ले़बि 10 - लिम्बुनादाब नु अबिहुरे़ खुन्छिॽ लायो 1 हारुने़ल्ले़ कुस्सा नादाब नु अबिहुःल्ले़ खुन्छिॽ आबाङे आबाङे सुक्पा हाःम्मा साङ्ते़रे़ःङ्हाॽ याङ्ने़त्छिआङ् खे़प्मो मि हाःन्दुसि॥ कम्भलॽरिक् नादाब नु अबिहुःल्ले़ यहवे दाङ्बे़ल्ले़ मुरा मे़त्तुसिआङ् मे़वये़ने़म्बा मिन् खुने़ॽ कुदगि तोःन्दे़सु॥ 2 कल्ले़चोगुल्ले़ खे़न् ये़म्मो यहवे दाङ्बाल्ले़ मिन् पाङ्घु हे़क्क्याङ् यहवे दाङ्बे़ल्ले़ कुदगि मिःल्ले़ खुन्छिॽ खाप्पुथ्यःङ् चोगुसि॥ 3 खे़ब्याङ् मोसाःल्ले़ हारुने़न् मे़त्तु, “यहवे दाङ्बे़ल्ले़ पाःत्तुबा पाःन्निन् हाबा कन् वाॽ—‘आङ्गाॽ आबेसाङ् के़दाबाहाॽओ आङ्गाॽ सेसेबा पोङ्ङा, हे़क्क्याङ् के़रे़क् मनाहाॽरे़ खुन्छिॽ तगि आङ्गाॽ आमिमिदिङ् पोङ्ॽ॥’” हारुने़न् स्वाःत् युङे़॥ 4 हारुने़ल्ले़ कुम्भङा उज्जिएलरे़ कुस्सा मिसाएल नु एलसाफाने़न् मोसाःल्ले़ उःत्तुसिआङ् मे़त्तुसि, “फे़रे़त्छे़आङ् खे़न्छिॽ नाक्पाहाॽ सेसेबादे़न्निल्ले़ कुदगिलाम् पक्खे़ तेॽरे़से़ॽ॥” 5 कल्ले़चोगुल्ले़ खुन्छिॽ फे़रे़छि हे़क्क्याङ् खुन्छिॽ चाक्खे़छुबा लगेःप्पो मोसाःल्ले़ मे़त्तुसिबा कुइसिक् साःङ्गाहिम् लाःक्कात् खे़न् चेहाॽ पक्खे़ तेॽरे़सुसि॥ 6 खे़ब्याङ् मोसाःल्ले़ हारुने़न् नु खे़ल्ले़ कुस्सा एलाजार नु इतामारे़न् मे़त्तुसि, “खिनिॽ थे़गेःक्कोबा थे़गेःक्इःन् ताङ्जिङ्सा मे़ले़रे़म्मिन्ने़ॽ, खिनिॽ चाङ्हाॽ मे़धे़ःक्खे़म्मिन्ने़ॽ, मेःन्ने़भग्र खिनिॽ के़स्ये़ॽइ हे़क्क्याङ् के़रे़क् सङ्जुम्भोहाॽओ यहवे दाङ्बे़ल्ले़ कुसाक्के़न्निन् थाःॽ॥ कर यहवे दाङ्बे़ल्ले़ पाङ्घुबा मिधुङ्दिङ् मिराःक्किल्ले़ खाप्पुथ्यःङ् के़बोङ्बाआङ् के़सिबाहाॽरे़ लागि खिनिॽ काॽइहाॽरे़, इस्राइलबा के़रे़क् हिम्सयङ्हाॽ मे़रिङ् मे़धक्किल्ले़ पोङ्ॽ॥ 7 खिनिॽग तुम्मादे़न् साःङ्गाहिम् लाःप्मादे़न्नोलाम् लाःक्कात् मे़बेगे़म्मिन्ने़ॽ, मेःन्ने़भग्र खिनिॽ के़स्ये़इॽ, थेआङ्भे़ल्ले़ यहवे दाङ्बे़ल्ले़ माङ्थोःक्ना पिमा कुनिःङ्गे़न् खिनिॽ सम्धाङ् पत्॥” कल्ले़चोगुल्ले़ खे़ङ्हाॽरे़ मोसाःल्ले़ मे़त्तुसिबा कुइसिक् मे़जोगुरो॥ निङ्वाॽफुसाम्बाहाॽरे़ लागि साम्योथिम्हाॽ 8 खे़न् एगाङ् यहवे दाङ्बे़ल्ले़ हारुने़न् मे़त्तु, 9 “खिनिॽ तुम्मादे़न् साःङ्गाहिम्मो के़बेगिल्ले़ खे़ने़ॽ नु खे़ने़ॽ के़स्साहाॽरे़ चे़ल्ले़क्सेॽ सेजःङ्वा इग्र वेॽ सेजःङ्वा मे़धुङे़म्मिन्ने़ॽ, मेःन्ने़भग्र खिनिॽ के़स्ये़इॽ॥ कन् पाःन्निन् खिनिॽ के़दाबा थाःक्हाॽओ थिम् पोङ्ल॥ 10 हे़क्केलॽरिक् खिनिॽ चक्खोबा नु मे़न्जोबा, हे़क्क्याङ् सुत्थो नु आसुत्थो पाःन्हाॽ के़से़न्दुम्ल पोङ्ॽ॥ 11 यहवे दाङ्बे़ल्ले़ मोसाःन्लाम् के़बिरिबा थिम्मिन् के़रे़क् इस्राइलिहाॽ खिनिॽ के़हुॽरुम्सिम्ल पोङ्ॽ॥” 12 मोसाःल्ले़ हारुने़न् नु खे़ल्ले़ के़हिङ्बा के़याःक्पा कुस्सा एलाजार नु इतामारे़न् मे़त्तुसि, “यहवे दाङ्बाल्ले़ कुलागि मिओलाम् तोःम्मनाबा सिदुङ्जभाहाॽलाम् के़नम्बाआङ् के़वाॽबा पोगुगे़न् कुजा सिदुङ्जभान् याङ्सिङ्ङे़म्मे़ॽआङ् ले़त्ति तोःम्मादे़न्नो के़भङ्बा सिदाॽ मे़न्याक्के चे़म्मे़ॽ, थेआङ्भे़ल्ले़ खे़न् साॽरिक् सेसेबा चोक्॥ 13 खे़निॽ खे़न् कुभा सेसेबादे़न्नो चे़म्मे़ॽ, थेआङ्भे़ल्ले़ यहवे दाङ्बे़ल्ले़ कुलागि मिओलाम् तोःम्मनाबा सिदुङ्जभाहाॽलाम् कन् खे़ने़ॽ नु खे़ने़ॽ के़स्साहाॽरे़ खिनिॽ खोमा लक्लो, थेआङ्भे़ल्ले़ आङ्गाॽ अक्तङ्बाए इङ्जाङ् खोसुङ्ङाङ् वाॽ॥ 14 कर थाःङ् पङ्मनाबा सिदुङ्जभाःल्ले़ कुसङ्बप्मे़न् नु तोःम्मनाबा कुलाङ्भे़ल्ले़क्मान् खे़ने़ॽ नु खे़ने़ॽ के़स्सा के़एहाॽरे़ सेसेबादे़न्नो चे़म्मे़ॽ, थेआङ्भे़ल्ले़ खे़ङ्हाॽग इस्राइलिहाॽरे़ खुन्छिॽ तङ्जुम् वयागे़न् सिदुङ्जभाहाॽलाम् खे़ने़ॽ नु खे़ने़ॽ के़स्सा के़एहाॽरे़ खिनिॽ खोमा लक् के़म्बिरिबारो॥ 15 मिओलाम् तोःम्मनाबा सिदुङ्जभाहाॽरे़ कुसोःत्तिन्नु सोसोरिक्, तोःम्मनाबा कुलाङ्भे़ल्ले़क्मान् नु पङ्मनाबा कुसङ्बप्मे़न् यहवे दाङ्बे़ल्ले़ कुदगि थाःङ् पङ्मनाबा सिदुङ्जभारे़ लागि खे़ङ्हाॽरे़ मे़दारुर, हे़क्क्याङ् यहवे दाङ्बे़ल्ले़ इङ्जाङ् चोगुबा कुइसिक् खे़ने़ॽ नु खे़ने़ॽ के़स्सा के़एहाॽरे़ लागि खे़ङ्हाॽ सदादिङ्ले़ लागि खोमा युक् पोङ्ॽ॥” 16 आल्ल मोसाःल्ले़ लायोलाम् ले़प्मि खोमा सिदुङ्जभा कुम्बाबा मे़ःन्दाःल्ले़ कुयाःम्बेओ पान् सेःन्दोसुल्ले़ खे़ङ्ग मिमे़धिक्खु मे़सुरुबा तुमु, खुने़ॽ हारुने़ल्ले़ के़हिङ्बा के़याःक्पा कुस्सा एलाजार हे़क्क्याङ् इतामारे़न्नु कुयाःक्ले़ॽरे़आङ् मे़त्तुसि, 17 “खे़न्छिॽ थेआङ् लायोलाम् ले़प्मि खोमा सिदुङ्जभान् सेसेदे़न्नो के़न्ज्ये़सुन्? थेआङ्भे़ल्ले़ खे़ङ्ग चाॽरिक् सेसेबा पान् चोक्॥ सङ्जुम्भोहाॽरे़ लागि लायोलाम् ले़प्मि नाःक्माआङ् खे़ङ्हाॽरे़ खुन्छिॽ आप्तिक्किन् खे़प्मा फाॽआङ् यहवे दाङ्बे़ल्ले़ कुदगि खे़न् खे़न्छिॽ पिने़सिङ्ङाङ् के़वये़सि॥ 18 खे़ल्ले़ कुमाक्खिन् सेसेदे़न्नो के़न्दारे़छुन्बाल्ले़ चोगुल्ले़ खे़न्छिॽ से़क्खासाङ् आङ्गाॽ मुरा मे़त्ने़छिङ्बा कुइसिक् खे़न् कुम्बाबा मे़ःन्दा सान् सेसेदे़न्नो चामा के़बोङ्बा वये़॥” 19 खे़ब्याङ् हारुने़ल्ले़ मोसान् मे़त्तु, “आइन्छा खे़ङ्हाॽरे़ खुन्छिॽ लायोलाम् ले़प्मि खोमा सिदुङ्जभान् नु मिधिङ्मनादेमनाबा वयागे़न् सिदुङ्जभान् यहवे दाङ्बे़ल्ले़ कुदगि मे़दोन्दुआङ् वाॽ, हे़क्केसाङ् आङ्गाॽओ अक्तङ्बा पान् पोःक्खे़द्ये़आङ् वाॽ॥ आङ्गाॽ आइन् लायोलाम् ले़प्मि खोमा सिदुङ्जभान् चाङ्बा हे़क्केःल्ले़ थे खे़न् यहवे दाङ्बे़ल्ले़ कुमिक्साओ नुबा पोःक्खे़बाबि?” 20 आल्ल मोसाःल्ले़ खे़न् पाःन्निन् खे़प्सु, खे़ब्याङ् खुने़ॽ कुनिङ्वाॽ त्ये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.