यहोसु 7 - लिम्बुआकानरे़ कुलायो 1 कर खाप्पुथ्यःङ् मे़जोगुआङ् यहवे दाङ्बाओ मे़दोन्दुबा पाःन्हाॽओ इस्राइलिहाॽरे़ लायो मे़जोगु॥ यहुदा थाःक्कोबा, जेरहरे़ कुस्सा जब्दिरे़ कुमुॽइदाङ्सा कार्मिरे़ कुस्सा आकान मे़प्मनाबा मनाधिक्ले़ कन् मे़दोन्दुबा पाःन्हाॽ कुभा खुःत्तुआङ् वये़, खे़ल्ले़चोगुल्ले़ यहवे दाङ्बे़न् इस्राइलिहाॽनु साॽरिक् कुसिक् पोगे़॥ 2 खे़ब्याङ् यहोसुःल्ले़ यरिहोलाम् बेथेलबा नाङ्गे़न् पिसाङ् बेथ-आवन निःत्ताङ्बा ऐ ये़क्यक्को मनाहाॽ अक्खे मे़त्तुसिआङ् पाङ्घुसि, “खिनिॽ पेगे़म्मे़ॽआङ् खे़न् लाजेन् थोःप्से़म्मे़ॽ॥” खे़न् मनाहाॽ मे़बेआङ् ऐ ये़क्यक्किन् मे़धोःप्सु॥ 3 हे़क्क्याङ् खे़ङ्हाॽ मे़नुःक्खे़ मे़भे़रे़आङ् यहोसुन् मे़मे़त्तु, “के़रे़क् मे़म्बेःक्मासाङ् नुॽ, के़त्मे़ङ्गे़त् हे़न्छिङ् ने़त्छि सुम्सि मनाहाॽ मे़बेःक्काङ् ऐ ये़क्यक्किन् मे़भत्तुर॥ के़रे़क् मनाहाॽ खे़प्मो पेःक्मारे़ लागि तुक्खे मे़जाःत्ते़से़न्ने़ॽ, थेआङ्भे़ल्ले़ खे़प्मो सुःल्लिक्लक् मना मे़वाॽ॥” 4 कल्ले़चोगुल्ले़ खे़ङ्हाॽओबा हे़न्छिङ् सुम्सि यारिक् मनाहाॽ मे़बे, कर ऐ ये़क्यक्कोबा मनाहाॽरे़ खे़ङ्हाॽ मे़नाःन्दुसिआङ् मे़घे़त्छिङ्॥ 5 ऐ ये़क्यक्कोबा मनाहाॽरे़ सुम्बोङ्ङाङ् तुक्सि यारिक् मनाहाॽ मे़से़रुसि, हे़क्क्याङ् खे़ङ्हाॽरे़ ये़क्यक्कोबा यम्बा लाम्धेःत्तोलाम् सबारिम थारिक् मे़नाःत्तुसिआङ् सङ्माङ्बादे़न्नो खे़ङ्हाॽ मे़से़रुसि॥ हे़क्क्याङ् इस्राइलिहाॽ साॽरिक् मे़गिसे़आङ् खुन्छिॽ सिक्लुङ्माॽ यक्खे़॥ 6 खे़ब्याङ् यहोसुःल्ले़ कुजाङ्हाॽ थे़ःक्खु हे़क्क्याङ् यहवे दाङ्बे़ल्ले़ कुमाङ्हुप् सन्दोक्किल्ले़ कुदगाङ् युःन्छिक् थारिक् खाम्बाङ्ङो साबन् हबत् फन्छिङ्॥ हे़क्क्याङ् खुने़ॽ नु इस्राइलबा साम्योसिक्साम्बाहाॽरे़ खुन्छिॽ थे़गेक्पान् खाम्भुत्राःल्ले़ मे़जुःत्तुआङ् आम्भा मे़युङे़ मे़गरे़॥ 7 हे़क्क्याङ् यहोसुःल्ले़ पाःत्तु, “नाॽराङ्स्याङ्लो! यहवे दाङ्बा निङ्वाॽफुमाङ्ङे, खे़ने़ॽ कन् मनाहाॽ यर्दन कत्नाहाङ्दाङ् के़भे़त्तुसि हे़क्क्याङ् एमोरिहाॽरे़ खुन्छिॽ हुक्को के़धासुसिआङ् आनिगे मे़ङ्मारे़ लागि थेआङ् याप्मि के़भे़त्ते़बाबे? खे़न्नुःल्ले़ग आनिगे निङ्वाॽ तासुम्बे़आङ् यर्दन नाधाःम्बिए वयिगे़मे़न्॥ 8 यहवे दाङ्बाए, इस्राइलिहाॽ खुन्छिॽ निङ्मिहाॽलाम् हारिमे़द्ये़आङ् मे़नुःक्खे़ मे़भे़रे़ आल्ल आङ्गाॽ थे़मा पाःत्तुङ्बे! 9 थेआङ्भे़ल्ले़ कनानिहाॽ नु लाजेॽबा के़रे़क् यक्युङ्बाहाॽरे़ कन् पाःन्निन् मे़घे़प्सुआङ् आनिगे किर्गप् मे़गबिगे़ॽ, हे़क्क्याङ् इक्सादिङ् खाम्बेःक्मोलाम् आनिगे मिङ् मे़मासुॽरो॥ खे़न् एगाङ् खे़ने़ॽ पयम् यम्बा के़मिङ्ङिल्ले़ लागि खे़ने़ॽ थे के़जोगुबे?” 10 यहवे दाङ्बे़ल्ले़ यहोसुन् मे़त्तु, “पोगे़ॽ! खे़ने़ॽ थेआङ् कम्भलॽरिक् साम्बोन् हबत् के़बप्पाबे? 11 इस्राइलरे़ लायो चोगुआङ् वाॽ॥ आङ्गाॽ इःत्ते़म् नाःत्ते़म्मे़ॽ फाॽआङ् इङ्जाङ् पिरुङ्सिङ्बा माङ्हुप्पिन् खे़ङ्हाॽरे़ मे़भेःन्दुआङ् वाॽ॥ मे़ङ्मारे़ लागि तोःम्मनाबा कुभा पाःन्हाॽ खे़ङ्हाॽरे़ मे़देॽरुआङ् वाॽ॥ खे़ङ्हाॽरे़ मे़घुःत्तुआङ् वाॽ हे़क्क्याङ् इङ्ले़क्पा याःम्बक् मे़जोगुआङ् खे़ङ्हाॽरे़ खे़न् सामाहाॽ खुन्छिॽ आप्फेक् चिगक्वाहाॽनु मे़जिक्खुआङ् वाॽ॥ 12 कल्ले़चोगुल्ले़ इस्राइलिहाॽ निङ्मिहाॽरे़ खुन्छिॽ तक्ले़ङ्वाओ आल्ल ये़प्मा मे़न्छुक्ने़न्॥ खे़ङ्हाॽ माङ्दे साङ्ग्रारे़ ते़त्तुसिबाल्ले़ चोगुल्ले़ खुन्छिॽ निङ्मिहाॽ तगि खुन्छिॽ एःक्थाःक्मे़न् मे़हिसु॥ खिनिॽ आप्फेक् लुम्मोलाम् खे़न् मे़ङ्मारे़ लागि मे़से़न्दुबा चिगक्वाहाॽ खाप्पुथ्यःङ् मे़न्जोःक्के थारिक् आल्लआङ्धो आङ्गाॽ खिनिॽनु मे़वाॽआन्॥ 13 “पोगे़ॽ! मनाहाॽ सेसेसाङ्साङ् चोगे़से़ॽ॥ खे़ङ्हाॽ ताःन्दिक्ले़ लागि आबाङे सुत्थो मे़जोक्सिङ्लो फाॽआङ् मे़त्ते़से़ॽ, थेआङ्भे़ल्ले़ इस्राइलबा यहवे दाङ्बा निङ्वाॽफुमाङ्ङिल्ले़ पाःत्तुॽ—‘इस्राइलिसे, खिनिॽ लुम्मो कुभा तोःम्मनाबा सामाहाॽ वाॽ॥ खिनिॽ लुम्मोलाम् खे़न् तोःम्नाबा सामाहाॽ लाप्मे़न्देए थारिक् खिनिॽ निङ्मिहाॽ नाःम्मा के़न्छुक्तुम्सिम्मिन्॥ 14 “‘कल्ले़चोगुल्ले़ तानाम् खिनिॽ आप्फेक् थाःक्थाःक् कुइसिक् निःत्ताङ् त्ये़म्मे़ॽ हे़क्क्याङ् आत्तिन् थाःक्किन् यहवे दाङ्बे़ल्ले़ सेगुॽ, खे़ङ्हाॽ मुॽइदाङ्सा मे़जोःक्सिङ्ङाङ् निःत्ताङ् मे़दार, खे़ब्याङ् आत्तिन् मुॽइदाङ्सान् यहवे दाङ्बे़ल्ले़ सेगुॽ, खे़ङ्हाॽ हिम्सयङ् हिम्सयङ् मे़बोङ्ङाङ् निःत्ताङ् मे़दार, हे़क्क्याङ् आत्तिन् हिम्सयङ्ङिन् यहवे दाङ्बे़ल्ले़ सेगुॽ, खे़प्मोलाम् थिक्पा थिक्पा मना निःत्ताङ् मे़दार॥ 15 हे़क्क्याङ् आत्तिन् मनान् तोःम्मनाबा सामाहाॽनु सोरिक् मे़सेगुॽ, खे़न् नु खुने़ॽ कत्तुबा के़रे़क् मिओ मिधिङ्मा पोङ्ॽ, थेआङ्भे़ल्ले़ खे़ल्ले़ यहवे दाङ्बे़ल्ले़ कुमाङ्हुप्पिन् फेःन्दुआङ् वाॽ, खम्भ्याङ् खे़ल्ले़ इस्राइलओ साॽरिक् याम्गे़सिङ्बा याःम्बक् चोगुआङ् वाॽ॥’” 16 यहोसुन् तानाम् आन्देन् पोगे़आङ् इस्राइलिहाॽ थाःक्थाःक् चोगुसिआङ् निःत्ताङ् तारुसि, हे़क्क्याङ् यहुदाबा थाःक्किन् मे़सेगुॽ॥ 17 हे़क्क्याङ् खे़ल्ले़ यहुदाबा मुॽइदाङ्सा चोगुसिआङ् निःत्ताङ् तारुसि, खे़ब्याङ् खे़ल्ले़ जेरहरे़ कुमुॽइदाङ्साहाॽ सेगुसि॥ हे़क्क्याङ् खे़ल्ले़ जेरहरे़ कुमुॽइदाङ्साहाॽ हिम्सयङ् हिम्सयङ् चोगुसिआङ् निःत्ताङ् तारुसि, हे़क्क्याङ् जब्दिरे़ कुहिम्सयङ्ङिन् मे़सेगु॥ 18 हे़क्क्याङ् खुने़ॽ खे़ल्ले़ कुहिम्सयङ्ङोबा लत्छा लत्छा मना निःत्ताङ् तारुसि, खम्भ्याङ् यहुदा थाःक्कोबा, जेरहरे़ कुस्सा जब्दिरे़ कुमुॽइदाङ्सा कार्मिरे़ कुस्सा आकान मे़प्मनाबे़न् मे़सेगु॥ 19 खे़ब्याङ् यहोसुःल्ले़ आकाने़न् मे़त्तु, “आस्साए, यहवे दाङ्बा इस्राइलबा निङ्वाॽफुमाङ्ङिन्ने खे़ने़ॽ मिमिदिङ् पिरे़ॽ, हे़क्क्याङ् खे़ने़ॽ थे के़जोगुआङ् वाॽ खे़न् आङ्गाॽ मे़त्ताङ्ङे़ॽ॥ आङ्गाॽलाम् खे़न् मे़जिक्खे़न्ने़ॽ॥” 20 आकानरे़ यहोसुन् मे़त्तु, “से़क्खाएरो, यहवे दाङ्बा इस्राइलबा निङ्वाॽफुमाङ्ङिल्ले़ कुदक्ले़ङ्वाओ आङ्गाॽ लायो चोगुङ्ङाङ् वाॽ, हे़क्क्याङ् आङ्गाॽ आभे़न् याःम्बक्किन् कन्लो— 21 आल्ल नाप्मनासिबा याङ्सा कुन्धेहाॽओ बेबिलोनिया लाजेॽओबा लत्छा नुबा लगेःत्, किप् ने़त्छि सेकेल यारिक् के़लिःप्पा युप्पा नु ङाबोङ् सेकेल यारिक् के़लिःप्पा लत्छा साम्म्याङ् तक्कात् थिक् आङ्गाॽ निसुङ्, खे़ब्याङ् आङ्गाॽ आमिक् लासे़आङ् खे़ङ्हाॽ आङ्गाॽ तेॽरुङ्॥ खे़ङ्हाॽ आङ्गाॽ आसाःङ्गाहिम् लुम्मो खाम्बाङ् सिगाङ् लुप्तुङ्ङाङ् याक्, हे़क्क्याङ् के़रे़क्नुःल्ले़ मु युप्पान् याक्॥” 22 खे़ब्याङ् यहोसुःल्ले़ इङ्साबाहाॽ पाङ्घुसि, हे़क्क्याङ् मे़लोःक्ते़आङ् खे़न् साःङ्गाहिम्मो मे़बे, हे़क्क्याङ् खे़न् चिगक्वाहाॽ खे़ल्ले़ कुसाःङ्गाहिम्मो लुप्तुआङ् यागे़ खे़ब्याङ् के़रे़क्नुःल्ले़ मु युप्पान् यागे़॥ 23 हे़क्क्याङ् खे़ङ्हाॽरे़ खे़न् चिगक्वाहाॽ साःङ्गाहिम् लुम्मोलाम् मे़लःत्तुआङ् यहोसुन् नु के़रे़क् इस्राइलिहाॽओ मे़दारु, खे़ब्याङ् यहवे दाङ्बे़ल्ले़ कुदगि मे़ने़स्सु॥ 24 खे़ब्याङ् के़रे़क् इस्राइलिहाॽनु सोरिक् यहोसुःल्ले़ जेरह थाःक्कोबा आकाने़न् नु खे़न् युप्पाःन्, लगेःत्तिन् हे़क्क्याङ् साम्म्याङ् तक्काःत्तिन्, खे़ब्याङ् खे़ल्ले़ कुस्सा ये़म्बित्छाहाॽ नु मे़न्छुमाहाॽ, हे़क्क्याङ् खे़ल्ले़ कुबित्हाॽ, कुअदङ्हाॽ, खम्भ्याङ् कुमे़ल्लुक्हाॽ नु कुसाःङ्गाहिम्मिन् हे़क्क्याङ् खे़ल्ले़ कत्तुबा के़वाॽ मे़न्वाॽ के़रे़क् पाःन्हाॽ आकोरबा ने़ने़बादे़न्नो मे़देॽरु॥ 25 यहोसुःल्ले़ मे़त्तु, “खे़ने़ॽ आनिगे सम्धाङ् थेआङ् अक्तङ्बा तुक्खे लाक्खेहाॽ के़दारुबाबे? आइन् यहवे दाङ्बे़ल्ले़ खे़ने़ॽ के़सम्धाङ् तुक्खे लाक्खे तारुरो॥” खे़ब्याङ् के़रे़क् इस्राइलिहाॽरे़ खे़न् लुङ्ङिल्ले़ मे़ले़प्तु, हे़क्क्याङ् वेॽहाॽआङ् मे़ले़प्तु मे़सुरुआङ् फुत्लुम् थ्यःङ् मिमे़धिक्खु मे़देसुसि॥ 26 खे़ङ्हाॽरे़ आकानरे़ कुसम्धाङ् यरिक् लुङ्हाॽ लुःप्पे़त् मे़लुप्सु, खे़न् आइन् थारिक्साङ् हाबा ने़रो॥ खे़ब्याङ् यहवे दाङ्बे़न् मि हे़क्तङ्बा कुसिक् पोःक्मालाम् नःम्नःम् पोःक्खे़॥ कल्ले़चोगुल्ले़ खे़न् ते़न्निल्ले़ कुमिङ् आइन् थारिक्साङ् आकोरबा ने़ने़बादे़न् मे़मे़त्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.