ले़बि 3 - लिम्बुतङ्जुम् सिदुङ्जभा 1 “‘कुभारे़ तोःन्दुबा हुक्वान् तङ्जुम् सिदुङ्जभाने़भग्र, हे़क्क्याङ् खे़ल्ले़ पित्हाॽलाम् कुभा लत्छा कुम्बाबा पित् तोःन्दुने़भग्र, खे़ल्ले़ खे़न् यहवे दाङ्बे़ल्ले़ कुदगि मे़ङ्गाःम्मनाबा पित् इग्र पिप्मा थिक् तोःन्दुर॥ 2 खे़ल्ले़ कुहुक्किन् खुने़ॽ तोःन्दुबा वयागे़न् सिदुङ्जभाःल्ले़ कुधे़गेःक्पो ने़स्सुर हे़क्क्याङ् तुम्मादे़न् साःङ्गाहिम् लाःप्मादे़न्नो च्ये़प्तु स्ये़रुर॥ खे़ब्याङ् हारुने़ल्ले़ कुस्साहाॽ, इग्र निङ्वाॽफुसाम्बाहाॽरे़ खे़ल्ले़ कुमाक्खिन् ले़त्ति तोःम्मादे़न् कब्रिङ् मे़साक्खुर॥ 3 तङ्जुम् वयागे़न् सिदुङ्जभालाम् खे़ल्ले़ यहवे दाङ्बाओ मिओलाम् सिदुङ्जभा तोःन्दुर—इग्र, कुहिदुत् कुधे़गाङ्ङिल्ले़ कुदे़प्मा कुसोःत्तिन् नु कुहिदुःत्तिल्ले़ कुसम्धाङ्बा कुसोःत्तिन् के़रे़क्, 4 ने़प्माङ् कुले़म्मिन् हे़क्क्याङ् खे़ल्ले़ कुसम्धाङ्बा कुसोःत्तिन् नु कुगे़ङ्ङोबा कुसोःत्तिन्, खे़ब्याङ् कुले़म्हाॽनु सोरिक् कुलुङ्माॽ के़दे़प्पा कुने़क्सान् खे़ल्ले़ लःत्तुर॥ 5 खे़ब्याङ् हारुने़ल्ले़ कुस्साहाॽरे़ ले़त्ति तोःम्मादे़न्नो मिओबा सिङ्ङिल्ले़ कुसम्धाङ् के़ने़बा मिधिङ्मनादेमनाबा सिदुङ्जभाओ मिमे़धिक्खुर॥ यहवे दाङ्बे़ल्ले़ कन् कुसिराॽ के़धाङ्बा कुनाम्गे़नुॽबा, मिओलाम् तोःम्मनाबा सिदुङ्जभारो॥ 6 “‘खे़ल्ले़ यहवे दाङ्बाल्ले़ कुलागि तङ्जुम् सिदुङ्जभा फाॽआङ् मे़ल्लुक् मे़ःन्दाहाॽओलाम् लत्छा तोःन्दुने़भग्र, खे़ल्ले़ मे़ङ्गाःम्मनाबा कुम्बाबा इग्र कुम्मामा थिक् तोःन्दुर॥ 7 खे़ल्ले़ खुने़ॽ तोःन्दुबा सिदुङ्जभाःल्ले़ लागि मे़ल्लुक्साःत्तिन् तोःन्दुने़भग्र यहवे दाङ्बाओ खे़न् तोःन्दुर॥ 8 खे़ल्ले़ खुने़ॽ तोःन्दुबा सिदुङ्जभाःल्ले़ कुधे़गेःक्पो खुने़ॽ कुहुक्किन् ने़स्सुर, हे़क्क्याङ् तुम्मादे़न् साःङ्गाहिम् तगाङ् खे़न् से़रुर॥ हारुने़ल्ले़ कुस्साहाॽरे़ खे़ल्ले़ कुमाक्खिन् ले़त्ति तोःम्मादे़न् कब्रिङ् पिसाङ् मे़साक्खुर॥ 9 खे़ल्ले़ तङ्जुम् सिदुङ्जभालाम् यहवे दाङ्बे़ल्ले़ कुलागि मिलाम्बा सिदुङ्जभा तोःन्दुर—इग्र, खे़ल्ले़ कुसोःत्तिन् नु कुमिःल्ले़ कुबुङ्ङोबा कुसोःत्तिन् कुएःक्कोनु खे़ल्ले़ से़न्दुर, हे़क्क्याङ् कुहिदुत् कुधे़गाङ्ङिल्ले़ कुबःत्थाङ्ङिन् नु कुहिदुत् सम्धाङ्बा के़रे़क् कुसोःत्तिन्, 10 ने़प्माङ् कुले़म्हाॽ नु खे़ल्ले़ कुसम्धाङ्बा हे़क्क्याङ् कुगेङ्ङो के़बप्पा कुसोःत्तिन्, खे़ब्याङ् कुले़म्मिन्नु सोरिक् कुलुङ्माॽ के़दे़प्पा सान् खे़ल्ले़ वे़गु लःत्तुर॥ 11 निङ्वाॽफुसाम्बाल्ले़ खे़न् यहवे दाङ्बाओ मिओलाम् तोःम्मनाबा सिदुङ्जभान् ले़त्ति तोःम्मादे़न्नो कुजा सिदुङ्जभा कुइसिक् मिधिक्खुदेसुर॥ 12 “‘खे़ल्ले़ तोःन्दुबा सिदुङ्जभान् मे़ःन्दाने़भग्र, खे़ल्ले़ खे़न् यहवे दाङ्बाओ तोःन्दुर॥ 13 खे़ल्ले़ खुने़ॽ कुहुक्किन् खे़न् सिदुङ्जभाःल्ले़ कुधे़गेःक्पो ने़स्सुर, हे़क्क्याङ् तुम्मादे़न् साःङ्गाहिम्मिल्ले़ कुदगि खे़न् से़रुर॥ हे़क्क्याङ् हारुने़ल्ले़ कुस्साहाॽरे़ ले़त्ति तोःम्मादे़न् कब्रिङ् खे़ल्ले़ कुमाक्खिन् मे़साक्खुर॥ 14 खुने़ॽ खे़न्लाम्बा खुने़ॽ तोःन्दुबा सिदुङ्जभान् यहवे दाङ्बे़ल्ले़ कुलागि मिओलाम् तोःन्दुर—कुहिदुत् कुधे़ङाङ् के़दे़प्पा कुबःत्थाःङ्ङिन् नु कुहिदुःत्तिल्ले़ कुसम्धाङ्बा के़रे़क् कुसोःत्तिन्, 15 ने़प्माङ् कुले़म्हाॽ हे़क्क्याङ् खे़ल्ले़ कुसम्धाङ्बा नु कुगेङ्ङो के़बप्पा कुसोःत्तिन्, खम्ब्याङ् कुले़म्हाॽनु सोसोरिक् कुलुङ्माॽ के़दे़प्पा सान् खे़ल्ले़ वे़गु लःत्तुर॥ 16 निङ्वाॽफुसाम्बाल्ले़ खे़न् कुनाम्गे़नुॽबा पोङ्मारे़ लागि मिओलाम् तोःम्मनाबा सिदुङ्जभान् ले़त्ति तोःम्मादे़न्नो कुजा कुइसिक् तोःन्दुर॥ कुसोत् के़याक्पाहाॽ के़रे़क् यहवे दाङ्बाल्ले़न्नेरो॥ 17 “‘खिनिॽ कुसोःत्तिन् नु कुमाक्खिन् मे़जाम्मिन्ने़ॽ॥ कन् खिनिॽ थाःक्थाःक्ले़ लागि खिनिॽ आत्ति के़युङिसाङ् आभे़ल्ले़साङ् सदादिङ्बा साम्योसाक्थिम् पोङ्लरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.