प्मि खोमा सिदुङ्जभारो॥ 25 खे़न् एगाङ् निङ्वाॽफुसाम्बाल्ले़ आप्फेक् कुहुक्चोःल्ले़ लायोलाम् ले़प्मि खोमा सिदुङ्जभाःल्ले़ कुमाक्खिॽओलाम् कुभा याङ्सिङ्ङाङ् मिधिङ्मनादेमनाबा सिदुङ्जभा ले़त्ति तोःम्मादे़न्नोबा ताङ्हाॽ हुःत्तुर, हे़क्क्याङ् के़नम्बा माक्खिन् ले़त्ति तोःम्मादे़न्निल्ले़ कुबुङ्ङो हुक्खुर॥ 26 खे़ल्ले़ के़रे़क् कुसोःत्तिन्नाङ् तङ्जुम् वयागे़न् सिदुङ्जभाःल्ले़ कुसोःत्तिन् कुइसिक् ले़त्ति तोःम्मादे़न्नो खे़ल्ले़ मिधिक्खुर॥ कम्भलॽरिक् निङ्वाॽफुसाम्बाल्ले़ खे़न् युक्साबे़ल्ले़ कुलायोल्ले़ लागि ले़प्मि नाःक्मा हे़क्क्याङ् निङ्वाॽफुमाङ्ङिन्नु नादङ् चोःक्मा पिमा याःम्बक् चोगु पिरुॽ, हे़क्क्याङ् खे़ल्ले़ लायोलाम् ले़प्मि खोसुॽ॥ 27 “‘सङ्जुम्भोबा मनाहाॽओलाम् कुभारे़ चोःक्मा निङ्वाॽ मे़न्जोःक्के लायो चोगुॽ हे़क्क्याङ् यहवे दाङ्बे़ल्ले़ चोःक्मा मे़नुॽने़न् फाॽआङ् पाःत्तुबा पाःन्हाॽओबा कुभा पान् चोगुने़भग्र, खे़न् आप्तिक्साबा पोङ्ॽ॥ 28 खुने़ॽ चोगुबा खे़न् लायोन् खुने़ॽ कुलागि ओसेःन्धाङ् पोङ्ङिल्ले़, खे़ल्ले़ चोगुबा लायोल्ले़ लागि हुक्वा कुइसिक् कुलाङ् मे़न्छक्मना मे़ङ्गाःम्ना कुम्मामा मे़ःन्दाधिक् सिदुङ्जभा तोःम्मारे़ लागि खुने़ॽ तारुर पोङ्ॽ॥ 29 खे़ल्ले़ लायोलाम् ले़प्मि खोमा सिदुङ्जभाःल्ले़ कुधे़गेःक्पो कुहुक्किन् ने़स्सुर, हे़क्क्याङ् मिधिङ्मनादेमनाबा सिदुङ्जभा तोःम्मादे़न्नो खे़ल्ले़ लायोलाम् ले़प्मि खोमा खे़न् सिदुङ्जभान् से़रुर॥ 30 खे़न् एगाङ् निङ्वाॽफुसाम्बाल्ले़ आप्फेक् कुहुक्चोःल्ले़ लायोलाम् ले़प्मि खोमा सिदुङ्जभाःल्ले़ कुमाक्खिॽओलाम् कुभा याङ्सिङ्ङाङ् मिधिङ्मनादेमनाबा सिदुङ्जभा तोःम्मा ले़त्ति तोःम्मादे़न्नोबा ताङ्हाॽओ हुःत्तुर, खे़ब्याङ् के़नम्बा माक्खिन् ले़त्ति तोःम्मादे़न्निल्ले़ कुबुङ्ङो हुक्खुर॥ 31 खे़ल्ले़ के़रे़क् कुसोःत्तिन् तङ्जुम्बा सिदुङ्जभाःल्ले़ कुसोःत्तिन् हे़क्के खे़ल्ले़ लःत्तुर, हे़क्क्याङ् निङ्वाॽफुसाम्बाल्ले़ यहवे दाङ्बे़ल्ले़ कुलागि ले़त्ति तोःम्मादे़न्नो खे़न् मिधिक्खुर हे़क्क्याङ् खे़न् कुनाम्गे़नुॽबे़ल्ले़ यहवे दाङ्बे़न् कुनिङ्वाॽ तासु पिरु॥ कम्भलॽरिक् निङ्वाॽफुसाम्बाल्ले़ खे़ल्ले़ कुलागि लायोलाम् ले़प्मि नाःक्तु पिरुॽ, खे़ब्याङ् खे़ल्ले़ लायोलाम् ले़प्मि खोसुॽ॥ 32 “‘खे़ल्ले़ लायोलाम् ले़प्मि खोमारे़ लागि मे़ल्लुक्साःत्तिन् खुने़ॽ हुक्वा हे़क्के तारुने़भग्र मे़ङ्गाःम्ना कुम्मामा मे़ल्लुक् च्याःक्थिक् तारुर॥ 33 खे़ल्ले़ लायोलाम् ले़प्मि खोमा सिदुङ्जभाःल्ले़ कुधे़गेःक्पो कुहुक्किन् ने़स्सुर, हे़क्क्याङ् आत्ति मिधिङ्मनादेमनाबा वयागे़न् सिदुङ्जभा थक्सान् मे़से़रुॽ, आम्भा खे़प्मोए लायोलाम् ले़प्मि खोमारे़ लागि खे़न् मे़से़रुर॥ 34 खे़न् एगाङ् निङ्वाॽफुसाम्बाल्ले़ कुहुक्चोःल्ले़ लायोलाम् ले़प्मि खोमा सिदुङ्जभाःल्ले़ कुभा कुमाक्खिॽजि याङ्सिङ्ङाङ् मिधिङ्मनादेमनाबा सिदुङ्जभा तोःम्मा ले़त्ति तोःम्मादे़न्नोबा ताङ्हाॽओ हुःत्तुर, हे़क्क्याङ् खे़ल्ले़ के़नम्बा कुमाक्खिन् ले़त्ति तोःम्मादे़न्निल्ले़ कुबुङ्ङो हुक्खुर॥ 35 खे़ल्ले़ के़रे़क् कुसोःत्तिन् तङ्जुम्बा वयागे़न् सिदुङ्जभा मे़ल्लुक्साःत्तिल्ले़ कुसोःत्तिन् कुइसिक् खे़ल्ले़ वे़गु लःत्तुर, हे़क्क्याङ् निङ्वाॽफुसाम्बाल्ले़ यहवे दाङ्बे़ल्ले़ कुलागि खे़न् मिलाम्बा तोःम्मनाबा सिदुङ्जभा ले़त्ति तोःम्मादे़न्नो मिधिक्खुर॥ कम्भलॽरिक् खे़ल्ले़ चोगुबा कुलायोल्ले़ लागि निङ्वाॽफुसाम्बाल्ले़ खुने़ॽ ले़प्मि नाःक्तु पिरुॽ, खे़ब्याङ् खे़ल्ले़ ले़प्मि खोसुरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.