ले़बि 24 - लिम्बुसेमियुङ्दे़न्हाॽ याङ्याङ् मे़प्मा 1 यहवे दाङ्बाल्ले़ मोसान् मे़त्तु, 2 “इस्राइलिहाॽ अक्खेलॽरिक् इङ्जाङ् पिरे़से़ॽ—‘सेमिहाॽ आभे़ल्ले़साङ् हाॽरुआङ् युङ्ल फाॽआङ् ओःत्तिःल्ले़ लागि युमनाबा सेसे चैतुन निःङ्गेॽ इसेःङ्बा निःङ्गेॽ तारे़म्मे़ॽ॥’ 3 तुम्मादे़न् साःङ्गाहिम्मो तोःन्दि पिमा फोःन्दाःल्ले़ लाःक्कात् ले़प्माङ् यहवे दाङ्बे़ल्ले़ कुदगिलाम् युःन्छिक्काङ्धो तानाम् थारिक् हारुने़ल्ले़ खे़न् सेमिहाॽ ओमे़त्तु चोगुर॥ कन् खिनिॽ थाःक्थाःक्को थारिक् आप्फाल्ले़साङ् सदादिङ्बा थिम् पोङ्ल॥ 4 खे़ल्ले़ यहवे दाङ्बे़ल्ले़ कुदगि चक्मे़ल्लॽए साम्म्याङ् इसेःङ्बा सेमियुङ्दे़न्नो के़युङ्बा सेमिहाॽ ओमे़त्तु चोगुररो॥ यहवे दाङ्बाओ तोःम्मनाबा खरे़ःङ् 5 “थिबोङ्ङाङ् ने़त्छि किलो चुन्जुम्बा फेॽरुम् याङ्सिङ्ङे़ॽ हे़क्क्याङ् किलो थिक् थिक्ले़न् थिबोङ्ङाङ् ने़त्छि खरे़ःङ् ले़ःक्खे़ॽ॥ 6 थे़ःक्पे़त् पे़न्बे़न् तुक्सि तुक्सि कुदिःक्ला ने़त्छि चोगे़ॽआङ् यहवे दाङ्बे़ल्ले़ कुदगि के़युङ्बा साम्म्याङ् इसेःङ्बा चप्ते़न्नो पे़न्छ़े ने़स्से़ॽ॥ 7 लत्छा लत्छा कुदिःक्लाओ सुत्थोबा सुक्पा याक्ते़ॽ, हे़क्क्याङ् खे़न् खरे़ःङ्ङिल्ले़ निङ्वाॽसोक् कुइसिक् मिओलाम् यहवे दाङ्बाओ तोःम्मनाबा खरे़ःङ् पोङ्ल॥ 8 सबाथ थक्मा यहवे दाङ्बाल्ले़ कुदगि खे़न् खरे़ःङ्हाॽ आप्फाल्ले़साङ् युङ्मा पोङ्ॽ॥ इस्राइलिहाॽरे़ खुन्छिॽ लागि कन् सदादिङ्बा माङ्हुप् पोङ्ल॥ 9 हारुन नु खुने़ॽ कुस्साहाॽरे़ लागि, हे़क्क्याङ् खे़ङ्हाॽरे़ सेसेदे़न्नो खे़न् मे़जरो, थेआङ्भे़ल्ले़ यहवे दाङ्बे़ल्ले़ कुलागि मिओलाम् तोःम्मनाबा सिदुङ्जभाहाॽओ खे़ङ्हाॽरे़ खुन्छिॽ खोमा लक्किन् साॽरिक् सेसेबा चोक्लो॥” कुदोःप्मा खासे़न् नु के़लाॽबा खुम्दिङ्ङिल्ले़ कुबि 10 मिस्रि ये़म्बित्छा नु इस्राइलि मे़न्छुमाःल्ले़ खुन्छि ये़म्बित्छा साधिक् इस्राइलिहाॽरो पेआङ् वये़॥ खे़न् इस्राइलि मे़न्छुमाःल्ले़ कुस्सान् नु लत्छा इस्राइलि ये़म्बित्छान् साःङ्गाहिम्हाॽओ खुन्छिॽ ने़त्छि आबाङे खे़माॽ चोगे़त्छि॥ 11 खे़न् इस्राइलि मे़न्छुमाःल्ले़ कुस्साःल्ले़ सेसे मिङ्ङिन् साङ्ग्रा मे़त्तुर चे़ॽया इङ्दो मे़प्मा हेःक्तु, हे़क्क्याङ् मनाहाॽरे़ खे़न् मोसाओ मे़दारु॥ खे़ल्ले़ कुम्मारे़ कुमिङ् सलोमित वये़॥ खे़न् दान थाःक्कोबा दिब्रिरे़ कुस्सा मे़न्छुमा वये़॥ 12 यहवे दाङ्बे़ल्ले़ कुनिङ्वान् खे़ङ्हाॽरे़ निङ्वाॽ मे़ङ्घोए थारिक् खे़न् मे़साक्तु मे़गत्तु॥ 13 खे़ब्याङ् यहवे दाङ्बे़ल्ले़ मोसान् मे़त्तु, 14 “खे़न् माङ्दे साङ्ग्रा के़बाःप्पा मनान् साःङ्गाहिम्मोलाम् लाःक्कात् तेॽरे़ॽ, हे़क्क्याङ् खे़ल्ले़ पाःत्तुबा पान् के़घे़म्बा के़रे़क्ले़ खुन्छिॽ हुक्हाॽ खे़ल्ले़ कुधे़गेःक्पो मे़ने़स्सुर॥ खे़न् एगाङ् के़रे़क् सङ्जुम्भोहाॽरे़ खुने़ॽ लुङ्ङिल्ले़ मे़ले़प्तु मे़से़रुर॥ 15 खे़ने़ॽ इस्राइलिहाॽ अक्खे मे़त्ते़से़ॽ, ‘आत्तिल्ले़ आबाङे कुनिङ्वाॽफुमाङ्ङिन् माङ्दे साङ्ग्रा मे़त्तुॽ, खे़ल्ले़ खुने़ॽ कुलायोल्ले़ खुम्दिङ् खोसुॽ॥ 16 यहवे दाङ्बे़ल्ले़ कुमिङ्ङिन् चे़ॽया इङ्दो के़मे़प्पा मनान् के़रे़क् सङ्जुम्भोहाॽरे़ लुङ्ङिल्ले़ मे़ले़प्तु मे़से़रुर॥ आबाङे लाजेॽसाबा इग्र वेॽ लाजेॽबा हाःत्छाङ्, खे़ल्ले़ यहवे दाङ्बाल्ले़ कुमिङ्ङिन् चे़ॽया इङ्दो मे़त्तुने़भग्र खे़न् से़प्माए पोङ्ॽ॥ 17 “‘कुभा मना के़से़प्पा मनान् से़प्माए पोङ्ॽ॥ 18 थक्सा के़से़प्पा मनाःल्ले़ कुले़क्वा थक्सा कुले़क्वा हुङुर पोङ्ॽ॥ 19 कुभा मनाःल्ले़ खुने़ॽ आबाङे कुहिम्बेसाङ्बाल्ले़ कुधक्किन् खाःन्दुने़भग्र, खे़ल्ले़ आक्खे चोगुआङ् वाॽ खुने़ॽ हे़क्केलॽरिक्के खाःम्मा पोङ्ॽ॥ 20 ये़त् के़ए़ङ्बे़ल्ले़ कुये़त्ते़न् एङ्माए पोङ्ॽ, मिक्किल्ले़ कुले़क्वा मिक्, हाबोॽबाल्ले़ कुले़क्वा हाबोॽबा, आक्खेलॽरिक् खे़ल्ले़ वेॽइल्ले़ कुधक्किन् खाःन्दु खुने़ॽआङ् हे़क्केए मे़प्मा पोङ्ॽ॥ 21 थक्सा के़से़प्पाल्ले़ खे़ल्ले़ कुले़क्वा हुङुर पोङ्ॽ॥ कर मना के़से़प्पान् चाए से़प्माए पोङ्ॽ॥ 22 लाजेॽसाबा नु वेॽ लाजेॽबा मनाःल्ले़ लागि लत्छा परिक्पा कुभाङ् पोङ्मा पोङ्ॽ॥ आङ्गाॽ यहवे दाङ्बा खिनिॽ निङ्वाॽफुमाङ्आ॥’” 23 मोसाःल्ले़ इस्राइलिहाॽ कन् पाःन्निन् मे़त्तुसिआङ् एगाङ् खे़ङ्हाॽरे़ खे़न् माङ्दे साङ्ग्रा के़बाःप्पान् साःङ्गाहिम् लाःक्कात् मे़देॽरुआङ् लुङ्ङिल्ले़ मे़ले़प्तु मे़से़रु॥ कम्भलॽरिक् यहवे दाङ्बे़ल्ले़ मोसान् इङ्जाङ् पिरुबा कुइसिक् इस्राइलिहाॽरे़ मे़जोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.