मे़रिङ् साप्पन् 5 - लिम्बुलुङ्माॽ आदुक्ते़ॽ फाॽआङ् पेलि फाक्मा 1 यहवे दाङ्बाए, आनिगे सम्धाङ् थे पोःक्खे़इ, निङ्वाॽ इःत्ते़ॽओ, आनिगे अक्तङ्बा नाध्ये़आङ् वाॽ, खे़न् ओमे़त्ते़म्मे़ॽओ॥ 2 आनिगे याङ्साकुन्धेहाॽ वेॽहाॽरे़न् पोःक्खे़आङ् वाॽरो, आनिगे हिम्हाॽ वेॽ लाजेॽबाहाॽरे़न् पोःक्खे़आङ् ने़रो॥ 3 आनिगे ये़त्छाबा नु पानुदिङ् पा मेःन्नेबा पोःक्खिगे़आङ् वयिगे़रो, आनिगे माहाॽ मेमेदुमा हे़क्तङ्मा मे़बोःक्खे़आङ् मे़वाॽरो॥ 4 थुङ्मा च्वाःत्तिन्नाङ् आनिगे लागि हुङ्मा पोङ्लो, सिङ्ङिन्नाङ् आनिगे आप्फेक् लागि इङ्मा पोङ्लो॥ 5 आनिगे नाःत्कुबाङ्हाॽ आनिगे लाङ्योःक्कोए मे़वाॽरो, आनिगे पना नासिगे़आङ् नाःम्सिङ्मा मे़ङ्घोए वयिगे़रो॥ 6 आनिगे साप्पोक् खाघा चामा नु थुङ्मारे़लागि मिस्र नु अस्सुरओ आनिगे हुक्हाॽ सन्छुम्बे़रो॥ 7 आनिगे पाधे़बाहाॽरे़ लायो लासोत् मे़जोगुरो, हे़क्क्याङ् आल्लो खे़ङ्हाॽ मे़होप्लो, खे़ङ्हाॽरे़ खुन्छिॽ लायोन् कुयुम्बे़र वयिगे़रो॥ 8 योःग्बाहाॽरे़ आनिगे सम्धाङ् युक् मे़जोगुर मे़वाॽरो, आनिगे खे़ङ्हाॽरे़ खुन्छिॽ युक्कोलाम् के़धे़ॽबा हाःत्ताङ् होप्लो॥ 9 मुरे़क् खारे़क् थेआङ् के़होःप्पादे़न्नोआङ् ताभेःल्ले़ चोगुल्ले़ आनिगे हिङ्मे़न् के़साक्पो थासुम्बे़आङ् चामा कुजा ताःप्मा पोङ्लो॥ 10 से़त्लाःक्माल्ले़ चोगुल्ले़ आनिगे होरिक्के़न् मिहाःत्लुङ् हे़क्के पये़म् पये़म् ये़म्लो॥ 11 सियोनबा मे़न्छुमाहाॽ नु यहुदाबा ये़क्यक्हाॽओ सिसादिङ् मे़न्छ्याहाॽ मेःत् मे़मे़त्तुसिआङ् वाॽरो॥ 12 आनिगे निङ्मिहाॽरे़ खुन्छिॽ हुक्के़ल्ले़ आनिगे तुम्म्याङ्हाङ्हाॽ मे़भोःन्दुसिआङ् वाॽरो, आनिगे तुम्भाक्साहाॽ थेआङ् मिङ्सो इङ्धाङ् मे़म्बिरुसिन्लो॥ 13 नालिगे़न् थाङ्बे़न्हाॽरे़ निङ्वाॽ मे़न्दे़न्ने लुङ्सुम् युःप्मा पोङ्लो, चप्प्रक् थाङ्बे़न् के़गे़प्पाहाॽ सिङ्गक्किल्ले़ के़प्तुसिरो, खे़ब्याङ् खे़ङ्हाॽ पे़ःङ्गक् पे़ःङ्गक् लॽरिक् लाङ्मे़घेःक्लो॥ 14 काप्पोबाहाॽ ये़क्यक्कोबा मा लाम्धेःप्पो चुम्मा मे़नाॽरे़आङ् वाॽरो॥ हे़क्क्याङ् थाङ्बे़न्हाॽरे़ साम्लो साम्मे़प्मा इक्लान् मे़ले़रु मे़देसुरो॥ 15 आनिगे निङ्वाॽओलाम् निङ्वाॽ तामान् मये़बेआङ् वाॽरो, आनिगे लाःङ्मान् मे़रिङ्ङो ले़ङ्सिङ्ङाङ् वाॽरो॥ 16 आनिगे थे़गेःक्कोलाम् तिचःन् मक्थ्ये़आङ् ने़रो, आनिगे चिःत्ते़ स्ये़ॽइगे़रो, थेआङ्भे़ल्ले़ लायो चोगुम्बे़आङ् वाॽरो॥ 17 कल्ले़चोगुल्ले़ आनिगे सिक्लुङ्मे़न् नासे़आङ् वाॽरो, आम्भा कल्ले़चोगुल्ले़ आनिगे मिक्हाॽ खाधाप्तुआङ् पत्लो॥ 18 थेआङ्भे़ल्ले़ सियोन कोःक्मे़न् चिजि ये़म्ये़म् युङ्लो, खे़प्मो स्यालाहाॽ उःङ्गाःक् उःङ्गाःक् ताक्मे़गन्नाङ् मे़वाॽरो॥ 19 कर यहवे दाङ्बाए, आदाङ्बा, थाःक्थाःक्को थारिक् युक् के़जोःक्लो, आदाङ्बारे़ के़हाङ्युक्नान् सदादिङ् थारिक् हाबा वाॽरो॥ 20 आदाङ्बारे़ थेआङ् आनिगे याप्मि सुधाःम् निङ्वाॽ के़भेःम्बाबे? आदाङ्बारे़ आनिगे थेआङ् कम्भ्यारिक् इरिक् आग्नाॽबाबे? 21-22 आदाङ्बारे़ आनिगे हिलाप्फु याप्मि के़नाॽरे़बा होप्ने़भग्र हे़क्क्याङ् साॽरिक् के़याःक् मे़ल्ले़ॽए वाॽने़भग्र यहवे दाङ्बाए, आदाङ्बा ले़प्माङ् आनिगे आनुःक्ते़ॽओ, हे़क्केलॽरिक् आनिगे नुःङ्मा सुक्तिगे़ररो, आनिगे ये़न्निन् तगिबा कुइसिक् कुसङ् चोगे़ आबिरे़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.