ले़बि 25 - लिम्बुनुसिगेक्पा तङ्बे 1 सिनै कोःक्माओ यहवे दाङ्बे़ल्ले़ मोसान् मे़त्तु, 2 “खे़ने़ॽ इस्राइलिहाॽ अक्खे मे़त्ते़से़ॽ—‘आङ्गाॽ खिनिॽ पिनिङ्बा लाजेॽओ खिनिॽ के़गे़रिआङ् लाजेःल्ले़आङ् यहवे दाङ्बे़ल्ले़ कुलागि लत्छा सबाथ ने़त्तुर॥ 3 तङ्बे तुक्सि खिनिॽ इक्ताप्पो कुजा हेॽरे़म्मे़ॽ॥ तङ्बे तुक्सि खिनिॽ चे़ल्ले़क्सेॽ इक्ताप्हाॽ साःक्ते़म्मे़ॽ, हे़क्क्याङ् खे़ल्ले़ कुजाॽहाॽ फुक्खे़म्मे़ॽ॥ 4 कर नुसिगेक्पा तङ्बेओ लाजेःल्ले़ लागि नाःम्सिङ्मा सबाथ पोङ्ल—यहवे दाङ्बे़ल्ले़ कुलागि लत्छा सबाथ पोङ्ल॥ नुसिगेक्पा तङ्बेओ खिनिॽ प्याङ्सिओ कुजा मे़लेःत्ते़म्मिन्ने़ॽ, चे़ल्ले़क्सेॽ इक्ताप्पिन् मे़साःक्ते़म्मे़ॽ, 5 खिनिॽ के़दुम्बा कुजाओ आप्फेक् के़लिङ्बा कुजान् मे़हे़गे़म्मिन्ने़ॽ, मे़न्छाःक्के के़युङ्बा चे़ल्ले़क्सेॽइल्ले़ कुजाॽहाॽ मे़सुप्से़म्मिन्ने़ॽ॥ लाजेःल्ले़ लागि तङ्बे थिक् खे़न् कुनाःम्सिङ्मा पोङ्ल॥ 6 खे़न् लाजेःल्ले़ कुनाःम्सिङ्मा तङ्बेओ के़धोःक्पा कुजाःन्ने खिनिॽ लागि, खिनिॽ योग्बा योःग्मा, से़वारोबा सेवारोमा, खिनिॽनु सोरिक् के़युङ्बा वेॽ लाजेॽबा मनाहाॽ, 7 खिनिॽ थक्साहाॽ, हे़क्क्याङ् लाजेॽओबा ताम्भुङ् थक्साहाॽरे़ लागि चामा कुजा पोङ्ॽ॥ खे़न् तङ्बेओ लाजेॽबा के़रे़क् के़धोःक्पा कुजान् के़जाम्साङ् नुॽरो॥ साम्म्याङ् तङ्बे 8 “‘खिनिॽ आबाङे लागि नुसि सबाथबा तङ्बेहाॽ नुसिले़ङ् निरे़म्मे़ॽ, खे़न् के़रे़क्ले़ लिबोङ्ङाङ् फाङ्सि तङ्बे पोङ्ॽ॥ 9 हे़क्क्याङ् नुसिगेक्पा लाओबा थिबोङ् ये़न्नो साॽरिक् लागे़इक्पा सादाङ्ङिन् मुःप्मा पाङ्घाम्सिम्मे़ॽ॥ लायोल्ले़ लागि ले़प्मि नाःक्मा ये़न्नो खिनिॽ लाजेॽ के़रे़क् खे़न् सादाङ्ङिन् मुःप्मा पाङ्घाम्सिम्मे़ॽ॥ 10 ङाबोङ्बा तङ्बेन् खिनिॽ सेसेबा चोगे़म्मे़ॽ, हे़क्क्याङ् लाजेॽ के़रे़क्पा यक्युङ्बाहाॽरे़ लागि चोःक्युम्भो उवा चोगे़म्मे़ॽ॥ खे़न् खिनिॽ लागि साम्म्याङ् तङ्बे पोङ्ॽ, खे़ब्याङ् के़रे़क् मनाहाॽ आबाङे खुन्छिॽ लाजेॽसिङ्बुङ् नु हिम्सयङ्हाॽओ मे़नुःङ्ल॥ 11 खे़न् ङाबोङ् तङ्बेन् खिनिॽ लागि साम्म्याङ् तङ्बे पोङ्ॽ॥ खे़न् तङ्बेओ खिनिॽ थे़माआङ् मे़लेःत्ते़म्मिन्ने़ॽ, हे़क्क्याङ् आप्फेक् के़लिङ्बा कुजाहाॽ मे़हे़गे़म्मिन्ने़ॽ, मे़न्छाःक्केबा चे़ल्ले़क्सेॽइल्ले़ कुइवाःत्हाॽलाम् चे़ल्ले़क्सेॽहाॽ मे़दुबे़म्मिन्ने़ॽ॥ 12 थेआङ्भे़ल्ले़ कङ्ग साम्म्याङ् तङ्बेरो॥ खे़न् खिनिॽ लागि सेसे पोङ्ल॥ प्याङ्सिओ आप्फेक् के़लिङ्बा कुजाहाॽ खे़न् तङ्बेओ खिनिॽ के़जाम्ॽ॥ 13 “‘खे़न् साम्म्याङ् तङ्बेओ के़रे़क् मनाहाॽ आबाङे खुन्छिॽ लाजेॽओ मे़नुःङ्ल॥ 14 “‘आप्फेक् हिम्बेसाङ्बे़न्नु लाजेॽसिङ्बुङ् सङ्मा इङ्मा याःम्बक् के़जोगुम्मिल्ले़ थिक्ले़ वेॽइन् मे़न्वाॽमनाबा मे़मे़त्तासिम्मिन्ने़ॽ॥ 15 साम्म्याङ् तङ्बे एगाङ् याङ्सिबा तङ्बेहाॽ निरे़म्मे़ॽ हे़क्क्याङ् खिनिॽ हिम्बेसाङ्बान्नु लाजेॽसिङ्बुङ् इङे़म्मे़ॽ, खे़ब्याङ् ताःन्दि के़दाबा साम्म्याङ् तङ्बे थारिक्ले़ लाजेॽओ के़धोःक्पा कुजान् सिःक्तुर कुमे़न् हे़न्दुआङ् खुने़ॽ खिनिॽओ सङ्घुर॥ 16 कुजा थोःक्मा आल्लसाङ् यरिक् तङ्बे वाॽने़भग्र, हे़म्भ्यारिक्के यरिक् कुमे़न् फोसे़म्मे़ॽ, हे़क्क्याङ् सुःल्लिक् तङ्बेरक् याःक्ते़आङ् वाॽने़भग्र खे़म्म्याक्के खिनिॽ कुमे़न्निन् सुःल्लिक् चोगे़म्मे़ॽ, थेआङ्भे़ल्ले़ खे़न् तङ्बेहाॽओ के़धोःक्पा कुजाहाॽए खिनिॽओ सङ्घुबारो॥ 17 आप्फेक् हिम्बेसाङ्बे़न्नु लाजेॽसिङ्बुङ् सङ्मा इङ्मा याःम्बक् के़जोगुम्मिल्ले़ थिक्ले़ वेॽइन् मे़न्वाॽमनाबा मे़मे़त्तासिम्मिन्ने़ॽ॥ कर निङ्वाॽफुमाङ्ङिन्नु खिनिॽ किसे़म्मे़ॽ, थेआङ्भे़ल्ले़ आङ्गाॽ यहवे दाङ्बा खिनिॽ निङ्वाॽफुमाङ्आरो॥ नुसिगेक्पा तङ्बेओ के़साक्पा याःम्बक् 18 “‘खिनिॽ आङ्गाॽ आसाम्यो थिम्हाॽ नु आधिम्हाॽ इःत्ते़म् नाःत्ते़म्मे़ॽआङ् खे़ङ्हाॽ के़त्ते़म्मे़ॽ॥ खे़ब्याङ् खिनिॽ खे़न् लाजेॽओ ताप्थेक् याम्धेक् के़बोःक्खिॽ॥ 19 लाजेःल्ले़ पोगुगे़न् कुजा फत्छु के़बिरिॽ, हे़क्क्याङ् चामा थुङ्मारे़लागि खिनिॽ तुक्खे के़न्ज्ये़ॽइन्, खे़म्ब्याङ् लाजेओ खिनिॽ निङ्वाॽ तुक्खे मे़न्जाए युङ्मा के़घोसिॽ॥ 20 “कुजा मे़न्हेॽए, कुजा मे़न्छुम्मे नुसिगेक्पा तङ्बेओ आनिगे थे़माःन् चाम्बे़बे?” लॽरिक् खिनिॽ के़बाःत्तुम्ने़भग्र, 21 तुक्सिगेक्पा तङ्बेओ आङ्गाॽ खिनिॽ हाङ्वागे़न् मुॽइसाम् पिनिङ्ॽ, हे़क्क्याङ् लाजेॽओ तङ्बे सुम्सिबा पोगुगे़न् कुजा थोक्॥ 22 ये़त्छिगेक्पा तङ्बेओ कुजा के़लेःत्तुम्मिल्ले़, तगि के़धोःक्पा कुजान् चे़म्मे़ॽर वये़म्मे़ॽ॥ फाङ्सिगेक्पा तङ्बेओ कुजा मे़न्दुम्मे थारिक् खिनिॽ खे़न् तगिबा कुजाःन्ने चे़म्मे़ॽर वये़म्मे़ॽओ॥ याङ्साकुन्धे नुःक्मा थिम् 23 “‘लाजेन् सदादिङ्ले़ लागि सिॽयाक् मे़सङ्घे़म् मे़देसे़म्मिन्ने़ॽ॥ थेआङ्भे़ल्ले़ लाजेःङ्ग आङ्गाॽइन्लो॥ खिनिॽग वेॽ लाजेॽबा नु वे़प्मिबा के़बोःक्खिआङ् आङ्गाॽनु के़युङिर के़वयिॽ॥ 24 खिनिॽ युक्को के़दाबा लाजेन् कुन्दाङ्बे़ल्ले़ याम्मो थे़ॽमा खोसुर याःन्दे़म्मे़ॽ॥ 25 “‘याङ्साॽमारे़ चोगुल्ले़ हिम्बेसाङ्बाहाॽओ कुभारे़ आबाङे कुलाजेॽ सिङ्बुङ्ङोबा कुभा कुलक् सङ्मा के़बोङ्बा पोःक्खे़ने़भग्र, खे़ल्ले़ कुनिःत्ताङ्बा कुगाॽइन् ताआङ् खे़न् थे़ॽरुर॥ 26 कर कुभारे़ कम्भलॽरिक् के़धे़ॽबा के़बिबा हाःत्ताङ् होप् हे़क्क्याङ् खे़न् ताःन्दि याङ्साकुन्धेसाबा पोङ्ङाङ् थे़ॽमा के़सुक्पा पोङ्ने़भग्र, 27 खुने़ॽ खे़न् लाजेन् सङ्घुबा तङ्बेहाॽ निरुर, हे़क्क्याङ् आत्तिन् मनाओ सङ्घुआङ् वये़ खे़न् तामा के़वाॽबा तङ्बेहाॽओ के़धोःक्पा कुजाःल्ले़ कुमे़ल्लुङ्ङिन् नुःक्तु पिरुर॥ हे़क्क्याङ् खुने़ॽ आप्फेक् कुलाजेॽओ नुःङ्ल॥ 28 कर खुने़ॽ आप्फेक् थे़ॽमा मे़सुक्तुन्ने़भग्र साम्म्याङ् तङ्बे थारिक् खे़न् लाजेॽ के़इङ्बे़ल्ले़ कुहुक्कोए ने़र॥ खे़ब्याङ् साम्म्याङ् तङ्बेओ खे़न् नुःक्तुर॥ खे़न् एगाङ् खे़न् मनान् आप्फेक् कुलाजेॽ सिङ्बुङ्ङो पेःक्मा सुक्॥ 29 “‘कुभारे़ लुङ्धाक् कब्रिङ् से़प्मनाबा ये़क्यक्को के़युङ्बा कुहिम्मिन् सङ्घुने़भग्र, सङ्घुबा तङ्बे थिक्ले़सा खुने़ॽ खे़न् थे़ॽमा खोसुॽ॥ खे़ल्ले़ हे़क्के चोःक्मा युक् तङ्बेधिक् थारिक् खोसुॽ॥ 30 कर तङ्बेधिक्ले़ खे़न् थे़ॽमा मे़सुक्तुन्ने़भग्र के़इङ्बान् नु खुने़ॽ याङ्सिबा कुस्सा कुएहाॽरे़ लागि खे़न् हिम्मिन् आभे़ल्ले़साङ् के़वाॽबा याङ्साकुन्धे पोङ्ल॥ साम्म्याङ् तङ्बेओआङ् खे़न् मे़नुःङ्ने़न्॥ 31 कर लुङ्धाक्किल्ले़ कब्रिङ् मे़ङ्गप्पेबा पाङ्भेॽहाॽओबा हिम्मिन् लाजेॽओबा वेॽ लाजेॽसिङ्बुङ् हे़क्तङ्बा इःत्ते़म्मे़ॽ॥ खे़ङ्हाॽग थे़ॽमा सुक्ते़त्, हे़क्क्याङ् साम्म्याङ् तङ्बेओ खे़न् नुःक्मा सुक्ते़त्॥ 32 “‘ले़बि थाःक्हाॽरे़ खुन्छिॽ युक्कोबा आबाङे ये़क्यक्हाॽओ के़ने़बा हिम्हाॽ खे़ङ्हाॽरे़ आप्फाल्ले़साङ् थे़ॽमा मे़सुक्तुॽ॥ 33 ले़बि थाःक्कोबा युक्को के़ने़बा ये़क्यक्हाॽओ कुभा ले़बिःल्ले़ खुने़ॽ आबाङे सङ्घुबा हिम्मिन् नुःक्मा मे़सुक्तुन्ने़भग्र साम्म्याङ् तङ्बेओ खे़न् हिम्मिन् खुने़ॽ मे़नुःक्तु मे़बिरुर, थेआङ्भे़ल्ले़ ले़बिहाॽरे़ खुन्छिॽ ये़क्यक्हाॽओ के़ने़बा हिम्हाॽग इस्राइलओ खे़ङ्हाॽरे़ खुन्छिॽ पालाम्बाबा याङ्सा कुन्धेरो॥ 34 कर खे़ङ्हाॽरे़ खुन्छिॽ ये़क्यक् लाकात्पा थक्सा चाराम्मादे़न्हाॽ सङ्मादेमा मे़ङ्घोसुन्ॽ, थेआङ्भे़ल्ले़ खे़न् थक्सा चाराम्मादे़न्हाॽ खे़ङ्हाॽरे़ खुन्छिॽ सदादिङ्बा याङ्सा कुन्धेरो॥ याङ्गे़साॽबाहाॽरे़ लागि सिङ्नात् 35 “‘खिनिॽ इस्राइलि फुॽनुसाॽहाॽओ कुभाॽ साॽरिक् याङ्गे़साॽबा पोङ्ङाङ् आबाङे कम्ब्राङ् मे़त्छिङ्मा मे़सुक्ने़न्ने़भग्र, खिनिॽए वेॽ लाजेॽबा तरेबे़न् कम्ब्राङ् के़मे़त्तुम्बा कुइसिक् खे़न् फाॽरे़म्मे़ॽ, हे़क्क्याङ् खुने़ॽ खिनिॽनु युङ्मा वाॽमा खोसुर॥ 36 खे़न् सिङ्नात् के़बिरुम्मिल्ले़ इन्धा इग्र याङ्ङिल्ले़ कुस्सा मे़जे़म्मिन्ने़ॽ॥ खिनिॽ आबाङे निङ्वाॽफुमाङ्ङिन्नु किसे़म्मे़ॽ, हे़क्क्याङ् खिनिॽ फुॽनुसाॽहाॽ खिनिॽनु सोरिक् मे़युङ् मे़वाॽर॥ 37 कुस्सा चामारे़ लागि खिनिॽ खे़न् याङ् मे़बिराम्मिन्ने़ॽ॥ खिनिॽ के़बिरुम्बा चामा कुजाःन्नुःल्ले़ यरिक् खुने़ॽलाम् मे़दाःक्ते़म्मिन्ने़ॽ॥ 38 कनान लाजेन् खिनिॽ पिमारे़ लागि नु खिनिॽ निङ्वाॽफुमाङ् पोङ्मारे़ लागि मिस्र लाजेॽलाम् खिनिॽ के़लःप्पा के़भे़प्पा आङ्गाॽ यहवे दाङ्बा खिनिॽ निङ्वाॽफुमाङ्ए़रो॥ योग्बा योःग्माहाॽरे़ खुन्छिॽ चोःक्युम्भो 39 “‘खिनिॽ कुभा इस्राइलि फुॽनुसाॽहाॽ साॽरिक् याङ्गे़साॽबा मे़बोःक्खे़बाल्ले़ चोगुल्ले़ खुन्छिॽ आप्फेक् खिनिॽ हुक्को मे़सङ्सिङ्ने़भग्र खे़ङ्हाॽ योक् कुइसिक् खे़न् याःम्बक्को मे़भत्छे़म्सिम्मे़न्ने़ॽ॥ 40 खे़न् खिनिॽनु नाम्याक् खोमारे़ लागि इग्र वेॽ लाजेॽबा तरेबा कुइसिक् पोङ्ङाङ् युङ्ल, हे़क्क्याङ् साम्म्याङ् तङ्बे थारिक् खिनिॽनु वाॽआङ् खे़ल्ले़ खिनिॽ याःम्बक् चोगु के़बिरिर॥ 41 खे़न् एगाङ् खे़न् नु खुने़ॽ कुस्साहाॽ खिनिॽनु मे़से़न्नाङ् खुन्छिॽ हिम्सयङ्हाॽओ नु याङ्साकुन्धेओ मे़नुःङ्ल॥ 42 थेआङ्भे़ल्ले़ आङ्गाॽ मिस्रलाम् लःत्तुङ् फे़त्तुङ्सिङ्बा खे़ङ्हाॽ आङ्गाॽ आसे़वारोबा आसे़रोमासिरो॥ खे़ङ्हाॽ योग्बा योःग्मा हे़क्के खे़ङ्हाॽ सङ्मासि मे़नुॽने़न्॥ 43 खिनिॽ खे़ङ्हाॽ साॽरिक् ताप्फे़ःल्लिक् मे़मे़त्ते़म्सिम्मिन्ने़ॽ, कर खिनिॽ निङ्वाॽफुमाङ्ङिन्नु किसे़म्मे़ॽ॥ 44 “‘खिनिॽ योग्बा योःग्मा चाहा के़जोगिने़भग्र खिनिॽ कब्रिङ् पिसाङ्बा सुवाङ्हाॽओलाम् इङे़म् तारे़म्से़ॽ॥ 45 खिनिॽनु के़युङ्बा वेॽ लाजेॽबा नु खिनिॽ लाजेॽओ सागे़वाःन्छिङ्बा खे़ङ्हाॽरे़ खुन्छिॽ साएहाॽआङ् खिनिॽ इङ्मासिआङ् आप्फेक् खिनिॽ याङ्साकुन्धे चोःक्मा के़सुक्तुम्सिम्ॽ॥ 46 खे़न् योग्बा योःग्माहाॽ लक्खोमा कुइसिक् खिनिॽ मुॽइदाङ्साहाॽ पिमा के़सुक्तुम्सिम्ॽ॥ हे़क्केलॽरिक् खे़ङ्हाॽरे़ खुन्छिॽ हिङ्हिङ् खिनिॽ साहाॽ याःम्बक् मे़जोगु मे़बिरुसिर, कर खे़ङ्हाॽरे़ ताप्फे़ःल्लिक् मे़प्मासिआङ् युक्को कप्मासि मेःन्॥ 47 “‘खिनिॽ लुम्मो के़युङ्बाआङ् याङ्साकुन्धेसाबा के़बोङ्बा वेॽ लाजेबा इग्र वे़प्मिबाल्ले़ किग्र खे़ल्ले़ कुहिम्सयङ्ङिल्ले़ कुहुक्को खिनिॽ कुभा याङ्गे़साॽबा फुॽनुसाॽइन् आबाङे सङ्सिङ्ङाङ् वाॽने़भग्र, 48 खे़न् के़सङ्सिङ्बान् थे़ॽमा सुक्ते़त्॥ खुने़ॽए कुन्साॽ कुगाॽइहाॽओबा कुभारे़ खे़न् थे़ॽमा मे़सुक्तुॽ॥ 49 खे़ल्ले़ए कुम्भङा, कुम्भुॽ कुन्साॽ, इग्र कुभा निःत्ताङ्बा कुगाॽइ के़धाप्पा कुभारे़ खे़न् थे़ॽरुर॥ मेःन्छाङ् खे़ल्ले़ ताःन्दि सुक्तुने़भग्र खुने़ॽ आप्फेक् थे़ॽसिङ्ल॥ 50 खे़न् मनान् कुन्दाङ्बो सङ्सिङ्बा तङ्बेआङ्धो साम्म्याङ् तङ्बे थारिक्पा ये़म्हाॽ खे़न् के़सङ्सिङ्बे़न् नु खुने़ॽ के़इङ्बा कुन्दाङ्बा ने़प्माङ्ले़ निःत्छुर॥ नाम्याक्को फम्मनाबा मनाःल्ले़ खोसुबा कुनाम्याक् कुइसिक् खे़न् तङ्बेहाॽओबा नाम्याक्किन् हुङुआङ् खुने़ॽ कुन्दाङ्बे़न्नु आबाङे थे़ॽसिङ्ल॥ 51 याम्मो युक्सिङ्बा तङ्बे तामा यरिक् ये़म् वाॽने़भग्र, खुने़ॽ मे़इङुबा के़रे़क् मे़ल्लुङ्ङिन् निःप्माआङ् चोःक्युम्भो खोमारे़ लागि यरिक् खे़ल्ले़ मे़ल्लुङ्ङिन् नुःक्तु पिरुसिर पोङ्ॽ॥ 52 याम्मो युक्सिङ्बा तङ्बे तामा आजे़ःत्छिक्लक् ये़म् वाॽने़भग्र, खुने़ॽ मे़इङुबा के़रे़क् मे़ल्लुङ्ङिन् निःप्माआङ् चोःक्युम्भो खोमारे़ लागि खे़ल्ले़ मे़ल्लुङ्ङिन् नुःक्तु पिरुसिर पोङ्ॽ॥ 53 नाम्याक् खोमारे़ लागि याःम्बक् के़जोःक्पा से़वारोबा कुइसिक् वेॽ लाजेबा कुन्दाङ्बे़न्नु खे़न् वाॽर पोङ्ॽ॥ हे़क्क्याङ् खिनिॽ इस्राइलिहाॽरे़ खे़न् वेॽ लाजेबा मनाःल्ले़ खुने़ॽ ताप्फे़ःल्लिक् मे़प्माआङ् युक्मा मे़भाःक्ते़म्मिन्ने़ॽ॥ 54 कन् पाःन्हाॽ लाम्माङ् खे़ल्ले़ चोःक्युम्भो मे़घोसुन्ने़भग्र, खे़न् खुने़ॽ कुस्साहाॽनु सोसोरिक् साम्म्याङ् तङ्बेओ लःन्नाङ् पेःक्ल॥ 55 इस्राइलबा मनाहाॽ वेॽहाॽरे़ खुन्छिॽ मनासि मेःन् कर खे़ङ्हाॽग आङ्गाॽए आमनासिआङ् आसे़वारोबासिरो॥ आङ्गाॽए खे़ङ्हाॽ मिस्रलाम् लःत्तुङ् फे़त्तुङ्सिङ्॥ आङ्गाॽ यहवे दाङ्बा खे़ङ्हाॽरे़ खुन्छिॽ निङ्वाॽफुमाङ्आरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.