ले़बि 18 - लिम्बुसोरिक् इम्मा मे़न्नुॽमनाबा पाःन्हाॽ 1 यहवे दाङ्बे़ल्ले़ मोसान् मे़त्तु, 2 “खे़ने़ॽ इस्राइलिहाॽ अक्खे मे़त्ते़से़ॽ—‘आङ्गाॽ यहवे दाङ्बा खिनिॽ निङ्वाॽफुमाङ्आ॥ 3 खिनिॽ के़युङि के़वयिबा मिस्र लाजेॽबा मनाहाॽरे़ खुन्छिॽ थिम्बे साक्थिम्हाॽ मे़इःत्ते़म् मे़नाःत्ताम्मिन्ने़ॽ॥ हे़क्क्याङ् आल्ल आङ्गाॽ कनान लाजेॽओ खिनिॽ तेॽनिङ्ल पत्ता, कल्ले़चोगुल्ले़ खे़प्मोबा थिम्बे साक्थिम्हाॽआङ् मे़नाःत्ते़म्मिन्ने़ॽ॥ 4 खिनिॽ आङ्गाॽ आसाम्यो थिम्हाॽ नु आधिम्हाॽ इःप्मा नाःप्माआङ् खे़न् कुइसिक् वाॽमा पोङ्ॽ॥ आङ्गाॽ यहवे दाङ्बा खिनिॽ निङ्वाॽफुमाङ्आ॥ 5 खिनिॽ कन् आसाम्योथिम् साक्थिम्हाॽ इःत्ते़म् नाःत्ते़म्मे़ॽ, थेआङ्भे़ल्ले़ खे़ङ्हाॽ के़इःप्पा के़नाःप्पा मनान् खे़ङ्हाॽलाम्बाए हिङ्ॽ॥ आङ्गाॽ यहवे दाङ्बाआ॥ 6 “‘खिनिॽ लुम्मो आत्तिल्ले़आङ् निःत्ताङ् काॽइ के़धाप्पा के़धाप्माहाॽनु सोरिक् इम्मा याःम्बक् मे़जोगुन्ल॥ आङ्गाॽ यहवे दाङ्बाआ॥ 7 “‘खे़ने़ॽ के़म्मा मेःत् तेॽमा याःम्बक् मे़जोगे़न्ने़ॽ हे़क्क्याङ् खे़ने़ॽ के़म्बा सिरिङ्ममो मे़धासे़न्ने़ॽ॥ खे़न् खे़ने़ॽ मानुदिङ् के़म्मारो॥ खे़ने़ॽ खुने़ॽनु सोरिक् इम्मा याःम्बक् मे़जोगे़न्ने़ॽ॥ 8 “‘खे़ने़ॽ आबाङे के़म्बारे़ कुमेत् के़म्मा पाःक्मे़न्नु सोरिक् इम्मा याःम्बक् मे़जोगे़न्ने़ॽ॥ हे़क्के के़जोगुल्ले़ खे़ने़ॽ आबाङे के़म्बारे़ कुजाःत्थि के़देसुॽ॥ 9 “‘खे़ने़ॽ आबाङे के़न्ने़ॽ के़न्साॽ इग्र के़म्मा पाःक्मा ले़प्माङ्बा किग्र आप्फेक् के़म्बा ले़प्माङ्बा के़न्ने़ॽ के़न्साॽइन् हिम्मो इग्र लाःक्कात् सागे़वाःन्छिङ्मासाङ् खे़न् मेःत् तेॽमा याःम्बक् मे़जोगे़न्ने़ॽ॥ 10 “‘खे़ने़ॽ आबाङे के़स्सा ये़म्बित्छा ले़प्माङ्बासाङ् के़स्सा मे़न्छुमा ले़प्माङ्बासाङ् खे़ने़ॽ आबाङे के़म्मे़न्छाॽइन्नु सोरिक् इम्मा याःम्बक् मे़जोगे़न्ने़ॽ॥ खुने़ॽलाम्बा खे़ने़ॽ आबाङे कुनामे़न्छाॽ के़जोःक्सिङ्ॽ॥ 11 “‘खे़ने़ॽ आबाङे के़म्मा पाःक्माल्ले़ कुस्साःन्नु सोरिक् इम्मा याःम्बक् मे़जोगे़न्ने़ॽ॥ खे़ने़ॽ खे़न् के़माङ्गे़न्ना के़न्साॽरो॥ 12 “‘खे़ने़ॽ आबाङे के़न्याॽनु सोरिक् इम्मा याःम्बक् मे़जोगे़न्ने़ॽ॥ खे़न् खे़ने़ॽ के़म्बारे़ निःत्ताङ्बा कुगाॽइरो॥ 13 “‘खे़ने़ॽ आबाङे के़म्मारे़ कुन्साॽ के़न्छुमानु सोरिक् इम्मा याःम्बक् मे़जोगे़न्ने़ॽ॥ खे़न् खे़ने़ॽ के़म्मारे़ निःत्ताङ्बा कुगाॽइरो॥ 14 “‘खे़ने़ॽ के़न्दुम्मा इग्र के़न्छुमाःन् मेःत् तेॽमा याःम्बक् मे़जोगे़न्ने़ॽ हे़क्क्याङ् आबाङे के़म्बारे़ कुन्साॽ कुम्भुॽहाॽ कुनामे़न्छाॽ मे़मे़त्ते़से़न्ने़ॽ॥ खुने़ॽग खे़ने़ॽ के़न्दुम्मा इग्र के़न्छुमारो॥ 15 “‘खे़ने़ॽ आबाङे के़म्बाङ्लिःन्नु सोरिक् इम्मा याःम्बक् मे़जोगे़न्ने़ॽ॥ खे़न् खे़ने़ॽ के़स्साःल्ले़ कुमेःत्लो॥ खे़ने़ॽ खे़न्नु मे़इप्से़न्ने़ॽ॥ 16 “‘खे़ने़ॽ आबाङे के़म्भुॽरे़ कुमेत् इग्र के़न्साॽरे़ कुमेःत्ते़न्नु सोरिक् इम्मा याःम्बक् मे़जोगे़न्ने़ॽआङ् के़न्साॽ के़म्भुॽहाॽ कुनामे़न्छाॽ मे़मे़त्ते़से़न्ने़ॽ॥ 17 “‘कुभा मे़न्छुमा हे़क्क्याङ् खे़ल्ले़ कुस्सा मे़न्छुमा ने़प्माङ्नु खे़ने़ॽ सोरिक् इम्मा याःम्बक् मे़जोगे़न्ने़ॽ॥ हे़क्क्याङ् कुस्सा ये़म्बित्छा इग्र कुस्सा मे़न्छुमा ले़प्माङ्बा कुम्मे़न्छाॽइन्नु सोरिक् इम्मा याःम्बक् मे़जोगे़न्ने़ॽ॥ खे़न् खुने़ॽ निःत्ताङ्बा कुगाॽइरो॥ हे़क्के चोःक्माग फे़न्याःम्बक् पोङ्ॽ॥ 18 “‘खे़ने़ॽ आप्फेक् के़मेःत्तिन् हिङ्ङाङ् वाॽर खुने़ॽ कुन्ने़ॽ इग्र कुन्साॽइन् लाॽमा मे़दारे़न्ने़ॽआङ् सोरिक् इम्मा याःम्बक् मे़जोगे़न्ने़ॽ॥ 19 “‘कुभा मे़न्छुमाःल्ले़ कुसिम् वाहप्मा वाॽबा आसुत्थो पोङ्बा ये़म्मो खे़न्नु सोरिक् इम्मा याःम्बक् मे़जोगे़न्ने़ॽ॥ 20 “‘खे़ने़ॽ के़हिम्बेसाङ्बे़ल्ले़ कुमेत् एयाङ्मा मे़न्छुमान्नु सोरिक् इम्मा याःम्बक् मे़जोगे़न्ने़ॽ॥ हे़क्केलॽरिक् खे़ने़ॽ आप्फेक् आसुत्थो मे़जोःक्सिङ्ङिन्ने़ॽ॥ 21 “‘खे़ने़ॽ के़स्सा के़एहाॽ मोलोख माङ्ङिल्ले़ कुलागि मिमे़धिक्खे़से़न्ने़ॽआङ् के़निङ्वाॽफुमाङ्ङिल्ले़ कुमिङ्ङिन् फे़त्मे़लाःन्दे़न्ने़ॽ॥ आङ्गाॽए यहवे दाङ्बाआ॥ 22 “‘मे़न्छुमाहाॽनु हे़क्के खे़ने़ॽ ये़म्बित्छाःन्नु सोरिक् इम्मा याःम्बक् मे़जोगे़न्ने़ॽ॥ खे़न् याम्गे़सिङ्बा याःम्बक्लो॥ 23 “‘आत्तिन् थक्साःन्नुआङ् सोरिक् इम्मा याःम्बक् मे़जोगे़न्ने़ॽआङ् आबाङे आसुत्थो मे़जोःक्सिङ्ङिन्ने़ॽ॥ मे़न्छुमान् सोरिक् इम्मा याःम्बक्ले़ लागि थक्साःन्नु मे़इम्ने़ल्ल॥ खे़न् मे़न्वाॽमनाबा फे़न्याःम्बक्लो॥ 24 “‘अक्तङ्बा के़रे़क् याःम्बक्हाॽलाम् आप्फेक् आसुत्थो मे़जोःक्कासिम्मिन्ने़ॽ॥ आङ्गाॽ खिनिॽ तगिलाम्बा लःप्मादेमा चोगुङ्सिङ्बा मे़न्छाम् सुवाङ्हाॽ के़रे़क् अक्तङ्बा पाःन्हाॽओए आसुत्थो मे़बोःक्खे़आङ् मे़वाॽ॥ 25 हे़क्केलॽरिक्के खे़न् लाजेन् आसुत्थो पोःक्खे़बारो॥ हे़क्क्याङ् आङ्गाॽ खे़ल्ले़ कुसम्धाङ् खे़ल्ले़ चोगुबा कुभे़न् याःम्बक्किल्ले़ कुले़क्वा खुम्दिङ् पिरुङ्, खे़ब्याङ् खे़न् लाजेःल्ले़ खे़प्मो के़युङ्बा मनाहाॽ असुसिआङ् लाप्फेसुसि॥ 26 कर लाजेॽओ के़युङ्बासाङ् इग्र खिनिॽलुम्मो के़युङ्बा वेॽ लाजेॽबा मनासाङ्, खिनिॽ आङ्गाॽ आसाम्यो थिम्हाॽ नु आधिम्हाॽ इःत्ताम् नाःत्ताम्मे़ॽ, खे़ब्याङ् अक्तङ्बा याम्गे़सिङ्बा याःम्बक्हाॽ मे़जोगे़म्मिन्ने़ॽ॥ 27 थेआङ्भे़ल्ले़ अक्तङ्बा के़रे़क् याम्गे़सिङ्बा याःम्बक्हाॽ खे़न् लाजेॽओ तगि के़युङ्बाहाॽरे़ मे़जोगु, खम्भ्याङ् खे़न् लाजेन् आसुत्थो पोःक्खे़॥ 28 आङ्गाॽ आसाम्यो साक्थिम्हाॽ के़न्इःत्तुम्मिन् के़न्नाःत्तुम्मिन्नाङ् खे़न् लाजेन् खिनिॽ आसुत्थो के़जोगुम्ने़भग्र खे़प्मो तगि के़युङ्बाहाॽ हे़क्के खिनिॽआङ् खे़न् लाजेःल्ले़ के़असिआङ् लाप्के़दे़सिॽ॥ 29 कन्हाॽओबा आत्तिल्ले़ कुभा याम्गे़सिङ्बा याःम्बक् चोगुने़भग्र खे़न् खुने़ॽ कुमनाहाॽलाम्बा मे़लःत्तु मे़देसुर॥ 30 “‘कल्ले़चोगुल्ले़ उन्छोन् उन्छोःन्बाहाॽरे़ मे़जोगु मे़युरुबा याम्गे़सिङ्बा याःम्बक्किन् खिनिॽ मे़जोगे़म्मिन्ने़ॽ हे़क्क्याङ् आबाङे आसुत्थो मे़जोःक्कासिम्मिन्ने़ॽ फाॽआङ् पिनिङ्बा आइङ्जाङ्ङिन् इःत्ताम् नाःत्ताम्मे़ॽ॥ आङ्गाॽ यहवे दाङ्बा खिनिॽ निङ्वाॽफुमाङ्आरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.