ले़बि 26 - लिम्बुइङ्जाङ्हाॽ इःप्मा नाःप्माल्ले़ के़धाबा मुॽइसाम्हाॽ ( साम्यो इङ् ७:१२-२४ , २८:१-१४ ) 1 यहवे दाङ्बे़ल्ले़ पाःत्तुॽ, “‘खिनिॽ आबाङे लागि नावाइत्लाहाॽ मे़जोगे़म्सिम्मिन्ने़ॽ॥ हे़क्क्याङ् आबाङे लागि कुभा खोःम्मना लक्मनाबा नावाइत्ला इग्र सेसे लुङ्हाॽ मे़ये़प्से़म्सिम्मिन्ने़ॽ, हे़क्क्याङ् खोःम्मना लक्मनाबा लुङ्हाॽ खिनिॽ लाजेॽओ मे़ये़प्से़म्सिम्मिन्ने़ॽआङ् से़वा मे़प्मासिरे़ लागि साम्बोन् मे़बत्छे़म्मिन्ने़ॽ॥ आङ्गाॽ यहवे दाङ्बा खिनिॽ निङ्वाॽफुमाङ्आ॥ 2 खिनिॽ आङ्गाॽ आसाबाथ ये़न्निन् ने़त्ते़म्मे़ॽ, हे़क्क्याङ् आङ्गाॽ आसेसेदे़न्निन् मिङ्सो इङ्धाङ् पिरे़म्मे़ॽ॥ आङ्गाॽ यहवे दाङ्बाआ॥ 3 “‘आङ्गाॽ आधिम्हाॽ कुइसिक् खिनिॽ के़वयिआङ् आङ्गाॽ आइङ्जाङ्हाॽ के़इःत्तुम् के़नाःत्तुम्ने़भग्र 4 चाहा के़जोःक्पा ये़म्मो आङ्गाॽ वहित् थार याःन्दुङ्ॽ, खे़ब्याङ् इक्ताप् लाजेॽओ पोगुगे़न् कुजा थोक्, हे़क्क्याङ् प्याङ्सि इक्ताप्पोबा सिङ्सेॽबुङ्हाॽओ कुजाॽ थोक्॥ 5 चे़ल्ले़क्सेॽ तुप्मा ये़म् थारिक्के खिनिॽ पोगुगे़न् कुजा के़नुगुम् के़धाप्सुम्ॽ, हे़क्क्याङ् कुजा लेःप्मा ये़म् थे़म्बाए चे़ल्ले़क्सेॽ के़सुप्सुम्ॽ॥ खिनिॽ चामा थुङ्मारे़लागि के़साक्पा के़न्दुमुम्मिन्, खम्भ्याङ् लाजेॽओ खिनिॽ हाङ्हाङ् के़बोःक्खिॽ॥ 6 “‘आङ्गाॽ लाजेॽओ सनारुङ् तारुङ्ॽ॥ खिनिॽ के़सोःन्नासिआङ् के़इप्सिॽ, हे़क्क्याङ् खिनिॽ हाःत्ले़आङ् यङ्मा के़न्छे़रिन्ॽ॥ आङ्गाॽ लाजेॽओलाम् मना आजाजाबा थक्साहाॽ खे़त्तुङ्देसुङ्सिङ्ॽ खे़ब्याङ् खिनिॽ लाजेॽओ खेमा थक्मा मे़बोङ्ने़न्॥ 7 खिनिॽ आप्फेक् निङ्मिहाॽ के़नाःत्तुम्सिम्माङ् ताभेःल्ले़ खल्ले़ःङ् खल्ले़ःङ् के़ले़ःक्खुम्सिम्ॽ॥ 8 खिनिॽ ङासि मनारे़ किप् ङासि नु किप् थिक् मनारे़ हे़न्छिङ् थिबोङ् मनाहाॽ के़नाःत्तुम्सिम्ॽ॥ खिनिॽ निङ्मिहाॽ खिनिॽ ताभेःल्ले़ खल्ले़ःङ् खल्ले़ःङ् ले़ःक्खुसिॽ॥ 9 आङ्गाॽ खिनिॽ मुॽइसाम् पिनिङ्ॽ, हे़क्क्याङ् खिनिॽ के़नुरि के़दासिर याःन्निङ्ङाङ् के़बोःन्दिर चोःक्निङ्ॽ, खे़ब्याङ् आङ्गाॽ चोगुङ्बा माङ्हुप्पिन् खिनिॽनु योधो मे़म्बोङ्ङे चोगुङ्ॽ॥ 10 खिनिॽ के़गत्तुम् के़युक्खुम्बा तगि के़दुम्बा कुजान् के़जाम्ल के़वयिरसाङ् कुसङ् के़दुम्बा कुजा युङ्मादे़न् तङ्मारे़ लागि तगिबा कुजान् खे़प्मा पोङ्ॽ॥ 11 आङ्गाॽ खिनिॽ मे़न्जिःत्ते खिनिॽ लुम्मोए वाॽआ॥ 12 आङ्गाॽ खिनिॽ लुम्मो लाङ्घेःक्कार वाॽआ, हे़क्क्याङ् खिनिॽ निङ्वाॽफुमाङ् पोङ्ङा, खे़ब्याङ् खिनिॽग आङ्गाॽ आमना के़बोःक्खिॽ॥ 13 आङ्गाॽ यहवे दाङ्बा खिनिॽ निङ्वाॽफुमाङ्आ॥ खिनिॽ मिस्रिहाॽरे़ खुन्छिॽ योग्बा के़म्बोःक्खिन्ल फाॽआङ् आङ्गाॽ मिस्रलाम् खिनिॽ लःत्निङ् फे़त्निङ्॥ आङ्गाॽ खिनिॽ के़म्गुःत्तिबा खे़ःप्सिङ्ङिन् ए़क्खुङ्ङाङ् नारा चाङ्जाङ्ङाङ् लाङ्गे़घेःक्पा चोःक्निङ्ङाङ् वाॽरो॥’” इङ्जाङ्हाॽ मे़न्इःप्मे़ल्ले़बा खुम्दिङ्हाॽ ( साम्यो इङ् २८:१५-६८ ) 14 यहवे दाङ्बे़ल्ले़ पाःत्तु, “‘कर खिनिॽ आङ्गाॽ आबाःन्निन् के़ङ्घे़प्सुम्मिन्ॽ, हे़क्क्याङ् कन् के़रे़क् इङ्जाङ्हाॽ के़न्इःत्तुम् के़न्नाःत्तुम्मिन्ॽ, 15 खे़ब्याङ् आङ्गाॽ आधिम्हाॽ के़जिःत्तुम्माङ् के़नाॽरुम्ॽ, हे़क्क्याङ् आङ्गाॽ के़रे़क् आइङ्जाङ्हाॽ के़न्इःत्तुम् के़न्नाःत्तुम्मिन्नाङ् आङ्गाॽ चोगुङ्बा माङ्हुप्पिन् के़भे़ःन्दुम्ने़भग्र, 16 आङ्गाॽ खिनिॽ लुम्मो किमा यङ्मा पोङ्ल चोगुङ्ॽ, खम्भ्याङ् थक्किन् के़मे़ङ्बार के़देॽबा, मिक्किन् मार के़जोःक्पा नु सक्मा मे़न्याक्मनाबा के़जोःक्पार के़देॽबा साॽरिक् किप्मा के़घुबा तुक्माहाॽ पाङ्घुङ् तासुङ्ॽ॥ खिनिॽ के़लेःत्तुम्बा याॽरिःम्बाहाॽ थेनाधेबा पोङ्ॽ, थेआङ्भे़ल्ले़ खिनिॽ निङ्मिहाॽरे़ कुजा के़दुम्बान् मे़जमे़देसु के़म्बिरिॽ॥ 17 आङ्गाॽ खिनिॽ अत्ने़निङ्ॽ, हे़क्क्याङ् खिनिॽ निङ्मिहाॽलाम् हारि के़द्ये़ॽइ॥ खिनिॽ कुनामे़न्छाॽ के़मे़प्पाहाॽरे़ खिनिॽ सम्धाङ् युक् मे़जोगुॽ, खे़ब्याङ् हाःत्ले़आङ् मे़न्नाःत्तेसाङ् खिनिॽ के़घे़त्तासिॽ॥ 18 “‘खिनिॽ आल्लसाङ् आङ्गाॽ आबाःन्निन् के़ङ्घे़प्सुम्मिन्ने़भग्र खिनिॽ लायोल्ले़ नुसिले़ङ् थारिक्नुःल्ले़ यरिक् खुम्दिङ् पिनिङ्ॽ॥ 19 आङ्गाॽ खिनिॽ यम्बा हे़न्छिङ्मान् नु हादिङ् थक्मान् थेनाधेबा चोगुङ्ॽ॥ खिनिॽ सम्धाङ्बा ताङ्साङ्बान् फे़न्जेॽ हे़क्तङ्बा नु खिनिॽ सिगाङ्बा खाम्बेःक्मान् कासा कुइसिक् के़साक्पा चोगुङ्ॽ॥ 20 खिनिॽ मुक्साम्मिन् चासोःक्काङ् पेक्, थेआङ्भे़ल्ले़ खिनिॽ इक्ताप् लाजेॽओ पोगुगे़न् कुजा मे़धोःक्ने़न्ॽ, हे़क्क्याङ् लाजेॽओबा सिङ्सेॽहाॽओ कुजाॽ मे़धोःक्ने़न्॥ 21 “‘खिनिॽ आङ्गाॽ आदक्ले़ङ्वाओ लाङ्गे़घेगिआङ् आल्लसाङ् आङ्गाॽ आबाःन्निन् के़ङ्घे़प्सुम्मिन्ने़भग्र आङ्गाॽ खिनिॽ खोमा के़बोङ्बा लायोल्ले़ खुम्दिङ्ङिन् नुसिलेङ्नुःल्ले़ यरिक् याम्मो तुक्खे लाक्खेहाॽ खिनिॽ सम्धाङ् तारुङ्ॽ॥ 22 आङ्गाॽ खिनिॽ लुम्मो ताम्भुङ् थक्साहाॽ पाङ्घुङ् तासुङ्सिङ्ॽ, खे़ङ्हाॽरे़ खिनिॽ अङे़ःक्वा साहाॽ मे़जसिॽ, हे़क्क्याङ् खिनिॽ पित्थक्साहाॽ मे़मे़क्खुसिॽ, खम्भ्याङ् खे़ङ्हाॽरे़ खिनिॽ साॽरिक् के़सुःन्दिर के़म्जोगिआङ् खिनिॽ लाम्हाॽए चिजि खक्खक् पोङ्ल यारिक् खे़ङ्हाॽ साॽरिक् यरिक् मे़बोःन्ॽ॥ 23 “‘कन्हाॽ के़रे़क् पोङ्ङाङ्साङ् खिनिॽ आङ्गाॽ ले़प्माङ् के़न्नुःक्खिन्ॽ हे़क्क्याङ् आङ्गाॽ आदक्ले़ङ्वाओ हाबा लाङ्गे़घेगिआङ् के़बत्छिने़भग्र, 24 आङ्गाॽ खिनिॽ तक्ले़ङ्वाओ वाॽआ, हे़क्क्याङ् खिनिॽ लायोल्ले़ चोगुल्ले़ आङ्गाॽ नुसिले़ङ् यारिक् खुम्दिङ् पिनिङ्ॽ॥ 25 आङ्गाॽ खिनिॽ सम्धाङ् ते़न्धङ्हाॽ तारुङ्ॽ, हे़क्क्याङ् आङ्गाॽ चोगुङ्बा माङ्हुप्पिन् के़भेःन्दुम्बाल्ले़ कुले़क्वा नुःक्तुङ्ॽ॥ खिनिॽ आप्फेक् आप्फेक् ये़क्यक्हाॽओ के़जुप्सिॽ, आङ्गाॽ खे़प्मोआङ् खिनिॽ लुम्मो तुक्मा लाःक्मा पाङ्घुङ्ॽ, खे़ब्याङ् खिनिॽ निङ्मिहाॽरे़ खुन्छिॽ हुक्को के़ध्ये़ॽइ॥ 26 आङ्गाॽ खिनिॽ पोगुगे़न् कुजाहाॽ साॽरिक् सुःल्लिक् चोगुङ् पिनिङ्ॽ खे़न् कुजान् लत्छा हिम्मोबा मिहाःत्लुङ्ङो थिबोङ् हिम्मोबा मे़न्छुमाहाॽरे़ मे़धोःक्तुॽ, हे़क्क्याङ् मे़धोःक्तुआङ् मे़हासुल्ले़ हाःत्ताङ् खाघा मे़दे़क्तुन्ॽ॥ 27 “‘कन्हाॽ के़रे़क् पोङ्ङाङ्साङ् खिनिॽ आङ्गाॽ आबाःन्निन् के़ङ्घे़प्सुम्मिन् हे़क्क्याङ् आङ्गाॽ आदक्ले़ङ्वाओ लाङ्घेःक्मा के़ल्ले़रुम्मिन्ने़भग्र, 28 आङ्गाॽ आसिक् पोःक्मो खिनिॽ तक्ले़ङ्वाओ पोःक्का, खे़ब्याङ् खिनिॽ लायोल्ले़ चोगुल्ले़ खिनिॽ नुसिले़ङ् यारिक् खुम्दिङ् पिनिङ्ॽ॥ 29 खिनिॽ आबाङे ये़म्बित्छा मे़न्छुमासाहाॽरे़ खुन्छिॽ ने़क्सान् चामा के़बोङ्बा पोङ्ॽ॥ 30 आङ्गाॽ खिनिॽ थे़गु माङ्वाओ के़जोगुम्बा माङ्धाःन्हाॽ मे़क्खुङ् पिनिङ्ॽ, आङ्गाॽ खिनिॽ सुक्पा हाःम्मा ले़त्ति तोःम्मादे़न्हाॽ लुःन्दुङ् पिनिङ्ॽ, हे़क्क्याङ् खिनिॽ चेहाॽ खिनिॽ कुसिवे़त् नावाइत्लाहाॽ सम्धाङ् लाप्फेसुङ्ॽ, खम्भ्याङ् खिनिॽ नाॽनिङ्ॽ॥ 31 आङ्गाॽ खिनिॽ ये़क्यक्हाॽ मुरे़क् खारे़क् चोगुङ् पिनिङ्ॽ, हे़क्क्याङ् खिनिॽ साम्योबादे़न्हाॽ चिजि खक्खक् चोगुङ् पिनिङ्ॽ, खे़ब्याङ् आङ्गाॽ खिनिॽ कुनाम्गे़नुॽबा सिदुङ्जभान् मे़दाःक्कान्॥ 32 आङ्गाॽ लाजेन् खाप्पुथ्यःङ् चोगुङ्ॽ॥ कन्हाॽ के़रे़क् मे़निसुआङ् खे़प्मो के़युङ्बा खिनिॽ निङ्मिहाॽ यङ्मा के़त्॥ 33 आङ्गाॽ चाए खिनिॽ मे़न्छाम् सुवाङ्हाॽरे़ खुन्छिॽ लुम्मो फुत्छिङ्ज्याङ् से़निङ्देनिङ्ॽ, हे़क्क्याङ् ताभेन् तरप् फिःक्खुङ्ङाङ् नाःत्निङ्ॽ॥ खिनिॽ लाजेन् चिजि खक्खक्पा नु खिनिॽ ये़क्यक्किन् मुरे़क् खारे़ःक्पा पोङ्ॽ॥ 34 चिजि खक्खक् पोङ्ङिल्ले़ लाजेःल्ले़ नाःम्सिङ्मा सबाथ तङ्बेहाॽ ने़प्मा खोसुॽ हे़क्क्याङ् खिनिॽग आबाङे निङ्मिहाॽरे़ खुनिॽ लाजेॽओ के़वयिॽ, खे़ब्याङ् आम्भा खे़न् ये़म्मो लाजेन् नाःम्सिङ्ङाङ् सबाथहाॽ ने़त्तुॽ॥ 35 आक्ख्यारिक् ये़न् खे़न् चिजि खक्खक् पोङ्ङाङ् ने़ःॽ लाजेःल्ले़ नाःम्सिङ्मा खोसुॽ॥ खिनिॽ खे़प्मो के़युङिल्ले़ सबाथ्हाॽओ के़घोसुम्बा नाःम्सिङ्मान् खे़ल्ले़ खोसुॽ॥ 36 “‘निङ्मिहाॽरे़ खुन्छिॽ लाजेॽओ के़वाॽबा के़याःक्पा मनाहाॽरे़ खुन्छिॽ लुङ्माॽसोःम्मिन् चाॽरिक् के़गिबा चोगुङ् पिरुङ्सिङ्ॽ, ते़त्लाफे़क्वा मक्थाबा इक्लाधिक् मे़घे़प्सुसाङ् खे़ङ्हाॽ निङ्मिहाॽरे़ मे़नाःत्तुसिबा हे़क्के मे़लोक्॥ खे़ब्याङ् खे़ङ्हाॽ कुभारे़ ताभेःल्ले़ से़प्मासिरे़ लागि नाःत्तुसिबा कुसिङ् पुबेलाप्सा मे़घे़त्छिङ् मे़बेक् हे़क्क्याङ् हाःत्ले़आङ् मे़नाःत्तुसिन्छाङ् खे़ङ्हाॽ खाम्बाङ्ङो लरे़ःङ्भरे़ःङ् मे़जोन्ॽ॥ 37 हाःत्ले़आङ् मे़नाःत्तुसिन्छाङ् ताभेःल्ले़ मे़नाःत्तुसिबा कुइसिक् खे़ङ्हाॽ मे़लोक् हे़क्क्याङ् थिक्ले़ कुसम्धाङ् थिक् मे़दोःक्ल मे़गे़ङ्ॽ॥ कल्ले़चोगुल्ले़ खिनिॽ निङ्मिहाॽरे़ खुन्छिॽ तगि ये़प्मा के़न्छुक्तिन्ॽ॥ 38 मे़न्छाम् सुवाङ्हाॽरे़ खुन्छिॽ लुम्मो खिनिॽ के़मे़गिॽ, हे़क्क्याङ् खिनिॽ निङ्मिहाॽरे़ खुन्छिॽ लाजेःल्ले़ खिनिॽ मिङ् मासु के़बिरिॽ॥ 39 के़दाङ्बा के़याःक्पाहाॽ निङ्मिहाॽरे़ खुन्छिॽ लाजेॽओ आबाङे नु आबाङे पाधे़बाहाॽरे़ खुन्छिॽ फे़न्याःम्बक्किल्ले़ चोगुल्ले़ मे़मे़क्ल मे़बेक्॥ 40 “‘कर खे़ङ्हाॽरे़ आबाङे नु खुन्छिॽ पाधे़बाहाॽरे़ खुन्छिॽ लायोन्, हे़क्क्याङ् आङ्गाॽ आदक्ले़ङ्वाओ खे़ङ्हाॽरे़ इङ्ले़क्को थामा याःम्बक् मे़जोगुबा फे़न्याःम्बक्किन् नु खे़ङ्हाॽरे़ आङ्गाॽनु निङ्मि मे़जोगे़बा पाःन्निन् पाःप्मा मे़दे़न्ने़भग्र— 41 खे़ल्ले़ आङ्गाॽ खे़ङ्हाॽरे़ खुन्छिॽ निङ्मि पोःक्खाङ्, हे़क्क्याङ् आङ्गाॽ खे़ङ्हाॽ खुन्छिॽ निङ्मिहाॽरे़ लाजेॽओ पाङ्घुङ्सिङ्ने़भग्र—खे़ङ्हाॽरे़ खुन्छिॽ पाःन्मे़ङ्घे़म्मनाबा निङ्वान् नःम्नःम्बा मे़जोगुआङ् खुन्छिॽ लायोल्ले़ कुले़क्वा खुम्दिङ्ङिन् मे़दुमुने़भग्र, 42 याकुब, इसहाक हे़क्क्याङ् अब्राहाम्मिन्नु चोगुङ्बा माङ्हुप्पिन् हे़क्क्याङ् खे़न्नु सोसोरिक् खे़न् लाजेःन्नाङ् आङ्गाॽ निङ्वाॽ इःत्तुङ्ॽ॥ 43 खे़न् लाजेन् खे़ङ्हाॽरे़ मे़ले़रुमे़धआङ् खे़ङ्हाॽ मेःन्ने चिजि खक्खक् पोङ्ङाङ्ने़ःल्ले़ लाजेःल्ले़ सबाथहाॽ ने़प्मा खोसुॽ॥ हे़क्क्याङ् खे़ङ्हाॽरे़ खुन्छिॽ फे़न्याःम्बक्किल्ले़ कुले़क्वा खुम्दिङ् मे़दुमुॽ, खे़न् खुम्दिङ्ङिन् आङ्गाॽ आसाम्यो थिम्मिन् मे़नाॽरुबा नु आधिम्मिन् मे़जिःत्तुबाल्ले़ चोगुल्ले़ आङ्गाॽ खे़ङ्हाॽ खुम्दिङ् पिरुङ्सिङ्ङाङ् वये़॥ 44 कन्हाॽ के़रे़क् मे़जोगुसाङ् आल्ल खे़ङ्हाॽ निङ्मि लाजेॽओ मे़वाॽइल्ले़ आङ्गाॽ नाॽरुङ्सिङ्बा नु अत्तुङ्सिङ्बाओ खे़ङ्हाॽ युम्रे़क्क मे़मे़ङ्ङासिङ्ङिन्, हे़क्क्याङ् आङ्गाॽ चोगुङ्बा माङ्हुप्पिन्नाङ् मे़ले़ङ्ङाङ्॥ आङ्गाॽ यहवे दाङ्बा खे़ङ्हाॽरे़ खुन्छिॽ निङ्वाॽफुमाङ्आ॥ 45 कर आङ्गाॽ खे़ङ्हाॽनु खुनिॽ लागि चोगुङ्बा खे़ङ्हाॽरे़ खुन्छिॽ पाधे़बाहाॽनु चोगुङ्बा माङ्हुप्पिन् निङ्वाॽ इःत्तुङ्ॽ॥ आङ्गाॽ खे़ङ्हाॽरे़ खुन्छिॽ निङ्वाॽफुमाङ् पोङ्मारे़ लागि खे़ङ्हाॽरे़ खुन्छिॽ पाधे़बाहाॽ मे़न्छाम् सुवाङ्हाॽरे़ खुन्छिॽ तगि मिस्रलाम् लःत्तुङ् फे़त्तुङ्सिङ्ङाङ् मे़वये़॥ आङ्गाॽ यहवे दाङ्बाआ॥’” 46 सिनै कोःक्माओ यहवे दाङ्बे़ल्ले़ खुने़ॽ नु इस्राइलिहाॽरे़ खुन्छिॽ लुम्मो खुने़ॽ मोसान् लाम्बा इस्राइलिहाॽ पिरुसिबा थिम्हाॽ नु इङ्जाङ्हाॽ हाबा कन्हाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.