मे़रिङ् साप्पन् 3 - लिम्बुखुम्दिङ्, लायोलाम् हिम्मा नु निङ्साङ् 1 यहवे दाङ्बे़ल्ले़ कुसिक् पोःक्मा तक्काःत्लाम् के़दाबा तुक्खे लाक्खे के़दुम्बा मनान् आङ्गाॽएरो॥ 2 खुने़ॽ आङ्गाॽ नाःत्ताङ्देसाङ्ङाङ् वाॽरो, हे़क्क्याङ् खागे़ओःप्पे़ल्ले़ कुले़क्वा खामाक्मो आङ्गाॽ लाङ्घेःक्मा पाङ्घाङ्ङाङ् वाॽरो॥ 3 से़क्खाःल्ले़, खुने़ॽ कुहुक्किल्ले़ आङ्गाॽ आदक्ले़ङ्वाओ ये़त्ले़ङ् ये़त्ले़ङ् नु ले़न्दिक् नाम्धाधाए साःप्साङ्ङाङ् वाॽरो॥ 4 खुने़ॽ आहोरिक्पान् नु आने़क्सान् इसुॽरुर याःन्दुआङ् वाॽरो, हे़क्क्याङ् आङ्गाॽ आये़प्पाहाॽ ए़क्खाङ् पिराङ्ङाङ् वाॽरो॥ 5 खुने़ॽग आङ्गाॽ तुक्खे नु लाक्खेःल्ले़ कबाङ्ङाङ् वाॽरो, हे़क्क्याङ् के़साक्पो के़बाङ्साङ्ङाङ् वाॽरो॥ 6 यरिक् ये़न्नाङ्धो के़सिबाआङ् के़ने़बा चेधक् कुइसिक् खुने़ॽग आङ्गाॽ खागे़माक्पादे़न्नो युक्खाङ्ङाङ् वाॽरो॥ 7 खे़त्छिङ्मा मे़सुक्कान्ल फाॽआङ् आङ्गाॽ आगब्रिङ् लुङ्धाक् से़त्तुआङ् ये़प्लो, पलिःप् के़लिःप्पा फे़न्जेॽ थक्क्रङ्ङिल्ले़ इघेःक्खाङ्ङाङ् पत्लो॥ 8 कुभाॽरे़ लागि आङ्गाॽ फिरिक् फिरिक् फिःक्कार अःक्कारो, करसाङ् आङ्गाॽ आबेलिन् खुने़ॽ खे़म्घे़म् मे़लाप्तुन्लो॥ 9 लुङ्गाक्माहाॽरे़ आङ्गाॽ आलाम्मिन् साक्ताङ् पिराङ्ङाङ् ने़रो, आङ्गाॽ आलाम्मिन् खुने़ॽ पेगे़क् वगे़क्पा चोगाङ् पिराङ्ङाङ् ने़रो॥ 10 मना के़सुक्पाआङ् के़ने़बा माःॽयुःन् कुइसिक् हे़क्क्याङ् के़जिङ्सिङ्बाआङ् के़ने़बा खिरिङ्बान् कुइसिक्, 11 खुने़ॽ आङ्गाॽ लाम्लाम्मोलाम् फत्ताङ्ङाङ् ते़रे़क् ते़रे़क् थे़ःक्खाङ्लो खे़ब्याङ् खुने़ॽग आङ्गाॽ कुभाॽबाङ् मेःन्नेबा चोगाङ्लो॥ 12 खुने़ॽ लिजोःन् फत्छुआङ् कुलिन् खिङ्घुरो हे़क्क्याङ् कुदोःङ्हाॽरे़ आङ्गाॽए सोःक्ताङ्लो॥ 13 खुने़ॽ कुदोःङ् याङ्मा काःन्द्याओबा तोःङ्हाॽरे़ आङ्गाॽ आलुङ्मे़न् फ्याक् लस्सुर पिराङ्लो॥ 14 के़रे़क् आमनाहाॽरे़ खुन्छिॽ एःप्मा चाहाक् पोःक्खाङ्लो, खे़ङ्हाॽरे़ ले़न्दिक् नाम्धाधाए साम्लोलाम् कुनामे़न्छाॽ मे़मे़त्तारो॥ 15 खुने़ॽ पघिःक् के़घिःक्पा सुङ्घिःङ्बे़ल्ले़ आङ्गाॽ थिम्साङ्लो साक्खिःक् के़घिःक्पा खिःङ्ङिन् आङ्गाॽ थुङ्घाङ्लो॥ 16 खुने़ॽ लुङ्जेःक्हाॽ चाःत्ताङ्ङाङ् आहाबोॽबाहाॽ ए़क्खाङ् पिराङ्लो, हे़क्क्याङ् खाम्हिःक्को आङ्गाॽ चिदोॽ चिदोॽ तोॽराङ्लो॥ 17 सनारुङ्ङिन् आङ्गाॽलाम् माःङ्घा पोःक्खे़आङ् वाॽरो, नुॽमादामे़न् थेइ, खे़न् आङ्गाॽ निङ्वाॽ फेःत्छुङ्ङाङ् वाॽरो॥ 18 कल्ले़चोगुल्ले़ आङ्गाॽ अक्खे पाःत्तुङ्लो, “आङ्गाॽ आहाङ्वा आमाङ्वान् पेलासे़रो, यहवे दाङ्बालाम् चोगुङ्बा निङ्साङ्ङिन्नाङ् नुबे़रो॥” 19 आङ्गाॽ तुमुङ्बा कुजागे़भे़म्बा, आदुक्खे आलाक्खे़न् हे़क्क्याङ् आङ्गाॽ ताप्पे़ॽराङ्बे़न् निङ्वाॽ इःत्तुङ्लो॥ 20 आङ्गाॽ खे़ङ्हाॽ चक्मे़ल्लॽए निङ्वाॽ लिङ्सुङ्लो, हे़क्क्याङ् आयाम्साम्मिन् आङ्गाॽओ कुसक्मा पुॽरो॥ 21 कर आङ्गाॽ कन् लत्छा पाःन्निन् निङ्वाॽ इःत्तुङ्लो, खे़ल्ले़चोगुल्ले़ आङ्गाॽ निङ्साङ् के़जोःक्पा पोङ्ङारो— 22 यहवे दाङ्बे़ल्ले़ खुने़ॽ यम्बा कुमिःम्जि नु आभे़ल्ले़आङ् मे़न्नुप्मनाबा कुलुङ्गुम्मिल्ले़ चोगुल्ले़ मे़म्मे़क्के वयिगे़रो॥ 23 खे़ङ्हाॽ तानाम् थक्मा कुसङ् पोङ्लो, आदाङ्बा साॽरिक् यरिक् नसाःन्साबा के़जोःक्लो॥ 24 आङ्गाॽ आयाम्साम्मिल्ले़ अक्खे पाःत्तुरो, “आलागि के़रे़क् पाःन्नो यहवे दाङ्बे़न्ने आलक्लो, कल्ले़चोगुल्ले़ आङ्गाॽ नासि थःत्तुङ्ङाङ् खुने़ॽ हाङ्घुङ्लो॥” 25 यहवे दाङ्बे़ल्ले़ कुलाम् ओगे़मे़प्पाहाॽ, खुने़ॽ के़गोःप्पाहाॽनुग खुने़ॽ के़नुॽबा चोक्लो॥ 26 स्वाःत्ताङ् यहवे दाङ्बे़ल्ले़ आसे़ःप्से़ःप्पा कुलाम्मिन् ओमे़प्माए के़रे़क्नुःल्ले़ नुबा पोङ्लो॥ 27 मनान् थाङ्बे़न् वाॽरए खुने़ॽ कुघे़ःप्सिङ्ङिन् कुमाग खे़ल्ले़ कुलागि चाॽरिक् नुबा पोङ्लो॥ 28 यहवे दाङ्बे़ल्ले़ मनाओ कन् फत्छुबाल्ले़ चोगुल्ले़ खे़न् एःक् मे़म्बाःत्ते स्वाःत् युङ्लरो॥ 29 खे़ल्ले़ कुम्ब्राःल्ले़ खाम्बाङ्ङिन् सुसुररो, कम्भलॽरिक् आल्लसाङ् याम्मो निङ्साङ् वाॽररो॥ 30 कुन्दे़ङ्बा के़भङ्बा ले़प्माङ्ङे खुने़ॽ कुन्दे़ङ्बे़न् हिसु पिरुररो, हे़क्क्याङ् कुनामे़न्छाॽ पाःन्निन् नासि थःत्तुररो॥ 31 थेआङ्भे़ल्ले़ यहवे दाङ्बे़न् लुङ्माॽ आदुक्तुक्पा चोक्लो हे़क्क्याङ् सदादिङ्ले़ लागि खुने़ॽ आन्नाॽने़न्लो॥ 32 खुने़ॽ इनोगे़न् तुक्खे लाक्खेहाॽ तारुसाङ् लुङ्माॽ आदुक्लो, आभे़ल्ले़आङ् चक्मे़ल्लॽमनाबा कुमिःम्जिन् पयम् यम्बा चोक्लो॥ 33 थेआङ्भे़ल्ले़ खुने़ॽ आप्फेक् कुसिक्लुङ्माॽलाम् मे़न्छाम् याप्मि साहाॽ तुक्खे लाक्खे मे़जार मे़याःन्दुसिन्लो॥ 34 कुभारे़ लाजेॽओबा के़रे़क् पुङ्लाधाबाहाॽ लाङ्ङिल्ले़ चिदोॽ चिदोॽ मे़दोॽरुसिने़भग्र, 35 के़रे़क्नुःल्ले़ यम्बा निङ्वाॽफुमाङ्ङिल्ले़ कुदगि कुभारे़ खुन्छिॽ खोमा लक्किन् मे़नाप्तुसिने़भग्र, 36 कुभारे़ कुदोःप्मा खासे़न् मे़न्लोःन्दुन् मे़म्बिरुसिन्ने़भग्र थे यहवे दाङ्बे़ल्ले़ हे़क्तङ्बा पाःन्हाॽ मे़निसुन्नाङ्बि? 37 यहवे दाङ्बे़ल्ले़ इङ्जाङ् मे़बिरुसिन्ल थारिक् हाःत्ले़ मुरा मे़त्तुसिबान् के़रे़आङ् वाॽबे? 38 के़रे़क्नुःल्ले़ यम्बा निङ्वाॽफुमाङ्ङिल्ले़ कुम्ब्राओलाम् ताप्फे़ःम्बा नु नुबा पाःन्हाॽ मे़लःन्ने़न्नाङ्बि? 39 आनिॽ आप्फेक् लायोल्ले़ खुम्दिङ् आघोसुम्मिल्ले़ आनिॽ कुहिङ्वे़त् के़वाॽबा मनाहाॽ थेआङ् मने़धिक्माबे? 40 आनिॽ आबाङे ये़प्ले़क्हाॽ साॽरुम्माङ् ओमे़त्तुम्लो, हे़क्क्याङ् यहवे दाङ्बा ले़प्माङ् आनिॽ नुःक्खिरो॥ 41 आनिॽ सिक्लुङ्मे़न् नु आनिॽ हुक्हाॽ साङ्ग्राम्पेदाङ्बा निङ्वाॽफुमाङ् ले़प्माङ् फोःक्खुम्माङ् पाःत्तुम्लो— 42 “आनिगे लायो चोगुम्बे़, आनिगे पिफ्युङ् चोगुम्बे़रो, हे़क्क्याङ् आदाङ्बारे़ आनिगे ले़प्मि मे़म्बिए के़वाॽरो॥” 43 आदाङ्बा के़साक्के़न्निल्ले़ मि के़बोःक्खे़रो, हे़क्क्याङ् आदाङ्बारे़ आनिगे पुबेलाप्सा के़नाःत्ते़रो, खम्भ्याङ् याप्मि लुङ्माॽ मे़न्दुक्के आनिगे आग्से़रे़रो॥ 44 आदाङ्बारे़ॽओ आत्तिन् पेलिन्नाङ् मे़गे़त्ने़न्ल फाॽआङ् आदाङ्बा के़साक्के़न्निल्ले़ के़सुःप्सिङ्ङाङ् के़बत्लो॥ 45 आदाङ्बारे़ आनिगे़ग मे़न्छाम् सुवाहाॽरे़ खुन्छिॽ लुम्मो चिःन्जिःन्गे़घुबा नु साक्चिॽ हे़क्तङ्बा आग्जोगे़आङ् वाॽरो॥ 46 “आनिगे के़रे़क् निङ्मिहाॽरे़ आनिगे तक्ले़ङ्वाओ खुन्छिॽ मुरा मे़हन्दुआङ् कुनामे़न्छाॽ मे़मे़त्तिगे़आङ् वाॽरो॥ 47 किमा यङ्मा नु किप्मा के़घुबा, मुदोखाम्दो नु मे़क्मासिमे़न् आनिगे सम्धाङ् इरे़द्ये़आङ् वाॽरो॥” 48 आङ्गाॽ आमनाबाहाॽरे़ खुन्छिॽ मे़क्मासिमे़न् निसुङ्लो हे़क्क्याङ् आङ्गाॽ आमिक्कोलाम् आमिक्वा ते़रे़रे़ थाप्लो॥ 49-50 यहवे दाङ्बे़ल्ले़ साङ्ग्राम्पेदाङ्लाम् मु ओमे़मे़त्तुन्ल थारिक् आङ्गाॽ आमिक्कोलाम् ते़रे़रे़ लॽरिक् मे़न्जिप्पे आङ्गाॽ आमिक्वा थाआङ् पत्लो॥ 51 आये़क्यक्कोबा मे़न्छुमाहाॽरे़ खुन्छिॽ ये़त्तुक्खेन् आमिक्के़ल्ले़ निसुङ्लो खे़ल्ले़चोगुल्ले़ आङ्गाॽ आनिङ्वान् तुक्खे चारो॥ 52 हने़ थेनाधे आनिङ्मि के़बोङ्बाहाॽरे़ पु हे़क्के आङ्गाॽ सानाःत् मे़जोगाङ् मे़गत्ताङ्लो॥ 53 खे़ङ्हाॽरे़ कुहिङ्वे़त्ते लुम्बाःत्तो मे़ङ्मा मे़गोःत्ताङ्लो हे़क्क्याङ् लुङ्हाॽरे़ फे़ङ्ङाङ्भे़ङ् मे़दे़प्ताङ्लो, 54 च्वाःत्तिन् आध्गेक्को थारिक्के थाङे़रो, हे़क्क्याङ् आङ्गाॽ आसिमे़न् निःत्ताङ्ङे त्ये़रो फाॽआङ् आङ्गाॽ निङ्वाॽ इःत्छिङारो॥ 55 यहवे दाङ्बाए, कुदिम्बे केःम्बा लुम्बाःत्तोलाम् आङ्गाॽ आदाङ्बा मिङ्लोःङ्ने़आङ् पेलि फाक्ने़रो॥ 56 आदाङ्बारे़ आङ्गाॽ आबेलिन् के़घे़प्सुरो, “कुभाॽरे़ लागि आङ्गाॽ पेलि फाक्ने़ल्ले़ आदाङ्बा मे़ङ्घे़म्मनाबा मे़बोःक्खे़न्ने़ॽओ॥” 57 आदाङ्बा पेलि फाक्ने़ल्ले़ आदाङ्बा आबेसाङ् के़द्ये़रो, हे़क्क्याङ् आदाङ्बारे़ के़बाःत्तु, “मे़गिसे़न्ने़ॽओ॥” 58 दाङ्बाए, आङ्गाॽ के़नाङाङ्लो खे़ब्याङ् आङ्गाॽ आहिङ्मे़न् ताङ्गे़से़ःप्तुरो॥ 59 यहवे दाङ्बाए, आङ्गाॽ मे़न्वाॽमना मे़मे़त्ताङ्बे़न् आदाङ्बारे़ के़निसुआङ् के़वाॽरो, आलागि खासे़न्लोःम्बा पोःक्खे़ॽओ हे़क्केलॽरिक् आङ्गाॽ कुदोःप्मा चोगाङ्ङे़ॽओ॥ 60 खे़ङ्हाॽरे़ कुले़क्वा नुःक्मा निङ्वाःल्ले़, आङ्गाॽ आदक्ले़ङ्वाओ मे़जोगुबा के़रे़क् चे़म्भःन्हाॽ आदाङ्बारे़ के़निसुआङ् वाॽरो॥ 61 “यहवे दाङ्बाए, खे़ङ्हाॽरे़ मे़जोगुबा चे़ॽयाइङ्दोःन्, आङ्गाॽ आदक्ले़ङ्वाओ खे़ङ्हाॽरे़ मे़जोगुबा के़रे़क् चे़म्भःन्हाॽ आदाङ्बारे़ के़घे़प्सुआङ् के़वाॽरो, 62 खे़ङ्ग आअत्पाङ्हाॽरे़ ले़न्दिक् नाम्धाधा आदक्ले़ङ्वाओ आङ्गाॽ स्वाःत् मे़जे़ङ्ङाआङ् मे़बाःत्तुआङ् वाॽरो॥ 63 खे़ङ्हाॽ ओमे़त्ते़से़ॽओ, मे़बोःक्साङ् मे़युङ्साङ् खे़ङ्हाॽरे़ खुन्छिॽ साम्लोओ आङ्गाॽ कुनामे़न्छाॽ मे़मे़त्तारो॥ 64 “यहवे दाङ्बाए, खुन्छिॽ हुक्किल्ले़ मे़जोगुबा याःम्बक्किल्ले़ कुले़क्वाओ खे़ङ्हाॽरे़ तुम्मा मे़यारुबा खुम्दिङ् पिरे़से़ॽओ॥ 65 खे़ङ्हाॽरे़ खुन्छिॽ सिक्लुङ्मे़न् ते़प्ते़ पिरे़से़ॽओ, हे़क्क्याङ् आदाङ्बारे़ के़माङ्देन् खुन्छिॽ सम्धाङ् थाररो॥ 66 आदाङ्बारे़ के़सिक् पोःक्मो खे़ङ्हाॽ नाःत्ते़से़ॽ, हे़क्क्याङ् यहवे दाङ्बाए के़साङ्ग्राम्पेदाङ्हाॽ सिगाङ्लाम् खे़ङ्हाॽ खाप्पुथ्यःङ् वरे़ङ्ले़ङ् मे़क्खे़से़ॽओ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.