ले़बि 14 - लिम्बुहोरिक्पोबा याःङ्घेक्लाम् सुत्थो 1 यहवे दाङ्बे़ल्ले़ मोसान् मे़त्तु, 2 “के़दुक्पे़न् सुत्थो चोःक्मे़ल्ले़ कन् थिम्हाॽ ओगप् चोःक्मा पोङ्ॽ॥ आत्तिन् ये़न्नो खे़न् सुत्थो पोङ्मा के़बोङ्बा वाॽ खे़ल्ले़ याःन्दिक् खे़न् मनान् निङ्वाॽफुसाम्बाओ ताःप्मा पोङ्ॽ॥ 3 निङ्वाॽफुसाम्बाल्ले़ साःङ्गाहिम्हाॽलाम् खे़न् लाःक्कात् तेॽरुआङ् खे़न् साॽरुर॥ होरिक्पो के़लःम्बा आलिःक्लिःक्पा तुक्मे़न् वेःत्ते़ने़भग्र, 4 खे़ल्ले़ लागि ने़त्छि कुहिङ्वे़त् सुत्थो पुसा, साम्माङ्सिङ्, हिसप यान् नु हे़ःक्कङ्गङ्बा खि मे़दारुर फाॽआङ् निङ्वाॽफुसाम्बे़ल्ले़ इङ्जाङ् पिरुसिर॥ 5 खे़ब्याङ् निङ्वाॽफुसाम्बे़ल्ले़ फुजिक्को के़याक्पा सेसेबा च्वाःत्तिल्ले़ कुसम्धाङ् खे़न् ने़त्छि पुहाॽओ लत्छा से़प्मारे़ लागि इङ्जाङ् पिरुसिर॥ 6 खे़न् कुहिङ्वे़त् पुःन् साम्माङ्सिङ्, हे़ःक्कङ्गङ्बा खि नु हिसप याःन्निन्नाङ् याङ्सिङ्ङाङ् आम्भा खे़न् फुजिक्को के़याक्पा सेसेबा च्वाःत्तिल्ले़ कुसम्धाङ् से़प्मनाबा पुःल्ले़ कुमाक्खिॽओ खे़ल्ले़ हुम्सुर॥ 7 आलिःक्लिःक्पा तुक्मालाम् सुत्थो पोङ्मा के़बोङ्बाल्ले़ कुसम्धाङ् नुसिले़ङ् थारिक् साक्खुआङ् खुने़ॽ खे़न् सुत्थो लेःत्तुआङ् उवा चोगुर॥ खे़ब्याङ् खुने़ॽ खे़न् कुहिङ्वे़त् पुःन् ताम्दाम्बादे़न्नो ले़रुदेसुर॥ 8 “खे़न् सुत्थो पोङ्मा के़बोङ्बे़ल्ले़ खुने़ॽ कुजाङ्ङिन् वाहप्तुर, हे़क्क्याङ् के़रे़क् कुधे़गेक् इःन् लिगोॽ नःक्खुआङ् वारुःम्सिङ्ल, हे़क्क्याङ् खुने़ॽ सुत्थो पोङ्ॽ॥ खे़न् एगाङ् खुने़ॽ साःङ्गाहिम्हाॽओ पेःक्ल, कर नुसि ये़न् थारिक् खुने़ॽ कुसाःङ्गाहिम्मोलाम् लाःक्कात्ते युङ्मा पोङ्ॽ॥ 9 नुसिगेक्पा ये़न्नो खुने़ॽ कुधे़गेःक्किन् लिगोॽ नःक्खुर, कुम्धोॽ, कुमिक्खुङ्बान् नु खुने़ॽ के़रे़क् कुम्ब्रिक्हाॽ नःक्खुर॥ खे़ल्ले़ कुजाङ्हाॽ वाहप्तुआङ् खुने़ॽ कुधक्किन् च्वाःत्तिल्ले़ वारुःप्सुर, हे़क्क्याङ् खे़न् सुत्थो पोङ्ॽ॥ 10 “ये़त्छिगेक्पा ये़न्नो खे़ल्ले़ मे़ङ्गाःम्मनाबा ने़न्छि मे़ल्लुक्साःत् नु तङ्बे थिक् के़गे़प्मा मे़ङ्गाःम्नाबा कुम्मामा लत्छा मे़ल्लुक्साःत्, हे़क्क्याङ् पोगुगे़न् कुजा सिदुङ्जभारे़ लागि चैतुन निःङ्गेॽओ सॽमनाबा किलो तुक्सि फेॽरुम् नु माना कुभ्रे़ःङ् चैतुन निःङ्गेॽ तारुर॥ 11 खे़न् सुत्थो पोङ्मा के़बोङ्बा मनान् खे़न् हुक्वाहाॽनु सोरिक् तुम्मादे़न् साःङ्गाहिम्मोबा लाःप्मादे़न्नो यहवे दाङ्बे़ल्ले़ कुदगि सुत्थो के़लेःप्पाआङ् उवा के़जोःक्पा निङ्वाॽसाम्बे़ल्ले़ तोःन्दुर॥ 12 “खे़ब्याङ् निङ्वाॽफुसाम्बे़ल्ले़ खे़न् माना कुभ्रे़ःङ्बा निःङ्गेन्नु सोरिक् मे़ल्लुक्साःत्हाॽलाम् लत्छा याङ्सिङ्ङाङ् आप्तिक्लाम् ले़प्मि खोमा सिदुङ्जभा तोःन्दुर, हे़क्क्याङ् पङ्मनाबा सिदुङ्जभाःल्ले़ लागि यहवे दाङ्बे़ल्ले़ कुदगि थाःङ् पक्खुर॥ 13 हे़क्क्याङ् खे़ल्ले़ लायोलाम् ले़प्मि खोमा सिदुङ्जभाओ नु मिधिङ्मनादेमनाबा सिदुङ्जभा से़प्मा सेसेबादे़न्नो खे़न् मे़ल्लुक्साःत्तिन् से़रुर, थेआङ्भे़ल्ले़ लायोलाम् ले़प्मि खोमा सिदुङ्जभान् निङ्वाॽफुसाम्बे़ल्ले़ कुलक् पोङ्बा कुइसिक् आप्तिक्लाम् ले़प्मि खोमा सिदुङ्जभाःन्नाङ् खे़ल्ले़न्ने पोङ्ॽ॥ खे़न् साॽरिक् सेसेबा चोक्॥ 14 खे़ब्याङ् निङ्वाॽफुसाम्बे़ल्ले़ आप्तिक्लाम् ले़प्मि खोमा सिदुङ्जभाःल्ले़ कुभा कुमाक्खिॽजि याङ्सिङ्ङाङ् सुत्थो पोङ्मा के़बोङ्बा मनाःल्ले़ कुजुक्वा ले़प्साङ्बा कुने़क्खो लोःत्तिःन् कुजुक्वा कुहुक्माःन् नु कुजुक्वा कुलाङ्माओ हुःत्तु पिरुर॥ 15 निङ्वाॽफुसाम्बाल्ले़ माना कुभ्रे़ःङ् निःङ्गेन् याङ्सिङ्ङाङ् खुने़ॽ कुभे़ङ्वा हुक्कोबा कुहुक्ताप्पेओ कुभा हुक्खुर॥ 16 निङ्वाॽफुसाम्बे़ल्ले़ खुने़ॽ कुजुक्वा कुहुक्चोःन् कुभे़ङ्वा हुक्को कत्तुबा निःङ्गेॽओ हुम्सुर हे़क्क्याङ् खे़न्लाम्बा कुभा याङ्सिङ्ङाङ् खुने़ॽ कुहुक्चोःल्ले़ यहवे दाङ्बे़ल्ले़ कुदगि नुसिले़ङ् साक्खुर॥ 17 हे़क्क्याङ् निङ्वाॽफुसाम्बे़ल्ले़ कुहुक्को कत्तुबा निःङ्गेॽलाम् कुभा याङ्सिङ्ङाङ् खे़न् सुत्थो पोङ्मा के़बोङ्बा मनाःल्ले़ कुजुक्वा ले़प्माङ्बा कुने़क्खोॽ लोःप्माओ, खे़ल्ले़ कुजुक्वा हुक्कोबा कुहुक्माओ नु खे़ल्ले़ कुजुक्वा लाङ्ङोबा कुलाङ्माओ आप्तिक्लाम् ले़प्मि खोमा सिदुङ्जभाःल्ले़ कुमाक्खिॽ सम्धाङ् हुःत्तु पिरुर॥ 18 निङ्वाॽफुसाम्बे़ल्ले़ कुहुक्को कत्तुबा के़नम्बा निःङ्गेन् खे़न् सुत्थो पोङ्मा के़बोङ्बा मनाःल्ले़ कुधे़गेःक्को हुःत्तु पिरुर, खे़ब्याङ् खुने़ॽ यहवे दाङ्बे़ल्ले़ कुदगि खे़ल्ले़ कुलागि लायोलाम् ले़प्मि नाःक्तु पिरुर॥ 19 “खे़ब्याङ् खे़न् आसुत्थोलाम् सुत्थो पोङ्मा के़बोङ्बाल्ले़ चोगुल्ले़ निङ्वाॽफुसाम्बे़ल्ले़ लायोलाम् ले़प्मि खोमा सिदुङ्जभा तोःन्दुआङ् खे़ल्ले़ कुलागि लायोलाम् ले़प्मि नाःक्तु पिरुर॥ खे़न् एगाङ् खे़ल्ले़ मिधिङ्मनादेमनाबा सिदुङ्जभान् से़रुर॥ 20 निङ्वाॽफुसाम्बे़ल्ले़ मिधिङ्मनादेमनाबा सिदुङ्जभान् नु पोगुगे़न् कुजा सिदुङ्जभान् ले़त्ति तोःम्मादे़न्नो तोःन्दुर, हे़क्क्याङ् खे़ल्ले़ कुलागि लायोलाम् ले़प्मि नाःक्तु पिरुर, खे़ब्याङ् खे़न् सुत्थो पोङ्ॽ॥ 21 “कर खे़न् याङ्गे़साॽबा चोक् हे़क्क्याङ् खाम्भ्यारिक्काङ् ताःप्मा मे़सुक्तुन्ने़भग्र, खुने़ॽ कुलागि लायोलाम् ले़प्मि नाःक्मारे़ लागि आप्तिक्लाम् ले़प्मि खोमा सिदुङ्जभाःल्ले़ लागि थाःङ्पङ्मा फाॽआङ् लत्छा मे़ल्लुक्साःत्, हे़क्क्याङ् पोगुगे़न् कुजा सिदुङ्जभारे़ लागि चैतुन निःङ्गेॽओ सॽमनाबा किलो ने़त्छि चुन्जुम्बा फेॽरुम्, खे़ब्याङ् माना कुभ्रे़ःङ् निःङ्गेॽ तारुर॥ 22 हे़क्क्याङ् खुने़ॽ थे़मा लःप्मा सुक्तुॽ, साप्पे़त्त्रुःक्मा ने़त्छि इग्र पे़र्वाज्याःक् ने़त्छि, लत्छा लायोलाम् ले़प्मि खोमा सिदुङ्जभारे़ लागि नु वेॽइन् मिधिङ्मनादेमनाबा सिदुङ्जभारे़ लागि तारुर॥ 23 “ये़त्छिगेक्पा ये़न्नो खुने़ॽ सुत्थो पोङ्मारे़ लागि खे़ल्ले़ तुम्मादे़न् साःङ्गाहिम्मोबा लाःप्मादे़न्नो यहवे दाङ्बे़ल्ले़ कुदगि निङ्वाॽफुसाम्बाओ खे़ङ्हाॽ तारुर॥ 24 खे़ब्याङ् निङ्वाॽफुसाम्बे़ल्ले़ आप्तिक्लाम् ले़प्मि खोमा सिदुङ्जभा मे़ल्लुक्साःत्तिन् नु माना कुभ्रे़ःङ् निःङ्गेन् याङ्सिङ्ङाङ् पङ्मनाबा सिदुङ्जभाःल्ले़ लागि यहवे दाङ्बे़ल्ले़ कुदगि खे़न् थाःङ् पक्खुर॥ 25 आप्तिक्लाम् ले़प्मि खोमा सिदुङ्जभा मे़ल्लुक्साःत्तिन् से़रुआङ् निङ्वाॽफुसाम्बे़ल्ले़ सिदुङ्जभाःल्ले़ कुमाक्खिॽओलाम् कुभा याङ्सिङ्ल हे़क्क्याङ् खे़न् सुत्थो पोङ्मा के़बोङ्बाल्ले़ कुजुक्वा कुने़क्खोॽ लोःप्माओ, कुजुक्वा हुक्कोबा कुहुक्माओ नु कुजुक्वा लाङ्ङोबा कुलाङ्माओ हुःत्तु पिरुर॥ 26 निङ्वाॽफुसाम्बे़ल्ले़ खे़न् निःङ्गेॽओलाम् खुने़ॽ कुभे़ङ्वा हुक्कोबा कुहुक्ताप्पेओ कुभा हुक्खुर, 27 हे़क्क्याङ् खुने़ॽ कुजुक्वा हुक्कोबा कुहुक्चोःल्ले़ खुने़ॽ कुभे़ङ्वा हुक्को कत्तुबा कुभा निःङ्गेन् यहवे दाङ्बे़ल्ले़ कुदगि नुसिले़ङ् साक्खुर॥ 28 हे़क्क्याङ् निङ्वाॽफुसाम्बे़ल्ले़ कुहुक्को कत्तुबा निःङ्गेॽलाम् कुभा याङ्सिङ्ङाङ् खे़न् सुत्थो पोङ्मा के़बोङ्बाल्ले़ कुजुक्वा ले़प्माङ्बा कुन्भाक्किल्ले़ कुलोःप्मे़न्, कुजुक्वा हुक्कोबा कुहुक्माःन् नु कुजुक्वा लाङ्ङोबा कुलाङ्माओ आप्तिक्लाम् ले़प्मि खोमा सिदुङ्जभाःल्ले़ कुमाक्खिन् हुःत्तु पिरुबादे़न्नोए हुःत्तु पिरुर॥ 29 हे़क्क्याङ् निङ्वाॽफुसाम्बे़ल्ले़ खुने़ॽ कुहुक्को कत्तुबा के़नम्बा निःङ्गेन् खे़न् सुत्थो पोङ्मा के़बोङ्बाल्ले़ कुलायोन् ले़प्मि नाःक्मारे़ लागि यहवे दाङ्बे़ल्ले़ कुदगि खे़ल्ले़ कुधे़गेःक्को हुःत्तु पिरुर॥ 30 खे़न् एगाङ् खे़न् मनाःल्ले़ च्या लःप्मा सुक्तुबा साप्पे़त्त्रुःक्मा इग्र पे़र्वाज्याःक्हाॽ निङ्वाॽफुसाम्बे़ल्ले़ सिदुङ्जभा तोःन्दुर, 31 लत्छा लायोलाम् ले़प्मि खोमा सिदुङ्जभारे़ लागि, वेॽइन् मिधिङ्मनादेमनाबा सिदुङ्जभाःल्ले़ लागि निङ्वाॽफुसाम्बे़ल्ले़ पोगुगे़न् कुजा सिदुङ्जभाःन्नु सोरिक् तोःन्दुर॥ कम्भलॽरिक् निङ्वाॽफुसाम्बे़ल्ले़ खे़न् सुत्थो पोङ्मा के़बोङ्बाल्ले़ कुलागि यहवे दाङ्बे़ल्ले़ कुदगि लायोलाम् ले़प्मि नाःक्तु पिरुॽ॥” 32 होरिक्पाओ आलिःक्लिःक्पा याङ्घेःक् के़लःम्बाआङ् सुत्थो पोङ्मारे़ लागि चाहा के़जोःक्पा पाःन्हाॽ लःप्मा मे़न्याःम्मनाबा मनाःल्ले़ कुलागि चोःक्मा के़बोङ्बा थिम्हाॽ आम्भा कन्हाॽरो॥ हिम्मोबा सुक्नाःम्बा 33 यहवे दाङ्बे़ल्ले़ मोसान् नु हारुने़न् मे़त्तुसि, 34 “आल्ल आङ्गाॽ खिनिॽ युक्को पिमानिङ् इःत्तुङ्बा कनान लाजेॽओ के़गे़रिल्ले़, हे़क्क्याङ् खिनिॽ युक्को के़घोसुम्बा लाजेॽओबा हिम्मो के़वाम्बा कुभा सुक्नाःम्बान् आङ्गाॽ थार याःन्दुङ्ने़भग्र, 35 खे़न् हिम्मोबा हिम्दाङ्बान् पेःक्काङ् ‘आङ्गाॽ आहिम्मो सुक्नाःम्बा थ्ये़बा हे़क्के लॽ’ फाॽआङ् निङ्वाॽफुसाम्बान् मे़त्तुर॥ 36 सुक्नाःम्बान् साॽमानुःल्ले़ तगि निङ्वाॽफुसाम्बे़ल्ले़ कुजा चिगक्वा हे़न्याहाॽ हिम्मोलाम् मे़लःत्तुर फाॽआङ् मे़त्तुसिर, हे़क्केलॽरिक् निङ्वाॽफुसाम्बे़ल्ले़ हिम्मिन् आसुत्थो चोक् फाॽआङ् उवा चोगुल्ले़ खे़प्मोबा थे़मा सामापुमाहाॽआङ् आसुत्थो मे़बोङ्ल॥ खे़न् एगाङ् निङ्वाॽफुसाम्बे़न् हिम्मिन् साॽमारे़ लागि सिगाङ् लाःत्ल॥ 37 हे़क्क्याङ् खे़ल्ले़ सुक्नाःम्बान् साॽरुर॥ खे़न् सुक्नाःम्बान् हिम्मोबा लुङ्धाक्को हिःक्ताङ्बा इग्र हे़ःत्हे़ःत्ताङ्बा चोःक्पा हे़क्के लॽने़भग्र, खे़ब्याङ् लुङ्धाक्किन् चिॽरुर पप्पा कुसिङ् लॽने़भग्र, 38 हिम्मोलाम् लाम्धेःत्तो पोङ्ङाङ् लाःक्कात् लःन्ल हे़क्क्याङ् नुसि ये़न् थारिक् खे़न् हिम्मिन् सुबुर॥ 39 नुसिगेक्पा ये़न्नो निङ्वाॽफुसाम्बान् याम्मो ताआङ् खे़न् हिम्मिन् ओमे़त्तुर, हे़क्क्याङ् खे़न् हिम्मोबा लुङ्धाक्हाॽओ सुक्नाःम्बान् वामुआङ् पत्ने़भग्र, 40 निङ्वाॽफुसाम्बे़ल्ले़ खे़न् सुक्नाःम्बा के़धाबा लुङ्हाॽ लःत्तुआङ् ये़क्यक् लाःक्कात् कुभा आसुत्थोबादे़न्नो लाप्फुमा पाङ्घुसिर॥ 41 खे़ल्ले़ हिम्सिगाङ् ले़प्माङ् के़रे़क् पिसाङ् हिःप्मा पाङ्घुसिआङ् हप्मा पाङ्घुसिर, खम्भ्याङ् मे़हिबुबा खे़न् सुक्नाःम्बा के़धॽबा खाम्मिन् खे़ङ्हाॽरे़ ये़क्यक् लाःक्कात् कुभा आसुत्थोबादे़न्नो लाप्मे़देसुर॥ 42 खे़न् एगाङ् खे़ङ्हाॽरे़ वेॽ लुङ्हाॽ मे़दारुआङ् खे़न् तगिबा लुङ्हाॽ यागे़बादे़न्नो मे़गेःत्तुर, हे़क्क्याङ् वेॽ खाम्मिल्ले़ मे़ले़ङुर॥ 43 “लुङ्हाॽ मे़लःत्तु खे़ब्याङ् हिम्मिन् मे़हिबु मे़ले़ङु मे़सुरुआङ् खे़न् सुक्नाःम्बान् याम्मो निधाबे़ने़भग्र, 44 निङ्वाॽफुसाम्बे़न् पेःक्काङ् ओमे़त्तुर॥ खे़न् सुक्नाःम्बान् वामुआङ् पत्ने़भग्र, खे़ङ्ग किप्मागे़घुबा सुक्नाःम्बारो॥ खे़न् हिम्मिन् आसुत्थो के़बोङ्बा पोङ्ॽ॥ 45 खे़न् हिम्मिन् लुःम्मादेमा पोङ्ॽ, खे़प्मोबा लुङ्हाॽ, सिङ्हाॽ नु ले़ङ्मनाबा पिःन्दाहाॽ मे़देॽरुआङ् ये़क्यक् लाःक्कात् कुभा आसुत्थोबादे़न्नो लाप्मे़भुसुर॥ 46 खे़न्नाङ्धो एगाङ् खे़न् हिम्मिन् मे़सुबु मे़भत्छुर थारिक् हिम्मो कुभा मे़लासे़ने़भग्र खे़ङ्हाॽ युःन्छिक् थारिक् आसुत्थो मे़बोङ्ॽ॥ 47 हे़क्क्याङ् खे़न् हिम्मो के़इम्बा इग्र के़जाबे़ल्ले़ खुने़ॽ कुजाङ्ङिन् वाहप्मा पोङ्ॽ॥ 48 “कर निङ्वाॽफुसाम्बे़न् खे़न् हिम्मो लाःत्ताङ् साॽरुल्ले़ हिम्मिन् मे़ले़ङुआङ् एगाङ् सुक्नाःम्बान् वामुबा होप्ने़भग्र, निङ्वाॽफुसाम्बे़ल्ले़ खे़न् हिम्मिन् सुत्थो लेःत्तुआङ् उवा चोगुर, थेआङ्भे़ल्ले़ सुक्नाःम्बा थॽमा नाॽरे़आङ् वाॽ॥ 49 हे़क्क्याङ् हिम्मिन् सुत्थो चोःक्मारे़ लागि खे़ल्ले़ पु ने़त्छि, साम्माङ्सिङ्, हिसप याःन्निन् नु हे़ःत्ताङ्बा खि तारुर॥ 50 हे़क्क्याङ् खे़ल्ले़ फुजिक्को के़याक्पा सेसेबा च्वाःत्तिल्ले़ कुसम्धाङ् ने़त्छि पुहाॽओ लत्छा से़रुर॥ 51 खे़ब्याङ् साम्माङ्सिङ्, हिसप याःन्, हे़ःत्ताङ्बा खिःन् हे़क्क्याङ् कुहिङ्वे़त् पुःन् याङ्सिङ्ङाङ् खे़न् से़प्मनाबा पुःल्ले़ कुमाक्खिॽओ नु सेसेबा च्वाःत्तो निःप्सुआङ् खे़न् हिम्मो नुसिले़ङ् थारिक् साक्खुर॥ 52 खे़ल्ले़ पुःल्ले़ कुमाक्खिन्, सेसेबा च्वाःत्तिन्, कुहिङ्वे़त् पुःन्, साम्माङ्सिङ्ङिन्, हिसप यान् नु हे़ःत्ताङ्बा खिःल्ले़ हिम्मिन् सुत्थो चोगुर॥ 53 खे़ब्याङ् खे़ल्ले़ कुहिङ्वे़त् पुःन् चाहे ये़क्यक् लाःक्कात् ताम्दाम्बादे़न्नो ले़रुदेसुर॥ कम्भलॽरिक् खुने़ॽ खे़न् हिम्मिल्ले़ लागि लायोलाम् ले़प्मि नाःक्तुॽ, खे़ब्याङ् खे़न् हिम्मिन् सुत्थो पोङ्ॽ॥” 54 होरिक्पो के़लःम्बा के़रे़क् परिक्पा आलिःक्लिःक्पा तुक्मा, हे़क्क्याङ् के़सोबा तुक्मा, 55 चाङ्ङोबा नु हिम्मोबा सुक्नाःम्बा, 56 याङ्घेःक् नु के़धङ्बा, हे़क्क्याङ् फक्वाःल्ले़ कुयोःक्किन् सुत्थो नु आसुत्थो लेःप्मा थिम्मिन् हाबा कन्हाॽरो॥ 57 होरिक्पो के़लःम्बा आलिःक्लिःक्पा तुक्माहाॽ नु सुक्नाःम्बा के़धॽबालाम् सुत्थो पोङ्मा थिम्हाॽ आम्भा कन्हाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.