ले़बि 21 - लिम्बुनिङ्वाॽफुसाम्बा सुत्थो पोङ्मा थिम् 1 यहवे दाङ्बे़ल्ले़ मोसान् मे़त्तु, “हारुने़ल्ले़ कुस्सा, निङ्वाॽफुसाम्बाहाॽ खे़ने़ॽ अक्खे मे़त्ते़से़ॽ—‘खे़ङ्हाॽरे़ खुन्छिॽ आप्फेक् मनाहाॽ कुभा मे़सिःल्ले़ खिनिॽ कुभारे़ चेःन् मे़सुसे़म्मिन्ने़ॽआङ् आप्फेक् आसुत्थो मे़जोःक्कासिम्मिन्ने़ॽ, 2 आप्फेक् काॽइ के़धाप्पाहाॽरक्, इग्र आप्फेक् मानुदिङ् मा, पानुदिङ् पा, साहाॽ, फुॽनुसाॽ, 3 इग्र हिम्मोए के़वाॽमा मेःक्खिम् मे़म्बोङ्ङेमा माङ्गे़न्ना ने़ॽनुसाॽहाॽरे़ लागि खुने़ॽ आसुत्थो चोःक्सिङ्ल॥ 4 ते़न्धाम् मेःक्खिम्लाम् काॽइ के़धाप्पा कुभारे़ लागिआङ् खे़न् आप्फेक् आसुत्थो चोःक्सिङ्ङाङ् मे़जिःन्छिङ्ङिन्ल॥ 5 “‘मिक्वा मे़गुःल्ले़ निङ्वाॽफुसाम्बाहाॽरे़ खुन्छिॽ थे़गेःक्किन् मे़न्नःक्खुन्ल, खुन्छिॽ मुधोॽहाॽरे़ कुसुक्पाहाॽ मे़न्छाःक्तुन्ल हे़क्क्याङ् खुन्छिॽ थक्किन् मे़ङ्घाःन्दुन्ल॥ 6 खुन्छिॽ निङ्वाॽफुमाङ्ङिल्ले़ कुलागि खे़ङ्हाॽ सेसे मे़युङ्ल, हे़क्क्याङ् खुन्छिॽ निङ्वाॽफुमाङ्ङिल्ले़ कुमिङ्ङिन् कुनामे़न्छाॽ पोङ्ल मे़न्जोगुन्ल, थेआङ्भे़ल्ले़ खे़ङ्हाॽरे़ यहवे दाङ्बे़ल्ले़ कुलागि मिओलाम्बा तोःम्मनाबा सिदुङ्जभा, इग्र निङ्वाॽफुमाङ्ङिल्ले़ कुजान् तोःम्मा याःम्बक् मे़जोगुॽ॥ कल्ले़चोगुल्ले़ खे़ङ्हाॽ सेसे मे़बोङ्ल॥ 7 “‘खे़ङ्हाॽरे़ ये़म्बा हङ्जेना के़बोङ्माआङ् फे़क्के़लाॽमा मे़न्छुमान् इग्र कुये़म्बाःल्ले़ लाप्फेसुमा आत्तिन् मे़न्छुमान्नाङ् मे़न्दारुन्ल, थेआङ्भे़ल्ले़ निङ्वाॽफुसाम्बाहाॽ खुन्छिॽ निङ्वाॽफुमाङ्ङिल्ले़ कुलागि सेसेबा मे़जोक्॥ 8 निङ्वाॽफुसाम्बाहाॽ खिनिॽ सेसेबा लेःत्ताम्सिम्मे़ॽ, थेआङ्भे़ल्ले़ खे़ङ्हाॽरे़ खुन्छिॽ निङ्वाॽफुमाङ्ङिल्ले़ कुजान् तोःम्मा याःम्बक् मे़जोगुॽ, थेआङ्भे़ल्ले़ खिनिॽ सेसेबा के़जोःक्पा आङ्गाॽ, यहवे दाङ्बान्, सेसेबा चोःक्का॥ 9 “‘कुभा निङ्वाॽफुसाम्बे़ल्ले़ कुस्सा मे़न्छुमाःल्ले़ ये़म्बा कोःप्मा के़त्निमा याःम्बक् चोगुआङ् आबाङे आसुत्थो चोःक्सिङ्ने़भग्र, खे़ल्ले़ कुम्बा कुनामे़न्छाॽ मे़त्तुॽ॥ खे़न् मिओ मिमे़धिक्खुर॥ 10 “‘आत्तिन् खुने़ॽ कुम्भुॽकुन्साॽहाॽओ तुम् निङ्वाॽफुसाम्बा पोःक्खे़आङ् वाॽ, हे़क्क्याङ् आत्तिल्ले़ कुधे़गेःक्पो पिमा माङ्थोःक्ना निःङ्गेन् मे़ले़ःक्तुआङ् पत्, खे़ब्याङ् निङ्वाॽफुसाम्बा ताक्फा चाङ् चाङ्मारे़ लागि आत्तिन् लाःत्लाःत् मे़से़न्दुआङ् वाॽ, खुने़ॽ मिक्वाःल्ले़ ते़त्तुबा फाॽआङ् ओसेःन्धाङ् चोःक्मारे़ लागि कुधे़गेक् इःन् मे़भाःक्खुन्ल, हे़क्क्याङ् खुने़ॽ कुदेःत्तिन् मे़धेःक्खुन्ल॥ 11 खुने़ॽ कुभा चे के़ने़बादे़न्नो मे़बेःक्ने़न्ल॥ खुने़ॽ आप्फेक् कुम्बा इग्र कुम्मारे़ कुजे के़ने़बादे़न्नोआङ् पेःक्काङ् आसुत्थो मे़जोःक्सिङ्ङिल्ल॥ 12 सेसेदे़न्नोलाम् खे़न् लाःक्कात् मे़लःन्ने़ल्ल, हे़क्क्याङ् खे़ल्ले़ खुने़ॽ कुनिङ्वाॽफुमाङ्ङिल्ले़ कुसेसेदे़न्निन् आसुत्थो मे़जोगुन्ल, थेआङ्भे़ल्ले़ निङ्वाॽफुमाङ्ङिल्ले़ माङ्थोःक्ना पिमा कुनिःङ्गेःल्ले़ खे़न् मे़दोन्दुआङ् वाॽ॥ आङ्गाॽ यहवे दाङ्बाआ॥ 13 “‘खे़ल्ले़ सिसागे़न् मे़न्छ्यान् मेःक्खिम् मे़त्तुर॥ 14 खे़ल्ले़ कुये़म्बा के़सिमा मेमेदुमा, कुये़म्बाःल्ले़ नाॽरुबा मे़न्छुमान्, इग्र ये़म्बा हङ्जेना याःम्बक्किल्ले़ फे़क्के़लाॽमा मे़न्छुमान् मे़दारुन्ल, कर आबाङे कुधाःक्कोबा सिसागे़न् मे़न्छ्यान् खे़ल्ले़ ते़न्धाम् मेःक्खिम् मे़त्तुर, 15 खे़ल्ले़चोगुल्ले़ खुने़ॽ आबाङे कुमनाहाॽरे़ खुन्छिॽ लुम्मो आबाङे कुस्सा कुएहाॽ आसुत्थो मे़जोगुसिन्ल॥ खुने़ॽ सेसे के़जोःक्पा आङ्गाॽए यहवे दाङ्बाआ॥’” 16 यहवे दाङ्बे़ल्ले़ मोसान् मे़त्तु, 17 “खे़ने़ॽ हारुने़न् मे़त्ते़ॽ—‘खे़ने़ॽ के़हिम्सयङ्बा के़रे़क् थाःक्को के़गाःम्बा कुयोक् के़बप्पा आत्तिन्छाङ्, खुने़ॽ निङ्वाॽफुमाङ्ङिल्ले़ कुजा तोःन्छे़ निःत्ताङ् मे़दाने़न्ल॥ 18 के़गाःम्बा के़बप्पा आत्तिन् मनाःन्छाङ्, कुमिक् के़होप्पा मिक्फःम्बा इग्र लाङ्सक्पा, कुनारा फे़क्के़लाॽबा, इग्र कुधक् फे़क्के़लाॽबा, 19 कुलाङ् इग्र कुहुक् के़दुःङ्बा, 20 एःक्थुःक्के, थे़प्प्रुक्या, कुमिक् के़दुक्पा, के़दुम्बा याङ्घेःक् के़बप्पा, कुधिःन्नो के़गाःम्बा आत्तिन्नाङ् निःत्ताङ् मे़दाने़न्ल॥ 21 हारुन निङ्वाॽफुसाम्बे़ल्ले़ कुहिम्सयङ्हाॽओबा के़गाःम्बा के़बप्पा आत्तिन् ये़म्बित्छाःन्नाङ् यहवे दाङ्बे़ल्ले़ कुलागि मिओ मिधिङ्मनादेमनाबा सिदुङ्जभा तोःम्मारे़ लागि निःत्ताङ् मे़दाने़न्ल॥ खे़प्मो कुयोक् पत्॥ खे़न् कुनिङ्वाॽफुमाङ्ङिल्ले़ कुजा तोःन्छे़ निःत्ताङ् तामा मे़नुॽने़न्॥ 22 खुने़ॽ कुनिङ्वाॽफुमाङ्ङिल्ले़ सेसेबा नु साॽरिक् सेसेबा कुजान् खे़ल्ले़ चामा सुक्तुॽ॥ 23 कर खे़प्मो के़गाःम्बा पप्पाल्ले़ चोगुल्ले़ खुने़ॽ फोःन्दा नु ले़त्ति तोःम्मादे़न्निल्ले़ निःत्ताङ् ताआङ् आङ्गाॽ आसेसेदे़न्निन् आसुत्थो मे़जोगुन्ल॥ खे़ङ्हाॽ सेसे के़जोःक्पा आङ्गाॽए यहवे दाङ्बाआ॥’” 24 खे़ब्याङ् मोसाःल्ले़ हारुने़न् खुने़ॽ कुस्साहाॽ नु के़रे़क् इस्राइलिहाॽ कन् पाःन्हाॽ चे़क्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.