ले़बि 27 - लिम्बुमाङ्हे़क् नु थिबोङ्लक् तोःम्मा थिम्हाॽ 1 यहवे दाङ्बे़ल्ले़ मोसान् मे़त्तु, 2 “खे़ने़ॽ इस्राइलिहाॽ अक्खे मे़त्ते़से़ॽ—‘कुभा मनाःल्ले़ माङ्हे़क् चोगुल्ले़ यहवे दाङ्बाओ खुने़ॽ माङ्हुप् चोगुबा मनान् तोःन्दुने़भग्र, खे़ल्ले़ यारुबा कुमे़ल्लुङ् कुइसिक् 3 निबोङ्ङाङ्धो तुक्पोङ् तङ्बे थारिक्पा ये़म्बित्छान् सेसेदे़न्नोबा सेकेल कुइसिक् ङाबोङ् युप्पा सेकेल कुमे़ल्लुङ् हे़म्मा पिमा॥ 4 हे़क्क्याङ् मे़न्छुमान् सुम्बोङ् युप्पा सेकेल कुमे़ल्लुङ् हे़म्मा पिमा॥ 5 तङ्बे ङासिआङ्धो निबोङ् थारिक्पा ये़म्बित्छान् निबोङ् सेकेल नु मे़न्छुमान् थिबोङ् सेकेल कुमे़ल्लुङ् हे़म्मा पिमा॥ 6 ला थिक्काङ्धो तङ्बे ङासि थारिक्पा ये़म्बित्छान् ङासि युप्पा सेकेल नु मे़न्छुमान् सुम्सि युप्पा सेकेल कुमे़ल्लुङ् हे़म्मा पिमा॥ 7 तुक्पोङ् तङ्बेआङ् थोबा ये़म्बित्छान् थिबोङ्ङाङ् ङासि युप्पा सेकेल नु मे़न्छुमान् थिबोङ् युप्पा सेकेल कुमे़ल्लुङ् हे़म्मा पिमा॥ 8 कुमे़ल्लुङ् हुङ्मा मे़न्छुक्मनाबा कुभा याङ्गे़साॽबा वाॽने़भग्र खे़न् निङ्वाॽफुसाम्बाओ मे़दारुर, हे़क्क्याङ् निङ्वाॽफुसाम्बे़ल्ले़ए माङ्हे़क् के़जोःक्पा मनाःल्ले़ सुक्तुबा यारिक् खुने़ॽ कुमे़ल्लुङ् हे़न्दु पिरुर॥ 9 “‘यहवे दाङ्बे़ल्ले़ कुलागि तोःम्मा के़बोङ्बा सिदुङ्जभान् यहवे दाङ्बे़ल्ले़ ताःक्तुबा थक्सा वाॽने़भग्र सिदुङ्जभा थक्सान् सेसेबा चोक्॥ 10 खे़ल्ले़ नुबाल्ले़ कुले़क्वा ताप्फे़ःम्बा इग्र ताप्फे़ःम्बाल्ले़ कुले़क्वा नुबा ले़क्मा मे़नुॽने़न्ॽ॥ खे़ल्ले़ थक्साःल्ले़ कुले़क्वा थक्साए ले़क्तुने़भग्र ले़क्तुसिबा ने़प्माङ् थक्साहाॽ सेसेबा चोःक्सिॽ॥ 11 खे़न् माङ्हे़क् चोगुबा थक्सान् तोःम्मा मे़न्नुॽमनाबा आसुत्थो थक्साने़भग्र खुने़ॽ खे़न् थक्सान् निङ्वाॽफुसाम्बाल्लो तारुर॥ 12 नुबा चोःक्साङ् ताप्फे़ःम्बा चोःक्साङ् निङ्वाॽफुसाम्बाल्ले़ खे़ल्ले़ कुमे़ल्लुङ् हे़न्दुर॥ हे़क्क्याङ् निङ्वाॽफुसाम्बे़ल्ले़ च्या कुमे़ल्लुङ् हे़न्दुॽ हाबा खे़न् कुइसिक् पोङ्ॽ॥ 13 खे़न् मनाःल्ले़ कुमे़ल्लुङ् हुङुआङ् थक्सान् थे़ॽरुबाने़भग्र, हे़म्मनाबा कुमे़ल्लुङ्ङो आल्लसाङ् ङासिले़ङ् कुलक् योॽरुआङ् लःत्तुर पोङ्ॽ॥ 14 “‘कुभा मनाःल्ले़ यहवे दाङ्बाओ खुने़ॽ कुहिम्मिन् तोःन्दुने़भग्र निङ्वाॽफुसाम्बाल्ले़ खे़न् नुबा चोःक्पि ताप्फे़ःम्बा चोःक्पि फाॽआङ् खे़न् ओमे़त्तुर हे़क्क्याङ् खे़ल्ले़ कुमे़ल्लुङ् हे़न्दु पिरुर॥ निङ्वाॽफुसाम्बाल्ले़ आक्ख्यारिक् कुमे़ल्लुङ् हे़न्दुॽ खे़ल्ले़ कुमे़ल्लुङ् खे़म्भ्यारिक्के पोङ्ल॥ 15 कर के़दोःम्बाल्ले़ कुमे़ल्लुङ् हुङ्माआङ् खे़न् थे़ॽमा निङ्वाॽ चोगुने़भग्र, हे़म्मनाबा कुमे़ल्लुङ्ङो आल्लसाङ् ङासिले़ङ् कुलक् योॽरुआङ् खे़ल्ले़ लःत्तुर पोङ्ॽ, खे़ब्याङ् खे़न् हिम्मिन् हाबा खे़न् मनाःल्ले़न् पोङ्ॽ॥ 16 “‘कुभा मनाःल्ले़ आप्फेक् कुलाजेॽ सिङ्बुङ्ङिल्ले़ कुभा कुलक्किन् यहवे दाङ्बे़ल्ले़ कुलागि तोःम्मा निङ्वाॽ चोगुने़भग्र खे़प्मो के़लाःप्पा याॽरिःम्बान् चिजे़प्तुर हे़क्क्याङ् खिनिॽ खे़ल्ले़ कुमे़ल्लुङ् हे़न्दे़म्मे़ॽ॥ खे़न् कुइसिक् निबोङ् किलो हःक्सिरे़ लागि थिबोङ् कुआत् युप्पा कुमे़ल्लुङ् मे़हे़न्दुर॥ 17 साम्म्याङ् तङ्बेआङ्धो खे़ल्ले़ कुइक्ताप्पिन् तोःन्दुबाने़भग्र खे़ल्ले़ कुमे़ल्लुङ्ङिन् मे़हे़न्दुबा कुइसिक् पोङ्ल॥ 18 कर खे़ल्ले़ कुइक्ताप्पिन् साम्म्याङ् तङ्बे एगाङ् तोःन्दुबाने़भग्र, साम्म्याङ् तङ्बे तामा आक्ख्यारिक् याःक्ते़आङ् वाॽ निङ्वाॽफुसाम्बे़ल्ले़ निरुर, हे़क्क्याङ् मे़हे़न्दुबा कुमे़ल्लुङ्ङिन् खे़न्लाम्बा युम्सुर॥ 19 खे़न् इक्ताप्पिन् के़दोःम्बे़ल्ले़ए कुमे़ल्लुङ् हुङुआङ् तेॽरुबाने़भग्र, मे़हे़न्दुबा कुमे़ल्लुङ्ङो आल्लसाङ् ङासिगेक्पा कुलक् योॽरुआङ् लःत्तुर, हे़क्क्याङ् खे़न् खुने़ॽइन्ने पोङ्ॽ॥ 20 कर खे़ल्ले़ खे़न् इक्ताप्पिन् कुमे़ल्लुङ् मे़हुङुन्नाङ् मे़धे़ॽरुन् इग्र खे़ल्ले़ वेॽ मनाओ खे़न् इक्ताप्पिन् सङ्घुआङ् ने़ने़भग्र, खे़ल्ले़ कुमे़ल्लुङ् हुङुआङ् आभे़ल्ले़आङ् थे़ॽमा मे़सुक्तुन्ॽ॥ 21 खे़न् इक्ताप्पिन् साम्म्याङ् तङ्बेओ खाल्सा लःन्निल्ले़ सेसेबा पोङ्ॽ, हे़क्केलॽरिक्के यहवे दाङ्बे़ल्ले़ कुलागि सरक् तोःम्मनाबा इक्ताप्पिन् सेसेबा पोङ्ॽ, खे़ब्याङ् खे़न् इक्ताप् युक्किन् निङ्वाॽफुसाम्बे़ल्ले़न् पोङ्ॽ॥ 22 “‘कुभा मनाःल्ले़ खोमा युक् लाम्बा खोसुबा मेःन् कर इङुबा इक्ताप्पिन् यहवे दाङ्बाओ तोःन्दुने़भग्र, 23 निङ्वाॽफुसाम्बे़ल्ले़ साम्म्याङ् तङ्बे तामा आक्ख्यारिक् वाॽ खे़न् निरुआङ् आक्ख्यारिक् कुमे़ल्लुङ् हे़न्दुॽ खे़ल्ले़ यहवे दाङ्बे़ल्ले़ कुलागि सेसे चोक् के़लॽबा निःन्धो चोगुआङ् आम्भा खे़ल्ले़ याःन्दिक् हुङुर॥ 24 याम्मो कुसङ् पोङ्मा तङ्बेओ खे़न् इक्ताप्पिन् खुने़ॽ हाःत्लोलाम् इङुआङ् ने़स्से़, इग्र हाःत्ले़ कुयुक्को खे़न् ने़स्से़, खे़ल्ले़ओए खे़न् नुःक्तुदेसुर॥ 25 हे़म्मनाबा कुमे़ल्लुङ्ङिन् के़रे़क् सेसेदे़न्नोबा युप्पा सेकेल कुइसिक् पोङ्ल—निबोङ् गेरान् सेकेल थिक् पोङ्ॽ॥ 26 “‘थक्साहाॽरे़ मे़धाप्तुसिबा थिक्सिगेक्पा थक्सा साःत्हाॽ, से़गम्बा इग्र मे़ल्लुक्किल्ले़ कुस्सा च्या पोङ्साङ्, आल्लआङ्धो खे़ङ्हाॽ यहवे दाङ्बे़ल्ले़न्ने मे़बोङ्ॽ—खे़ङ्हाॽ चाए मे़दोःन्देम्सिम्मिन्ने़ॽ॥ 27 खे़न् आसुत्थो थक्साःल्ले़ कुस्साने़भग्र, हे़म्मनाबा कुमे़ल्लुङ्ङो आल्लसाङ् ङासिगेक्पा कुलक् योॽमाआङ् खे़न् से़म्मा पोङ्ॽ, कर थे़ॽमनाबा मेःन्ने़भग्र हे़म्मनाबा कुमे़ल्लुङ्ङो खे़न् सङ्मा पोङ्ॽ॥ 28 “‘कर यहवे दाङ्बे़ल्ले़ कुलागि सरक् तोःम्मनाबा मना, थक्सा इग्र आप्फेक् लाजेॽ सिङ्बुङ्ङिन् सङ्मा सुक्मे़दे़त्ने़न् हे़क्क्याङ् से़म्माआङ् सुक्मे़दे़त्ने़न्॥ सरक् तोःम्मनाबा के़रे़क् पाःन्हाॽ यहवे दाङ्बे़ल्ले़ कुलागि साॽरिक् सेसेबा चोक्॥ 29 “‘मे़क्मारे़ लागि सरक् तोःम्मनाबा मनान्, खे़न् मे़ल्लुङ् हुङ्माआङ् थे़ॽमा मेःन्॥ खे़न् से़प्माए पोङ्ॽ॥ 30 “‘सिङ्सेॽहाॽरे़ कुजाॽहाॽ इग्र इक्ताप्पोबा याॽरिःम्बा च्यासाङ्, इक्ताप्पो के़दुम्बा कुजाःल्ले़ थिबोङ्लक्किन् यहवे दाङ्बे़ल्ले़न्ने पोङ्ॽ, हे़क्क्याङ् खे़ङ्हाॽ यहवे दाङ्बे़ल्ले़ कुलागि सेसेबा चोक्॥ 31 कुभा मनाःल्ले़ कुधिबोङ् लक्किन् कुमे़ल्लुङ् हुङ्माआङ् थे़ॽमा निङ्वाॽ चोगुने़भग्र, खे़प्मो कुलक् ङासि योॽरुआङ् लःत्तुर पोङ्ॽ॥ 32 थक्सा निःप्मा तक्काःत्तिल्ले़ कुसिगाङ् के़लिःन्छिङ् के़बेःक्पा थक्साओ, पित्थक्सा, मे़ल्लुक् मे़ःन्दा च्यासाङ्, थिबोङ्लक्किन् यहवे दाङ्बाल्ले़ कुलागि सेसेबा पोङ्ॽ॥ 33 नुबा इग्र ताप्फे़ःम्बा थक्साहाॽ खे़ल्ले़ मे़से़न्दुसिन्ल हे़क्क्याङ् मे़ले़क्तुसिन्ल॥ ले़क्माए पोङ्ने़भग्र, ले़क्तुसिबा ने़प्माङ् थक्साहाॽ सेसेबा पोङ्सिॽ, खे़ब्याङ् कुमे़ल्लुङ् हुङ्माआङ् खे़ङ्हाॽ थे़ॽमा सुक्मे़न्दे़त्ने़न्॥’” 34 यहवे दाङ्बे़ल्ले़ इस्राइलिहाॽरे़ खुनिॽ लागि सिनै कोःक्माओ मोसान् पिरुबा इङ्जाङ्हाॽ हाबा कन्हाॽएरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.