मे़रिङ् साप्पन् 1 - लिम्बुयरुसले़मरे़ लागि मे़रिङ् 1 आयाक्को मनाहाॽरे़ थिक्ले़ङ् सधे़क् मे़धिम्सुआङ् के़ने़बा ये़क्यक्किन्, आल्ल आभेलॽरिक् चिजि खक्खक् पोःक्खे़आङ् ने़बे! खे़ङ्ग मेमेदुमा हे़क्तङ्मा पोःक्खे़आङ् ने़रो, खे़न् थिक्ले़ङ् मे़न्छाम् सुवाङ्हाॽओ पयम् यम्मा हे़क्क्याङ् ते़ङ्गप्हाॽओ हाङ्सामा हे़क्तङ्मा ने़स्से़रो, आल्ल खे़न् योःग्माओ के़धामा ये़क्यक् पोःक्खे़आङ् ने़रो॥ 2 से़न्दिक् नाम्दाःत्तात् खे़न् उःक्काङ् उःक् हाःप्लो, खे़ल्ले़ कुने़दे़ङ्बो मिक्वा चक् चक् थाआङ् पत्लो॥ खे़ल्ले़ लुङ्माॽ हिःप्तुसिबाहाॽओलाम्, खे़न् आःन्छिङ्मा के़बिबा हाःत्ताङ् होप्लो॥ खे़ल्ले़ के़रे़क् कुन्जुम्हाॽरे़ खुने़ॽ इङ्ले़क्को मे़धासुआङ् ने़रो, हे़क्क्याङ् खे़ङ्हाॽ खे़ल्ले़ कुनिङ्मि मे़बोःक्खे़आङ् मे़वाॽरो॥ 3 तुक्खे लाक्खे नु के़साक्पा योग्बा चोःक्मा एगाङ् यहुदान् लाजेॽलाम् मे़लःत्तु मे़देॽरुआङ् वाॽरो॥ आल्ल खे़न् थिम्मे़न्दङ् सुवाङ्हाॽरे़ खुन्छिॽ लुम्मो वाॽरो, खे़ल्ले़ कुभा नाःम्सिङ्मादे़न् मे़घोसुन्लो, खे़न् के़नाःप्पाहाॽ के़रे़क्ले़ चिभिःप्भिःप्पादे़न्नो खे़न् मे़दे़म्सुआङ् वाॽरो॥ 4 निःन्धो के़बोङ्बा तङ्नाम्हाॽओ आत्तिन्नाङ् मे़दाने़न्बाल्ले़ चोगुल्ले़ सियोन के़बेःक्पा लाम्हाॽ हाःप् चिङ्ल ने़रो, खे़ल्ले़ के़रे़क् मा कुलाम्धेःत्हाॽ चिजि खक्खक् पोःक्खे़आङ् ने़रो, खे़ल्ले़ कुनिङ्वाॽफुसाम्बाहाॽ सक्मारक् मे़सोःन्छिङ्लो॥ खे़प्मोबा सिसागे़न् मे़न्छ्याहाॽ निङ्वाॽ तुक्खे चामो मे़ध्ये़आङ् मे़वाॽरो, खे़ब्याङ् खे़न् के़साक्पा तुक्मा याःप्मो थ्ये़आङ् ने़रो॥ 5 खे़ल्ले़ कुनिङ्मिहाॽ खुने़ॽ कुन्दाङ्बा मे़बोःक्खे़आङ् मे़वाॽरो, खे़ल्ले़ कुअत् कुबाङ्हाॽ मे़नाःम्सिङ्ङाङ् मे़वाॽरो॥ खे़ल्ले़ यरिक् कुलायोहाॽरे़ चोगुल्ले़ यहवे दाङ्बे़ल्ले़ खे़न् तुक्खेओ थासुबारो, खे़ल्ले़ अङे़ःक्वा कुस्साहाॽ निङ्मिहाॽरे़ खुन्छिॽ तगि पुङ्लाहिम्मो मे़दे़म्सु मे़देॽरुसिआङ् मे़वाॽरो॥ 6 सियोनरे़ कुस्सा मे़न्छुमाःल्ले़ कुगे़रे़क् कुहाङ्वा कुमाङ्हाॽ मे़देॽरु मे़बिरुआङ् वाॽरो॥ खे़ल्ले़ कुलाम्लोबाहाॽ चाराम्मादे़न् मे़ङ्घोम्नाबा पे़ःङ्वा हे़क्तङ्बा मे़जोक्लो॥ खे़ङ्हाॽ मे़न्धुम्मनाबा मे़बोःक्खे़आङ् खुन्छिॽ के़नाःप्पाहाॽलाम् तगि तगि मे़घे़त्छिङ्ङाङ् मे़वाॽरो॥ 7 यरुसले़ःम्मिल्ले़ कुदुक्खे नु कुलाक्खेबा ये़न्नो उन्छोन् तुमुबा के़रे़क् इमे़ल्लुङ्बा पाःन्हाॽ निङ्वाॽ इःत्तुरो॥ खुने़ॽ कुमनाहाॽ निङ्मिहाॽरे़ खुन्छिॽ हुक्को मे़ध्ये़ःल्ले़, खे़न् के़भाॽबा आत्तिन्नाङ् होःप्ते़रो, खुने़ॽ कुनिङ्मिहाॽरे़ खे़न् ओमे़मे़त्तुरो, हे़क्क्याङ् खे़न् खाप्पुथ्यःङ् पोःक्खे़बाओ किनाःन्दि मे़बिरुरो॥ 8 यरुसले़ःम्मिल्ले़ यम्बा लायो चोगुरो, खे़ल्ले़चोगुल्ले़ खे़न् आसुत्थो पोःक्खे़आङ् ने़रो॥ खे़न् मिङ्सो इङ्धाङ् के़बिबा के़रे़क्ले़ कुनामे़न्छाॽ मे़मे़त्तुरो, थेआङ्भे़ल्ले़ खे़ङ्हाॽरे़ खे़ल्ले़ कुले़क्चाबुधुःक्किन् मे़निसुआङ् वाॽरो, खे़न् आप्फेक् उघुइ लॽआङ् थिक्नाहाङ् हिसिङ्लो॥ 9 खे़ल्ले़ कुजिःन्जिःन्घुमान् कुसिम्मो खिप्तुरो, खे़ल्ले़ के़दाबा ताप्फे़ःम्बा कुये़न्निन् निङ्वाॽ मे़इःत्तुन्लो॥ खे़ल्ले़ कुमे़क्मे़न् किप्मा के़घुबा चोगे़रो, खे़न् हाङ्हाङ् के़मे़प्पा हाःत्ताङ् होःप्ते़रो॥ “यहवे दाङ्बाए, आङ्गाॽ तुक्खे तुमुङ्बे़न् ओमे़त्ते़ॽओ, थेआङ्भे़ल्ले़ निङ्मिहाॽ के़नाःम्बा मे़बोःक्खे़आङ् वाॽरो॥” 10 खे़ल्ले़ के़रे़क् कुयाङ्सा कुन्धेहाॽ नाप्मारे़ लागि निङ्मिहाॽरे़ हुक् मे़धे़क्तुआङ् वाॽरो॥ आदाङ्बारे़ के़ये़जुम्भोओ थिम्मे़न्दङ् सुवाङ्हाॽ लाःप्मा के़म्भाःक्तुसिन्नाङ् मे़वये़रो, यरुसले़ःम्मिल्ले़ कुसेसेदे़न्नो खे़ङ्हाॽ मे़लासे़बा निसुसिरो॥ 11 खे़ल्ले़ काक् कुमनाहाॽ खुन्छिॽ सक्मा पुॽर कुजा कोःत्नु मे़वाॽरो, खुन्छिॽ सक्मा केःक्मारे़ लागि खे़ङ्हाॽरे़ चामा कुजाःन्नु खुन्छिॽ याङ्साकुन्धेहाॽ मे़ले़क्तुरो॥ “यहवे दाङ्बाए, ओमये़ॽआङ् निङ्वाॽ इःत्ते़ॽओ, थेआङ्भे़ल्ले़ आङ्गाॽ कुनामे़न्छाॽ मे़मे़त्ताङ्ङाङ् वाॽरो॥” 12 “कप्मोलाम् के़बोङ्बाआङ् के़बेःक्पा लाम्दिःक्पाहाॽ के़रे़क्ले़ लागि थे आङ्गाॽ थे़माआङ् मे़ःन्नाबि? के़रे़क् पिसाङ् ओमे़त्ते़म्मे़ॽआङ् ओमुये़म्मे़ॽओ॥ यहवे दाङ्बे़ल्ले़ किप्मागे़घुबा कुसिक् पोःक्मा ये़न्नो खुने़ॽ आङ्गाॽ तुमुङ्बा आदुक्खेन् हे़क्के वेॽ आत्तिन् मनाःल्ले़ आभे़ल्ले़ ये़त्तुक्खे तुमुआङ् वाॽबि? 13 “खुने़ॽ थाःङ्लाम्बा मिन् थासुआङ् वाॽरो, खे़न् मिन् आङ्गाॽ आये़त् सिगाङ् पाङ्घुरो॥ खुने़ॽ आङ्गाॽ आलाङ्ङो इजो के़सुरो, हे़क्क्याङ् आङ्गाॽ नुःक्ताङ् ताराङ्लो॥ खुने़ॽ आङ्गाॽ मुरे़क् खारे़क् चोगाङ्लो खे़ब्याङ् ले़न्दिक् नाम्धाधा मे़न्धुम्मनाबा चोगाङ्लो॥ 14 “आङ्गाॽ आलायोहाॽ लत्छा खे़ःप्सिङ्ङो इघेःक्खुआङ् पत्लो, खुने़ॽ कुहुक्किल्ले़ खे़ङ्हाॽ इघेःक्खुरो, खे़न् आङ्गाॽ आभक्ताङ्ङो मे़भत्छुआङ् पत्लो, यहवे दाङ्बे़ल्ले़ आङ्गाॽ आधुम्मे़न् युम्सुआङ् वाॽरो॥ खुने़ॽ आनिङ्मिहाॽरे़ खुन्छिॽ हुक्को थासाङ्लो, खे़ङ्हाॽनु आङ्गाॽ थक्मा मे़सुक्कान्लो॥ 15 “दाङ्बे़ल्ले़ के़रे़क् आधक्सुबाहाॽ नाॽरुसिआङ् वाॽरो, आङ्गाॽ थाङ्बे़न् आमनाहाॽ तरःम्दरःम् लःम्मासिरे़ लागि आङ्गाॽ आदक्ले़ङ्वाओ के़धुम्बाहाॽ फुक्खुसिआङ् वाॽरो॥ खुने़ॽ चे़ल्ले़क्सेॽ एःम्मादे़न्नो, चे़ल्ले़क्सेॽ एःप्मनाबा हे़क्के यहवे दाङ्बे़ल्ले़ यहुदाःल्ले़ सिसागे़न् कुस्सा मे़न्छ्यान् युःत्तुआङ् वाॽरो॥ 16 “कन् के़रे़क् पाःन्हाॽरे़ चोगुल्ले़ आङ्गाॽ हाःप्मार वाॽआरो, आङ्गाॽ आमिक्कोलाम् आमिक्वा ते़रे़रे़ थाप्लो॥ आङ्गाॽ हाङ्हाङ् मे़प्मारे़ लागि आबेसाङ् हाःत्ताङ् होप्लो, आयाम्साम्मिन् याम्मो कुहिङ्वे़त् के़जोःक्पा आसाःत्ताङ् होप्लो॥ आङ्गाॽ अङे़ःक्वा आस्सा ये़म्बित्छाहाॽ एःक्से़त्छा मे़वाॽरो, थेआङ्भे़ल्ले़ निङ्मिन् थङ् के़नाःम्बा पोःक्खे़आङ् वाॽरो॥ 17 “पेलि फाक्मारे़ लागि सियोनरे़ कुहुक्किन् सल्लिक् सन्छुरो, कर खे़न् आःन्छिङ्मा के़बिबा आत्तिन्नाङ् होप्लो॥ यहवे दाङ्बे़ल्ले़ याकुबरे़ कुदक्ले़ङ्वाओ कुहिम्बेसाङ्बाहाॽ कुनिङ्मि मे़बोङ्ल फाॽआङ् इङ्जाङ् पिरुसिआङ् वाॽरो॥ खे़ङ्हाॽरे़ खुन्छिॽ लुम्मो यरुसले़ःम्मिन् लत्छा आसुत्थो पान् पोःक्खे़आङ् ने़रो॥ 18 “यहवे दाङ्बे़न् साम्योबा चोक्लो, हे़क्केसाङ् कुदक्ले़ङ्वाओ पिफ्युङ्बा पोःक्खाङ्ङाङ् वयाङ्लो॥ के़रे़क् मे़न्छाम् सुवाङ्से, खे़प्से़म्मे़ॽओ हे़क्क्याङ् आङ्गाॽ आदुक्खेन् ओमे़त्ते़म्मे़ॽओ॥ सिसागे़न् मे़न्छ्या आमनाहाॽ नु थाङ्बे़न् आमनाहाॽ लाजेॽलाम् लाःक्कात् मे़लःत्तु मे़देॽरुसिआङ् मे़वाॽरो॥ 19 “आङ्गाॽ आन्जुम् आन्देङ्बाहाॽ उःत्तुङ्सिङ्लो, कर खे़ङ्हाॽरे़ आङ्गाॽ इङ्ले़क्को मे़धासाङ्लो॥ याम्मो हिङ्मारे़ लागि चामा कुजाहाॽ मे़गोःत्तुआङ् मे़ङ्घोसुन्निल्ले़ ये़क्यक्को आङ्गाॽ आमाङ्निङ्वाॽपान् के़बाःप्पाहाॽ नु आलाम्लोबाहाॽ मे़मे़गे़रो॥ 20 “यहवे दाङ्बाए, ओमे़त्ते़ॽओ, तुक्खेओ थ्याङ्ङाङ् वाॽआरो, आङ्गाॽ साॽरिक् पिफ्युङ्बा पोःक्खाङ्बाल्ले़ चोगुल्ले़ आङ्गाॽ आसिक्लुङ्मान् याःत्लो, आङ्गाॽ आयाम्साम्मिन् आसिगाङ् थाम्सिङ् मुङ्सिङ्लो॥ लाःक्कात् ताभेःल्ले़ मना स्ये़रुसिरो, सिगाङ् खे़प्मो सिमारक् वाॽरो॥ 21 “मनाहाॽरे़ आङ्गाॽ याःत्ताबान् मे़घे़प्सुआङ् वाॽरो, कर आङ्गाॽ हाङ्हाङ् के़मे़प्पा आत्तिन्नाङ् होप्लो॥ आङ्गाॽ के़रे़क् आनिङ्मिहाॽरे़ आये़त्तुक्खेन् मे़घे़प्सुआङ् वाॽरो, आदाङ्बारे़ अक्खे के़जोगुबाओ खे़ङ्हाॽ मे़सःत्लो॥ आदाङ्बारे़ उवा के़जोगुबा ये़न्निन् के़दारुरो, खम्भ्याङ् खे़ङ्हाॽआङ् आङ्गाॽ कुसिङ्बाए मे़बोङ्लरो॥ 22 “खुन्छिॽ ताप्फे़ःम्बा याःम्बक्हाॽ खक्पे़त् आदाङ्बारे़ के़दगि ताररो, हे़क्क्याङ् के़रे़क् आलायोहाॽरे़ चोगुल्ले़ आङ्गाॽ के़मे़त्ताङ्बा हे़क्के खे़ङ्हाॽआङ् हाबा हे़क्केलॽरिक्के ताप्फे़ःल्लिक् मे़त्ते़से़ॽओ॥ आङ्गाॽ साॽरिक् यरिक् याःत्तारो हे़क्क्याङ् आङ्गाॽ आसक्मा पुॽरे़आङ् वाॽआरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.