ले़बि 13 - लिम्बुहोरिक्को याङ्घेःक् के़लःम्बाल्ले़ कुयाःम्बेओ थिम्हाॽ 1 यहवे दाङ्बे़ल्ले़ मोसान् नु हारुने़न् मे़त्तुसि, 2 “कुभा मनाःल्ले़ कुहोरिक्पान् थङ्दु इग्र फक्वा लःन्दे़ किग्र फदाङ्बा कुयोक् चुक्ते़ने़भग्र, हे़क्क्याङ् खे़ल्ले़ कुहोरिक्को के़जत्छिङ्बा तुक्माल्ले़ याङ्घुने़भग्र, खे़न् निङ्वाॽफुसाम्बा हारुनओ इग्र कुस्साहाॽओबा कुभा थिक्पारो मे़दारुर॥ 3 खे़ल्ले़ कुहोरिक्पो के़लःम्बा याङ्घेःक्किन् निङ्वाॽफुसाम्बाल्ले़ ओमे़त्तुर, हे़क्क्याङ् खे़ल्ले़ कुहोरिक्को तुक्माल्ले़ तरुबादे़न्नो के़लिङ्बा कुम्ब्रिक्किन् फदाङ्बा पोःक्खे़आङ् युङ्ॽ हे़क्क्याङ् खे़न् याङ्घेःक्किन् होरिक्किन्नुःल्ले़आङ् पाक्खोःङ् निधाबे़ने़भग्र, खे़ङ्ग आलिःक्लिःक्पा तुक्मारो॥ निङ्वाॽफुसाम्बाल्ले़ खुने़ॽ साॽरुआङ् आसुत्थो लेःत्तुआङ् उवा चोगुर॥ 4 कर खे़न् कुयोःक्किन् होरिक्पो फदाङ्बा चोःक्ने़भग्र, हे़क्क्याङ् ओमे़प्मे़ल्ले़ खे़न् होरिक्पो मुमुक् सिगाङ् थारिक् निमे़दे़त्ते़न्ने़भग्र, खे़ब्याङ् खे़प्मो के़लिङ्बा मुरिक्किन्नाङ् फदाङ्बा मे़म्बोङ्ङे युङ्ने़भग्र, निङ्वाॽफुसाम्बे़ल्ले़ खे़न् के़दुक्पे़न् नुसि ये़न् थारिक् लाःत्लाःत् युक्खुर॥ 5 नुसि ये़न् के़त्तिल्ले़ याःन्दिक् निङ्वाॽफुसाम्बे़ल्ले़ खे़न् साॽरुल्ले़ कुइसिःक्सिःक् पत्, हे़क्क्याङ् होरिक्पो खे़न् याङ्घेःक्किन् मे़म्बोए पत्ने़भग्र, निङ्वाॽफुसाम्बाल्ले़ खे़न् याम्मो वेॽ नुसि ये़न् थारिक् लाःत्लाःत् युक्खुर॥ 6 नुसि ये़न् के़त्तिल्ले़ याःम्मा निङ्वाॽफुसाम्बाल्ले़ खे़न् याम्मो साॽरुल्ले़ तुक्मे़न् आजे़त् चप्चप् लॽरे़आङ् पत् हे़क्क्याङ् होरिक्पो मे़न्वाम्मे पत्ने़भग्र, निङ्वाॽफुसाम्बाल्ले़ खे़न् सुत्थो लेःत्तुआङ् उवा चोगुर॥ खे़ङ्ग याङ्घेःक्रक्लो॥ खे़ल्ले़ कुजाङ्ङिन् वाहप्तुर हे़क्क्याङ् थिम् कुइसिक् खे़न् सुत्थो पोङ्ॽ॥ 7 कर सुत्थो पोङ्मान् निःन्धो चोःक्मारे़ लागि निङ्वाॽफुसाम्बाओ ओसेःन्धाङ् चोःक्मा सुःप्माआङ्साङ् खे़न् याङ्घेःक्किन् होरिक्पो याम्मो वामुदेॽरुने़भग्र, निङ्वाॽफुसाम्बाओ खुने़ॽ आबाङे पेःक्माआङ् ओःन्धाक्सिङ्मा पोङ्ॽ॥ 8 हे़क्क्याङ् निङ्वाॽफुसाम्बाल्ले़ साॽरुल्ले़ होरिक्को याङ्घेःक्किन् वामे़आङ् पत्ने़भग्र, निङ्वाॽफुसाम्बाल्ले़ खे़न् आसुत्थो लेःत्तुआङ् उवा चोगुर, खे़न् आलिःक्लिःक्पा तुक्मारो॥ 9 “कुभा मनाःन् आलिःक्लिःक्पा होरिक्पा तुक्माल्ले़ याङ्घुआङ् वाॽने़भग्र, खे़न् मनान् निङ्वाॽफुसाम्बाओ ताःप्मा पोङ्ॽ॥ 10 हे़क्क्याङ् निङ्वाॽफुसाम्बे़ल्ले़ साॽरुल्ले़ होरिक्पान् फदाङ्बा थङ्दुबाल्ले़ चोगुल्ले़ खे़प्मोबा मुरिक्किन् फदाङ्बा पोःक्खे़बा नु थङ्दुबादे़न्नो हे़न्ने़क्सा निगे़धाःप्पा याङ्घेःक् पोःक्खे़ने़भग्र, 11 खे़न् यरिक् ये़म् थे़म्बा के़बप्पा होरिक्पा तुक्मारो, हे़क्क्याङ् निङ्वाॽफुसाम्बे़ल्ले़ खे़न् आसुत्थो लेःत्तुआङ् उवा चोगुर॥ खुने़ॽ खे़न् लाःत्लाःत् मे़युक्खुन्ल, थेआङ्भे़ल्ले़ खे़न् आसुत्थो पोःक्खे़चुरे़आङ् वाॽ॥ 12 “तुक्मे़न् होरिक्पाओ पोरे़र पे, हे़क्क्याङ् निङ्वाॽफुसाम्बे़ल्ले़ खे़न् ओमे़त्तुल्ले़ के़दुक्पे़ल्ले़ कुधे़गेःक्कोनु कुलाङ्ङो थारिक्के होरिक्पाओ वामुआङ् पत्ने़भग्र, 13 खम्भ्याङ् निङ्वाॽफुसाम्बे़ल्ले़ खे़न् साॽरुल्ले़ तुक्मे़न् थक्को कुरे़ःम् थिम्सुआङ् पत्ने़भग्र, खुने़ॽ खे़न् के़दुक्पे़न् सुत्थो पोःक्खे़ फाॽआङ् उवा चोगुर॥ खे़न् के़रे़क् फुत्त्रिःङ्ग्याःप्पा पोःक्खे़ चुरे़बाल्ले़ चोगुल्ले़ खे़न् मनाःङ्ग सुत्थोरो॥ 14 कर खे़ॽयो हे़न्ने़क्सा निदे़त्ने़भग्र खे़न् आसुत्थो पोङ्ॽ॥ 15 निङ्वाॽफुसाम्बे़ल्ले़ खे़न् साॽरुल्ले़ कुहे़न्ने़क्सान् निधाबे़ने़भग्र खे़न् आसुत्थो लेःत्तुआङ् उवा चोगुर॥ खे़न् हे़न्ने़क्साःङ्ग आसुत्थोरो, खे़न् आलिःक्लिःक्पा तुक्मारो॥ 16 कर खे़न् हे़न्ने़क्सान् याम्मो फदाङ्बा पोःक्खे़ लःन्दे़ने़भग्र खे़न् मनान् निङ्वाॽफुसाम्बाल्लो पेःक्ल, 17 हे़क्क्याङ् निङ्वाॽफुसाम्बे़ल्ले़ खे़न् साॽरुल्ले़ खे़न् याङ्घेःक्किन् फदाङ्बा पोःक्खे़आङ् पत्ने़भग्र खे़न् निङ्वाॽफुसाम्बे़ल्ले़ खे़न् के़दुक्पे़न् सुत्थो लेःत्तुआङ् उवा चोगुर॥ खे़ब्याङ् खे़न् मनान् सुत्थो पोङ्ॽ॥ 18 “कुभा मनाःल्ले़ कुहोरिक्पो होॽ लःन्दे़आङ् वेःत्ते़, 19 हे़क्क्याङ् खे़न् होॽ लःन्दे़बादे़न्निन् फदाङ्बा पोःक्खे़आङ् थङ्दु इग्र हे़ःत्के़लॽबा फदाङ्बा कुयोक् खे़ॽयो चुक्ते़ने़भग्र, खे़न् पेःक्काङ् निङ्वाॽफुसाम्बान् आबाङे ओःन्धाक्तुर पोङ्ॽ॥ 20 निङ्वाॽफुसाम्बे़ल्ले़ साॽरुल्ले़ खे़न् कुयोःक्किन् होरिक्पान्नुःल्ले़ मुमुक् निधाबे़ हे़क्क्याङ् मुरिक्किन्नाङ् फदाङ्बा पोःक्खे़ने़भग्र, निङ्वाॽफुसाम्बे़ल्ले़ खे़न् आसुत्थो लेःत्तुआङ् उवा चोगुर॥ खे़न् आलिःक्लिःक्पा तुक्मारो॥ खे़ङ्ग होॽओलाम् के़लःम्बारो॥ 21 कर निङ्वाॽफुसाम्बे़ल्ले़ साॽरुल्ले़ खे़ॽयो कुभा फदाङ्बा मुरिक् मे़युङ्ङे़न्ने़भग्र, हे़क्क्याङ् होरिक्पान्नुःल्ले़ सिगाङ् मुमुक् होप् खे़ब्याङ् हेरे़आङ् मये़ने़भग्र, निङ्वाॽफुसाम्बाल्ले़ खे़न् नुसि ये़न् थारिक् लाःत्लाःत् युक्खुर॥ 22 खे़न् होरिक्पाओ वामुआङ् पत्ने़भग्र, निङ्वाॽफुसाम्बे़ल्ले़ खे़न् आसुत्थो लेःत्तुआङ् उवा चोगुर, खे़ङ्ग आलिःक्लिःक्पा तुक्मारो॥ 23 कर खे़न् कुयोःक्किन् मे़न्वाम्मे थिक्मे़त्थिक् पत्ने़भग्र खे़ङ्ग होॽइल्ले़ कुयोःक्लो॥ निङ्वाॽफुसाम्बे़ल्ले़ खे़न् सुत्थो लेःत्तुआङ् उवा चोगुर॥ 24 “कुभारे़ कुहोरिक्पो मिगे़राक्पा याङ्घेःक् चुक्ते़ हे़क्क्याङ् खे़न् मिगे़राक्पा याङ्घेःक्कोबा हे़न्ने़क्साओ हे़ःत्हे़ःत् के़लॽबा फदाङ्बा इग्र फदाङ्बा कुयोक् चुक्ते़भग्र, 25 निङ्वाॽफुसाम्बे़ल्ले़ खे़न् कुयोःक्किन् साॽरुर, हे़क्क्याङ् खे़न् कुयोःक्को के़लिङ्बा मुरिक्किन् फदाङ्बा नु ओमे़प्माल्ले़ होरिक्पान्नुःल्ले़ सिगाङ् मुमुक् निदे़त्ते़ने़भग्र, खे़न् आलिःक्लिःक्पा तुक्मारो॥ खे़ङ् मिगे़राक्पा याङ्घेःक्को के़दे़बा के़लःम्बारो॥ निङ्वाॽफुसाम्बाल्ले़ खे़न् आसुत्थो लेःत्तुआङ् उवा चोगुर, खे़ङ्ग होरिक्पाओ के़लःम्बा आलिःक्लिःक्पा तुक्मारो॥ 26 कर निङ्वाॽफुसाम्बे़ल्ले़ साॽरुल्ले़ खे़न् कुयोःक्को फदाङ्बा मुरिक् मे़युङे़न्, हे़क्क्याङ् होरिक्पान्नुःल्ले़ मुमुक् सिगाङ्ङाङ् मे़जोक्ने़न् कर हेर पेःक्ल पत्ने़भग्र, निङ्वाॽफुसाम्बे़ल्ले़ खे़न् नुसि ये़न् थारिक् लाःत्लाःत् युक्खुर॥ 27 निङ्वाॽफुसाम्बे़ल्ले़ खे़न् नुसिगेक्पा ये़न्नो साॽरुर॥ खे़न् होरिक्पाओ वामुआङ् पत्ने़भग्र निङ्वाॽफुसाम्बे़ल्ले़ खे़न् आसुत्थो लेःत्तुआङ् उवा चोगुर॥ खे़न् होरिक्कोबा आलिःक्लिःक्पा तुक्मारो॥ 28 कर खे़न् कुयोःक्किन् मे़न्वाम्मे थिक्मे़त्थिक् पत्ने़भग्र हे़क्क्याङ् मये़ने़भग्र, खे़न् मिगे़दिक्पा याङ्घेःक्कोलाम् थङ्दुबारो॥ खे़ब्याङ् निङ्वाॽफुसाम्बे़ल्ले़ खे़न् सुत्थो लेःत्तुआङ् उवा चोगुर, थेआङ्भे़ल्ले़ खे़ङ्ग मिगे़राक्पा याङ्घेःक्किल्ले़ कुयोःक्लक्लो॥ 29 “कुभा ये़म्बित्छा इग्र मे़न्छुमाःल्ले़ कुधे़गेःक्पो किग्र कुसिङ्दाङ्मो याङ्घेःक् पत्ने़भग्र, 30 निङ्वाॽफुसाम्बे़ल्ले़ खे़न् याङ्घेःक्किन् साॽरुर, हे़क्क्याङ् खे़न् होरिक्पान्नुःल्ले़ मुमुक् निदे़त्ते़ने़भग्र खम्भ्याङ् खे़प्मो के़बप्पा मुरिक्किन् साॽरिक् काॽराःङ्लाःङ्बा नु अम्दाङ्बा चोःक्ने़भग्र, निङ्वाॽफुसाम्बे़ल्ले़ खे़न् आसुत्थो लेःत्तुआङ् उवा चोगुर॥ खे़ङ्ग के़सोबा तुक्मा, इग्र थे़गेक् किग्र सिङ्दाङ्मोबा आलिःक्लिःक्पा तुक्मारो॥ 31 कर निङ्वाॽफुसाम्बे़ल्ले़ खे़न् तुक्मे़न् साॽरुल्ले़ खे़न् होरिक्पान्नुःल्ले़ मुमुक् निमे़दे़त्ने़न् हे़क्क्याङ् खे़प्मो माक्ताङ्बा मुरिक्काङ् मे़युङ्ने़न्ने़भग्र, निङ्वाॽफुसाम्बे़ल्ले़ खे़न् के़दुक्पे़न् नुसि ये़न् थारिक् लाःत्लाःत् युक्खुर॥ 32 नुसिगेक्पा ये़न्नो निङ्वाॽफुसाम्बे़ल्ले़ खे़न् याङ्घेःक्किन् साॽरुर, हे़क्क्याङ् खे़न् के़सोबा तुक्मे़न् मे़न्वाम्मे पत् खे़ब्याङ् खे़प्मो मुरिक्के़न् अम्दाङ्बा मे़म्बोङ्ङे युङ्ॽ खम्भ्याङ् खे़न् होरिक्पान्नुःल्ले़ मुमुक् मे़ल्लःत्ते पत्ने़भग्र, 33 खे़ल्ले़ कुयाङ्घेःक्के़न् चाहे ले़रुआङ् खुने़ॽ कुधे़गेःक्किन् नु कुम्धोन् नःक्खुर॥ निङ्वाॽफुसाम्बाल्ले़ खे़न् के़दुक्पे़न् आल्लसाङ् नुसि ये़न् थारिक् लाःत्लाःत् युक्खुर॥ 34 नुसिगेक्पा ये़न्नो निङ्वाॽफुसाम्बे़ल्ले़ खे़ल्ले़ के़सोबा कुदुक्मे़न् साॽरुर॥ खे़न् तुक्मे़न् मे़न्वाःम्मे पत्ताङ् होरिक्पान्नुःल्ले़ मुमुक् पप्पा निमे़धाःप्ने़न्ने़भग्र निङ्वाॽफुसाम्बाल्ले़ खे़न् सुत्थो लेःत्तुआङ् उवा चोगुर॥ हे़क्क्याङ् खे़ल्ले़ कुजाङ्ङिन् वाहप्तुआङ् खुने़ॽ सुत्थो पोङ्ॽ॥ 35 कर खे़न् सुत्थो पोःक्खे़बा उवा चोगुआङ्साङ् के़सोबा तुक्मे़न् होरिक्पो वाम्मा हेःक्तुने़भग्र, 36 निङ्वाॽफुसाम्बाल्ले़ खे़न् साॽरुर॥ खे़न् होरिक्पो वामुर तेॽरुने़भग्र, निङ्वाॽफुसाम्बे़ल्ले़ अम्दाङ्बा मुरिक् युङ्बि मेःम्बि फाॽआङ् ओमे़प्मा चाहा मे़जोक्ने़न्॥ खे़ङ्ग आसुत्थोरो॥ 37 कर निङ्वाॽफुसाम्बे़ल्ले़ साॽरुल्ले़ खे़न् के़सोबा तुक्मे़न् आम्भा कुइसिःक्सिःक् पत् हे़क्क्याङ् खे़प्मो माक्ताङ्बा मुरिक् लिङ्से़ने़भग्र, खे़न् तुक्मे़ङ्ग वेःत्ते़बारो॥ खे़न् सुत्थो चोक्, खे़ब्याङ् निङ्वाॽफुसाम्बे़ल्ले़ खे़न् सुत्थो लेःत्तुआङ् उवा चोगुर॥ 38 “कुभा ये़म्बित्छा इग्र मे़न्छुमाःल्ले़ कुहोरिक्पो फदाङ्बा कुयोःक्हाॽ पत्ने़भग्र, 39 निङ्वाॽफुसाम्बे़ल्ले़ खे़न् साॽरुर, हे़क्क्याङ् खे़ल्ले़ कुहोरिक्पो खे़न् कुयोःक्हाॽ फुःत्तक्तक्पा पत्ने़भग्र खे़ङ्ग होरिक्पो के़लःम्बा कुयोःक्रक्लो॥ खे़न् मनान् सुत्थोए चोक्॥ 40 “कुभारे़ कुधेगेःक् मुरिक्किन् के़रे़क् लुगे़आङ् वाॽने़भग्र खे़न् त्वाले़ःक्के पोःक्खे़बारक्, कर खे़न् सुत्थोए चोक्॥ 41 खे़ल्ले़ कुधे़गेक् इःन् खे़ल्ले़ कुधे़गेःक्किल्ले़ तगाङ् ले़प्माङ् ले़ःक्ते़आङ् पत्ने़भग्र खे़ल्ले़ कुद्वाबे़न् ले़ःक्ते़बारो, कर खे़न् सुत्थोए चोक्॥ 42 कर खे़ल्ले़ कुने़रे़म्बोःप्मा इग्र कुद्वाबा के़ले़ःक्पो हे़ःत्हे़ःत् के़लॽबा फदाङ्बा याङ्घेःक्ने़भग्र खे़न् ने़रे़म्बोःप्मा इग्र त्वाबोलाम् के़भे़क्पा के़लःम्बा आलिःक्लिःक्पा तुक्मारो॥ 43 निङ्वाॽफुसाम्बे़ल्ले़ खे़न् साॽरुआङ् ओमे़त्तुल्ले़ आलिःक्लिःक्पा तुक्मा हे़क्के ने़रे़म्बोःप्मा इग्र त्वाबा के़ले़ःक्पो थङ्दुआङ् हे़ःत्हे़ःत् के़लॽबा याङ्घेःक् निधाबे़ने़भग्र, 44 खे़न् मनान् के़दुक्पा नु आसुत्थोरो॥ खे़ल्ले़ कुधे़गेःक्पो के़बप्पा याङ्घेःक्किल्ले़ चोगुल्ले़, निङ्वाॽफुसाम्बे़ल्ले़ खे़न् आसुत्थो लेःत्तुआङ् उवा चोगुर॥ 45 “आलिःक्लिःक्पा तुक्मा के़गप्पा मनाःल्ले़ के़दे़ःङ्बा चाङ् चाङ्मा पोङ्ॽ, हे़क्क्याङ् खे़ल्ले़ कुधे़गेःक्पोबा थे़गेःक्इःन् ताङ्जिङ्सा पप्मा पोङ्ॽ॥ खे़ल्ले़ मुहाङ् ले़प्माङ्बा कुनाःन् ते़प्तुआङ् ‘आसुत्थो! आसुत्थो!’ लॽर अःक्ल पोङ्ॽ॥ 46 आप्फाल्ले़ थारिक् खे़न् तुक्मे़ल्ले़ मे़ले़रुन्, खे़न् आसुत्थोए पोङ्ॽ॥ खे़न् एःक्से़त्छा युङ्मा पोङ्ॽ॥ खे़ल्ले़ कुयुङ्मादे़न्निन् साःङ्गाहिम्हाॽलाम् लाःक्कात् पोङ्मा पोङ्लो॥ सुक्नाःम्बा के़धॽबाल्ले़ कुयाःम्बेओ थिम्हाॽ 47 “आत्तिन् चाङ्ङो सुक्नाःम्बा के़धाबा कुयोक् पत्, खे़न् से़मुरिक् पोङ्साङ् इग्र नैनासुत् पोङ्साङ्, 48 खे़न् थाक्मनाबा पोङ्साङ् इग्र फमनाबा पोङ्साङ्, नैनासुत् इग्र से़मुरिक् थे़मा पोङ्साङ्, सिहोॽबा किग्र सिहोॽबा तमनाबा च्यासाङ्— 49 हिःक्ताङ्बा सुक्नाःम्बा इग्र हे़ःत्ताङ्बा सुक्नाःम्बा के़धाबा, चाङ्, सिहोॽबा, थाक्मनाबा, फमनाबा इग्र सिहोॽबा चिगक्वा थे़माओ पत्छाङ् खे़ङ्ग के़वाम्बा सुक्नाःम्बारो, हे़क्क्याङ् निङ्वाॽफुसाम्बान् ओःन्धाक्मा पोङ्ॽ॥ 50 निङ्वाॽफुसाम्बे़ल्ले़ खे़ल्ले़ कुयोःक्किन् साॽरुर, हे़क्क्याङ् खे़न् कुयोक् के़जुक्पा चिगक्वान् नुसि ये़न् थारिक् लाःत्लाःत् युक्खुर॥ 51 निङ्वाॽफुसाम्बे़ल्ले़ खे़न् कुयोःक्किन् नुसिगेक्पा ये़न्नो साॽरुर॥ चाङ्, थाक्मनाबा, फमनाबा इग्र थे़मा याःम्बक्को याङ्मनाबा सिहोॽबाओ खे़न् सुक्नाःम्बान् वामुआङ् पत्ने़भग्र खे़न् किप्मागे़घुबा सुक्नाःम्बारो॥ खे़न् चिगक्वान् आसुत्थोरो॥ 52 खे़ब्याङ् खे़न् सुक्नाःम्बा के़धॽबा चाङ्ङिन्, थाक्मनाबा, से़मुरिक्, नैनासुत् इग्र थे़मा सिहोॽबा चिगक्वा थेसाङ् निङ्वाॽफुसाम्बाल्ले़ खे़न् मिधिक्खुदेसुर, थेआङ्भे़ल्ले़ खे़न् आगिःन्गिःम्बा सुक्नाःम्बारो॥ मिओ खे़न् मिधिङ्मादेमा पोङ्ॽ॥ 53 “कर निङ्वाॽफुसाम्बे़ल्ले़ खे़न् साॽरुल्ले़ खे़न् सुक्नाःम्बान् चाङ्, थाक्मनाबा, फमनाबा, इग्र थे़मा सिहोॽबा चिगक्वाओआङ् वामुबा होप्ने़भग्र, 54 खे़न् सुक्नाःम्बा के़धॽबा चाङ्ङिन् वाहप्मारे़ लागि निङ्वाॽफुसाम्बे़ल्ले़ इङ्जाङ् पिरुसिर॥ खे़ब्याङ् खे़ल्ले़ आल्लसाङ् नुसि ये़न् थारिक् लाःत्लाःत् युक्खुर॥ 55 खे़न् चिगक्वान् वामे़हप्तुआङ् निङ्वाॽफुसाम्बे़ल्ले़ साॽरुर, हे़क्क्याङ् सुक्नाःम्बे़न् मे़न्वाम्मे पत्ताङ् मे़न्जाःन्नेबा हे़क्के लॽने़भग्र खे़न् आल्लसाङ् आसुत्थोए चोक्॥ खे़न् सुक्नाःम्बे़न् सिगाङ् ले़प्माङ् पत्छाङ् लाःक्कात् पत्छाङ्, मिओ खे़न् चाङ्ङिन् मिधिङ्मादेमा पोङ्ॽ॥ 56 खे़न् चाङ्ङिन् वामे़हप्तुआङ् निङ्वाॽफुसाम्बे़ल्ले़ साॽरुल्ले़ सुक्नाःम्बे़न् माबेःक्ल पत्ने़भग्र खे़न् चाङ्ङिन्, थाक्मनाबा, इग्र फमनाबा किग्र सिहोॽबोलाम् खे़न् सुक्नाःम्बा के़धॽबा कुले़प्पिल्लक् निङ्वाॽफुसाम्बे़ल्ले़ थे़ःक्खुदे़सुर॥ 57 कर खे़न् सुक्नाःम्बे़न् आल्लसाङ् चाङ्, थाक्मनाबा, फमनाबा इग्र कुभा सिहोॽबा चिगक्वाओ याम्मो निधाबे़ने़भग्र, खे़न् वामुदेॽरुर पप्पारो॥ खे़न् सुक्नाःम्बा के़धॽबा चिगक्वान् मिओ मिधिङ्मादेमा पोङ्ॽ॥ 58 आत्तिन् चाङ्, थाक्मनाबा, फमनाबा इग्र थे़मा सिहोॽबा चिगक्वासाङ् वाहप्मे़ल्ले़ खे़प्मोलाम् सुक्नाःम्बे़न् पेगे़ने़भग्र, खे़न् याम्मो निले़ङ् वाहप्मा पोङ्ॽ, हे़क्क्याङ् खे़न् सुत्थो पोङ्ॽ॥” 59 से़मुरिक् इग्र नैनासुत् चिरिक्को, थाक्मनाबा किग्र फमनाबा नु कुभा सिहोॽबा चिगक्वाओ सुक्नाःम्बा के़धॽबा कुयोःक्किन् सुत्थो नु आसुत्थो लेःप्मारे़ लागि इःप्मा नाःप्मा के़बोङ्बा थिम्हाॽ आम्भा कन्हाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.