मे़रिङ् साप्पन् 4 - लिम्बुयरुसले़ःम्मिन् खाप्पुथ्यःङ् पोःक्खे़ 1 आयाक्को साम्म्याङ्ङिल्ले़ कुओःप्मान् मये़बेरो साम्म्याङ् इसेःङ्बान् सभिङ्ग्याःप्पा पोःक्खे़रो! सेसे लुङ्हाॽ यम्बा माराम्हाॽ थक्मा हत्छे़ हत्छे़ मे़से़सुआङ् ने़रो॥ 2 आयाक्को साम्म्याङ् इसेःङ् कुसिङ्बा सियोनरे़ कुस्साहाॽग आल्लो कुभा कोःम्भाल्याःल्ले़ कुहुक्किल्ले़ चोगुबा खाम्खप्प्या फुजिक्हाॽ हे़क्तङ्बा मे़न्जोबा मे़लेःत्तुसिआङ् मे़वाॽरो! 3 कुम्मामा स्यालाहाॽरे़आङ् खुन्छिॽ नुसेॽहाॽ मे़लःत्तुरो हे़क्क्याङ् हुन्छिॽ अङे़ःक्वा साहाॽरे़ मे़बिःत्तुर मे़याःन्दुसिरो, कर आङ्गाॽ आमनाहाॽग मुरे़क् खारे़क् थेआङ् के़होःप्पादे़न्नोबा थःङ्वा पुहाॽ हे़क्तङ्बा कुॽइगे़भे़म्बा मे़बोःक्खे़आङ् मे़वाॽरो॥ 4 नुगे़धुङ्बा अङे़ःक्वाःल्ले़ कुल्सोःत्ते़न् वामिःक्माल्ले़ कुघाम्दाःक्मो चिघिप् खिप्तुरो॥ हिन्जाॽबित्छाहाॽरे़ चामा कुजा मे़नाःक्तुरो, कर हाःत्ले़आङ् खे़ङ्हाॽ थेधिक्काङ् मे़बिरुन्सिन्लो॥ 5 कुजा के़नुॽबा कुजा के़जाबाहाॽ आल्ल माराम्हाॽओ थेधिक्काङ् मे़ङ्गप्मनाबा याङ्गे़साॽबा मे़बोःक्खे़आङ् मे़वाॽरो, पारान्ला तेत् के़जाङ्बाआङ् के़बोबाहाॽ आल्लो खाप्पु के़लुम्सिङ्बादे़न्नो मे़ने़ मे़गन्लो॥ 6 सदोम्मे़न् हाःत्ले़ कुहुक्किल्ले़आङ् मे़म्भाॽए सप्फाधिक्ले़सा लाप्पुङ् मे़देसुरो॥ आङ्गाॽ आमनाहाॽरे़ खुन्छिॽ तुम्मा खुम्दिङ्ङिन् सदोम के़युङ्बाहाॽरे़न्नुःल्ले़आङ् यम्बा चोक्लो॥ 7 खे़प्मोबा तुम्म्याङ्हाङ्हाॽ नाःङ्नुःल्ले़ सेसेबा मे़वये़रो हे़क्क्याङ् पित्नुनुःल्ले़ फदाङ्बा मे़जोगे़रो, खुन्छिॽ थक्हाॽ मुधिङ् लुङ्नुःल्ले़आङ् हे़ःत्ताङ्बा चोगे़रो, खे़ङ्हाॽ मे़धाःम्सिङ्बान् हिःक्कोःम्कोःम्बा मुधिङ्लुङ् हे़क्तङ्बा चोगे़रो॥ 8 कर आल्ल खे़ङ्हाॽरे़ खुन्छिॽ नारान् माक्सुःन्दानुःल्ले़आङ् माक्के़लॽबा पोःक्खे़रो, खे़ङ्हाॽ माराम्हाॽओआङ् कुसिङ् मे़न्निःत्छे मे़वाॽरो॥ खे़ङ्हाॽरे़ खुन्छिॽ होरिक्पान् ये़त्तो खिप्तुआङ् पत्लो, सिङ् हे़क्के खे़न् पघे़क् खे़क्तुआङ् पत्लो॥ 9 साक्मे़न्जा वमे़न्धुङ् के़सिबाहाॽनुःल्ले़ ताभेलाम् के़सिबाहाॽ आल्लसाङ् नुबा मे़बोङ्लो॥ खाम्बेःक्को के़धोःक्पा कुजा होप्पाल्ले़ चोगुल्ले़ खे़ङ्हाॽ खुन्छिॽ सिक्लाःक्काङ् मे़हेर मे़बेःक्लो॥ 10 कुलुङ्माॽ स्याःत् के़लॽमा मे़न्छुमाहाॽरे़ आप्फेक् हुक्किल्ले़ खुन्छिॽ आप्फेक् अङे़ःक्वा साहाॽ मे़धोःक्तुसिरो॥ आङ्गाॽ आमनाहाॽरे़ खुन्छिॽ मे़क्मा सिमाओ खे़ङ्हाॽरे़ खुन्छिॽ आम्ब्रे़ःङ्वा साहाॽए चामा कुजा मे़बोःक्खे़रो॥ 11 यहवे दाङ्बे़ल्ले़ साॽरिक् कुसिक् पोःक्मे़न् ओःन्धाक्तुसिरो, खुने़ॽ मि हे़क्तङ्बा कुसाक्के़न्निन् थासुरो॥ खुने़ॽ सियोनओ मिभाःत्त्रा केःत्तुरो, खे़ल्ले़चोगुल्ले़ खे़ल्ले़ कुबुङ्हाॽ खाप्पुथ्यःङ् पोःक्खे़रो॥ 12 यरुसले़ःम्मोबा मा लाम्धेःत्हाॽओलाम् निङ्मिहाॽ नु तक्ले़ङ्वाबाहाॽ मे़लात् फाॽआङ् इक्सादिङ् खाम्बेःक्मोबा कुभा हाङ्हाॽ इग्र योॽबा लाजेॽओबा आत्तिन् मनाहाॽरे़आङ् मे़न्इःत्ते मे़वये़रो॥ 13 कर कङ्ग खे़ल्ले़ कुमाङ्निङ्वाॽपान् के़बाःप्पाहाॽरे़ खुन्छिॽ लायोन् नु खे़ल्ले़ कुनिङ्वाॽफुसाम्बाहाॽरे़ खुन्छिॽ फे़न्याःम्बक्किल्ले़ चोगुल्ले़ पोःक्खे़बारो, खे़ङ्हाॽरे़ ये़क्यक् लुम्मो साम्योबाहाॽरे़ खुन्छिॽ माक्खिन् मे़से़सुरो॥ 14 आल्लो माराम्हाॽओ खे़ङ्हाॽ मिक्फःम्बा हे़क्के ससप् ससप् मे़सप्सुर ताक्मे़गन्नाङ् मे़वाॽरो॥ खे़ङ्हाॽरे़ खुन्छिॽ चाङ्हाॽ हाःत्ताङ् सुमा मे़आःन्छिङ्ङिन्ल यारिक् खे़ङ्हाॽ माक्खिल्ले़ चिःन्दुसिआङ् मे़वाॽरो॥ 15 “चिःन्जिःन्गे़घुबासे! खिनिॽ पेगे़म्मे़ॽओ!” मनाहाॽरे़ खे़ङ्हाॽ मे़भे़ःक्तुसिर मे़मे़त्तुसिरो॥ “माःङ्घा पेगे़म्मे़ॽ! माःङ्घा पेगे़म्मे़ॽ! आनिगे आन्छुसे़म्मिन्ने़ॽओ!” खे़ङ्हाॽ के़घे़त्छिङ्बा नु ताक्कन्निबा मे़बोःक्खे़ल्ले़, मे़न्छाम् सुवाङ्बा मनाहाॽरे़ अक्खे मे़मे़त्तुसिरो, “आल्ल खे़ङ्हाॽ आनिगे़नु कप्मो मे़न्युङ्ने़न्लरो॥” 16 यहवे दाङ्बे़ल्ले़ए खे़ङ्हाॽ फुत्लुम् से़सुदेसुसिआङ् मे़वाॽरो, खुने़ॽ आल्ल याम्मो आभे़ल्ले़आङ् खे़ङ्हाॽ निनि मे़लाप्तुसिन्लो॥ निङ्वाॽफुसाम्बाहाॽ मिङ्सो इङ्धाङ् ओसेःन्मे़धाक्तुसिन्लो, हे़क्क्याङ् लाम्लोबाहाॽआङ् लुङ्माॽ मे़दुक्तुसिन्लो॥ 17 कुभाॽरे़ लागि हने़ थेनाधे लाम् ओमे़प्मारे़ ओमे़प्मारे़ आनिगे मिक्हाॽ ले़क्खे़रो॥ आनिगे चङ्हिम्हाॽओलाम् सुवाङ्धिक् मिक् हङ् लॽरिक् ओमे़त्तुम्बे़आङ् युङिगे़रो खे़ल्ले़ आनिगे ताङ्से़ःप्मा मे़सुक्तिगे़न्लो॥ 18 निङ्मिहाॽरे़ आनिगे के़रे़क् लाङ्योःक्हाॽ योःक्मे़धक्तुरो, हे़क्क्याङ् आनिगे माराम्हाॽओ लाङ्घेःक्मा मे़सुक्तिगे़न्लो॥ आनिगे मे़क्मान् निःत्ताङ् के़रे़ चुरे़आङ् वये़रो, आनिगे ये़न्हाॽ नुबे़ चुरे़आङ् वये़रो, आनिगे नुप्मान् त्ये़ चुरे़आङ् वये़रो॥ 19 आनिगे के़नाःप्पाहाॽ ताङ्साक्पोबा मुयाहाॽनुःल्ले़ साॽरिक् पजात् के़जाप्पा मे़जोगे़रो॥ खे़ङ्हाॽरे़ कोःक्मा फाङ्जङ् थे़गु माङ्वाहाॽओ मे़नाःत्तिगे़रो, मुरे़क् खारे़क्पा एःक्सादे़न्हाॽओ खे़ङ्हाॽरे़ मे़सुगिगे़रो॥ 20 यहवे दाङ्बे़ल्ले़ सेःन्दुबा हाङ्, आनिगे हिङ्मन्ने खे़ङ्हाॽरे़ खुन्छिॽ इजोओ थ्ये़रो॥ आम्भा खुने़ॽ कुगम्ब्राङ्ङो थिम्मे़न्दङ् सुवाङ्हाॽरे़ खुन्छिॽ लुम्मो आनिगे ताप्थेक् याम्धेक् वयिगे़ फाॽआङ् इःप्मनाआङ् वये़रो॥ 21 उज के़युङ्मा एदोमरे़ कुस्सा मे़न्छुमाए, सःत्ते़ॽआङ् ये़ये़ लॽरे़बा, कर खे़न् चल्लाङ्ना खोर्यान् खे़ने़ॽआङ् के़म्बिरो॥ खे़न् सेजङ्वाःल्ले़ खे़ने़ॽ के़मरो॥ हे़क्क्याङ् खे़ने़ॽ ले़क्चाबे़धिःक् के़म्जोःक्लो॥ 22 सियोनरे़ कुस्सा मे़न्छुमाए, खे़ने़ॽ के़भे़न्याःम्बक्किल्ले़ खुम्दिङ्ङिन् नुप्लो॥ खे़ने़ॽ लाजेॽलाम् लाःक्कात् लःप्मादेमा ये़म्मिन् खुने़ॽ मे़भोसुन्लो, कर एदोमरे़ कुस्सा मे़न्छुमाए, खे़ने़ॽ के़लायोल्ले़ खुम्दिङ्ङिन् खे़ने़ॽए के़बिरो खे़ने़ॽ के़लायोहाॽ ओःन्गे़धाक्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.