ले़बि 17 - लिम्बुसामाक्खिॽ चामा मे़नुॽने़न् 1 यहवे दाङ्बे़ल्ले़ मोसान् मे़त्तु, 2 “खे़ने़ॽ हारुने़न्, खे़ल्ले़ कुस्साहाॽ नु के़रे़क् इस्राइलिहाॽ मे़त्ते़से़ॽ—‘यहवे दाङ्बे़ल्ले़ इङ्जाङ् चोगुबा पाःन्हाॽ कन्हाॽरो— 3 इस्राइलिहाॽरे़ खुन्छिॽ लुम्मो आत्तिल्ले़ साःङ्गाहिम्हाॽ सिगाङ् इग्र लाःक्कात् पित्, मे़ल्लुक्साःत् किग्र मे़ःन्दाक् च्या से़रुॽ, 4 हे़क्क्याङ् तुम्मादे़न् साःङ्गाहिम्मोबा लाम्धेःप्पो यहवे दाङ्बे़ल्ले़ कुसेसे युङ्दे़न् तगि ले़प्माङ् सिदुङ्सभा तोःम्मारे़ लागि मे़दारुन्, खे़न् मनान् माक्खिॽइल्ले़ ते़त्तुर॥ खे़ल्ले़ माक्खिॽ वदेःन्दुआङ् वाॽ॥ खे़न् खुने़ॽ कुमनाहाॽलाम् मे़लःत्तु मे़देसुर॥ 5 मनाहाॽरे़ खुन्छिॽ तोःम्मा के़बोङ्बा सिदुङ्जभाहाॽ लाःक्कात् ताम्दाम्बादे़न्नो सिदुङ्जभा मे़न्दोःन्दुन्ल फाॽआङ् कन् इङ्जाङ्ङिन् पोःक्खे़आङ् वाॽ॥ खे़ङ्हाॽरे़ निङ्वाॽफुसाम्बाओ तुम्मादे़न् साःङ्गाहिम्मोए ताःप्मासिआङ् खे़ङ्हाॽ यहवे दाङ्बाओ तङ्जुम् वयागे़न् सिदुङ्जभा हे़क्के तोःम्मासि पोङ्ॽ॥ 6 निङ्वाॽफुसाम्बे़ल्ले़ खे़न् माक्खिन् तुम्मादे़न् साःङ्गाहिम्मोबा लाःप्मादे़न्नो यहवे दाङ्बाओ ले़त्ति तोःम्मादे़न्नो साक्खुर, हे़क्क्याङ् कुसोःत्तिन् चाहे यहवे दाङ्बे़ल्ले़ कुलागि कुनाम्गे़नुॽबा कुनाम् पोङ्मारे़ लागि मिधिक्खुदेसुर॥ 7 खे़ङ्हाॽरे़ आल्ल मे़ःन्दा नारा नावाइत्लाहाॽ से़वा मे़म्मे़त्तुसिन्ल हे़क्क्याङ् खुन्छिॽ मे़दोन्दुबा सिदुङ्जभाःल्ले़ आङ्गाॽनु नसान् के़ले़ङ्बा चोगुसिआङ् याम्बोःप्मा याःम्बक् के़जोःक्पा हे़क्तङ्बा मे़जोगुसिन्ल॥ खे़ङ्हाॽ नु खे़ङ्हाॽरे़ खुन्छिॽ थाःक्थाःक्ले़ लागि कन् सदादिङ्बा थिम् पोङ्ल॥’ 8 “खे़ने़ॽ खे़ङ्हाॽ मे़त्ते़से़ॽ, ‘इस्राइलिहाॽ इग्र खे़ङ्हाॽनु के़युङ्बा वेॽ लाजेॽबा मनाहाॽरे़ मिधिङ्मनादेमनाबा वयागे़न् सिदुङ्जभा इग्र कुभा वेॽ सिदुङ्जभा मे़दोन्दुल्ले़ 9 आत्तिल्ले़ यहवे दाङ्बे़ल्ले़ कुलागि खे़न् तोःन्छे़ तुम्मादे़न् साःङ्गाहिम्मोबा लाःप्मादे़न्नो मे़दारुन्, खे़न् मनान् खुने़ॽ कुमनाहाॽलाम् मे़लःत्तु मे़देसुर॥ 10 “‘इस्राइलिहाॽ इग्र खे़ङ्हाॽनु के़युङ्बा वेॽ लाजेॽबा मनाहाॽओ कुभारे़ आत्तिन् सामाक्खिन्छाङ् चने़भग्र, खे़न् माक्खिॽ के़जाबे़न् आङ्गाॽ अत्तुङ्ॽ, हे़क्क्याङ् खे़न् खुने़ॽ कुमनाहाॽलाम् लःत्तुङ्देसुङ्ॽ, 11 थेआङ्भे़ल्ले़ कुसक्मा के़याक्पा थक्सा पुसाहाॽरे़ खुन्छिॽ सक्मान् माक्खिॽओ याक्॥ आङ्गाॽ माक्खिन् चाहे ले़त्ति तोःम्मादे़न्नो खिनिॽ लागि लायोलाम् ले़प्मि नाःक्मारे़ लागि पिनिङ्ङाङ् वाॽ, थेआङ्भे़ल्ले़ माक्खिॽलाम्बाए मे़न्छाम् याप्मि हिङ्मन्ले़ लागि ले़प्मि नाःक्मा पोङ्ॽ॥ 12 कल्ले़ चुगुल्ले़ खिनिॽ इग्र खिनिॽनु के़युङ्बा वेॽ लाजेॽबा मनाहाॽओ आत्तिल्ले़आङ् माक्खिॽ मे़जने़न्ल फाॽआङ् आङ्गाॽ इस्राइलिहाॽ मे़त्तुङ्सिङ्बारो॥ 13 “‘इस्राइलिहाॽ इग्र खिनिॽनु के़युङ्बा वेॽ लाजेॽबा मनाहाॽओ आत्तिल्ले़ सानाःप्मा चामा के़नुॽबा कुभा थक्सा इग्र पुःन् ते़म्सुॽ, खुने़ॽ खे़ल्ले़ के़रे़क् कुमाक्खिन् सिःप्तुलःत्तुआङ् खाम्मिल्ले़ लुप्तुर॥ 14 थेआङ्भे़ल्ले़ के़रे़क् कुसक्मा के़याक्पा मुन्जिङ् वयाक् के़लॽबा थक्सा पुसाहाॽरे़ खुन्छिॽ सक्मान् खे़ङ्हाॽरे़ खुन्छिॽ माक्खिॽओ याःक्॥ कल्ले़चोगुल्ले़ आङ्गाॽ इस्राइलिहाॽ मे़त्तुङ्सिङ्ङाङ् वाॽ—“आत्तिन् कुहिङ्वे़त् थक्सा पुसाःल्ले़ कुमाक्खिन्नाङ् मे़जे़म्मिन्ने़ॽ, थेआङ्भे़ल्ले़ के़रे़क् कुहिङ्वे़त् थक्सा पुसाहाॽरे़ खुन्छिॽ सक्मान् खुन्छिॽ माक्खिॽओ याक्॥ खे़न् माक्खिॽ के़जाबा आत्तिन्छाङ् लःप्मादेमा पोङ्ॽ॥” 15 “‘लाजेॽओबासाङ् इग्र वेॽ लाजेॽबासाङ् हाःत्ले़ आप्फेक् के़सिबा इग्र ताम्भुङ् थक्साहाॽरे़ मे़भुयुबा सान् चःॽ, खे़ल्ले़ खुने़ॽ कुजाङ्ङिन् वाहप्तुर पोङ्ॽ हे़क्क्याङ् आबाङे च्वाःत्तो वारुःम्सिङ्मा पोङ्ॽ, हे़क्क्याङ् युःन्छिक् थारिक् आसुत्थो पोङ्ॽ॥ खे़न् एगाङ् खुने़ॽ सुत्थो पोङ्ॽ॥ 16 कर खे़ल्ले़ कुजाङ्ङिन् वामे़हप्तुन् हे़क्क्याङ् आबाङेआङ् वामे़रुःम्सिङ्ङे़न्ने़भग्र खे़ल्ले़ लागि खुने़ॽ खुम्दिङ् पिमाए पोङ्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.