ले़बि 12 - लिम्बुके़साङ्सिङ्मा मे़न्छुमान् सुत्थो पोङ्मा थिम् 1 यहवे दाङ्बे़ल्ले़ मोसान् मे़त्तु, 2 “खे़ने़ॽ इस्राइलिहाॽ मे़त्ते़से़ॽ—‘मे़न्छुक्मा के़बोङ्माआङ् ये़म्बित्छासा के़गप्मा मे़न्छुमान् नुसि ये़न् थारिक् आसुत्थो पोङ्ॽ॥ कुसिम् वाहप्मा वाॽबा ये़न्नो हे़क्केए खे़न् आसुत्थो पोङ्ॽ॥ 3 ये़त्छिगेक्पा ये़न्नो ये़म्बित्छा अङे़ःक्वान् हर्दो मे़हे़गु मे़बिरुर॥ 4 खे़न् एगाङ् खे़न् मे़न्छुमाःल्ले़ कुमाक्खिॽ वयुमालाम् सुत्थो पोङ्मारे़ लागि सुम्बोङ्ङाङ् सुम्सि ये़न् थारिक् हाङ्घुर पोङ्ॽ, हे़क्क्याङ् सुत्थो पोङ्मा ये़न् मे़ङ्गे़त् मे़न्जुःत्ते थारिक् खुने़ॽ आत्तिन् सुत्थो पाःन्निन्नाङ् सुमा मे़नुॽने़न्, सेसेदे़न्नोआङ् पेःक्मा मे़नुॽने़न्॥ 5 “‘कर खे़ल्ले़ मे़न्छुमासा कत्तुने़भग्र कुसिम् वाहप्मा वाॽमा ये़न्नो हे़क्केए खुने़ॽ ये़त्नाम् ने़त्छि थारिक् आसुत्थो पोङ्ॽ, हे़क्क्याङ् कुमाक्खिॽ वयुमालाम् सुत्थो पोङ्मारे़ लागि तुक्पोङ्ङाङ् तुक्सि ये़न् थारिक् हाङ्मा पोङ्ॽ॥ 6 “‘खुने़ॽ सुत्थो कुबोङ्मा ये़न्निन् के़प्मा चुःत्ताङ्, ये़म्बित्छासाःल्ले़ कुलागिसाङ् मे़न्छुमा साःल्ले़ कुलागिसाङ्, खुने़ॽ मिधिङ्मनादेमनाबा वयागे़न् सिदुङ्जभारे़ लागि तङ्बे थिक् के़गे़प्पा थुःम्बा नु लायोलाम् ले़प्मि खोमा सिदुङ्जभारे़ लागि लत्छा पे़र्वाज्याःक् इग्र साप्पे़त्त्रुःक्मा थिक् तुम्मादे़न् साःङ्गाहिम्मोबा लाःप्मादे़न्नो निङ्वाॽफुसाम्बाओ तारुर॥ 7 निङ्वाॽफुसाम्बाल्ले़ यहवे दाङ्बे़ल्ले़ कुदगि खे़ङ्हाॽ तोःन्दुसिआङ् खे़न् मे़न्छुमाःल्ले़ कुलागि लायोलाम् ले़प्मि नाःक्तुॽ॥ हे़क्क्याङ् खे़न् मे़न्छुमान् कुमाक्खिॽ वयुमालाम् सुत्थो पोङ्बा निःन्धो पोङ्ॽ॥ “‘मे़न्छुमाःल्ले़ ये़म्बित्छा इग्र मे़न्छुमासा कत्तुआङ् एगाङ् खे़ल्ले़ लागि चोःक्मा के़बोङ्बा थिम्मिन् हाबा कन्लो॥ 8 “‘थुःम्बा ताःप्मा खे़ल्ले़ मे़हिॽरुन्ने़भग्र खुने़ॽ ने़त्छि साप्पे़त्त्रुःक्मा इग्र पे़र्वाज्याःक् ने़त्छि—लत्छा मिधिङ्मनादेमनाबा सिदुङ्जभारे़ लागि नु वेॽइन् लायोलाम् ले़प्मि खोमा सिदुङ्जभारे़ लागि तारुर॥ कम्भलॽरिक् निङ्वाॽफुसाम्बाल्ले़ खे़ल्ले़ कुलागि लायोलाम् ले़प्मि नाःक्तुॽ, हे़क्क्याङ् खे़न् मे़न्छुमान् सुत्थो पोङ्बा निःन्धो पोङ्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.