ले़बि 11 - लिम्बुचामा के़नुॽबा थक्साहाॽ 1 यहवे दाङ्बे़ल्ले़ मोसान् नु हारुने़न् मे़त्तुसि, 2 “इस्राइलिहाॽ खे़न्छिॽ अक्खे मे़त्ते़छे़से़ॽ—इक्सादिङ् खाम्बेःक्मो के़वाॽबा के़रे़क् कुहिङ्वे़त् थक्साहाॽओ खिनिॽ कन्हाॽ चामासि नुॽ॥ 3 थक्साहाॽओ ने़त्छि कुलक्को कुलाङ् तोॽभेःत् के़से़बा नु कुजा के़अम्बाहाॽ चामासि नुॽ॥ 4 “‘हे़क्केसाङ् कुजा के़अम्बारक् इग्र कुलाङ् तोॽभेःत् के़से़बारक् के़बप्पा कन् थक्साहाॽ खिनिॽ चामासि मे़नुॽने़न्—उमे, थेआङ्भे़ल्ले़ उमेःल्ले़ कुजान् अन्दु कर खे़ल्ले़ कुलाङ् तोॽभे़ःत्तिन् के़से़बा मे़बप्ने़न्, खे़न् खिनिॽ लागि आसुत्थो चोक्॥ 5 हे़क्क्याङ् मिघक्पा सुबा, थेआङ्भे़ल्ले़ खे़ल्ले़ कुजा अन्दुॽ, कर खे़ल्ले़ कुलाङ् तोॽभे़ःत्तिन् के़से़म्बा मे़बत्ने़न्॥ खे़न् खिनिॽ लागि आसुत्थो चोक्॥ 6 हे़क्क्याङ् फता, थेआङ्भे़ल्ले़ खे़ल्ले़ कुजा अन्दु, कर खे़ल्ले़ कुलाङ् तोॽभेःत्तिन् के़से़म्बा मे़बत्ने़न्॥ खे़न् खिनिॽ लागि आसुत्थो चोक्॥ 7 हे़क्क्याङ् फाक्, थेआङ्भे़ल्ले़ खे़ल्ले़ कुलाङ् तोॽभेःत्तिन् के़से़म्बाग पत्, कर कुजान् मे़अन्दुन्ॽ॥ खे़न् खिनिॽ लागि आसुत्थो चोक्॥ 8 खे़न् थक्सा साहाॽ खिनिॽ मे़जे़म्मिन्ने़ॽ, खे़ब्याङ् खे़न् थक्सा के़सिबाहाॽ सुमासि मे़नुॽने़न्॥ खे़ङ्हाॽ खिनिॽ लागि आसुत्थो मे़जोक्॥ 9 “‘च्वाःत्तो के़याक्पा कन् थक्साहाॽ खिनिॽ चामा मे़नुॽ, इग्र वरःङ्ङो नु वहःङ्हाॽओ के़याक्पा कुलाप् हे़क्क्याङ् कुसेःक् के़बप्पाहाॽ खिनिॽ चामासि नुॽ॥ 10 कर वरःङ् नु वहःङ्हाॽओ के़याक्पा कुलाप् नु कुसेःक् मे़म्बप्मनाबा, च्वाःत्तो मुन्जिङ् वयाक् के़लॽबा के़रे़क् पाधुङ् ले़क्ङा नु च्वाःत्तो हयङ् हयङ् के़याक्पा के़रे़क् कुहिङ्वे़त् थक्साहाॽ के़रे़क् खिनिॽ लागि सिक्के़ले़ःङ्बा मे़जोक्॥ 11 खे़ङ्हाॽ खिनिॽ लागि सिक्के़ले़ःङ्बा मे़जोःक्पाल्ले़ चोगुल्ले़, खिनिॽ खे़न् पाधुङ् ले़क्ङा साहाॽ मे़जे़म्मिन्ने़ॽ, हे़क्क्याङ् खे़न् पाधुङ् ले़क्ङा कुसिवे़त्हाॽरे़ कुबेसाङ् खिनिॽ पेःक्माए मे़बेगे़म्मिन्ने़ॽ॥ 12 च्वाःत्तो के़याक्पा कर कुलाप् नु कुसेःक् मे़म्बप्मनाबाहाॽ खिनिॽ लागि सिक्के़ले़ःङ्बा मे़जोक्॥ 13 “‘पुसाहाॽओ कन्हाॽ खिनिॽ लागि सिक्के़ले़ःङ्बा मे़जोक्—खे़ङ्हाॽ खिनिॽ चामासि मे़नुॽने़न्, थेआङ्भे़ल्ले़ खे़ङ्हाॽ याम्गे़सिङ्बा मे़जोक्—कक्कफिःक्मा, किथ, कुमाक्ला किथ, 14 कुहे़ःत्ला मया नु के़रे़क् परिक्पा मयाहाॽ, 15 के़रे़क् परिक्पा आःक्वाहाॽ, 16 यम्बा फक्थिःम्बा, कुलुलु के़लॽबा फक्थिःम्बा, वरःङ्ङोबा पु, के़रे़क् परिक्पा फिःत्चोहाॽ, 17 चुक्सा फक्थिःम्बा, च्वाःत्तो के़याक्पा काःक्वा, हम्बुःम्मा, 18 कुभरा फक्थिःम्बा, मुरे़क् खारे़क् थेआङ् के़होप्पा ये़ःङ्घादे़न्नोबा फक्थिःम्बा, ङा के़जाबा मया, 19 ताःङ्वा, के़रे़क् परिक्पा लिलिवा, खे़प् पु नु ने़क्वा मे़वाराप्॥ 20 “‘कुलाप् के़बप्पा कुलाङ् लिसिरे़ लाङ्गे़घेःक्पा के़रे़क् परिक्पा फेॽबाःत्हाॽ खिनिॽ लागि याम्गे़सिङ्बा मे़जोक्॥ 21 कर कुलाप् के़बप्पा कुलाङ् लिसिरे़ लाङ्गे़घेःक्पाहाॽओ खाम्बाङ्ङो लाङ्घेःक्मारे़ लागि कुलाङ्मिक् के़बप्पाहाॽ खिनिॽ चामासि मे़नुॽ॥ 22 खे़ङ्हाॽओ कन्हाॽ खिनिॽ चामासि नुॽ—इग्र के़रे़क् परिक्पा निःङ्घुक्वाहाॽ, ताङ्ले़ःक्क्या प्याःत्, किरिःक्वा, लम्लम् प्याःप्मा॥ 23 कर कुलाङ् लिसिबा कुलाप् के़बप्पा वेॽ के़रे़क् खिनिॽ लागि याम्गे़सिङ्बा मे़जोक्॥ 24 “‘कन्हाॽलाम् खिनिॽ आसुत्थो के़बोःक्खिॽ॥ आत्तिल्ले़ कन् कुसिवे़त्हाॽ सुसुसिॽ, खे़न् युःन्छिक् थारिक् आसुत्थो पोङ्ॽ॥ 25 आत्तिल्ले़ कन्हाॽओबा कुभा के़सिबाहाॽ पक्खुसिॽ, खुने़ॽ कुजाङ्ङिन् वाहप्मा पोङ्ॽ, हे़क्क्याङ् युःन्छिक् थारिक् खे़न् आसुत्थो पोङ्ॽ॥ 26 “‘कुलाङ् तोॽभेःत् के़से़बा मे़म्बप्मनाबा नु कुजा मे़न्अम्मनाबा के़रे़क् थक्साहाॽ खिनिॽ लागि आसुत्थो मे़जोक्॥ खे़न् कुसिवे़त्हाॽ के़सुबाहाॽ के़रे़क् आसुत्थो मे़बोङ्ॽ॥ 27 खुन्छिॽ लाङ् तोॽभेःत्तिल्ले़ के़दक्सिङ्बाआङ् लिसि लाङ्ङिल्ले़ लाङ्गे़घेःक्पा के़रे़क् थक्साहाॽ खिनिॽ लागि आसुत्थो मे़जोक्॥ खे़न् कुसिवे़त् थक्सा के़सुबाहाॽ के़रे़क् युःन्छिक् थारिक् आसुत्थो मे़बोङ्ॽ॥ 28 खे़न् कुसिवे़त्हाॽ के़बङ्बे़ल्ले़ कुजाङ्ङिन् वाहप्तुर पोङ्ॽ, हे़क्क्याङ् खे़न् युःन्छिक् थारिक् आसुत्थो पोङ्ॽ॥ खे़ङ्हाॽ खिनिॽ लागि आसुत्थो मे़जोक्॥ 29 “‘खाम्बाङ्ङो मुन्जिङ् वयाक् के़लॽबाहाॽओ कन्हाॽ चाहे खिनिॽ लागि आसुत्थोसिरो—इग्र हियु, सुबा, के़रे़क् परिक्पा हःन्दगेःक्हाॽ, 30 कदा, नाम्युःक्, नल्ले़ःक्, ये़ःङ्घाओ के़याक्पा हःन्दगेःक् नु कुनारा के़ले़ङ्बा हःन्दगेःक्॥ 31 मुन्जिङ् वयाक् के़लॽबाहाॽओ आसुत्थो कन्हाॽरो॥ कल्ले़ कुसिवे़त्हाॽ हाःत्ले़ सुसुसि, खे़न् युःन्छिक् थारिक् आसुत्थो पोङ्ॽ॥ 32 कन्हाॽओबा कुसिवे़त् थिक् कुभा आत्तिन् सामाओसाङ् लाःत्ने़भग्र, खे़न् पाःन्निन् आसुत्थो पोङ्ॽ॥ खे़न् सिङ्ले़ चिगक्वा, इग्र चाङ्, सिहोॽबा, सागिसाङ् आसुत्थो पोङ्ॽ॥ खे़न् च्वाःत्तो हुम्मा पोङ्ॽ, हे़क्क्याङ् खे़न् युःन्छिक् थारिक् आसुत्थो पोङ्ॽ, खे़न् एगाङ्लक् खे़न् सुत्थो पोङ्ॽ॥ 33 कुभा खाम् खप्प्याओ कन् मुन्जिङ् वयाक् के़लॽबाहाॽलाम् कुभा लत्थिक् लासे़ने़भग्र खे़न् खप्प्याओ के़याक्पा के़रे़क् पाःन्निन् आसुत्थो पोङ्ॽ॥ खे़न् खप्प्यान् खिनिॽ यःप्से़म्दे़से़म्मे़ॽ॥ 34 हे़क्तङ्बा खप्प्याओ युङ्मनाबा च्वाःत्तिन् आत्तिन् कुजाओ लाःत्छाङ् खे़न् आसुत्थो पोङ्ॽ, खे़ब्याङ् हे़क्तङ्बा खप्प्याओ के़याक्पा थुङ्मनाबा थे़माःन्छाङ् आसुत्थो पोङ्ॽ॥ 35 थे़मा पाःन्नोसाङ्, मिहाॽलुङ् किग्र तःक् थोःक्मा खप्प्या, खे़प्मो खे़ल्ले़ कुसिवे़त्हाॽ मे़लासे़नेगभ्र खे़न् आसुत्थो पोङ्ॽ॥ खे़न् पक्क्रे़ॽ पक्क्रे़ॽ हे़रे़म्देसे़म्मे़ॽ॥ खे़ङ्हाॽ आसुत्थोसि, हे़क्क्याङ् खिनिॽ लागि आसुत्थोए मे़जोक्॥ 36 हे़क्केसाङ् वाबुन्दाक्वा इग्र वबाक्कोबा च्वाःत्तिन् सुत्थोए पोङ्ङाङ् ने़ःॽ, कर खे़न् कुसिवे़त्हाॽ के़सुबान् आसुत्थो पोङ्ॽ॥ 37 हेॽमारे़ लागि युङ्मनाबा याॽरिःम्बाओ हे़क्तङ्बा आसुत्थो पाःन्निन् लाःत्छाङ् याॽरिःम्बान् सुत्थोए पोङ्ॽ॥ 38 कर खे़न् याॽरिःम्बाओ च्वाःत् केःप्मनाआङ् याक्काङ् खे़न् कुसिवे़त्हाॽ खे़ल्ले़ कुसम्धाङ् चुक्ते़ने़भग्र, खे़न् खिनिॽ लागि आसुत्थो पोङ्ॽ॥ 39 “‘खिनिॽ साजामा कुभा थक्सान् स्ये़ने़भग्र खे़न् कुसिवे़त् थक्सा के़सुबे़न् युःन्छिक् थारिक् आसुत्थो पोङ्ॽ॥ 40 कुसिवे़त् सा के़जाबा इग्र के़बङ्बे़ल्ले़ कुजाङ्ङिन् वाहप्मा पोङ्ॽ, हे़क्क्याङ् खे़न् युःन्छिक् थारिक् आसुत्थो पोङ्ॽ॥ 41 “‘खाम्बाङ्ङो के़सःन्छिङ्बा चुजुक्सा के़रे़क् मुन्जिङ् वयाक् के़लॽबाहाॽ याम्गे़सिङ्बा मे़जोक्, खे़ङ्हाॽ मे़जाम्सिम्मिन्ने़ॽ॥ 42 साप्पोःक्लाम् के़सःन्छिङ्बा, इग्र लाङ् लिसिरे़ के़उःङ्सिङ्बा, किग्र यरिक् लाङ्हाॽरे़ खाम्बाङ्ङो के़सःन्छिङ्बा मुन्जिङ् वयाक् के़लॽबा फेॽबाःत्हाॽ खिनिॽ चामासि मे़नुॽने़न्, थेआङ्भे़ल्ले़ खे़ङ्हाॽ याम्गे़सिङ्बा मे़जोक्॥ 43 आत्तिन् के़सःन्छिङ्बा मुन्जिङ् वयाक् के़लॽबा थक्साःन्लाम्माङ् खिनिॽ आसुत्थो मे़बोःक्खे़म्मिन्ने़ॽ॥ खे़ङ्हाॽ मे़सुसे़म्सिम्मिन्ने़ॽ, मे़जाम्सिम्मिन्ने़ॽ हे़क्क्याङ् आसुत्थो मे़बोःक्खे़म्मिन्ने़ॽ॥ 44 आङ्गाॽ यहवे दाङ्बा खिनिॽ निङ्वाॽफुमाङ्आ॥ खिनिॽ आबाङे तोःन्नासिम्मे़ॽआङ् सेसे पोःक्खे़म्मे़ॽ, थेआङ्भे़ल्ले़ आङ्गाॽ सेसेबा चोःक्का॥ खाम्बाङ्ङो के़उःङ्सिङ्बा आत्तिन् परिक्पा मुन्जिङ् वयाक् के़लॽबा थक्सालाम्माङ् आसुत्थो मे़बोःक्खे़म्मिन्ने़ॽ॥ 45 थेआङ्भे़ल्ले़ खिनिॽ निङ्वाॽफुमाङ् पोङ्मारे़ लागि मिस्रलाम् खिनिॽ के़लःप्पा के़भे़प्पा यहवे दाङ्बे़न् आङ्गाॽआ॥ कल्ले़चोगुल्ले़ खिनिॽ सेसे पोःक्खे़म्मे़ॽ, थेआङ्भे़ल्ले़ आङ्गाॽ सेसे चोःक्का॥ 46 “‘थक्सा, पुसा नु च्वाःत्तो मुन्जिङ् वयाक् के़लॽबा हे़क्क्याङ् खाम्बाङ्ङो के़सःन्छिङ्बा के़रे़क् थक्सारे़ याःम्बेओबा थिम्हाॽ हाबा कन्हाॽरो॥ 47 सुत्थो नु आसुत्थो, हे़क्क्याङ् थक्साहाॽओ चामा के़नुॽबा नु मे़न्नुॽमनाबा के़से़न्दुम्सिम्ल पोङ्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.