यहोसु 8 - लिम्बुऐ ये़क्यक्किन् हुक्काप् मे़जोगुआङ् मे़मे़क्खु 1 खे़ब्याङ् यहवे दाङ्बे़ल्ले़ यहोसुन् मे़त्तु, “मे़गिसे़न्ने़ॽ, के़निङ्वाॽ स्रोःन् मे़लॽरे़न्ने़ॽ॥ के़रे़क् थक्सुबाहाॽ सोरिक् तेॽरे़से़ॽ॥ पेगे़ॽ, ऐ ये़क्यक्को थङ् चोगे़ॽ॥ ओमे़त्ते़ॽ, ऐ ये़क्यक्कोबा हाङ्ङिन्, खे़ल्ले़ कुमनाहाॽ, खे़ल्ले़ कुये़क्यक्किन् नु खे़ल्ले़ कुलाजेन् आङ्गाॽ खे़ने़ॽ हुक्सुप्ने़आङ् वाॽ॥ 2 खे़ने़ॽ यरिहोन् नु खे़प्मोबा हाङ्ङिन् आक्खे के़जोगुआङ् वये़, ऐ ये़क्यक्किन् नु खे़प्मोबा हाङ्ङिन्नाङ् हे़क्केए के़जोगुॽ, कर खे़प्मोबा याङ्साकुन्धेहाॽ नु खे़प्मोबा थक्साहाॽरक् खिनिॽ आप्फेक् लागि तेॽमा के़सुक्तुम्ॽ॥ खे़न् ये़क्यक्किन् कुएगाङ् ले़प्माङ् सुगे़म्मे़ॽआङ् युङे़म्मे़ॽ॥” 3 कल्ले़चोगुल्ले़ यहोसुन् के़रे़क् थङ् के़धक्पा मनाहाॽनु सोरिक् ऐ ये़क्यक्को थङ् चोःक्से़ पेःक्मारे़ लागि पोगे़॥ यहोसुःल्ले़ सुम्बोङ् हे़न्छिङ् नुरिक् थङ् के़धक्पा मनाहाॽ सेगुसिआङ् से़न्दिक्सा फोःक्खुसि॥ 4 खुने़ॽ खे़ङ्हाॽ अक्खे मे़त्तुसिआङ् इङ्जाङ् पिरुसि, “ओमे़त्ते़म्मे़ॽ, खिनिॽ कन् ये़क्यक्किल्ले़ कुएगाङ् ले़प्माङ् सुगे़म्मे़ॽआङ् युङे़म्मे़ॽ॥ ये़क्यक्लाम् माःङ्घा मे़बेगे़म्मिन्ने़ॽ, हे़क्क्याङ् चाःत्चाःत् लॽरे़म्मे़ॽ॥ 5 आङ्गाॽनु सोरिक् के़वाॽबा मनाहाॽनु आङ्गाॽ ये़क्यक् ले़प्माङ् तगि पेःक्कारो, हे़क्क्याङ् आल्ल ऐबा मनाहाॽ आनिॽ तक्ले़ङ्वाओ मे़भे़न्, खे़ब्याङ् तगि हे़क्केए खे़ङ्हाॽरे़ आनिॽ आम्नाःत्ते़ल्ले़ आघे़त्छिङ्ॽ॥ 6 खे़ङ्हाॽरे़ आनिॽ आम्नात् हे़क्क्याङ् आनिॽ खे़ङ्हाॽ ये़क्यक्लाम् माङ्भा माःङ्घा आलःत्तुम् आभे़त्तुम्सिम्ॽ, खे़ब्याङ् खे़ङ्हाॽरे़ मे़बाःत्तुॽ, ‘तगिबा हे़क्केए इस्राइलिहाॽ आनिॽ तगाङ्लाम् मे़घे़त्छिङ्ल मे़बत्॥’ हे़क्केलॽरिक् आनिॽ खुन्छिॽ तगाङ्लाम् आघे़त्छिङ्ॽ, 7 खे़ब्याङ् खिनिॽ के़सुगुम्सिम्माङ् के़युङ्ङिबा ते़न्नोलाम् पोगे़म्मे़ॽआङ् खे़न् ये़क्यक्किन् हुक्काप् चोगे़म्मे़ॽ, थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हुक्को खे़न् हुक्के़सुःप्तिॽ॥ 8 ये़क्यक्किन् हुक्काप् के़जोगुम्मिल्ले़ खिनिॽ खे़प्मो मि याक्ते़म्मे़ॽ॥ यहवे दाङ्बे़ल्ले़ कुबाःन्जाक् इसिःक् खिनिॽ चोगे़म्मे़ॽ॥ ओमे़त्ते़म्मे़ॽ, आङ्गाॽ खिनिॽ कन् इङ्जाङ्हाॽ पिनिङ्ङाङ् वाॽ॥” 9 कम्भलॽरिक् यहोसुःल्ले़ खे़ङ्हाॽ पाङ्घुसि, हे़क्क्याङ् खे़ङ्हाॽ मे़बेआङ् ऐ ये़क्यक् नाम्धा ले़प्माङ् बेथेल नु ऐ ये़क्यक्किल्ले़ कुलुम्मो मे़सुगुसिआङ् मे़युङे़॥ कर यहोसुन् खे़न् से़न्दिक् साःङ्गाहिम्मोए युङे़॥ 10 यहोसुन् आन्देन् तानाम्सा पोगे़, हे़क्क्याङ् थक्सुबाहाॽ फुक्खुसिआङ् इस्राइलिहाॽरे़ खुन्छिॽ लाम्लोबाहाॽआङ् खे़ङ्हाॽरे़ खुन्छिॽ तगि तगि ऐ ये़क्यक् ले़प्माङ् मे़बे॥ 11 खुने़ॽनु के़वाॽबा के़रे़क् थङ् के़धक्पाहाॽ ये़क्यक्किल्ले़ कुबेसाङ् निःत्ताङ् मे़द्ये़, खे़ब्याङ् ऐ ये़क्यक् थोहाङ् ले़प्माङ् साःङ्गाहिम् मे़जोगु॥ खे़ङ्हाॽ नु ऐ ये़क्यक्किल्ले़ कुलुम्मो लत्छा ने़ने़बादे़न् ने़स्से़॥ 12 यहोसुःल्ले़ हे़न्छिङ् ङासि यारिक् मनाहाॽ तेॽरुसिआङ् ये़क्यक् नाम्धा ले़प्माङ्, बेथेल नु ऐ ये़क्यक् लुम्मो मनाहाॽ सुक्मा पाङ्घुसि॥ 13 थङ् चोःक्मारे़ लागि यम्बा साःङ्गाहिम्मो यारिप् मे़जोगुसिबा थक्सुबा थाङ्गे़त् ले़प्माङ् मे़युक्खुसि हे़क्क्याङ् वेॽ थक्सुबाहाॽ ये़क्यक्लाम् नाम्धा ले़प्माङ् युङ्मा मे़बाङ्घुसि॥ यहोसुन् चैँ ने़ने़बादे़न्नोए नाम्दाःत्तात् युङे़॥ 14 आल्ल ऐ ये़क्यक्कोबा हाङ्ङिल्ले़ कन् निसु खे़ब्याङ् खुने़ॽ नु ये़क्यक्कोबा के़रे़क् मनाहाॽ आन्देन् तानाम्सा मे़बोगे़आङ् इस्राइलिहाॽरे़ खुन्छिॽ तक्ले़ङ्वाओ थङ् चोःक्मारे़ लागि निःन्धो के़बोङ्बादे़न्नो अराबा तगि ले़प्माङ् हाराहारा मे़लःन्दे़॥ कर ये़क्यक् एगाङ् ले़प्माङ् आप्फेक् तक्ले़ङ्वाओ आम्सुक्काङ् मे़युङ् फाॽआङ् खे़ल्ले़ निङ्वाॽ मे़घोसुन्ॽ॥ 15 खे़ब्याङ् यहोसुन् नु के़रे़क् इस्राइलिहाॽ खे़ङ्हाॽरे़ खुन्छिॽ तगि हारिगे़दाबा मे़ले़ङ्सिङ्ङाङ् मुरे़क् खारे़क् थेआङ् के़होःप्पादे़न् ले़प्माङ् मे़घे़त्छिङ्॥ 16 खे़ङ्हाॽ नाःप्मासिरे लागि खे़न् ये़क्यक्को के़वाॽबा के़रे़क् मनाहाॽ मे़उःत्तुसि, हे़क्क्याङ् खे़ङ्हाॽरे़ यहोसुन् एगाङ् एगाङ् मे़नाःत्तुर मे़बे, खम्भ्याङ् ये़क्यक्लाम् यरिक् माःङ्घा मे़लःन्दे़ मे़भे़रे़॥ 17 इस्राइलिहाॽ मे़न्नाःप्मनाबा मना ऐ ये़क्यक् नु बेथेलओ लत्छा मनाआङ् होःप्ते़॥ खे़ङ्हाॽरे़ ये़क्यक्किन् चिजि खक्खक् मे़ने़स्सुआङ् इस्राइलिहाॽ मे़नाःत्तुसि॥ 18 खे़ब्याङ् यहवे दाङ्बे़ल्ले़ यहोसुन् मे़त्तु, “खे़ने़ॽ के़हुक्को के़गत्तुबा लाःक्किन् ऐ ले़प्माङ् सन्छे़ॽ, थेआङ्भे़ल्ले़ आङ्गाॽ खे़न् खे़ने़ॽ के़हुक्को पिने़॥” खम्भ्याङ् यहोसुःल्ले़ कुहुक्को कत्तुबा लाःक्किन् ये़क्यक् ले़प्माङ् सन्छु॥ 19 खुने़ॽ कुहुक्किन् सन्छुनुमे़ःन्ने के़सुक्पाआङ् के़युङ्बा मनाहाॽ खुन्छिॽ मे़युङे़बा आप्फेक् आप्फेक् ते़न्हाॽओलाम् मुत्थ्रिक् मे़बोगे़, हे़क्क्याङ् ये़क्यक्को कुदुङ्दुङ् मे़लोःक्ते़ मे़लासे़आङ् खे़न् हुक्काप् मे़जोगु, खे़ब्याङ् खिमो खे़प्मो मि मे़याक्तु॥ 20 आल्ल ऐबा मनाहाॽ एगाङ् मे़हिसिङ्ङाङ् ओमे़मये़ल्ले़ ये़क्यक्कोबा मिःक्खुन् ताङ्साङ्बो पोगे़आङ् पत्छे़बा मे़निसु, कर खुन्छिॽ लागि कत्ना कत्थो खे़त्छिङ्मा ये़म्माङ् मे़ङ्घोसुन्, थेआङ्भे़ल्ले़ मुरे़क् खारे़क् थेआङ् के़होप्पादे़न्नो के़घे़त्छिङ्बा के़ले़ङ्सिङ्बा इस्राइलिहाॽरे़ खुन्छिॽ के़नाःप्पा ऐबा मनाहाॽ ले़प्माङ् मे़हिसिङ्ङाङ् फप्मा मे़हेःक्तुसि॥ 21 थेआङ्भे़ल्ले़ खे़न् के़सुक्पाआङ् के़युङ्बाहाॽरे़ ये़क्यक्किन् हुक्काप् मे़जोगुबा हे़क्क्याङ् ये़क्यक्कोबा मिःक्खुन् थाःङ् पोगे़आङ् पत्छे़बा यहोसुन् नु के़रे़क् इस्राइलिहाॽरे़ मे़निसु, खे़ब्याङ् खे़ङ्हाॽ मे़नुःक्खे़आङ् ऐबा मनाहाॽ मे़भत्तुसि॥ 22 ये़क्यक्को के़गे़प्पा इस्राइलिहाॽआङ् ऐबा मनाहाॽ फप्मासिरे़ लागि ये़क्यक्लाम् मे़लःन्दे़ मे़भे़रे़॥ कम्भलॽरिक् कुभा कत्नाहाङ् ले़प्माङ्लाम् नु कुभा नाहाङ् ले़प्माङ्लाम् मे़बोःक्खे़आङ् ऐबा मनाहाॽ इस्राइलिहाॽरे़ खुन्छिॽ लुम्मो मे़जुक्ते़, हे़क्क्याङ् इस्राइलिहाॽरे़ खे़ङ्हाॽ लत्छाआङ् पिम्मा नु हिङ्मा मे़ङ्घोए मे़से़रुसि॥ 23 कर ऐबा हाङ्ङिन् खे़ङ्हाॽरे़ कुहिङ्वे़त्ते मे़दे़म्सुआङ् यहोसुओ मे़भे़त्तु॥ 24 इस्राइलिहाॽरे़ ऐबा के़रे़क् यक्युङ्बाहाॽ खुन्छिॽ मे़नाःत्तुसिबा ने़ने़बादे़न्नो नु मुरे़क् खारे़क् थेआङ् के़होप्पादे़न्नो मे़मे़क्खुसि, हे़क्क्याङ् खे़ङ्हाॽ के़रे़क् ताभेःल्ले़ युम्रे़क् मे़मे़क्खुसि॥ खे़ब्याङ् के़रे़क् इस्राइलिहाॽ ऐ ये़क्यक्को मे़नुःक्खे़ मे़बेआङ् खे़प्मो के़वाॽबाहाॽआङ् मे़से़रुसि॥ 25 खे़ल्ले़ याःन्दिक् मे़से़रुसिबा ये़म्बित्छा नु मे़न्छुमा के़रे़क्ले़ थिबोङ्ङाङ् ने़त्छि हे़न्छिङ् मे़वये़, ऐ ये़क्यक्कोबा मनाहाॽ के़रे़क्ले़ खे़म्म्याक्लक् मे़वये़॥ 26 थेआङ्भे़ल्ले़ यहोसुःल्ले़ ऐबा के़रे़क् यक्युङ्बाहाॽ युम्रे़क् मे़म्मे़ङ्सिङ्ङे थारिक् खुने़ॽ लाःक्किन् ते़म्सुआङ् सन्छुबा कुहुक्किन् मे़नाःप्सुन्॥ 27 कर थक्साहाॽ नु ये़क्यक्कोबा याङ्साकुन्धेहाॽरक्, यहवे दाङ्बे़ल्ले़ यहोसुन् इङ्जाङ् पिरुबा हे़क्के, इस्राइलिहाॽरे़ मे़देॽरु॥ 28 कम्भलॽरिक् यहोसुःल्ले़ ऐ ये़क्यक्किन् खाप्पुथ्यःङ् मिधिक्खुआङ् के़लुम्सिङ्बाआङ् के़ने़बा चोगु, खे़न् हाबा आइन् थारिक्काङ् ने़रो॥ 29 हे़क्क्याङ् खुने़ॽ ऐबा हाङ्ङिन् युःन्छिक् थारिक् लत्छा सिङ्बुङ्ङो फोःन्दु फत्छु खम्भ्याङ् नाम्ध्ये़ःल्ले़ यहोसुःल्ले़ इङ्जाङ् पिरुसिबा कुइसिक् खे़ङ्हाॽरे़ खे़ल्ले़ कुजेन् सिङ्बुङ्ङोलाम् यो मे़धासुआङ् ये़क्यक्को लाःप्मा लाम्धेःत्तो लाप्मे़देसु, हे़क्क्याङ् खे़ल्ले़ कुसम्धाङ् यरिक् लुङ्हाॽ मे़लुप्सु, खे़न् आल्लो थारिक्साङ् ने़रो॥ एबाल कोःक्माओ साम्यो साक्थिम्हाॽ मे़निरु 30 खे़ब्याङ् यहोसुःल्ले़ यहवे दाङ्बा इस्राइलबा निङ्वाॽफुमाङ्ङिल्ले़ कुलागि एबाल कोःक्माओ 31 यहवे दाङ्बे़ल्ले़ कुसे़वारोबा मोसाःल्ले़ इस्राइलिहाॽ इङ्जाङ् पिरुसिबा कुइसिक् मोसाःल्ले़ पिरुसिबा साम्योथिम् इङ्जाङ् साप्पन्नो साप्ते़आङ् पप्पा हे़क्के, मे़ङ्घक्केबा इग्र फे़न्जेल्ले़ मे़न्छुएबा लुङ्हाॽलाम् लत्छा ले़त्ति तोःम्मादे़न् चोगु, हे़क्क्याङ् खे़प्मो खे़ङ्हाॽरे़ यहवे दाङ्बे़ल्ले़ कुलागि मिधिङ्मनादेःम्नाबा सिदुङ्जभा मे़दोन्दु, खे़ब्याङ् तङ्जुम् सिदुङ्जभाआङ् मे़दोन्दु॥ 32 खे़प्मो यहोसुःल्ले़ इस्राइलिहाॽरे़ खुन्छिॽ तगि मोसाःल्ले़ साप्तुबा साम्योथिम् इङ्जाङ्ङिन् लुङ्हाॽओ लिङ्घु॥ 33 इस्राइलिहाॽ हाङ्वागे़न् मुॽइसाम् पिमासि पोङ्ॽ फाॽआङ् यहवे दाङ्बे़ल्ले़ कुसे़वारोबा मोसाःल्ले़ तगिए इङ्जाङ् पिरुसिबा कुइसिक्, वेॽ लाजेॽबा, आप्फेक् लाजेॽबा, के़रे़क् इस्राइलिहाॽ, खे़ङ्हाॽरे़ खुन्छिॽ साम्योसिक्साम्बाहाॽ, युक्साबाहाॽ, खासे़न्लोःम्बाहाॽ खे़ङ्हाॽनु सोसोरिक् यहवे दाङ्बे़ल्ले़ कुमाङ्हुप् सन्दोक् के़बङ्बा ले़बि निङ्वाॽफुसाम्बाहाॽरे़ खुनिॽ तगि सन्दोक् नाहाङ् कत्नाहाङ् कुभ्रे़ःङ् एबाल कोःक्मा तगि नु वेॽ कुभ्रे़ःङ् गिरिज्जिम कोःक्मा तगि मे़ये़म्सिङ्॥ 34 खे़न् एगाङ् मुॽइसाम् नु माङ्दे साङ्ग्रारे़ कुयाःम्बेओ साम्योथिम् इङ्जाङ् साप्पन्नो साप्ते़आङ् के़बप्पा, के़रे़क् साम्योथिम् इङ्जाङ् पाःन्जाःक्हाॽ यहोसुःल्ले़ निरु पिरुसि॥ 35 मोसाःल्ले़ इङ्जाङ् चोगुआङ् वये़बा के़रे़क् पाःन्हाॽ यहोसुःल्ले़ इस्राइलबा के़रे़क् मनाहाॽ, मे़न्छुमाहाॽ, हिन्जाॽबित्छाहाॽ हे़क्क्याङ् खे़ङ्हाॽनु के़वाॽबा वेॽ लाजेॽबाहाॽरे़ खुन्छिॽ तगि खुने़ॽ मे़निरुम्बा पान् थे़माआङ् मे़याःक्ते़न्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.