ले़बि 23 - लिम्बुसाम्योबा तङ्नाम्हाॽ 1 यहवे दाङ्बाल्ले़ मोसान् मे़त्तु, 2 “खे़ने़ॽ इस्राइलिहाॽ अक्खे मे़त्ते़से़ॽ—‘सेसे चुम्लुङ् कुइसिक् खिनिॽ उवा चोःक्मा के़बोङ्बा यहवे दाङ्बे़ल्ले़ निःन्धो चोगुबा तङ्नाम्हाॽ हाबा कन्हाॽरो॥ सबाथ नाःम्सिङ्मा ये़न् 3 “‘तुक्सि ये़न् थारिक् याःम्बक् मे़जोःक्ल, कर नुसिगेक्पा ये़न्नोग नाःम्सिङ्मा, सबाथ लत्छा सेसे चुम्लुङ् ये़न् पोङ्ल॥ खे़ल्ले़ याःन्दिक् खिनिॽ आत्तिन् परिक्ले़न्नाङ् याःम्बक् मे़जोगे़म्मिन्ने़ॽ॥ खिनिॽ आत्ति के़वयि के़युङिसाङ् खे़ङ्ग यहवे दाङ्बे़ल्ले़ कुसाबाथ ये़न्लो॥ चोःक्युम्भो नु सिदाॽ मे़न्याक्केबा खरे़ःङ्ले़न् तङ्नाम् ( खानिःत् २८:१६-२५ ) 4 “‘कुदोक् के़बोङ्बा ये़म्मो खिनिॽ उवा चोःक्मा के़बोङ्बा यहवे दाङ्बे़ल्ले़ निःन्धो चोगुबा तङ्नाम्हाॽ, इग्र सेसे चुम्लुङ्हाॽ कन्हाॽएरो॥ 5 “‘थिक्सिगेक्पा लाओबा थिबोङ्ङाङ् लिसिगेक्पा ये़न् युःन्छिक् यहवे दाङ्बे़ल्ले़ कुलागि तोमा के़बोङ्बा चोःक्युम्भो तङ्नाम्मिन् हेःक्सिङ्ॽ॥ 6 हाबा खे़न् लाओबा थिबोङ्ङाङ् ङासिगेक्पा ये़न्नो यहवे दाङ्बे़ल्ले़ कुलागि के़भङ्बा सिदाॽ मे़न्याक्केबा खरे़ःङ् चामा तङ्नाम्मिन् हेःक्सिङ्ॽ॥ नुसि ये़न् थारिक् खिनिॽ के़भङ्बा सिदाॽ मे़न्याक्के खरे़ःङ् चाम्मे़ॽ॥ 7 थिक्सिगेक्पा ये़न्निन् सेसे चुम्लुङ् पोङ्ल॥ खे़ल्ले़ याःन्दिक् खिनिॽ थिक्याःन्धक्पा चोःक्मा के़बोङ्बा याःम्बक् मे़जोगे़म्मिन्ने़ॽ॥ 8 नुसि ये़न् थारिक् खिनिॽ यहवे दाङ्बे़ल्ले़ कुलागि मिओ तोःम्मा के़बोङ्बा मिधिङ्मनादेमनाबा सिदुङ्जभा तोःन्दे़म्मे़ॽ॥ हे़क्क्याङ् नुसिगेक्पा ये़न्नो सेसे चुम्लुङ् पोङ्ल॥ खे़न् ये़न्नो खिनिॽ थिक्याःन्धक् चोःक्मा के़बोङ्बा याःम्बक् मे़जोगे़म्मिन्ने़ॽ॥’” 9 यहवे दाङ्बे़ल्ले़ मोसान् मे़त्तु, 10 “इस्राइलिहाॽ अक्खे मे़त्ते़से़ॽ—‘आल्ल आङ्गाॽ खिनिॽ पिनिङ्बा लाजेॽओ के़गे़रिॽ खे़ब्याङ् खे़प्मोबा के़दुम्बा कुजान् के़हे़गुम्मिल्ले़ खिनिॽ लागि नुबा पोङ्ल फाॽआङ् थिक्सिगेक्पा कुधःङ्माधिक् निङ्वाॽफुसाम्बाओ तारे़म्मे़ॽ॥ 11 निङ्वाॽफुमाङ्ङिल्ले़ खे़न् ताःक्तुबा पोङ्मारे़ लागि खे़न् मनाःल्ले़ खे़न् चाधःङ्मान् यहवे दाङ्बे़ल्ले़ कुदगि खे़न् थाःङ् पक्खुर॥ सबाथ ये़न्निल्ले़ कुदाःन्दिक्मा निङ्वाॽफुसाम्बे़ल्ले़ खे़न् थाःङ् पक्खुर॥ 12 खे़न् चाधःङ्मान् थाःङ् पङ्मा ये़न्नो यहवे दाङ्बे़ल्ले़ कुलागि मिधिङ्मनादेमनाबा सिदुङ्जभारे़ लागि तङ्बेधिक् के़गे़प्पा मे़ङ्गाःम्मनाबा लत्छा थुःम्बा खिनिॽ तोःन्दे़म्मे़ॽ॥ 13 खे़न्नु सोरिक्पा पोगुगे़न् कुजा सिदुङ्जभान् यहवे दाङ्बाल्ले़ कुलागि लत्छा कुनाम्गे़नुॽबा, मिओलाम् तोःम्मनाबा सिदुङ्जभा कुइसिक् निःङ्गेॽओ सॽमनाबा चुन्जुम्बा किलो ने़त्छि फेॽरुम् के़दोःन्दुम्ल पोङ्ॽ॥ कुवा सिदुङ्जभाःङ्ग लितर थिक् चे़ल्ले़क्सेॽ सेजःङ्वा के़दोःन्दुम्ल पोङ्ॽ॥ 14 खिनिॽ कन् सिदुङ्जभान् आप्फेक् यहवे दाङ्बे़ल्ले़ कुलागि के़न्दारुम्मिल्ल थारिक् खरे़ःङ्, नमनाबा कुजा नु कुरेःत्ला चादाप्मा थे़माआङ् मे़जाम्मिन्ने़ॽ॥ खिनिॽ आत्ति के़युङि के़वयिसाङ् खिनिॽ थाःक्थाःक्को थारिक् कन् आप्फाल्ले़साङ् के़वाॽबा थिम् पोङ्लरो॥ ये़त्नाम्हाॽओबा तङ्नाम् ( खानिःत् २८:२६-३१ ) 15 “‘सबाथ कुदाःन्दिक्माआङ्धो, इग्र खिनिॽ थाःङ् के़भोक्खुम्बा सिदुङ्जभा चाधःङ्मान् के़दारुम्बा ये़न्नाङ्धो नुसि ये़त्नाम् खिनिॽ निरे़म्मे़ॽ, 16 इग्र नुसिगेक्पा सबाथआङ्धो कुदाःन्दिक्मा थारिक् ङाबोङ् ये़न् निरे़म्मे़ॽ॥ हाबा खे़न् ये़न्नो यहवे दाङ्बे़ल्ले़ कुलागि तगि के़दुम्बा कुजा सिदुङ्जभान् खिनिॽ तोःन्दे़म्मे़ॽ॥ 17 खिनिॽ आबाङे हिम्मोनु किलो ने़त्छि चुन्जुम्बा फेॽरुम्लाम् के़जोगुम्बा नु के़भङ्बा सिदाॽ के़याक्तुम्माङ् के़ले़ःङ्सुम्बा खरे़ःङ् ने़त्छि यहवे दाङ्बे़ल्ले़ कुलागि तगि के़दुम्बा पोगुगे़न् कुजा सिदुङ्जभा कुइसिक् पक्खे़म्मे़ॽ॥ 18 खे़न् खरे़ःङ्हाॽनु सोसोरिक् तङ्बेधिक् के़गे़प्पा मे़ङ्गाःम्मनाबा नुसि थुःम्बा नु लत्छा से़गम्बा हे़क्क्याङ् थुःम्बा ने़त्छि मिधिङ्मनादेमनाबा वयागे़न् सिदुङ्जभा हे़क्के तोःन्दे़म्सिम्मे़ॽ॥ खे़ङ्हाॽनु सोरिक्पा पोगुगे़न् कुजा सिदुङ्जभा नु चे़ल्ले़क्सेॽ सेजःङ्वा सिदुङ्जभाःन्नाङ् यहवे दाङ्बाल्ले़ कुलागि मिओलाम् तोःम्मनाबा कुनाम्गे़नुॽबा मिधिङ्मनादेमनाबा सिदुङ्जभा पोङ्ल॥ 19 खे़न् एगाङ् खिनिॽ लायोलाम् ले़प्मि खोमा सिदुङ्जभाःल्ले़ लागि लत्छा मे़ःन्दबका नु तङ्जुम् सिदुङ्जभारे़ लागि तङ्बेधिक् के़गे़प्पा थुःम्बा ने़त्छि तोःन्दे़म्सिम्मे़ॽ॥ 20 निङ्वाॽफुसाम्बे़ल्ले़ यहवे दाङ्बे़ल्ले़ कुदगि, तगि के़दुम्बा कुजाःल्ले़ खरे़ःङ्ङिन्नु सोसोरिक् थाःङ् पङ्मनाबा सिदुङ्जभाःल्ले़ लागि मे़ल्लुक् ने़त्छि थाःङ् पक्खुसिर॥ निङ्वाॽफुसाम्बाल्ले़ कुलक् पोङ्मारे़ लागि यहवे दाङ्बे़ल्ले़ कुलागि खे़न् सेसे सिदुङ्जभा पोङ्ल॥ 21 खे़न् ये़न्निन् सेसे चुम्लुङ् फाॽआङ् खिनिॽ उवा चोगे़म्मे़ॽ॥ खे़ल्ले़ याःन्दिक् खिनिॽ थिक्याःन्धक् चोःक्मा के़बोङ्बा याःम्बक्हाॽ मे़जोगे़म्मिन्ने़ॽ॥ खिनिॽ आत्ति के़वयिसाङ् थाःक्थाःक्ले़ लागि खे़न् आप्फाल्ले़साङ् के़वाॽबा थिम् पोङ्ल॥ 22 “‘खिनिॽ आबाङे लाजेॽओ प्याङ्सिगे़न् इक्ताप्पोबा कुजान् के़हे़गुम्मिल्ले़ प्याङ्सिगे़न् इक्ताप्पिल्ले़ कुयाहाॽ वरे़ङ्ले़ङ् मे़हे़गे़म्मिन्ने़ॽ॥ खिनिॽ पोगुगे़न् कुजाःल्ले़ के़माबा के़याःक्पा सिलाहाॽ मे़भुक्खे़म्मिन्ने़ॽ॥ खे़न् कुजाहाॽ याङ्गे़साॽबा नु वेॽ लाजेॽबा मनाहाॽरे़ लागि ले़रे़म्धे़म्मे़ॽ॥ आङ्गाॽ यहवे दाङ्बा खिनिॽ निङ्वाॽफुमाङ्आरो॥’” सादाङ् मुःप्मा तङ्नाम्हाॽ ( खानिःत् २९:१-६ ) 23 यहवे दाङ्बे़ल्ले़ मोसान् मे़त्तु, 24 “खे़ने़ॽ इस्राइलिहाॽ अक्खे मे़त्ते़से़ॽ—‘नुसिगेक्पा लाःल्ले़ थिक्सिगेक्पा ये़न्नो खिनिॽ लागि लत्छा के़ये़क्पा नाःम्सिङ्मा ये़न् पोङ्ल॥ खे़ल्ले़ याःन्दिक् निङ्वाॽसोक्ले़ लागि सादाङ्ङिन् मुःत्ते़म्मे़ॽआङ् सेसे चुम्लुङ् चोगे़म्मे़ॽ॥ 25 खिनिॽ खे़ल्ले़ याःन्दिक् थिक्याःन्धक् चोःक्मा के़बोङ्बा याःम्बक्किन् मे़जोगे़म्मिन्ने़ॽ, कर यहवे दाङ्बे़ल्ले़ कुलागि मिओलाम् तोःम्मनाबा मिधिङ्मनादेमनाबा सिदुङ्जभा तोःन्दे़म्मे़ॽओ॥’” लायोलाम् सुत्थो पोङ्मा ये़न् ( खानिःत् २९:७-११ ) 26 यहवे दाङ्बे़ल्ले़ मोसान् मे़त्तु, 27 “नुसिगेक्पा लाओबा थिबोङ्गेक्पा ये़न्निन् लायोल्ले़ लागि ले़प्मि नाःक्मा ये़न् पोङ्ल॥ खे़ल्ले़ याःन्दिक् खिनिॽ सेसे चुम्लुङ् चोगे़म्मे़ॽ॥ खिनिॽ आबाङे नाॽआसिम्मे़ॽ, हे़क्क्याङ् यहवे दाङ्बे़ल्ले़ कुलागि खिनिॽ मिधिङ्मनादेमनाबा सिदुङ्जभा तोःन्दे़म्मे़ॽ॥ 28 यहवे दाङ्बा खिनिॽ निङ्वाॽफुमाङ्ङिल्ले़ कुदगि खिनिॽ लागि लायोलाम् ले़प्मि नाःक्मा याःम्बक् पोङ्ङिल्ले़ याःन्दिक् खिनिॽ आत्तिन् परिक्ले़न्नाङ् याःम्बक् मे़जोगे़म्मिन्ने़ॽ, थेआङ्भे़ल्ले़ खिनिॽ लागि खे़न् लायोलाम् ले़प्मि नाःक्मा ये़न्लो॥ 29 खे़ल्ले़ याःन्दिक् आत्तिन् आबाङे नाॽसिङ्मा मे़दे़न्ने़न्, खे़न् खुने़ॽ कुमनाहाॽलाम् मे़लःत्तु मे़देसुर॥ 30 खे़ल्ले़ याःन्दिक् कुभा परिक्पा याःम्बक् के़जोःक्पा मनान् खुने़ॽ कुमनाहाॽरे़ खुनिॽ लुम्मोलाम् आङ्गाॽ मे़क्खुङ्ॽ॥ 31 खिनिॽ आत्तिन् परिक्ले़न्नाङ् याःम्बक् मे़जोगे़म्मिन्ने़ॽ॥ खिनिॽ आत्ति के़युङि के़वयिसाङ् खिनिॽ थाःक्थाःक्ले़ लागि कन् सदादिङ्बा थिम् पोङ्ल॥ 32 खिनिॽ लागि कन् लत्छा के़ये़क्पा नाःम्सिङ्मा ये़न् सबाथ पोङ्ल, हे़क्क्याङ् खिनिॽ ये़न्नो कुजा थेआङ् मे़जाम्मिन्ने़ॽ॥ खे़न् लाओबा फाङ्सिगेक्पा ये़न्नोबा युःन्छिक्काङ्धो कुदाःन्दिक्मा युःन्छिक् थारिक् सबाथ ये़न्निन् खिनिॽ इःत्ते़म् नाःत्ते़म्मे़ॽओ॥” तक्तक्वा हिम्ले़न् तङ्नाम् ( खानिःत् २९:१२-४० ) 33 यहवे दाङ्बे़ल्ले़ मोसान् मे़त्तु, 34 “खे़ने़ॽ इस्राइलिहाॽ अक्खे मे़त्ते़से़ॽ—‘नुसिगेक्पा ला थिबोङ्ङाङ् ङासिगेक्पा ये़न्नाङ्धो नुसि ये़न् थारिक् यहवे दाङ्बाल्ले़ कुलागि तक्तक्वा हिम् याःक्मा तङ्नाम् पोङ्ल॥ 35 खे़ल्ले़ याःन्दिक्पा थिक्सिगेक्पा ये़न्नो सेसे चुम्लुङ् पोङ्ल॥ खे़ल्ले़ याःन्दिक् खिनिॽ थिक्याःन्धक् चोःक्मा के़बोङ्बा याःम्बक् मे़जोगे़म्मिन्ने़ॽ॥ 36 नुसि ये़न् थारिक् यहवे दाङ्बे़ल्ले़ कुलागि खिनिॽ मिओलाम् तोःम्मनाबा सिदुङ्जभा तोःन्दे़म्मे़ॽ॥ ये़त्छिगेक्पा ये़न्नो खिनिॽ सेसे चुम्लुङ् चोगे़म्मे़ॽ, हे़क्क्याङ् यहवे दाङ्बे़ल्ले़ कुलागि खिनिॽ मिओ तोःम्मनाबा लत्छा सिदुङ्जभा तोःन्दे़म्मे़ॽ॥ कन् सुप्मनाबा चुम्लुङ्लो॥ खिनिॽ थिक्याःन्धक् चोःक्मा के़बोङ्बा याःम्बक् मे़जोगे़म्मिन्ने़ॽ॥ 37 (“‘सेसे चुम्लुङ् कुइसिक् खिनिॽ उवा चोःक्मा के़बोङ्बा यहवे दाङ्बे़ल्ले़ कुदोक् के़बोङ्बा तङ्नाम्हाॽ हाबा कन्हाॽरो॥ कन् ये़न्हाॽओ मिओलाम् कन् सिदुङ्जभाहाॽ तोःन्दे़म्मे़ॽ—कन् तङ्नाम्हाॽओ यहवे दाङ्बे़ल्ले़ कुलागि खिनिॽ मिओलाम् तोःम्मा के़बोङ्बा मिधिङ्मनादेमनाबा सिदुङ्जभा, पोगुगे़न् कुजा सिदुङ्जभा, वयागे़न् सिदुङ्जभा नु सेजःङ्वा सिदुङ्जभाहाॽ तोःम्मा के़बोङ्बा ये़न्नो तोःन्दे़म्मे़ॽ॥ 38 यहवे दाङ्बे़ल्ले़ कुसबाथ, खिनिॽ मिक्तोक्हाॽ, के़जोगुम्बा माङ्हुप्हाॽ नु आबाङे निङ्वाॽलाम् यहवे दाङ्बे़न् के़बिरुम्बा सिदुङ्जभाहाॽनुःल्ले़ कन्हाॽ वेॽ पोङ्मा पोङ्ॽ॥) 39 “‘नुसिगेक्पा लाओबा थिबोङ्ङाङ् ङासिगेक्पा ये़न्नो आबाङे खिनिॽ लाजेॽओबा सिङ्सेॽहाॽ के़सुप्सुम्माङ् एगाङ् खिनिॽ नुसि ये़न् थारिक् यहवे दाङ्बे़ल्ले़ कुलागि कन् तङ्नाम्मिन् तोसे़म्मे़ॽ॥ थिक्सिगेक्पा ये़न्निन् नु ये़त्छिगेक्पा ये़न्निङ्ग नाःम्सिङ्माए के़बोङ्बा ये़न्लो॥ 40 थिक्सिगेक्पा ये़न्नो सिङ्सेॽहाॽरे़ नुबा नुबा कुजाॽहाॽ, खे़बक्सिङ्ङिल्ले़ कुबोराक्हाॽ, यरिक् कुभे़क्वा के़बप्पा सिङ्बोराःक्हाॽ, नु पिपोरे़ल्ले़ कुबोराक्हाॽ याङ्ङासिम्मे़ॽआङ् यहवे दाङ्बा खिनिॽ निङ्वाॽफुमाङ्ङिल्ले़ कुदगि नुसि ये़न् थारिक् ये़ये़ लॽरे़म्मे़ॽ॥ 41 तङ्बेरे़ खिनिॽ नुसि ये़न् थारिक् यहवे दाङ्बे़ल्ले़ कुलागि कन् तङ्नाम्मिन् तोसे़म्मे़ॽ॥ कन् खिनिॽ थाःक्थाःक्ले़ लागि आप्फाल्ले़साङ् के़वाॽबा थिम् पोङ्ल॥ नुसिगेक्पा लाओ खिनिॽ कन् तोसे़म्मे़ॽ॥ 42 नुसि ये़न् थारिक् खिनिॽ के़रे़क् इस्राइलिहाॽ तक्तक्वा हिम्हाॽओ युङे़म्मे़ॽ॥ के़रे़क् लाजेॽसाबा इस्राइलिहाॽग तक्तक्वा हिम्हाॽओ मे़युङ्ल, 43 हे़क्क्याङ् आङ्गाॽ इस्राइलिहाॽ मिस्रलाम् लःत्तुङ् फे़त्तुङ्सिङ्ङिल्ले़ खे़ङ्हाॽ तक्तक्वा हिम्हाॽओ याङ्धोःक्मा पाङ्घुङ्सिङ्ङाङ् वयाङ् फाॽआङ् खिनिॽ याङ्सिबा मुॽइदाङ्साहाॽरे़ निङ्वाॽ मे़घोसुर॥ आङ्गाॽ यहवे दाङ्बा खिनिॽ निङ्वाॽफुमाङ्आ॥’” 44 कम्भलॽरिक् मोसाःल्ले़ इस्राइलिहाॽ यहवे दाङ्बाओ कुदोक् के़बोङ्बा तङ्नाम्हाॽ तोमा इङ्जाङ् पिरुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.