ले़बि 19 - लिम्बुसेसे नु कुदोःप्मा खासे़न् लोःम्मा थिम्हाॽ 1 यहवे दाङ्बे़ल्ले़ मोसान् मे़त्तु, 2 “के़रे़क् इस्राइलि सङ्जुम्भोहाॽ अक्खे मे़त्ते़से़ॽ—‘खिनिॽ सेसे पोःक्खे़म्मे़ॽ, थेआङ्भे़ल्ले़ आङ्गाॽ, यहवे दाङ्बा खिनिॽ निङ्वाॽफुमाङ्ङिन्, सेसेबा चोःक्का॥ 3 “‘खिनिॽ के़रे़क्ले़ आबाङे पानुदिङ् पाहाॽ थामे़न्दिङ् माहाॽ मिङ्सो इङ्धाङ् पिरे़म्सिम्मे़ॽ, हे़क्क्याङ् आङ्गाॽ आनाःम्सिङ्मा सबाथ ये़न्निन् ने़त्ते़म्मे़ॽ॥ आङ्गाॽ यहवे दाङ्बा खिनिॽ निङ्वाॽफुमाङ्आ॥ 4 “‘नावाइत्लाहाॽ ले़प्माङ् खिनिॽ मे़बत्छे़म्मिन्ने़ॽ, हे़क्क्याङ् खिनिॽ योःम्मनाबा माङ्हाॽआङ् मे़जोगे़म्सिम्मे़न्ने़ॽ॥ आङ्गाॽ यहवे दाङ्बा खिनिॽ निङ्वाॽफुमाङ्आ॥ 5 “‘खिनिॽ तङ्जुम् वयागे़न् सिदुङ्जभान् के़दोःम्दुम्मिल्ले़ आङ्गाॽ पिनिङ्बा थिम्हाॽ इःत्ते़म् नाःत्ते़म्मे़ॽ हे़क्क्याङ् आङ्गाॽ सिदुङ्जभान् ताःक्तुङ्ॽ॥ 6 खिनिॽ के़दोःन्दुम्बा ये़न्नोए इग्र कुदाःन्दिक्मा थारिक् खे़न् चे़म्मे़ॽ॥ कर कुआत्छिन्दाःन् थारिक् नरे़ने़भग्र खे़न् मिओ मिधिक्खे़म्देसे़म्मे़ॽ॥ 7 कुआत्छिन्दाःन् थारिक्काङ् के़जाम्ने़भग्र खे़न् आसुत्थो पोङ्ॽ॥ खे़न् निङ्वाॽफुमाङ्ङिल्ले़ मे़दाःक्तुन्॥ 8 खे़न् आत्तिन्हाॽरे़ मे़जःॽ खे़न् के़जाबाहाॽ खुन्छिॽ फे़न्याःम्बक्किल्ले़ लागि खुम्दिङ् पिमासिए पोङ्ॽ, थेआङ्भे़ल्ले़ खे़ङ्हाॽरे़ यहवे दाङ्बे़ल्ले़ कुसेसे पाःन्निन् आसुत्थो मे़जोगु॥ हे़क्क्याङ् खे़ङ्हाॽ खुन्छिॽ मनाहाॽलाम् मे़लःत्तु मे़देसुसिर॥ 9 “‘खिनिॽ आबाङे के़दुम्बा पोगुगे़न् कुजान् के़हे़गुम्मिल्ले़ खिनिॽ प्याङ्सिगे़न् इक्ताप्पिल्ले़ कुयाओ थारिक् मे़हे़गे़म्मिन्ने़ॽ॥ के़हे़गुम्माङ् के़माबा के़याःक्पा कुदाप्माहाॽ मे़भुक्खे़म्मिन्ने़ॽ॥ 10 खिनिॽ चे़ल्ले़क्सेॽ इक्ताप्पो कुजाॽहाॽ वरे़ङ्ले़ङ् मे़दुबे़म्मिन्ने़ॽ, हे़क्क्याङ् चे़ल्ले़क्सेॽ इक्ताप्पो मक्के़धाबा कुजाॽहाॽ मे़सुप्से़म्मिन्ने़ॽ॥ खे़ङ्हाॽग याङ्गे़साॽबा नु वेॽ लाजेॽबा मनाहाॽरे़ खुन्छिॽ लागि ले़रे़म्धे़म्मे़ॽ॥ आङ्गाॽ यहवे दाङ्बा खिनिॽ निङ्वाॽफुमाङ्आ॥ 11 “‘खिनिॽ मे़घुःत्ते़म्मिन्ने़ॽ॥ “‘इङ्ले़क् मे़जोगे़म्मिन्ने़ॽ॥ “‘वेॽहाॽनु इङ्ले़क् पान् मे़बारे़म्मिन्ने़ॽ॥ 12 “‘खिनिॽ आङ्गाॽ आमिङ्ङो इङ्ले़क्के माङ्हे़क् मे़जोगे़म्मिन्ने़ॽ॥ हे़क्के के़जोगुम्मिल्ले़ खिनिॽ निङ्वाॽफुमाङ्ङिल्ले़ कुमिङ्ङिन् फे़त्के़लाःम्दुम्ॽ॥ आङ्गाॽ यहवे दाङ्बाआ॥ 13 “‘खिनिॽ आप्फेक् हिम्बेसाङ्बे़न् मे़युक्ते़म्मिन्ने़ॽ, हे़क्क्याङ् खे़न् मे़नाप्ते़म्मिन्ने़ॽ॥ “‘नाम्याक्को याःम्बक् के़जोःक्पे़ल्ले़ कुयाङ्ङिन् खिनिॽ थिक् से़न्नाङ् मे़गत्ते़म्मिन्ने़ॽ॥ 14 “‘कुनागे़धाक्पा मनान् माङ्दे साक्मुरा मे़मे़त्ते़म्मिन्ने़ॽ॥ मिक्फःम्बे़ल्ले़ कुदगि आदोःक्तोःक्पा पान् मे़ने़स्से़म्मिन्ने़ॽ, कर आबाङे निङ्वाॽफुमाङ्ङिन्नु किसे़म्मे़ॽ॥ आङ्गाॽ यहवे दाङ्बाआ॥ 15 “‘खिनिॽ मे़न्वाॽमनाबा मे़जोगे़म्मिन्ने़ॽ॥ चुक्पासाङ् इग्र यम्बासाङ्, मनान् ओमे़प्माआङ् मेःन्, कर के़रे़क् मनाहाॽरे़ खुन्छिॽ लागि कुदोःप्मा खासे़न् चोगे़म्मे़ॽ॥ 16 “‘मनाहाॽरे़ खुन्छिॽ लुम्मो इङ्ले़क् पान् मे़इङ्साम्मिन्ने़ॽ॥ “‘खिनिॽ आप्फेक् हिम्बेसाङ्बे़न् सिमालिङ्धो के़त्ल मे़जोगे़म्मिन्ने़ॽ॥ आङ्गाॽ यहवे दाङ्बाआ॥ 17 “‘आबाङे फुॽनुसाॽहाॽ निङ्मि मे़जोगे़म्सिम्मिन्ने़ॽ॥ आबाङे हिम्बेसाङ्बे़न् नादुम्दुम्बा पान् मे़त्ते़म्मे़ॽ, मेःन्ने़भग्र खिनिॽआङ् खे़ल्ले़ कुभे़न् याःम्बक्को कुदङ्बा के़ध्ये़ॽइ॥ 18 “‘आबाङे हिम्बेसाङ्बे़न्नु कुले़क्वा नुःक्मा मे़गेःत्ते़म्मिन्ने़ॽ हे़क्क्याङ् सिक् मे़गुये़म्मिन्ने़ॽ, कर आप्फेक् हिम्बेसाङ्बे़न् आप्फेक् कुइसिक् लुङ्माॽ तुक्ते़म्मे़ॽ॥ आङ्गाॽ यहवे दाङ्बाआ॥ 19 “‘खिनिॽ आङ्गाॽ आसाम्यो थिम्हाॽ इःत्ते़म् नाःत्ते़म्मे़ॽ॥ “‘ने़त्छि वेॽ वेॽ परिक्पा थक्साहाॽ मे़लाम्सिङ्ल मे़याःन्दे़म्सिम्मिन्ने़ॽ॥ “‘खिनिॽ इक्ताप्पो ने़त्छि परिक्पा याॽरिःम्बाहाॽ मे़हेॽरे़म्मिन्ने़ॽ॥ “‘खिनिॽ ने़त्छि परिक्ले़न् खि के़बःम्बा चाङ् मे़जाक्खे़म्मिन्ने़ॽ॥ 20 “‘मेःक्खिम्ले़ लागि पान् के़बुॽमाआङ् के़ये़प्मा कर मे़ल्ले़त्ते के़वाॽमा इग्र चोःक्युम्भो मे़म्बोङ्ङे के़वाॽमा योःग्मा मे़न्छ्यान् कुभा मनाःल्ले़ इप्तुने़भग्र, खे़न् पाःन्निन् साॽमाआङ् निःन्धो चोःक्मा पोङ्ॽ॥ खे़न् मनान् से़प्माग मे़नुॽने़न्, थेआङ्भे़ल्ले़ खे़न् मे़न्छ्यान् चोःक्युम्भो मे़म्बोङ्ङे वये़॥ 21 कर खे़न् ये़म्बित्छाःल्ले़ तुम्मादे़न् साःङ्गाहिम्मोबा लाःप्मादे़न्नो खुने़ॽ कुआप्तिक्लाम् ले़प्मि खोमा सिदुङ्जभारे़ लागि लत्छा थुःम्बा यहवे दाङ्बाओ तोःम्मारे़ लागि तारुर पोङ्ॽ॥ 22 हे़क्क्याङ् खे़न् मनाःल्ले़ कुलायोल्ले़ लागि आप्तिक्लाम् ले़प्मि खोमा सिदुङ्जभा थुःम्बाःन्लाम्बा निङ्वाॽफुसाम्बाल्ले़ यहवे दाङ्बे़ल्ले़ कुदगि लायोलाम् ले़प्मि नाःक्तु पिरुर, खे़ब्याङ् खे़ल्ले़ कुलायोन् ले़प्मि पोङ्ॽ॥ 23 “‘खिनिॽ खे़न् लाजेॽओ के़गे़रि हे़क्क्याङ् कुभा परिक्पा चामा के़नुॽबा सिङ्सेॽ के़लेःत्तुम्माङ् तङ्बे सुम्सि थारिक् खे़ल्ले़ कुजाॽइन् चामा मे़नुॽने़न् फाॽआङ् निङ्वाॽ इःत्ते़म्मे़ॽ॥ 24 लिसिगेक्पा तङ्बेओ चाहे के़रे़क् सिङ्सेॽहाॽ सेसेबा पोङ्ॽ, हे़क्क्याङ् यहवे दाङ्बाओ नाराफोमा सिदुङ्जभा पोङ्ॽ॥ 25 कर ङासिगेक्पा तङ्बेओ खे़ल्ले़ कुजाॽइन् खिनिॽ चामा नुॽ॥ हे़क्केलॽरिक् कन् पाःन्निन् के़इःत्तुम् के़नाःत्तुम्ने़भग्र खे़न् यरिक् कुजाॽ थोःक्ल पेक्॥ आङ्गाॽ यहवे दाङ्बा खिनिॽ निङ्वाॽफुमाङ्आ॥ 26 “‘कुभा थक्सा पुसान् खे़ल्ले़ कुमाक्खिन्नु सोरिक् खिनिॽ मे़जे़म्मिन्ने़ॽ॥ “‘खिनिॽ थुम्म्या मे़इसे़म्मिन्ने़ॽ हे़क्क्याङ् कित्चाक् मे़जोगे़म्मिन्ने़ॽ॥ 27 “‘खिनिॽ ने़सिःम्बोबा थे़गेःक्इःन् मे़घक्ते़म्मिन्ने़ॽ, खे़ब्याङ् मुधोॽइल्ले़ कुसुक्पाहाॽ मे़साःक्ते़म्मिन्ने़ॽ॥ 28 “‘के़सिबा मनाहाॽरे़ लागि खिनिॽ थक्को मे़हे़गे़म्मिन्ने़ॽआङ् मे़घाःन्दाम्मिन्ने़ॽ॥ हे़क्क्याङ् आप्फेक् थक्को आत्तिन् परिक्ले़न्नाङ् कुयोक् मे़भत्छे़म्मिन्ने़ॽ॥ आङ्गाॽ यहवे दाङ्बाआ॥ 29 “‘खिनिॽ मे़न्छुमा साहाॽ ये़म्बा हङ्जेना के़त्निमा मे़जोगे़म्सिम्मिन्ने़ॽआङ् फे़त्मे़लाःन्दे़म्सिम्मिन्ने़ॽ, मेःन्ने़भग्र लाजेन् के़त्निमा चोःक्मा ले़प्साङ् लाःत्, खे़ब्याङ् लाजेन् फे़न्याःम्बक्किल्ले़ तिम्ॽ॥ 30 “‘खिनिॽ आङ्गाॽ आनाःम्सिङ्मा सबाथ ये़न्निन् ने़त्ते़म्मे़ॽ हे़क्क्याङ् आसेसेदे़न्निन् मिङ्सो इङ्धाङ् पिरे़म्मे़ॽ॥ आङ्गाॽ यहवे दाङ्बाआ॥ 31 “‘खिनिॽ माङ्बा याःम्बक् के़जोःक्पा इग्र के़सिबा साम् के़भोङ्बा ले़प्माङ् मे़लासे़म्मिन्ने़ॽ॥ खे़ङ्हाॽनु सुजा मे़नाःक्ताम्मिन्ने़ॽआङ् खिनिॽ आबाङे आसुत्थो मे़जोःक्कासिम्मिन्ने़ॽ॥ आङ्गाॽ यहवे दाङ्बा खिनिॽ निङ्वाॽफुमाङ्आ॥ 32 “‘काप्पो तुम्साहाॽ मिङ्सो इङ्धाङ् पिमासिरे़ लागि पोगे़म्मे़ॽ हे़क्क्याङ् खदाक्मिहाॽ नाजम् पिरे़म्सिम्मे़ॽ॥ निङ्वाॽफुमाङ्ङिन्नु खिनिॽ किसे़म्मे़ॽ॥ आङ्गाॽ यहवे दाङ्बाआ॥ 33 “‘खिनिॽओ याङ्धोःक्से़ के़दाबा वेॽ लाजेॽबा मनान् ताप्फे़ःल्लिक् मे़मे़त्ते़म्मिन्ने़ॽ॥ 34 खे़न् खिनिॽ आबाङे लाजेॽओ सागे़वाःन्छिङ्बा मना हे़क्के लेःत्ते़म्मे़ॽ॥ खिनिॽ खे़न् आबाङे कुसिङ् लुङ्माॽ तुक्ताम्मे़ॽ, थेआङ्भे़ल्ले़ खिनिॽआङ् मिस्र लाजेॽओ वेॽ लाजेॽबा के़वयि॥ आङ्गाॽ यहवे दाङ्बा खिनिॽ निङ्वाॽफुमाङ्आ॥ 35 “‘खिनिॽ के़सिःक्तुम्मिल्ले़, के़धाङ्घुम्मिल्ले़ हे़क्क्याङ् के़धिम्सुम्मिल्ले़ इङ्ले़क् मे़जोगे़म्मिन्ने़ॽ॥ 36 खिनिॽ कुदोःप्मा ते़म्दुरि नु कुधाङ्मा, हे़क्क्याङ् के़गे़प्पा कुसिःक्मा नु पासाङ्गाहाॽ कत्ते़म्मे़ॽ॥ मिस्र लाजेॽलाम् खिनिॽ के़लःप्पा के़भे़प्पा आङ्गाॽ यहवे दाङ्बा खिनिॽ निङ्वाॽफुमाङ्आ॥ 37 “‘खिनिॽ आङ्गाॽ के़रे़क् आसाम्यो थिम्हाॽ नु आधिम्हाॽ इःत्ते़म् नाःत्ते़म्मे़ॽ॥ आङ्गाॽ यहवे दाङ्बाआरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.