ले़बि 20 - लिम्बुफे़न्याःम्बक् के़जोःक्पे़ल्ले़ खुम्दिङ् खोसु 1 यहवे दाङ्बे़ल्ले़ मोसान् मे़त्तु, 2 “खे़ने़ॽ इस्राइलिहाॽ अक्खे मे़त्ते़से़ॽ—‘इस्राइलिहाॽ इग्र खे़ङ्हाॽनु सोरिक् के़युङ्बा वेॽ लाजेॽबा इस्राइलओ के़युङ्बा मनाहाॽओ आत्तिल्ले़ कुस्सा अङे़ःक्वान् मोलोख साम्माङ्ङो तोःन्दुॽ खे़न् से़प्मा पोङ्ॽ॥ सङ्जुम्भोबा मनाहाॽरे़ खे़न् लुङ्ङिल्ले़ मे़ले़प्तुर॥ 3 खे़ङ्हाॽओ कुस्सा अङे़ःक्वान् मोलोख माङ्ङो के़दोःम्बे़ल्ले़ आङ्गाॽ आसेसेदे़न्निन् चिःन्दुॽ हे़क्क्याङ् सेसेबा आमिङ्ङिन् फे़त्लाःन्दुॽ॥ कल्ले़चोगुल्ले़ आङ्गाॽ खे़न् अत्तुङ्ङाङ् खुने़ॽ कुमनाहाॽलाम् लःत्तुङ्देसुङ्ॽ॥ 4 खे़ल्ले़ खुने़ॽ अङे़ःक्वा कुस्सान् मोलोख माङ्ङो तोःन्दुल्ले़ सङ्जुम्भोबा मनाहाॽरे़ खे़न् मनान् मे़न्छे़रुन् हे़क्क्याङ् मे़न्निःमनाबा मे़ले़ङिसिङ्ने़भग्र, 5 खे़न् मनान् नु खे़ल्ले़ कुहिम्सयङ्हाॽ अत्तुङ्सिङ्ॽ, आङ्गाॽ खे़न् हे़क्क्याङ् खुने़ॽनु सोसोरिक् मोलोख माङ्ङिन् के़दिम्बाआङ् के़त्निमा के़जोःक्सिङ्बाहाॽ के़रे़क् खुन्छिॽ मनाहाॽलाम् मे़लःत्तु मे़देसुसिर चोगुङ्ॽ॥ 6 “‘आत्तिन् मनाःन् माङ्बा याःम्बक् चोःक्मा ले़प्माङ् इग्र के़सिबा साम्हाॽ के़भोङ्बा ले़प्माङ् लाःत्ताङ् आङ्गाॽ इङ्ले़क्का, आङ्गाॽ खे़न् अत्तुङ्ङाङ् खुने़ॽ कुमनाहाॽलाम्बा लःत्तुङ्देसुङ्ॽ॥ 7 “‘आबाङे तोःन्नासिम्मे़ॽआङ् सेसे पोःक्खे़म्मे़ॽ॥ थेआङ्भे़ल्ले़ आङ्गाॽ यहवे दाङ्बा खिनिॽ निङ्वाॽफुमाङ्आ॥ 8 खिनिॽ आङ्गाॽ आसाम्यो थिम्हाॽ इःत्ते़म् नाःत्ते़म्मे़ॽ॥ आङ्गाॽए खिनिॽ सेसे के़जोःक्पा यहवे दाङ्बाआ॥ 9 “‘आत्तिल्ले़ खुने़ॽ कुम्बा कुम्मा साङ्ग्रा माङ्दे मे़त्तुसिॽ खे़न् से़प्माए पोङ्ॽ॥ खुने़ॽ आबाङे कुम्बा कुम्मा माङ्दे साङ्ग्रा मे़त्तुसिबाल्ले़ चोगुबाल्ले़ खुने़ॽ आप्फेक् सिमा के़बोङ्बा पोङ्लो॥ 10 “‘कुभा मनाःन् वेॽइल्ले़ कुमेःत्तिन्नु याम्बोःप्मा याःम्बक् चोगुने़भग्र याम्बोःप्मा याःम्बक् के़जोक्पे़न् नु याःम्बोःप्मा याःम्बक् के़जोःक्मे़न् ने़प्माङ् से़प्मासिए पोङ्ॽ॥ 11 “‘आप्फेक् कुम्बारे़ कुमेःत्तिन्नु सोरिक् इम्मा याःम्बक् के़जोःक्पे़ल्ले़ खुने़ॽ आबाङे कुम्बा कुनामे़न्छाॽ मे़त्तुबा पोङ्ॽ॥ खे़ङ्हाॽ ने़प्माङ् से़प्मासिए पोङ्ॽ॥ खुन्छिॽ चोःक्सुबा फे़न्याःम्बक्किल्ले़ चोगुल्ले़ खुन्छिॽ आप्फेक् सिमा के़बोङ्बा पोङ्ॽ॥ 12 “‘कुभा मनाःल्ले़ खुने़ॽ आप्फेक् कुम्बाङ्लिःन्नु सोरिक् इम्मा याःम्बक् चोगुने़भग्र खे़न् ये़म्बित्छान् नु मे़न्छुमान् ने़प्माङ् से़प्मासिए पोङ्ॽ॥ खुन्छिॽ चोगे़सुबान् फे़त्लाॽमा याःम्बक्लो॥ खुन्छिॽ हे़क्के चोगे़सुबे़ल्ले़ चोगुल्ले़ खुन्छिॽ आप्फेक् सिमा पोङ्ॽ॥ 13 “‘कुभा मनाःल्ले़ मे़न्छुमान्नु सोरिक् इम्मा याःम्बक् चोगुबा कुइसिक् ये़म्बित्छाःन्नु हे़क्के चोगुने़भग्र खे़न् याम्गे़सिङ्बा याःम्बक् पोङ्ॽ॥ खे़न् ने़प्माङ् से़प्मासिए पोङ्ॽ॥ खुन्छिॽ हे़क्के चोगे़सुबे़ल्ले़ चोगुल्ले़ खुन्छिॽ आप्फेक् सिमा पोङ्ॽ॥ 14 “‘कुभा मनाःल्ले़ कुम्मा कुस्सा ने़प्माङ् मेःत् चोगुसिने़भग्र खे़न् फे़न्याःम्बक्लो॥ खे़न् मनान् खे़ङ्हाॽनु सोरिक् मिधिङ्मा पोङ्ॽ, हे़क्क्याङ् खिनिॽ लुम्मो हे़क्तङ्बा याःम्बक् मे़बोङ्ने़न्ल॥ 15 “‘कुभारे़ थक्साःन्नु सोरिक् इम्मा याःम्बक् चोगुने़भग्र खे़न् मनान् से़प्माए पोङ्ॽ, खे़ब्याङ् खे़न् थक्साःन्नाङ् से़प्मा पोङ्ॽ॥ 16 “‘कुभा मे़न्छुमाःल्ले़ थक्सान् ये़म्बा चोगुबा तुम्दे़त्ते़ने़भग्र खे़न् मे़न्छुमान्नु थक्सान् ने़प्माङ् से़प्मासिए पोङ्ॽ॥ खुन्छिॽ हे़क्के चोगे़सुबे़ल्ले़ चोगुल्ले़ खुन्छिॽ आप्फेक् सिमाए पोङ्ॽ॥ 17 “‘आत्तिल्ले़ आबाङे कुन्साॽ, इग्र आबाङे कुम्बा इग्र कुम्मा ले़प्माङ्बा मे़न्छुमासान् मेःक्खिम् मे़त्तुआङ् सोरिक् इम्मा याःम्बक् चोगुने़भग्र खे़ङ्ग साॽरिक् सिरिङ्ममा पाःन्लो॥ खे़न् ने़प्माङ् मनाहाॽरे़ मे़निसुसिरए खुन्छिॽ आप्फेक् मनाहाॽलाम् लःप्मादेमासि पोङ्ॽ॥ खे़ल्ले़ आबाङे कुन्साॽ मे़न्छुमान् कुनामे़न्छाॽ मे़त्तुआङ् वाॽ॥ खुन्छिॽ हे़क्के चोगे़सुबे़ल्ले़ चोगुल्ले़ खुन्छिॽ आप्फेक् सिमा पोङ्ॽ॥ 18 “‘कुसिम् वाहप्मा वाॽबा ये़म्मो कुभा मनाःल्ले़ मे़न्छुमान्नु सोरिक् इम्मा याःम्बक् चोगुने़भग्र खे़न् ने़प्माङ् खुन्छिॽ मनाहाॽलाम्बा लःप्मादेमासि पोङ्ॽ, थेआङ्भे़ल्ले़ खे़न् ये़म्बित्छाःल्ले़ मे़न्छुमाःल्ले़ कुमाक्खिल्ले़ कुबुन्निन् ओसेःन्धाङ् चोगु हे़क्क्याङ् मे़न्छुमाःल्ले़ग खुने़ॽ कुमाक्खिल्ले़ कुबुन्निन् ओःन्धाक्तु॥ 19 “‘खे़ने़ॽ आबाङे के़म्बा इग्र के़म्मारे़ कुन्ने़ॽ कुन्साॽनु सोरिक् इम्मा याःम्बक् मे़जोगे़न्ने़ॽ॥ थेआङ्भे़ल्ले़ कल्ले़ निःत्ताङ्बा काॽइःन् कुनामे़न्छाॽ चोगुॽ॥ खे़न्छिॽ हे़क्के के़जोगुसिबे़ल्ले़ चोगुल्ले़ खे़न्छिॽ आप्फेक् के़सिसिर पोङ्ॽ॥ 20 “‘कुभारे़ आबाङे कुम्भङा इग्र कुन्दुम्बारे़ कुमेःत्तिन्नु सोरिक् इम्मा याःम्बक् चोगुने़भग्र खे़ल्ले़ आप्फेक् कुम्भङा इग्र कुन्दुम्बा कुनामे़न्छाॽ मे़त्तुरो॥ खे़ङ्हाॽ खुन्छिॽ लायोल्ले़ कुले़क्वा खुम्दिङ् खोमा पोङ्ॽ॥ खे़ङ्हाॽ खुन्छिॽ सामे़न्वाॽए मे़सिर पोङ्ॽ॥ 21 “‘कुभारे़ आबाङे कुन्साॽरे़ कुमेत् कुअङे़ःक्मान् इग्र कुम्भुॽरे़ कुमेःत्ते़न् मेःक्खिम् मे़प्माग आसुत्थो पाःन्लो॥ खे़ल्ले़ आबाङे कुम्भुॽ कुन्साॽहाॽ कुनामे़न्छाॽ मे़त्तुसिबा पोङ्ॽ॥ खे़ङ्हाॽ खुन्छिॽ सामे़न्वाॽए लुक्पा खक्पा मे़बोङ्ङाङ् मे़सिरो॥ 22 “‘आङ्गाॽ के़रे़क् आसाम्यो थिम्हाॽ इःत्ते़म् नाःत्ते़म्मे़ॽ॥ मेःन्ने़भग्र आत्तिन् लाजेॽओ आङ्गाॽ खिनिॽ तेॽनिङ्ल पत्ता खे़ल्ले़ खिनिॽ के़असिआङ् लाप्के़भुसिॽ॥ 23 खिनिॽ तगि आङ्गाॽ लःप्मादेमा इःत्तुङ्सिङ्बा मे़न्छाम् सुवाङ्हाॽरे़ खुन्छिॽ ये़प्ले़क्को खिनिॽ लाङ्मे़घेगे़म्मिन्ने़ॽ॥ खे़ङ्हाॽरे़ कन् के़रे़क् याःम्बक्हाॽ मे़जोगुआङ् मे़वये़, खे़ल्ले़चोगुल्ले़ आङ्गाॽ खे़ङ्हाॽ चिःत्तुङ्सिङ्॥ 24 कर आङ्गाॽ खिनिॽ मे़त्निङ्ङाङ् वाॽ, “खिनिॽ खे़ङ्हाॽरे़ खुन्छिॽ लाजेन् युक् के़जोगुम्ॽ, हे़क्क्याङ् पित्नु नु सक्वाघु के़गुङ्बा लाजेन् खिनिॽ पिनिङ्ॽ॥” खिनिॽ वेॽ मे़न्छाम् सुवाङ्हाॽलाम् के़से़म्बा आङ्गाॽ यहवे दाङ्बा खिनिॽ निङ्वाॽफुमाङ्आ॥ 25 “‘कल्ले़चोगुल्ले़ खिनिॽ सुत्थो नु आसुत्थो थक्सापुसाहाॽ से़न्दे़म्सिम्मे़ॽ॥ आङ्गाॽ आसुत्थो लेःत्तुङ्सिङ्ङाङ् ओसेःन्धाक्निङ्बा थक्सापुसा इग्र खाम्बाङ्ङो के़सःन्छिङ्बा मुन्जिङ् वयाक् के़लॽबाहाॽलाम् खिनिॽ आसुत्थो मे़जोःक्कासिम्मिन्ने़ॽ॥ 26 खिनिॽ आङ्गाॽ आलागि सेसेबा पोःक्खे़म्मे़ॽ, थेआङ्भे़ल्ले़ आङ्गाॽ, यहवे दाङ्बान्, सेसेबा चोःक्का, हे़क्क्याङ् खिनिॽ आङ्गाॽ आमना पोङ्मारे़ लागि आङ्गाॽ खिनिॽ वेॽ मे़न्छाम् सुवाङ्हाॽलाम् लाःत्लाःत् एःक् से़न्निङ्बारो॥ 27 “‘खिनिॽओबा कुभा ये़म्बित्छा इग्र मे़न्छुमान् माङ्बा याःम्बक् के़जोःक्पा ले़प्माङ् इग्र के़सिबा साम्हाॽ के़भोङ्बा ले़प्माङ् लाःत्ने़भग्र खे़न् से़प्माए पोङ्ॽ॥ खे़ङ्हाॽ लुङ्ङिल्ले़ ले़प्मा से़प्मासि पोङ्ॽ॥ खुन्छिॽ हे़क्के मे़जोगुबाल्ले़ चोगुल्ले़ खुन्छिॽ आप्फेक् सिमा पोङ्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.