मे़रिङ् साप्पन् 2 - लिम्बुयरुसले़ःम्मो यहवे दाङ्बे़ल्ले़ कुघुम्दिङ् 1 आयाक्को यहवे दाङ्बे़ल्ले़ कुसिक् पोःक्मो सियोनरे़ कुस्सा मे़न्छुमान् माक्सिःङ्ग्याःप्पा खामाक्मे़ल्ले़ सुःप्तुआङ् पत्लो! इस्राइलरे़ कुहाङ्वा कुमाङ्वान् खुने़ॽ ताङ्साङ्बोलाम् इक्सादिङ् खाम्बेःक्मो मक्थाःन्दुआङ् वाॽरो॥ खुने़ॽ कुसिक् पोगे़बा ये़न्नो आप्फेक् कुलाङ्तोॽभेत् सियोने़न्नाङ् खुने़ॽ निङ्वाॽ इःत्तुबा होप्लो॥ 2 याकुबरे़ के़रे़क् कुवाॽमा कुयुङ्मादे़न्हाॽ यहवे दाङ्बे़ल्ले़ आक्खे़न्नाङ् कुलुङ्माॽ स्याःत् मे़ल्लॽए खाप्पुथ्यःङ् चोगुरो॥ खुने़ॽ कुसाक्के़न् पोगे़बाओ यहुदाःल्ले़ कुस्सा मे़न्छुमाःल्ले़ खुन्छिॽ यक्हाॽ फुत्लुम् थ्यःङ् लुःन्दु पिरुसिरो॥ खे़न् हाङ्जुम्मिन् नु खे़ल्ले़ कुलाम्लोबाहाॽ खुने़ॽ खाम्बाङ्ङो सोःन्दुसिआङ् कुनामे़न्छाॽ मे़त्तुसिरो॥ 3 खुने़ॽ साॽरिक् किप्मागे़घुबा कुसिक् पोःक्मो खुने़ॽ इस्राइलबा काक् मुक्साम्मिन् फुत्लुम् थ्यःङ् चोगुरो॥ निङ्मिहाॽरे़ खुन्छिॽ तगिए खुने़ॽ कुजुक्वा हुक्के़न् खे़त्तुरो, याकुबरे़ कुसम्धाङ् के़धाबा खुने़ॽ आमे़ङ्मे़ङ्बा कुसाक्के़न्निन् के़रे़क् पिसाङ् मिधुङ्दिङ् मिराःक् हे़क्के ले़ॽरे़रो॥ 4 निङ्मि कुइसिक् खुने़ॽ लिओ पे़रे़ःन्जोःन् फत्छुआङ् पत्लो, आअत्अप्पा कुइसिक् खुने़ॽ तक्पे़त् ये़म्सिङ्ङाङ् ये़प्लो॥ मिक्के़ल्ले़ निसुल्ले़ के़वाॽबा सिराॽगे़धाङ्बा पाःन्हाॽ खुने़ॽ निङ्मि हे़क्के के़रे़क् वरे़ङ्ले़ङ् मे़क्खुरो॥ सियोनरे़ कुस्सा मे़न्छुमाःल्ले़ कुसाःङ्गाहिम्मो खुने़ॽ कुसाक्के़न्निन् मि हे़क्के थासुआङ् वाॽरो॥ 5 यहवे दाङ्बे़न् निङ्मि कुइसिक् पोःक्खे़आङ् वाॽरो, खुने़ॽ इस्राइले़न् खाप्पुथ्यःङ् चोगुआङ् ने़रो॥ खुने़ॽ के़रे़क् हाङ्हिम्हाॽ फुत्लुम् थ्यःङ् चोगुरो, के़रे़क् यक्हाॽ थुप्सु लुःन्दुदेसुरो॥ खुने़ॽ यहुदाःल्ले़ कुस्सा मे़न्छुमाःल्ले़ कुनिङ्वाॽ तुक्खे चामे़न् नु कुमे़रिङ्ङे़न् फोसु पिरुरो॥ 6 खुने़ॽ माङ्से़वा मे़प्मा साःङ्गाहिम्मिन् इक्ताप्पोबा तक्तक्वा हिम् कुइसिक् थ्यःङ् यन्छुदेसुरो, खुने़ॽ कुदुम्मादे़न्निन् खाप्पुथ्यःङ् चोगुरो॥ यहवे दाङ्बे़ल्ले़ सियोनओ निःन्धो के़बोङ्बा तङ्नाम् नु सबाथहाॽ के़रे़क् निङ्वाॽसोक्किल्ले़ कुमिङ् मासुरो॥ खुने़ॽ चाॽरिक् किप्मागे़घुबा कुसिक् पोःक्मो खुने़ॽ हाङ्ङिन् नु निङ्वाॽफुसाम्बे़न् ने़प्माङ् नाॽरुसिरो॥ 7 दाङ्बे़ल्ले़ खुने़ॽओ ले़त्ति तोःम्मादे़न्निन् नाॽरुआङ् ने़रो, खुने़ॽ कुसेसेदे़न्निन् लाप्फेसुआङ् ने़रो॥ खुने़ॽ खे़प्मो के़ने़बा हाङ्हिम्मोबा लुङ्धाक्हाॽ निङ्मिहाॽरे़ खुन्छिॽ हुक्को पिरुसिआङ् ने़रो॥ खे़ङ्हाॽरे़ यहवे दाङ्बे़ल्ले़ कुहिम्मोए निःन्धो के़बोङ्बा तङ्नाम्मोबा ये़न् कुइसिक् मे़जोगुआङ् ने़रो॥ 8 यहवे दाङ्बे़ल्ले़ सियोनरे़ कुस्सा मे़न्छुमाःल्ले़ कुलुङ्धाक्हाॽ लुःम्मादेमा निङ्वाॽ निःन्धो चोगुरो॥ खुने़ॽ खे़न् कुसिःक्मा खाॽनाम्मिल्ले़ सिःक्तुरो, खे़न् खाप्पुथ्यःङ् चोःक्मालाम् कुहुक्किन् मे़नुःक्तुन्लो॥ खुने़ॽ हाङ्यक् नु लुङ्धाक् ने़प्माङ् मे़रिङ् थक्ते़र याःन्दुरो, खे़ङ्हाॽ ने़प्माङ् थिक्ले़ङ्ले़ पुरुःङ् लुःन्दे़बेरो॥ 9 यम्बा लाम्धेःत्हाॽ खाम्बाङ्ङो निमे़रो, खुने़ॽ खे़ल्ले़ कुए़प्माहाॽ यसुआङ् कुम्जिक्मा चोगुरो॥ हाङ्ङिन् नु लाम्लोबाहाॽ वेॽ मे़न्छाम् सुवाङ्हाॽरे़ खुन्छिॽ लुम्मो लाजेॽलाम् मे़लःत्तु मे़देॽरुसिआङ् मे़वाॽरो, हे़क्क्याङ् साम्योथिम् इङ्जाङ्ङिन् मे़न्हुॽरुन्सिन्लो॥ खे़ब्याङ् खे़ल्ले़ कुमाङ्निङ्वाॽपान् के़बाःप्पाहाॽरे़आङ् यहवे दाङ्बे़न्लाम् थे़माआङ् सुफो मे़ङ्घोसुन्लो॥ 10 सियोनरे़ कुस्सा मे़न्छुमाःल्ले़ कुलाम्लोबाहाॽ मे़म्बाःत्ते स्वाःत्ताङ् खाम्बाङ्ङो हर्जुॽ मे़युङ्लो॥ खे़ङ्हाॽरे़ खुन्छिॽ थे़गेःक्को खाम्हिःक्किन् मे़जुःत्तुआङ् याक्लो हे़क्क्याङ् खे़ङ्हाॽरे़ सगितेत् मे़जाक्खुआङ् मे़वाॽरो॥ यरुसले़ःम्बा मे़न्छ्याहाॽरे़ खुन्छिॽ थे़गेःक्हाॽ खाम्बाङ्ङो थारिक् अःक्खुम् मे़भत्छुआङ् वाॽरो॥ 11 हाःप्मारे़ हाःप्मारे़ मिक्वाःल्ले़ आमिक्हाॽ ले़सुरो, आङ्गाॽ आसिक्लुङ्मो आङ्गाॽ याःत्तारो॥ आङ्गाॽ आमनाहाॽ मे़मे़गे़बाल्ले़ चोगुल्ले़, अङे़ःक्वाहाॽ नु नुगे़धुङ्बा आम्ब्रे़ःङ्वा अङे़ःक्वाहाॽ ये़क्यक्कोबा माराम्हाॽओ खुन्छिॽ थना ले़क्खे़बे़ल्ले़ चोगुल्ले़ आङ्गाॽ आलुङ्माॽ फ्याःङ्भ्याःङ् लॽरे़रो॥ 12 के़गाःम्बा मनाहाॽ हे़क्के ये़क्यक्कोबा माराम्हाॽओ खे़ङ्हाॽरे़ खुन्छिॽ थना ले़ङ्लो, खुन्छिॽ माहाॽरे़ फक्थुङ्मो खुन्छिॽ सक्मा पुॽर पेःक्लो, खे़ब्याङ् खे़ङ्हाॽरे़ खुन्छिॽ माहाॽ अक्खे मे़मे़त्तुसिरो, “चामा कुजा नु चे़ल्ले़क्सेॽ थिन् आत्ति वाॽबे?” 13 यरुसले़ःम्मिल्ले़ कुस्सा मे़न्छुमाए, खे़ने़ॽ के़लागि आङ्गाॽ थे पाःप्तुङ्बाबे? आङ्गाॽ खे़ने़ॽ थेःन्नु कुदङ्बा तङ्ने़बाबे? सियोनरे़ कुस्सा मे़न्छ्याए, हाङ्हाङ् मे़प्मारे़ लागि खे़ने़ॽ थेःन्नु तङ्ने़बाबे? के़याङ्घेःक्किन् वरःङ् हे़क्के कुदिम्बे केःम्बा चोक्लो, हाःत्ले़ खे़ने़ॽ के़नुॽर याःम्मा के़सुक्काङ्बे? 14 खे़ने़ॽ के़माङ्निङ्वाॽपान् के़बाःप्पाहाॽरे़ मे़निसुबा सुफोहाॽ इङ्ले़क्पा नु कुसुम् मे़न्दम्मनाबा वये़रो॥ खे़ने़ॽ ते़म्मा तेॽमा मे़म्भाःक्मारे़ लागि खे़ङ्हाॽरे़ खे़ने़ॽ के़भे़न् याःम्बक्हाॽ ओःन्गे़मे़न्धाक्ते़न्लो॥ खे़ङ्हाॽरे़ खे़ने़ॽ के़लागि मे़निसुबा सुफोन् इङ्ले़क्पा नु मिक्ले़ःङ्मा पाःन्लक् वये़रो॥ 15 खे़ने़ॽ के़बेसाङ् के़बोङ्बाआङ् के़बेःक्पा के़रे़क्ले़ के़दुमुइ के़म्मे़त्ताङ् खुन्छिॽ हुक्हाॽ हिप्ला मे़हिप्तुरो॥ यरुसले़ःम्मिल्ले़ कुस्सा मे़न्छुमाःल्ले़ कुदक्ले़ङ्वाओ कुनामे़न्छाॽ मे़बाःत्तुर खुन्छिॽ थे़गेःक्हाॽ तघुम्तघुम् मे़मे़त्तुरो— “से़क्खा साॽरिक् पनुनुबा नु निङ्वाॽ के़सःप्पा इक्सादिङ् खाम्बेःक्कोबा ये़क्यक् फाॽआङ् कुमिङ् के़इङ्बान् हाबा कन् मेःन्बि?” 16 खे़ने़ॽ के़रे़क् के़निङ्मिहाॽरे़ मे़बाःत्तुआङ् किनाःन्दि के़म्बिरो, खे़ङ्हाॽरे़ खुन्छिॽ हाबोॽबान् मे़ये़ःक्खुर अक्खे के़म्मे़त्लो, आनिगे खे़न् खाप्पुथ्यःङ् मे़क्खुम्बे़रो॥ आम्भा कन् ये़न्निन् ओमे़प्मारे़ लागि हाङ्घुम्बे़आङ् वयिगे़रो, आनिगे हिङिगे़आङ् कन् ओमे़प्मा खोसुम्बे़रो! 17 यहवे दाङ्बे़ल्ले़ थेःन् चोःक्मा निङ्सेक् चोगुआङ् वये़, खुने़ॽ थेःन् उवा चोगुआङ् वये़, आम्भा खे़न् चोःक्मा इःत्तुबे़न् के़त्तुरो॥ कुलुङ्माॽ स्याःत् मे़ल्लॽए खे़ने़ॽ चिल्ले़क् के़ले़क्खे़ के़देसे़रो, खुने़ॽ निङ्मिहाॽ खे़ने़ॽ के़सम्धाङ् मे़सःत्ते़र याःन्दुसिरो, खम्भ्याङ् के़अत् के़बाङ्हाॽ पधुम् के़धुम्बा चोगुसिरो॥ 18 मनाहाॽरे़ खुन्छिॽ सिक्लुङ्मे़ल्ले़ यहवे दाङ्बे़न् पेलि मे़भाक्तुरो, सियोनरे़ कुस्सा मे़न्छुमाःल्ले़ कुलुङ्धाक्के, वहःङ् हे़क्के से़न्दिक् ले़न्दिक् के़मिक्वा थासे़ॽओ॥ चबे़ःत्छिक्काङ् खे़ने़ॽ मे़नाःम्सिङ्ङे़न्ने़ॽओ, खे़ने़ॽ के़मिक्के़न् चिराप् लॽरिक् मे़नाःप्से़न्ने़ॽओ॥ 19 से़न्दिक् ये़त्ले़ङ् ये़त्ले़ङ् पोगे़आङ् अःक्ते़ॽओ, के़सिक्लुङ्मोलाम् यहवे दाङ्बे़न् पेलि फाक्ते़ॽओ॥ माराम्हाॽरे़ कुसुक्पाहाॽओ साक्के़ल्ले़ कुधना के़ले़ङ्बा के़स्साहाॽ मे़हिङ्ल फाॽआङ् के़हुक्हाॽ खुने़ॽ ले़प्माङ् फोःक्खे़ॽओ॥ 20 यहवे दाङ्बाए, ओमे़त्ते़ॽओ, हे़क्क्याङ् निङ्वाॽ इःत्ते़ॽओ, आदाङ्बारे़ अक्तङ्बा तुक्खे हात् के़जाःत्तुआङ् वाॽबे? थे मे़न्छुमाहाॽरे़ खुन्छिॽ आप्फेक् फक्थुङ्मो मे़ने़स्सुसिबा, खुन्छिॽ आप्फेक् मे़गत्तुसिबा आम्ब्रे़ःङ्वा साहाॽ मे़जसिरबि? निङ्वाॽफुसाम्बाहाॽ नु माङ्निङ्वाॽपान् के़बाःप्पाहाॽ यहवे दाङ्बे़ल्ले़ कुसेसेदे़न्नो मे़स्ये़रुसिरबि? 21 माराम् माराम्हाॽओबा खाम्हिःक्को काप्पोबा नु थाङ्बे़न् मनाहाॽ ले़रे़म्भे़ना मे़जोःन्दे़आङ् मे़ने़रो॥ थाङ्बे़न् नु मे़न्छ्या आमनाहाॽ ताभेःल्ले़ मे़सोःन्दुसिआङ् ने़रो के़सिक् पोगे़बा ये़न्नो आदाङ्बारे़ खे़ङ्हाॽ के़स्ये़रुसिआङ् वाॽरो, लुङ्माॽ स्याःत् मे़ल्लॽए खे़ङ्हाॽ के़स्ये़रुसिआङ् वाॽरो॥ 22 तङ्नाम्मो मनाहाॽ मे़जुम्बा कुइसिःक्के, आगब्रिङ्लाम् आदाङ्बारे़ आनिङ्मिहाॽ के़सुप्सुसिरो॥ यहवे दाङ्बे़ल्ले़ कुसाक्के़न् पोगे़बा ये़न्नो आत्तिन्नाङ् खे़त्छिङ्मा मे़घोसे़न्लो हे़क्क्याङ् आत्तिन्नाङ् ताङ्माआङ् मे़घोसे़न्लो॥ आङ्गाॽ हिङ्घुङ्सिङ्ङाङ् यम्बा चोगुङ्सिङ्बा आस्साहाॽ आङ्गाॽ आनिङ्मिःल्ले़ मे़क्खुसि पिराङ्ङाङ् वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.