ले़बि 22 - लिम्बुसुत्थोबा सिदुङ्जभा 1 यहवे दाङ्बे़ल्ले़ मोसान् मे़त्तु, 2 “हारुने़न् नु खुने़ॽ कुस्साहाॽ अक्खे मे़त्ते़से़ॽ—‘इस्राइलिहाॽरे़ आङ्गाॽ आलागि मे़दोन्दुआङ् सिदुङ्जभा मे़जोगुबा सुत्थोबा सिदुङ्जभाहाॽ खिनिॽ इङ्धाङ् पिरे़म्मे़ॽ, हे़क्क्याङ् आङ्गाॽ आसेसे मिङ्ङिन् फे़त्मे़लाःन्दे़म्मिन्ने़ॽ॥ आङ्गाॽ यहवे दाङ्बाआ॥’ 3 “खे़ने़ॽ खे़ङ्हाॽ मे़त्ते़से़ॽ—‘खिनिॽ आत्तिन् थाःक्कोबासाङ् कुभा आसुत्थो निङ्वाॽफुसाम्बान् इस्राइलिहाॽरे़ मे़दोन्दुआङ् सिदुङ्जभा मे़जोगुबा सुत्थो सिदुङ्जभाहाॽरे़ कुबेसाङ् पेःक्ने़भग्र, खे़न् आङ्गाॽ आबेसाङ्लाम्बा लःप्मादेमा पोङ्ॽ॥ आङ्गाॽ यहवे दाङ्बाआ॥ 4 “‘हारुने़ल्ले़ कुस्साहाॽओबा कुभा आत्तिन्छाङ् होरिक्पो याङ्घेःक् लःम्मा नु वायुमा तुक्मे़ल्ले़ तरुआङ् वाॽने़भग्र, खे़न् सुत्थो मे़म्बोङ्ङे थारिक् सुत्थोबा सिदुङ्जभाहाॽओबा थे़माआङ् कुजा खे़ल्ले़ मे़जने़न्ल॥ चे के़सुबा, से़मे़वा वायुमा तुक्मे़ल्ले़ के़याङ्बान् के़सुबा, 5 इग्र के़उःङ्सिङ्बा मुन्जिङ् वयाक् के़लॽबा थक्सान् इग्र आसुत्थो मना इग्र आसुत्थो पान् थेःल्ले़साङ् खुने़ॽ आसुत्थो चोगुॽ॥ 6 खे़न् मनान् युःन्छिक् थारिक् आसुत्थो पोङ्ल पोङ्ॽ॥ खुने़ॽ वामे़ल्लुःम्सिङ्ङे थारिक् सुत्थोबा सिदुङ्जभाहाॽ मे़जने़न्ल॥ 7 नाम्धाआङ्लक् खुने़ॽ सुत्थो पोङ्ॽ॥ खे़न् एगाङ् खुने़ॽ सुत्थो सिदुङ्जभाहाॽ चामा सुक्तुॽ, थेआङ्भे़ल्ले़ खे़ङ्ग खुने़ॽ कुजामारो॥ 8 आप्फेक् के़सिबा इग्र ताम्भुङ् थक्साःल्ले़ थे़ःक्खु से़रुबा थक्सान् खे़ल्ले़ मे़जने़न्ल॥ हे़क्क्याङ् खुने़ॽ खे़न् चआङ् आबाङे आसुत्थो मे़जोःक्सिङ्ङिन्ल॥ आङ्गाॽ यहवे दाङ्बाआ॥ 9 “‘निङ्वाॽफुसाम्बाहाॽरे़ आङ्गाॽ आइङ्जाङ्हाॽ मे़इःत्तु मे़नाःत्तुर, मेःन्ने़भग्र खे़ङ्हाॽरे़ आङ्गाॽ आधिम्हाॽ मे़नाॽरुबाल्ले़ चोगुल्ले़ खे़ङ्हाॽ आप्तिक्साबा मे़बोङ्ङाङ् मे़सिःॽ॥ खे़ङ्हाॽ सेसे के़जोःक्पा आङ्गाॽ यहवे दाङ्बाआ॥ 10 “‘निङ्वाॽफुसाम्बे़ल्ले़ कुहिम्सयङ्नुःल्ले़ वेॽ आत्तिन् मनाःल्ले़आङ् सुत्थोबा सिदुङ्जभान् मे़जने़न्ल, खे़ब्याङ् निङ्वाॽफुसाम्बे़ल्ले़ कुदरे़बा इग्र कुयाःल्ले़क् से़वारोबाल्ले़आङ् सुत्थोबा सिदुङ्जभान् मे़जने़न्ल॥ 11 कर निङ्वाॽफुसाम्बे़ल्ले़ कुमे़ल्लुङ् हुङुआङ् इङुबा कुयोःग्बा इग्र खुने़ॽ कुहिम्मो सागे़वाःन्छिङ्बा योःग्बाने़भग्र खे़ल्ले़ निङ्वाॽफुसाम्बाल्ले़ कुजामा लक्कोलाम् चःल्ले़ नुॽ॥ 12 निङ्वाॽफुसाम्बे़ल्ले़ कुस्सा मे़न्छुमान् वेॽ थाःक्कोबा कुभा ये़म्बित्छाःन्नु कुमेःक्खिम् पोःक्खे़आङ् वाॽने़भग्र आत्तिन् सुत्थोबा सिदुङ्जभालाम्माङ् खुने़ॽ मे़जने़न्ल॥ 13 कर कुभा निङ्वाॽफुसाम्बे़ल्ले़ कुस्सा मे़न्छुमान् कुये़म्बा के़सिमा मेमेदुमा इग्र मे़नाॽरुमा नु खे़ल्ले़ कुस्सा मे़न्वाॽए खुने़ॽ आप्फेक् कुम्बारे़ कुहिम्मो वाॽने़भग्र, खुने़ॽ हिन्जाॽ वये़बा हे़क्केए खे़ल्ले़ कुम्बा निङ्वाॽफुसाम्बा पोःक्खे़आङ् खोसुबा कुलक्कोलाम् चररो॥ चामा खोमा युक् के़गप्पाहाॽरे़रक् खे़न् मे़जर॥ 14 “‘कुभा मनाःल्ले़ निङ्वाॽ मे़ङ्घोए सुत्थोबा सिदुङ्जभालाम् कुभा थे़माइ चने़भग्र, खे़ल्ले़ कुलक् ङासि योॽमाआङ् खे़न् सुत्थोबा सिदुङ्जभाःल्ले़ कुले़क्वा निङ्वाॽफुसाम्बान् पिरुर॥ 15 इस्राइलिहाॽरे़ यहवे दाङ्बे़न् मे़दोन्दु मे़बिरुबा सेसे सिदुङ्जभाहाॽ निङ्वाॽफुसाम्बाहाॽरे़ आसुत्थो मे़न्जोगुन्ल॥ मनाहाॽ मे़म्बिरुसिन्ल॥ 16 निङ्वाॽफुसाम्बाहाॽरे़ सेसे सिदुङ्जभान् मनाहाॽ मे़म्बिरुन्छिन्ल, मेःन्ने़फग्र खे़न्हाॽरे़ आप्फेक् खुन्छि आप्तिक् नु खुम्दिङ् मे़दारुरो॥ सिदुङ्जभाहाॽ सेसे के़जोःक्पा आङ्गाॽ यहवे दाङ्बाआरो॥’” 17 यहवे दाङ्बे़ल्ले़ मोसान् मे़त्तु, 18 “हारुन, नु खुने़ॽ कुस्साहाॽ हे़क्क्याङ् के़रे़क् इस्राइलिहाॽ मे़त्ते़से़ॽ—‘इस्राइलि इग्र इस्राइलओ के़युङ्बा वेॽ लाजेॽबा मनाःल्ले़ माङ्हे़क् चोगुबा इग्र आबाङे कुनिङ्वाॽ लाम्बाबा मिधिङ्मनादेमनाबा वयागे़न् सिदुङ्जभान् यहवे दाङ्बाओ तोःन्दुल्ले़, 19 निङ्वाॽफुमाङ्ङिल्ले़ खे़न् ताःक्मारे़ लागि पित्, मे़ल्लुक् इग्र मे़ःन्दबकाहाॽलाम् मे़ङ्गाःम्मनाबा कुम्बाबान् तोःन्दुर॥ 20 के़गाःम्बा थक्सा थे़माःन्नाङ् खिनिॽ मे़दोःन्दे़म्मिन्ने़ॽ, थेआङ्भे़ल्ले़ निङ्वाॽफुमाङ्ङिल्ले़ खे़न् मे़दाःक्तुन्ॽ॥ 21 तङ्जुम् वयागे़न् सिदुङ्जभा तोःम्माआङ् यहवे दाङ्बाओ आप्फेक् चोःक्मनाबा माङ्हे़क्किन् के़प्मे़ल्ले़ इग्र आबाङे निङ्वाॽलाम्बाबा सिदुङ्जभान् तोःम्मे़ल्ले़ थक्सा लुप्पो इग्र थक्सा सुम्मोलाम् ताःप्मनाबा थक्सान् निङ्वाॽफुमाङ्ङिल्ले़ ताःक्तुबा पोङ्मारे़ लागि खे़न् मे़ङ्गाःम्मनाबा नु कुलाङ् कुहुक् मे़न्छक्मनाबा पोङ्मा पोङ्ॽ॥ 22 मिक्मे़न्निमनाबा, के़गाःम्बा, कुभुदुक् के़बोङ्बा, से़ःप्मा के़लःम्बा इग्र के़दुम्बा याङ्घेःक् के़बप्पा थक्सान् खिनिॽ यहवे दाङ्बे़ल्ले़ कुलागि मिओ मिधिङ्मनादेमनाबा सिदुङ्जभारे़ लागि ले़त्ति तोःम्मादे़न्नो मे़दोःन्दे़म्मिन्ने़ॽ॥ 23 कुलाङ् के़सक्पा, कुमिक् के़भे़क्पा से़गम्बान् इग्र मे़ल्लुक्किन् चाहे खिनिॽ आबाङे निङ्वाॽलाम्बाबा सिदुङ्जभाओ के़दोःन्दुम्मिल्ले़ पोङ्ॽ॥ कर माङ्हुप् के़जोगुम्बा सिदुङ्जभाओ चाए निङ्वाॽफुमाङ्ङिल्ले़ खे़न् मे़दाःक्तुन्ॽ॥ 24 आत्तिन् थक्साःल्ले़ कुल्धिःम्बान् फे़ङ्मनाबा इग्र यःम्मनाबा, हे़प्मनाबा इग्र चे़रे़बा चोक्, यहवे दाङ्बाल्ले़ कुलागि खे़न् मे़दोःन्दे़म्मिन्ने़ॽ॥ खिनिॽ लाजेॽ के़रे़क् अक्खे चोःक्मा मे़नुॽने़न्॥ 25 कुभा वेॽ लाजेॽबा मनालाम्बाआङ् अक्तङ्बा थक्सा मे़दारे़म्मिन्ने़ॽ हे़क्क्याङ् निङ्वाॽफुमाङ्ङिल्ले़ कुजा कुइसिक् मे़दोःन्दे़म्मिन्ने़ॽ॥ खे़ङ्हाॽओ के़बप्पा कुभुदुक्मा नु के़गाःम्बा कुयोःक्किल्ले़ चोगुल्ले़, खे़ङ्हाॽ खिनिॽ लागि निङ्वाॽफुमाङ्ङिल्ले़ मे़दाःक्तुन्॥’” 26 यहवे दाङ्बे़ल्ले़ मोसान् मे़त्तु, 27 “पित्सात् इग्र मे़ल्लुक् मे़ःन्दाक्किल्ले़ के़धाप्पा कुस्सान् नुसि ये़न् थारिक् खे़न् कुम्मानुए वाॽर॥ ये़त्छिगेक्पा ये़न्नाङ्धो खे़न् मिओलाम् सिदुङ्जभा तोःम्मे़ल्ले़ यहवे दाङ्बे़ल्ले़ खे़न् ताःक्तुबा पोङ्ॽ॥ 28 कुम्मामा पित् इग्र कुम्मामा मे़ल्लुक्किन् खे़ल्ले़ कुस्साःन्नु सोसोरिक् थिक्याःन्ले़ से़प्मासि मेःन्॥ 29 “यहवे दाङ्बे़ल्ले़ कुलागि खिनिॽ नुगे़न् तोःम्मा सिदुङ्जभा के़दोःम्दुम्मिल्ले़ निङ्वाॽफुमाङ्ङिल्ले़ कुधिम्हाॽ कुइसिक् चोगे़म्मे़ॽ हे़क्क्याङ् खुने़ॽ खिनिॽ के़दाःक्तिरो॥ 30 आम्भा खे़ल्ले़ याःन्दिक् खे़न् चे़म्देसे़म्मे़ॽ॥ खे़प्मो के़नम्बा कुभा थे़माआङ् तानाम् थारिक् मे़गत्ते़म्मिन्ने़ॽ॥ आङ्गाॽ यहवे दाङ्बाआ॥ 31 “आङ्गाॽ आइङ्जाङ्हाॽ खिनिॽ इःत्ते़म् नाःत्ते़म्मे़ॽ॥ आङ्गाॽ यहवे दाङ्बाआ॥ 32 आङ्गाॽ सेसे आमिङ्ङिन् खिनिॽ आसुत्थो मे़जोगे़म्मिन्ने़ॽ॥ इस्राइलिहाॽरे़ आङ्गाॽ सेसेबा चोःक्का के़लॽबा पाःन्नो मे़दे़न्ल पोङ्ॽ॥ खिनिॽ सेसे के़जोःक्पा, 33 हे़क्क्याङ् खिनिॽ मुक्साम्दाङ्बा यहवे दाङ्बा पोङ्मारे़ लागि मिस्रलाम् खिनिॽ के़लःप्पा के़भे़प्पा यहवे दाङ्बाआ॥ आङ्गाॽ यहवे दाङ्बाआरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.