यहोसु 9 - लिम्बुगिबोनिहाॽरे़ यहोसुन् इङ्मे़ले़क्तु 1 आल्ल यर्दन वहःङ् नाम्धा पिसाङ्बा के़रे़क् हाङ्हाॽरे़ थे़मा पोःक्खे़आङ् वये़ के़लॽबा पाःन्निन् मे़घे़प्सु॥ कन् हाङ्हाॽग नाम्धा पिसाङ्बा थे़गु माङ्वाहाॽओबा लाजेॽहाॽओ नु लुम्बाङ् वरःङ्ङिल्ले़ कुया कुया लेबनान थाङ्गे़त् ले़प्माङ् कोःक्माहाॽओ थारिक् के़युङ्बा हित्ति, एमोरि, कनानि, परिज्जि, हिब्बि नु यबुसिहाॽ मे़वये़॥ 2 यहोसुन् नु इस्राइलिहाॽरे़ खुन्छिॽ तक्ले़ङ्वाओ थक्मारे़ लागि कन् हाङ्हाॽरे़ खुन्छिॽ थक्सुबाहाॽ थिक्हुप् मे़जोगुसि॥ 3 कर यरिहोओ नु एेओ यहोसुःल्ले़ चोगुबा पाःन्निन् गिबोन के़युङ्बाहाॽरे़ मे़घे़प्सु, 4 खे़ब्याङ् खे़ङ्हाॽरे़ लत्छा इङ्ले़क् पान् मे़जोगु॥ खे़ङ्हाॽ लाजेॽबा इङ्साबा मे़ले़ङ्सिङ्साङ् कुद्रे़क् फाःङ्ग्रिमाहाॽ नु चे़ल्ले़क्सेॽ सेजःङ्वा याङ्मा के़दे़ःङ्बा ले़म्मनाबा सिहोॽबा सुक्वाहाॽ खुन्छिॽ अदङ्हाॽ मे़गुःत्तुसि॥ 5 हे़क्क्याङ् ये़म्बित्छाहाॽरे़ खुन्छिॽ लाङ्ङो ले़म्मनाबा कुद्रे़क् लाङ्सुःप्हाॽ नु खुन्छिॽ थक्को कुद्रे़क् चाङ्हाॽ मे़जाक्खु॥ खे़ङ्हाॽरे़ खुन्छिॽ चामा चाहाॽआङ् के़रे़क् के़हेबा नु सुक्नाःम् के़धक्पा चोगे़॥ 6 खे़ब्याङ् खे़ङ्हाॽ गिलगालबा साःङ्गाहिम्मो यहोसुओ मे़द्ये़आङ् खुने़ॽ नु इस्राइलिहाॽ मे़मे़त्तुसि, “आनिगे़ग माःङ्घाबा लाजेॽलाम् त्ये़ॽइगे़बारो॥ कल्ले़चोगुल्ले़ आनिगे़नु नादङ् चोगे़म्मे़ॽ॥” 7 हे़क्क्याङ् इस्राइलि ये़म्बित्छाहाॽरे़ खे़न् हिब्बिहाॽ मे़मे़त्तुसि, “खिनिॽग आनिगे लुम्मोए के़युङ्बा मनानिङ्बिला, खिनिॽनु आनिगे आक्खेलॽरिक् नादङ् चोःक्मा सुक्तुम्बे़बे?” 8 खे़ङ्हाॽरे़ यहोसुन् मे़मे़त्तु, “आनिगे़ग खे़ने़ॽए के़योःग्बादिगे़॥” कर यहोसुःल्ले़ खे़ङ्हाॽ सेःन्दोसुसि, “खिनिॽ हाःत्निङ्बे हे़क्क्याङ् आत्तिलाम् के़द्ये़ॽइबाबे?” 9 खे़ङ्हाॽरे़ खुने़ॽ मे़मे़त्तु, “खे़ने़ॽ के़योःग्बाहाॽ यरिक् माःङ्घाबा लाजेॽलाम् यहवे दाङ्बा खे़ने़ॽ के़निङ्वाॽफुमाङ्ङिल्ले़ कुमिङ्ङिन् खे़प्सुम्बे़आङ् आनिगे त्ये़ॽइगे़बारो, थेआङ्भे़ल्ले़ खुने़ॽ के़इङ्बा कुमिङ्ङिन् नु मिस्र लाजेॽओ चोगुबा याःम्बक्हाॽ आनिगे खे़प्सुम्बे़आङ् वयिगे़, 10 यर्दन नाधाःम्बि एमोरिहाॽरे़ खुन्छिॽ ने़प्माङ् हाङ्हाॽ, हेस्बोनबा हाङ् सिहोने़न् नु अस्तारोत के़युङ्बा बासानबा हाङ् ओगे़न् थे़मा थे़मा मे़त्तुसिआङ् वये़, खे़न् आनिगे खे़प्सुम्बे़आङ् वयिगे़॥ 11 कल्ले़चोगुल्ले़ आनिगे तुम्भाक्साहाॽ नु आनिगे लाजेॽओ के़युङ्बा के़रे़क्ले़ आनिगे अक्खे मे़मे़त्तिगे़, ‘खिनिॽ लाम्दिक् चोःक्मारे़ लागि लाम्मो चामा कुजा याङ्ङासिम्मे़ॽआङ् खे़ङ्हाॽरे़ खुन्छिॽ तुम्से़ पेगे़म्मे़ॽ, हे़क्क्याङ् खिनिॽ खे़ङ्हाॽ अक्खे मे़त्ताम्सिम्मे़ॽ, “आनिगे़ग खिनिॽए योःग्बादिगे़, कल्ले़चोगुल्ले़ आल्ल आनिगे़नु नादङ् चोगे़म्मे़ॽ॥”’ 12 “आनिगे खिनिॽओ लःम्मना फे़म्मनाःल्ले़ याःन्दिक् आनिगे हिम्मोलाम् आनिगे चामारे़ लागि आनिगे कन् खरे़ःङ्ङिन् पगो कोसे़र याङ्ङासिगे़आङ् वये़, कर आल्ल ओमे़त्ते़म्मे़ॽ, कन् हेरे़आङ् सुक्नाःम्बा थ्ये़ चुरे़आङ् वाॽ॥ 13 आनिगे चे़ल्ले़क्सेॽ सेजःङ्वा याङ्मनाबा कन् सिहोॽबा सुक्वाहाॽ कुसङ्ङे वये़, कर ओमे़त्ते़म्मे़ॽ, कन्हाॽ ते़ःक्खे़बेआङ् वाॽ, खम्भ्याङ् आनिगे कन् चाङ्हाॽ नु लाङ्सुःप्हाॽआङ् माःङ्घा लाम् पोःक्खे़बाल्ले़ चोगुल्ले़ कुद्रे़क् पोःक्खे़चुरे़आङ् वाॽ॥” 14 यहवे दाङ्बालाम् इङ्जाङ् पान् मे़ङ्घे़म्मे खे़न् इस्राइलिहाॽरे़ खे़ङ्हाॽरे़ खुन्छिॽ चामा कुजाहाॽ ओमे़मे़त्तु मे़साॽरु॥ 15 हे़क्क्याङ् यहोसुःल्ले़ खे़ङ्हाॽनु तङ्माआङ् मे़न्छे़प्मासि नादङ् चोगु खे़ब्याङ् खे़ङ्हाॽनु पाःन्दङ् चोगुआङ् सङ्जुम्भोबा लाम्लोबाहाॽरे़आङ् कन् पाःन्नो ते़म्मा माङ्हे़क् मे़जोगु॥ 16 गिबोनिहाॽनु पाःन्दङ् मे़जोगुबा सुम्यान् एगाङ्सा खे़ङ्हाॽग आप्फेक् हिम्बेसाङ्बासिरे़त्छ, हे़क्क्याङ् आप्फेक् लुम्मो के़युङ्बासिरे़त्छ के़लॽबा पाःन्निन् इस्राइलिहाॽरे़ मे़घे़प्सु॥ 17 कल्ले़चोगुल्ले़ इस्राइलिहाॽ लाङ्मे़घेगे़आङ् सुम्यान्ले़ खे़ङ्हाॽरे़ खुन्छिॽ ये़क्यक्हाॽओ मे़गे़रे़॥ खे़ङ्हाॽरे़ खुन्छिॽ ये़क्यक्हाॽग गिबोन, कपिरा, बेरोत र किर्यत-यारिम ने़स्से़॥ 18 इस्राइलिहाॽ खे़ङ्हाॽनु मे़न्धक्ते़न्, थेआङ्भे़ल्ले़ सङ्जुम्भोबा लाम्लोबाहाॽरे़ खे़ङ्हाॽनु यहवे दाङ्बा इस्राइलबा निङ्वाॽफुमाङ्ङो माङ्हे़क् मे़जोगुआङ् वये़॥ के़रे़क् सङ्जुम्भोहाॽ लाम्लोबाहाॽरे़ खुन्छिॽ तक्ले़ङ्वाओ मने़धिक्मा मे़हेःक्ते़॥ 19 कर के़रे़क् लाम्लोबाहाॽरे़ सङ्जुम्भोबा मनाहाॽ मे़मे़त्तुसि, “आनिगे खे़ङ्हाॽनु यहवे दाङ्बा इस्राइलबा निङ्वाॽफुमाङ्ङो माङ्हे़क् चोगुम्बे़आङ् वाॽ॥ कल्ले़चोगुल्ले़ आनिगे खे़ङ्हाॽ सुमा मे़सुक्तुम्सिम्बे़न्ॽ॥ 20 आनिॽ अक्खेए चोःक्मा पोङ्ॽ—आनिॽ खे़ङ्हाॽ कुहिङ्वे़त्ते ले़प्मासि पोङ्ॽ, मेःन्ने़भग्र आनिॽ आजोगुम्बा माङ्हे़क्किल्ले़ चोगुल्ले़ निङ्वाॽफुमाङ्ङिल्ले़ कुसाक्के़न्निन् आनिॽ सम्धाङ् थारो॥ 21 खे़ङ्हाॽ कुहिङ्वे़त्ते ले़रे़म्सिम्मे़ॽ॥ कर खे़ङ्हाॽ के़रे़क् सङ्जुम्भोहाॽरे़ खुन्छिॽ लागि सिङ् के़गोःप्पा नु च्वाःत् के़भाःप्पा मे़बोङ्ङाङ् मे़वाॽर याःन्दे़म्सिम्मे़ॽ॥” कल्ले़चोगुल्ले़ लाम्लोबाहाॽरे़ खे़ङ्हाॽनु मे़जोगुबा माङ्हे़क् कुइसिक् के़रे़क् सङ्जुम्भोहाॽरे़ खुन्छिॽ लागि सिङ् के़हङ्बा नु च्वाःत् के़भाःप्पा मे़बोःक्खे़॥ 22 हे़क्क्याङ् यहोसुःल्ले़ गिबोनिहाॽ उःत्तुसिआङ् मे़त्तुसि, “से़क्खाःल्ले़ खिनिॽग आनिगे लुम्मोए के़युङ्बानिङ्रे़त्छ, कर खिनिॽ थेआङ् ‘आनिगे साॽरिक् माःङ्घाबा लाजेॽ के़युङ्बासिगे़रो’ फाॽआङ् इङ्ले़क् के़बाःत्तुम्ॽ? 23 कल्ले़चोगुल्ले़ आल्ल खिनिॽ माङ्दे साङ्ग्रा के़ध्ये़ॽइआङ् के़वयिॽ॥ आनिङ्वाॽफुमाङ्ङिल्ले़ कुहिम्मो खिनिॽ आभे़ल्ले़साङ् मानाहाॽरे़ खुन्छिॽ लुम्मो सिङ् के़हङ्बा नु च्वाःत् के़भाःप्पा पोङ्माआङ् वाॽमा पोङ्ॽ॥” 24 खे़ङ्हाॽरे़ यहोसुन् मे़मे़त्तु, “यहवे दाङ्बा खे़ने़ॽ के़निङ्वाॽफुमाङ्ङिल्ले़ कुसे़वारोबा मोसान् पिरुबा कन् लाजेन् के़रे़क् खिनिॽ पिमा नु कन् लाजेॽओ के़युङ्बाहाॽ के़रे़क् मे़ङ्मासि इङ्जाङ् पिरुबा पाःन्निन् खे़ने़ॽ के़योःग्बाहाॽ नुरिक्काङ् मे़मे़त्तिगे़आङ् वये़॥ कल्ले़चोगुल्ले़ साॽरिक् किसिगे़आङ् आनिगे हिङ्मन् से़ःप्मारे़ लागि अक्खे चोगुम्बे़बारो॥ 25 आल्ल ओमे़त्ते़ॽ, आनिगे खे़ने़ॽ के़हुक्को वयिगे़॥ खे़ने़ॽ थे़मा चोःक्मा नुबा नु के़लाॽबा चोक्, खे़न् आनिगे़नु चोगे़ॽ॥” 26 कम्भलॽरिक् यहोसुःल्ले़ इस्राइलिहाॽलाम् खे़ङ्हाॽ से़ःप्तुसिआङ् इस्राइलिहाॽरे़ खे़ङ्हाॽ मे़न्छे़रुसिन्॥ 27 खे़ल्ले़ याःन्दिक् यहोसुःल्ले़ खे़ङ्हाॽ सङ्जुम्भोहाॽरे़ खुन्छिॽ लागि नु यहवे दाङ्बे़ल्ले़ सेगुबादे़न्नो खुने़ॽओ मे़दोन्दुबा ले़त्ति तोःम्मादे़न्निल्ले़ लागि सिङ् के़गोःप्पा नु च्वाःत् के़भाःप्पा चोगुसि॥ खे़ङ्हाॽ आइन् थारिक् हे़क्तङ्बाए मे़वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.