ले़बि 1 - लिम्बुमिधिङ्मनादेमनाबा सिदुङ्जभा 1 यहवे दाङ्बे़ल्ले़ मोसान् तुम्मादे़न् साःङ्गाहिम् सिगाङ्लाम् उःत्तुआङ् मे़त्तु, 2 “इस्राइलिहाॽ अक्खे मे़त्ते़से़ॽ—‘खिनिॽओलाम् कुभा आत्तिन् मनाःल्ले़साङ् यहवे दाङ्बे़ल्ले़ कुलागि सिदुङ्जभा तोःन्दुल्ले़ वयागे़न् सिदुङ्जभान् खिनिॽ पित् लुप्पोबा इग्र मे़ल्लुक् मे़ःन्दा लुप्पोलाम् खे़ल्ले़ सिदुङ्जभा तोःन्दुर पोङ्ॽ॥ 3 “‘खे़ल्ले़ तोःन्दुबा सिदुङ्जभान् पित्ले़न् मिधिङ्मनादेमनाबा सिदुङ्जभाने़भग्र, मे़ङ्गाःम्मनाबा कुम्बाबा पित्सात्तिन् तोःन्दुर पोङ्ॽ॥ तुम्मादे़न् साःङ्गाहिम्मोबा लाम्धेःत्तो खुने़ॽ खे़न् तोःन्दुर, हे़क्क्याङ् यहवे दाङ्बे़ल्ले़ खे़न् ताःक्तुॽ॥ 4 खे़ल्ले़ मिधिङ्मनादेमनाबा सिदुङ्जभाःल्ले़ कुधे़गेःक्पो खुने़ॽ कुहुक्किन् ने़स्सुर, हे़क्क्याङ् खुने़ॽ कुलायोलाम् ले़प्मि खोमारे़ लागि निङ्वाॽफुमाङ्ङिल्ले़ खे़न् ताःक्तुॽ॥ 5 खे़ल्ले़ खे़न् पित्सात्तिन् यहवे दाङ्बे़ल्ले़ कुदगि च्ये़प्तुआङ् स्ये़रुर॥ हे़क्क्याङ् हारुने़ल्ले़ कुस्सा निङ्वाॽफुसाम्बाहाॽरे़ सामाक्खिन् निःत्ताङ् मे़देॽरुर हे़क्क्याङ् तुम्मादे़न् साःङ्गाहिम्मोबा लाम्धेःत्तिल्ले़ कुबेसाङ्बा ले़त्ति तोःम्मादे़न्निल्ले़ कुयाम्ले़ङ्बो छ्वाःक् मे़हुक्खु मे़देसुर॥ 6 खे़न् एगाङ् खे़ल्ले़ मिधिङ्मनादेमनाबा वयागे़न् सिदुङ्जभाःल्ले़ कुहोरिक्के़न् थिःक्तुआङ् खे़न् थक्सान् कुजक्ता कुले़म्दा पोङ्ल थारिक् खक्तुर॥ 7 निङ्वाॽफुसाम्बा हारुने़ल्ले़ कुस्साहाॽरे़ ले़त्ति तोःम्मादे़न्नो सिङ्हाॽ मे़बे़न्छुआङ् मिःल्ले़ कुसम्धाङ् मे़ने़स्सुर हे़क्क्याङ् मि मे़हाःन्दुर॥ 8 हारुने़ल्ले़ कुस्सा निङ्वाॽफुसाम्बाहाॽरे़ ले़त्ति तोःम्मादे़न्निल्ले़ कुसम्धाङ् मिओ मे़ने़स्सुबा सिङ्ङिल्ले़ कुसम्धाङ् खे़न् कुजक्ता कुले़म्दाहाॽ, कुधे़गेःक्किन् नु कुसोःत्तिन् मे़बे़न्छु मे़ने़स्सुर॥ 9 खुने़ॽ खे़ल्ले़ कुहिदुत् कुधे़ङाङ् नु कुलाङ्हाॽ च्वाःत्तिल्ले़ वाहप्तुर, हे़क्क्याङ् खे़न् के़रे़क्के निङ्वाॽफुसाम्बाल्ले़ ले़त्ति तोःम्मादे़न्नो मिधिक्खुदेसुर॥ यहवे दाङ्बाल्ले़ कन् लत्छा कुसिराॽगे़धाङ्बा कुनाम्गे़नुॽबा, मिलाम्बा तोःम्मनाबा मिधिङ्मनादेमनाबा वयागे़न् सिदुङ्जभारो॥ 10 “‘खे़ल्ले़ तोःन्दुबा सिदुङ्जभान् थक्सा लुप्पोलाम् मे़ल्लुक् इग्र मे़ःन्दाःल्ले़न् मिधिङ्मनादेमनाबा सिदुङ्जभाने़भग्र, खे़ल्ले़ मे़ङ्गाःम्मनाबा थुःम्बा इग्र मे़ःन्दबकान् तोःन्दुर॥ 11 खे़ल्ले़ निङ्वाॽफुमाङ्ङिल्ले़ कुदगि ले़त्ति तोःम्मादे़न्नोबा थाङ्गे़त् ले़प्माङ् खे़न् च्ये़प्तु से़रुर हे़क्क्याङ् हारुने़ल्ले़ कुस्सा निङ्वाॽफुसाम्बाहाॽरे़ खे़ल्ले़ कुमाक्खिन् ले़त्ति तोःम्मादे़न् कब्रिङ् मे़साक्खुर॥ 12 खे़ल्ले़ खे़न् थक्सान् कुजक्ता कुले़म्दा खक्तुर हे़क्क्याङ् कुधे़गेःक्किन् नु कुसोःत्तिन् सोसोरिक् खे़न् कुजक्ता कुले़म्दा खक्तुबाहाॽ ले़त्ति तोःम्मादे़न्नो के़ने़बा मिःल्ले़ कुसम्धाङ्बा सिङ्ङो निङ्वाॽफुसाम्बाल्ले़ खे़न् पे़न्छु ने़स्सुर॥ 13 खे़ल्ले़ कुहिदुत् कुधे़ङाङ् नु कुलाङ्हाॽ च्वाःत्तिल्ले़ वाहप्तुआङ् खे़न् के़रे़क् निङ्वाॽफुसाम्बाल्ले़ ले़त्ति तोःम्मादे़न्नो ओॽरुआङ् मिधिक्खुदेसुर॥ यहवे दाङ्बे़ल्ले़ कन् कुसिराॽ के़धाङ्बा कुनाम्गे़नुॽबा, मिलाम्बा तोःम्मनाबा मिधिङ्मनादेमनाबा सिदुङ्जभारो॥ 14 “‘यहवे दाङ्बाल्ले़ कुलागि खे़ल्ले़ तोःन्दुबा सिदुङ्जभान् पुसालाम्बाबा मिधिङ्मनादेमनाबा सिदुङ्जभाने़भग्र, खे़ल्ले़ तोःन्दुबान् पुत्तुःक्के इग्र पे़र्वाःल्ले़ कुस्साहाॽ खे़ल्ले़ सिदुङ्जभान् तोःन्दुर॥ 15 निङ्वाॽफुसाम्बाल्ले़ ले़त्ति तोःम्मादे़न्नो खे़न् तारुआङ् खे़ल्ले़ कुधे़गेक्पान् खइक् इगु फुॽरुर हे़क्क्याङ् कुधे़गेःक्के़न् ले़त्ति तोःम्मादे़न्नो मिधिक्खुदेसुर॥ हे़क्क्याङ् माक्खिन्ग ले़त्ति तोःम्मादे़न्निल्ले़ कुयाम्ले़ङ्बो सिःप्तुर॥ 16 खे़ल्ले़ खे़न् वहिनु सोरिक्पा कुदक्फन् कुहिदुत् कुम्ब्रिक्हाॽ ले़त्ति तोःम्मादे़न् नाङ्गे़न् ले़प्माङ्बा खाप्पु के़ने़बादे़न्नो लाप्फेसुर॥ 17 खे़ल्ले़ खे़न् मे़ङ्घक्के कुलाप्पिल्ले़ कुलुम्मोलाम् थे़सुर॥ निङ्वाॽफुसाम्बाल्ले़ ले़त्ति तोःम्मादे़न्नो के़ने़बा मिःल्ले़ कुसम्धाङ्बा मिओ खे़न् मिधिक्खुर, यहवे दाङ्बाल्ले़ कन् कुसिराॽ के़धाङ्बा कुनाम्गे़नुॽबा, मिलाम्बा तोःम्मनाबा मिधिङ्मनादेमनाबा वयागे़न् सिदुङ्जभारो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.