ले़बि 15 - लिम्बुथक्कोनु के़लःम्बा आसुत्थो पाःन्हाॽ 1 यहवे दाङ्बे़ल्ले़ मोसान् नु हारुने़न् मे़त्तुसि, 2 “इस्राइलिहाॽ खिन्छिॽ अक्खे मे़त्ते़छे़से़ॽ, ‘कुभा ये़म्बित्छा मनान् से़मे़वा वयामा तुक्मे़ल्ले़ तरुने़भग्र, खे़न् से़मे़वान् आसुत्थो पोङ्ॽ॥ 3 खे़ल्ले़ कुधक्कोलाम्बा चक्मे़ल्लॽए वयासुॽ, इग्र वयामा नाॽसाङ् खे़ल्ले़ मनान् आसुत्थोए चोगुॽ॥ अक्खेलॽरिक् खे़न् से़मे़वाःल्ले़ मनाओ आसुत्थो तारुॽ— 4 “‘वयुमा तुक्मे़ल्ले़ के़दम्बा खे़न् मनान् ने़बा, युङ्बा के़रे़क् पाःन्हाॽ आसुत्थो पोङ्ॽ॥ 5 आत्तिल्ले़ खे़ल्ले़ कुने़त्नान् सुसु, खे़न् के़सुबा मनाःल्ले़ कुजाङ्ङिन् वाहप्मा पोङ्ॽ, हे़क्क्याङ् आबाङेआङ् च्वाःत्तो वारुःम्सिङ्मा पोङ्ॽ, खे़ब्याङ् युःन्छिक् थारिक् आसुत्थो पोङ्मा पोङ्ॽ॥ 6 से़मे़वा वयामा तुक्मे़ल्ले़ के़दम्बा मनान् युङ्बा थे़मा पाःन्नोसाङ् हात् युङ्ॽ खे़ल्ले़ कुजाङ्ङिन् वाहप्मा पोङ्ॽ, हे़क्क्याङ् आप्फेक्काङ् वारुःम्सिङ्मा पोङ्ॽ, खे़ब्याङ् युःन्छिक् थारिक् खे़न् आसुत्थो पोङ्ॽ॥ 7 “‘आत्तिल्ले़ वयामा तुक्मे़ल्ले़ तरुबा मनान् सुसु, खे़ल्ले़ कुजाङ्ङिन् वाहप्मा पोङ्ॽ, हे़क्क्याङ् आबाङेआङ् वारुःम्सिङ्मा पोङ्ॽ, खे़ब्याङ् खुने़ॽ युःन्छिक् थारिक् आसुत्थो पोङ्ॽ॥ 8 “‘खे़न् के़दुक्पा मनाःल्ले़ कुभा सुत्थो मनान् थ्यात्थोःक्तुने़भग्र खे़ल्ले़ कुजाङ्ङिन् वाहप्मा पोङ्ॽ, हे़क्क्याङ् खुने़ॽ आबाङेआङ् वारुःम्सिङ्मा पोङ्ॽ, खम्भ्याङ् युःन्छिक् थे़म्मा खे़न् आसुत्थो पोङ्ॽ॥ 9 “‘आत्तिन् सिङ्दाक्खोःक् इग्र युक्नाओ खे़न् के़दुक्पान् युङ्ॽ, खे़न् आसुत्थो पोङ्ॽ॥ 10 आत्तिल्ले़ खे़ल्ले़ कुसिगाङ् के़ने़बा कुभा पाःन्निन् सुसुॽ, खे़न् युःन्छिक् थारिक् आसुत्थो पोङ्ॽ॥ आत्तिल्ले़ खे़न् पाःन्हाॽ फोःक्खुॽ, खे़ल्ले़ कुजाङ्ङिन् वाहप्मा पोङ्ॽ, हे़क्क्याङ् वारुःम्सिङ्मा पोङ्ॽ, खे़ब्याङ् खे़न् युःन्छिक् थारिक् आसुत्थो पोङ्ॽ॥ 11 “‘खे़न् के़दुक्पा मनाःल्ले़ कुहुक्किन् च्वाःत्तो वामे़न्हप्पे कुभा मनान् सुसुने़भग्र, खे़न् सुसुबा मनाःल्ले़ कुजाङ्ङिन् वाहप्मा पोङ्ॽ, हे़क्क्याङ् च्वाःत्तो वारुःम्सिङ्मा पोङ्ॽ, खम्भ्याङ् युःन्छिक् थारिक् खे़न् आसुत्थो युङ्मा पोङ्ॽ॥ 12 “‘खे़न् के़दुक्पा मनाःल्ले़ कुभा फुजिक्के़न् सुसुने़भग्र खे़न् यःम्मादेमा पोङ्ॽ, कर सिङ्ङिल्ले़न् के़रे़क् सामाहाॽ च्वाःत्तिल्ले़ इःङ्मासि पोङ्ॽ॥ 13 “‘खे़न् मनाःन् वयामा तुक्मोलाम् वेःत्ते़ल्ले़ खुने़ॽ सुत्थो पोङ्मारे़ लागि नुसि ये़न् थारिक् निरुर, हे़क्क्याङ् कुजाङ्ङिन् वाहप्तुआङ् कुधक्किन् सेसेबा च्वाःत्तिल्ले़ वारुःप्सुर, खे़ब्याङ् खुने़ॽ सुत्थो पोङ्ॽ॥ 14 ये़त्छिगेक्पा ये़न्नो खे़ल्ले़ साप्पे़त्त्रुःक्मा ने़त्छि इग्र पे़र्वाज्याःक् ने़त्छि तुम्मादे़न् साःङ्गाहिम्मोबा लाःप्मादे़न्नो यहवे दाङ्बे़ल्ले़ कुदगाङ् तारुसिआङ् तार, हे़क्क्याङ् निङ्वाॽफुसाम्बे़न् खे़ङ्हाॽ पिरुर॥ 15 खे़ब्याङ् निङ्वाॽफुसाम्बे़ल्ले़ खे़ङ्हाॽओलाम् लत्छा लायोलाम् ले़प्मि खोमा सिदुङ्जभा नु वेॽइन् मिधिङ्मनादेमनाबा सिदुङ्जभारे़ लागि तोःन्दुसिर॥ कम्भलॽरिक् निङ्वाॽफुसाम्बे़ल्ले़ यहवे दाङ्बे़ल्ले़ कुदगि वयुमा तुक्मे़ल्ले़ तरुबा मनाःल्ले़ कुलागि लायोलाम् ले़प्मि नाःक्तु पिरुॽ॥ 16 “‘याम्मो कुभा ये़म्बित्छाःल्ले़ कुसे़मे़वान् खुने़ॽलाम् हाबा लःन्दे़ने़भग्र, खुने़ॽ कुधक्किन् खक्पे़त् वारुःप्सुर, हे़क्क्याङ् युःन्छिक् थारिक् आसुत्थो पोङ्ॽ॥ 17 आत्तिन् चाङ्ङो इग्र सिहोॽबाओ खे़न् से़मे़वान् चुक्, खे़न् च्वाःत्तिल्ले़ वाहप्मा पोङ्ॽ, हे़क्क्याङ् युःन्छिक् थारिक् आसुत्थो पोङ्ल॥ 18 कुभा ये़म्बित्छाःल्ले़ मे़न्छुमान्नु ने़मा याःम्बक् चोगु हे़क्क्याङ् से़मे़वा लःन्नाङ् एगाङ् ने़प्माङ् वारुःम्ने़सिर पोङ्ॽ, हे़क्क्याङ् युःन्छिक् थारिक् खुन्छिॽ आसुत्थो पोङ्सिॽ॥ 19 “‘कुभा मे़न्छुमाःल्ले़ कुमाक्खिॽ लःम्मा हेःक्ते़आङ् खे़न् कुसिम् वाहप्पाने़भग्र, खुने़ॽ कुसिम् वाहप्मा आसुत्थोन् नुसि ये़न् थारिक् पत्॥ आत्तिल्ले़ खुने़ॽ सुसु, खे़न् युःन्छिक् थारिक् आसुत्थो पोङ्ॽ॥ 20 “‘खे़ल्ले़ कुसिम् वाहप्मा ये़न् वाॽर थारिक् थे़मा थे़माहाॽओ खे़न् ने़ःॽ, खे़ङ्हाॽ के़रे़क् आसुत्थो पोङ्ॽ॥ हे़क्क्याङ् थेधे युक्नादे़न्हाॽओ खे़न् युङ्ॽ, खे़ङ्हाॽआङ् आसुत्थो पोङ्ॽ॥ 21 आत्तिल्ले़ खे़ल्ले़ कुने़त्नान् सुसुॽ, खे़न् आसुत्थो पोङ्ॽ खे़ल्ले़ कुजाङ्ङिन् वाहप्मा पोङ्ॽ, हे़क्क्याङ् खुने़ॽ आबाङेआङ् वारुःम्सिङ्मा पोङ्ॽ, खे़ब्याङ् युःन्छिक् थारिक् खे़न् आसुत्थो पोङ्ॽ॥ 22 आत्तिल्ले़ खे़ल्ले़ कुयुक्नान् सुसुॽ खुने़ॽ आसुत्थो पोङ्ॽ खे़ल्ले़ कुजाङ्ङिन् वाहप्मा पोङ्ॽ हे़क्क्याङ् खुने़ॽ आबाङेआङ् च्वाःत्तिल्ले़ वारुःम्सिङ्मा पोङ्ॽ, खे़ब्याङ् युःन्छिक् थारिक् खे़न् आसुत्थो पोङ्ॽ॥ 23 ने़त्ना च्यासाङ् इग्र युक्तुबा थे़मासाङ् आत्तिल्ले़ सुसुॽ, खे़न् के़सुबे़न् युःन्छिक् थारिक् आसुत्थो पोङ्ॽ॥ 24 “‘कुभा ये़म्बित्छान् खुने़ॽनु इप्से़ हे़क्क्याङ् खे़ल्ले़ कुसिम् वाहप्मे़ल्ले़ खुने़ॽ सुसुने़भग्र, खे़न् नुसि ये़न् थारिक् आसुत्थो पोङ्ॽ, खे़ब्याङ् खुने़ॽ इम्बा आत्तिन् इम्नादे़न्निन्छाङ् आसुत्थो पोङ्ॽ॥ 25 “‘कुभा मे़न्छुमाःल्ले़ कुसिम् वाहप्मा वाॽबा ये़न्निन्नुःल्ले़ वेॽ यरिक् ये़न् थारिक् माक्खिॽ वयुसु इग्र कुसिम् वाहप्मा वाॽबा ये़न्निन्नुःल्ले़ वेॽ ये़न् थारिक् माक्खिॽ वयुसुने़भग्र, माक्खिॽ वयुसुआङ् वाॽर थारिक् खुने़ॽ आसुत्थो पोङ्ॽ॥ कुसिम् वाहप्मा वाॽबा ये़न्हाॽओ हे़क्केए खुने़ॽ आसुत्थो पोङ्ॽ॥ 26 खे़ल्ले़ कुमाक्खिॽ वयुबा के़रे़क् ये़न्हाॽओ खुने़ॽ इम्बा आत्तिन् कुने़त्नाःन्छाङ् कुसिम् वाहप्मा वाॽमा ये़म्मोबा हे़क्केए लेःप्मा पोङ्ॽ॥ थे़मा थे़मा युक्नाहाॽ युक्तुॽ, खुने़ॽ कुसिम् वाहप्मा वाॽबा ये़न्हाॽ हे़क्केए खे़ङ्हाॽआङ् आसुत्थो पोङ्ल॥ 27 खे़न् पाःन्हाॽ के़सुबे़न् आसुत्थो पोङ्ॽ॥ खे़ल्ले़ आबाङे कुजाङ्हाॽ वाहप्तुर पोङ्ॽ, हे़क्क्याङ् खुने़ॽ आबाङेआङ् वारुःम्सिङ्मा पोङ्ॽ, खे़ब्याङ् युःन्छिक् थारिक् खुने़ॽ आसुत्थो पोङ्ॽ॥ 28 “‘खे़ल्ले़ कुसिम् वाहप्मे़न् वाॽमा नाॽआङ् एगाङ् खुने़ॽ नुसि ये़न् थारिक् निरुर, हे़क्क्याङ् खे़न् एगाङ् खुने़ॽ सुत्थो पोङ्ॽ॥ 29 ये़त्छिगेक्पा ये़न्नो खे़ल्ले़ पुत्तुःक्के ने़त्छि इग्र पे़र्वाज्याःक् ने़त्छि याङ्सिङ्ङाङ् तुम्मादे़न् साःङ्गाहिम्मोबा लाःप्मादे़न्नो तार हे़क्क्याङ् निङ्वाॽफुसाम्बे़न् पिरुर॥ 30 खे़ब्याङ् निङ्वाॽफुसाम्बे़ल्ले़ लत्छा लायोलाम् ले़प्मि खोमा सिदुङ्जभाःल्ले़ लागि नु वेॽइन् मिधिङ्मनादेमनाबा वयागे़न् सिदुङ्जभाःल्ले़ लागि तोःन्दुर॥ कम्भलॽरिक् निङ्वाॽफुसाम्बे़ल्ले़ खे़न् मे़न्छुमाःल्ले़ कुमाक्खिॽ वागे़युबा आसुत्थोःल्ले़ लागि यहवे दाङ्बे़ल्ले़ कुदगि लायोलाम् ले़प्मि नाःक्तुॽ॥ 31 “‘कम्भलॽरिक् खिनिॽ इस्राइलिहाॽ आसुत्थो के़जोःक्पा पाःन्हाॽलाम् लाःत्लाःत् कत्ते़म्सिम्मे़ॽ, मेःन्ने़भग्र खे़ङ्हाॽरे़ खुनिॽ लुम्मो के़युङ्बा आङ्गाॽ आवाॽमादे़न्निन् खे़ङ्हाॽरे़ आसुत्थो मे़जोगुल्ले़ खे़ङ्हाॽ आबाङे खुन्छिॽ आसुत्थोओ मे़सिःॽ॥’” 32 आत्तिल्ले़ वयामा तुक्मा कत्तुॽ, हे़क्क्याङ् हाःत्ले़ कुसे़मे़वान् लःन्बेःक् हे़क्क्याङ् खे़न् लाम्बा आसुत्थो पोङ्ॽ, 33 खे़ब्याङ् कुसिम् वाहप्मा के़वाॽमा मे़न्छुमा, वयामा तुक्मे़ल्ले़ याङ्घुबा ये़म्बित्छा इग्र मे़न्छुमा, खम्भ्याङ् आसुत्थो के़बोङ्मा मे़न्छुमान्नु इम्मा याःम्बक् के़जोःक्पा ये़म्बित्छा खे़न् के़रे़क् पाःन्हाॽरे़ कुयाःम्बेओबा थिम्हाॽ कन्हाॽएरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.