यहोसु 6 - लिम्बुयरिहोन् खाप्पुथ्यःङ् पोङ्ॽ 1 आल्ल खे़न् ये़म्मो इस्राइलिहाॽरे़ मे़जोगुल्ले़ यरिहोबा यम्बा लाम्धेःत्हाॽ मे़साक्तुआङ् पत्छे़॥ आत्तिन्हाॽआङ् सिगाङ् लाःप्मा नु लाःक्कात् लःम्मा मे़ङ्घोसे़न्॥ 2 खे़ब्याङ् यहवे दाङ्बे़ल्ले़ यहोसुन् मे़त्तु, “ओमे़त्ते़ॽ, यरिहोन्, खे़प्मोबा हाङ्ङिन् नु के़धुम्बा थक्सुबाहाॽआङ् खे़ने़ॽ के़युक्को थासुङ्सिङ्ङाङ् वाॽरो॥ 3 के़रे़क् खजुम्घया फे़जुम्भे़या के़हेबा थक्सुबाहाॽरे़ खे़न् ये़क्यक्किन् किर्गप् कबे़म्मे़ॽआङ् थिक्ले़ङ् कब्रिङ् इरे़म्मे़ॽ॥ तुक्सि ये़न् थारिक् खिनिॽ अक्खे चोगे़म्मे़ॽ॥ 4 नुसि निङ्वाॽफुसाम्बाहाॽरे़ नुसि थुःम्बा सादाङ्हाॽ मे़याङ्सिङ्ङाङ् माङ्हुप् सन्दोक्किल्ले़ कुदगि कुदगि लाङ्मे़घेःक्ल॥ नुसिगेक्पा ये़न्नो कन् ये़क्यक्किन् खिनिॽ नुसिले़ङ् कबे़म्मे़ॽ, खम्भ्याङ् निङ्वाॽफुसाम्बाहाॽरे़ सादाङ्ङिन् मे़मुःत्तुर॥ 5 हे़क्क्याङ् आल्ल खे़ङ्हाॽरे़ थुःम्बा सादाङ्ङिन् माङ्भा इरिक् मे़मुःत्तुॽ, खे़ब्याङ् खिनिॽ सादाङ्ङिन् मुक्पा इक्लान् के़घे़प्सुम्नुमे़ःन्ने के़रे़क् मनाहाॽ यम्बा इक्लाओ मे़अःक्ल॥ हे़क्क्याङ् ये़क्यक्कोबा लुङ्धाक्किन् कुबुङ् थे़र्ले़ चोन्, हे़क्क्याङ् के़रे़क् मनाहाॽ ये़क्यक्को कुदोःप्मा मे़लोक् मे़लाःत्ल॥” 6 कल्ले़चोगुल्ले़ नुनरे़ कुस्सा यहोसुःल्ले़ निङ्वाॽफुसाम्बाहाॽ उःत्तुसिआङ् मे़त्तुसि, “माङ्हुप् सन्दोक्किन् पक्खे़म्मे़ॽ, हे़क्क्याङ् नुसि निङ्वाॽफुसाम्बाहाॽरे़ थुःम्बा सादाङ् नुसि मे़हेॽसिङ्ङाङ् यहवे दाङ्बे़ल्ले़ कुमाङ्हुप् सन्दोक् तगि लाङ्मे़घेःक्ल॥” 7 हे़क्क्याङ् खुने़ॽ मनाहाॽ मे़त्तुसि, “तगि पोरे़म्मे़ॽआङ् खे़न् ये़क्यक् के़रे़क् पिसाङ् इरे़म् पेगे़म्मे़ॽ॥ फे़जुम्भे़या खजुम्घया के़हेबाहाॽग यहवे दाङ्बे़ल्ले़ कुमाङ्हुप् सन्दोक् तगि तगि लाङ्मे़घेःक्ल॥” 8 यहोसुःल्ले़ कन् मनाहाॽ मे़त्तु सुरुसिआङ् एगाङ् नुसि निङ्वाॽफुसाम्बाहाॽरे़ थुःम्बा सादाङ् नुसि मे़याङ्सिङ् हे़क्क्याङ् यहवे दाङ्बे़ल्ले़ कुदगि लाङ्मे़घेगे़आङ् खुन्छिॽ सादाङ्हाॽ मे़मुःत्तुर तगि थासिङ्मा मे़हेःक्ते़॥ यहवे दाङ्बे़ल्ले़ कुमाङ्हुप् सन्दोःक्किन्ग खे़ङ्हाॽरे़ खुन्छिॽ एगाङ् थासिङ्॥ 9 फे़जुम्भे़या खजुम्घया के़हेबा मनाहाॽग सादाङ् के़मुःप्पा निङ्वाॽफुसाम्बाहाॽरे़ खुन्छिॽ तगि लाङ्मे़घेगे़, हे़क्क्याङ् एगाङ् के़बप्पा थक्सुबाहाॽ माङ्हुप् सन्दोक् एगाङ् लाङ्मे़घेगे़, खम्भ्याङ् निङ्वाॽफुसाम्बाहाॽ सादाङ्हाॽ मे़मुःत्तुर लाङ्मे़घेगे़॥ 10 कर यहोसुःल्ले़ मनाहाॽ अक्खे मे़त्तुसिआङ् मुरा मे़त्तुसि, “आङ्गाॽ खिनिॽ अःक्ते़म्मे़ॽ फाॽआङ् इङ्जाङ् मे़बिनिङ्ङिन्बा ये़न् थारिक्, खिनिॽ मे़अःक्ते़म्मिन्ने़ॽ, खिनिॽ इक्लाःन्ने खे़म्मे़दे़त्ने़न्ल, खिनिॽ मुराओलाम्माङ् कुभा पाःन्छेःक्वा मे़लःत्ते़म्मिन्ने़ॽ॥ आङ्गाॽ अःक्ते़म्मे़ॽ मे़त्निङ्ङाङ्लक् खिनिॽ अःक्ते़म्मे़ॽ॥” 11 कम्भलॽरिक् खुने़ॽ यहवे दाङ्बे़ल्ले़ कुमाङ्हुप् सन्दोक्किन् ये़क्यक् कब्रिङ् पिसाङ् थिक्ले़ङ् इसु, हे़क्क्याङ् खे़ङ्हाॽ साःङ्गाहिम्मो मे़द्ये़, खे़ब्याङ् हाबा खे़प्मो याङ्मे़धोःक्ते़॥ 12 यहोसुन् आन्देन् तानाम्सा पोगे़, हे़क्क्याङ् निङ्वाॽफुसाम्बाहाॽरे़ यहवे दाङ्बे़ल्ले़ कुमाङ्हुप् सन्दोक्किन् मे़बक्खु॥ 13 खे़न् नुसि निङ्वाॽफुसाम्बाहाॽरे़ थुःम्बा सादाङ् नुसि मे़याङ्सिङ्ङाङ् यहवे दाङ्बे़ल्ले़ कुमाङ्हुप् सन्दोक्किल्ले़ कुदगाङ् कुदगाङ् सादाङ्हाॽ मे़मुःत्तुर लाङ्मे़घेगे़आङ् मे़बत्छे़॥ फे़जुम्भे़या खजुम्घया के़हेबा मनाहाॽ खे़ङ्हाॽरे़ खुन्छिॽ तगाङ् मे़धासिङ्, हे़क्क्याङ् एगाङ् लाङ्गे़घेःक्पा थक्सुबाहाॽ यहवे दाङ्बे़ल्ले़ कुमाङ्हुप् सन्दोक् एगाङ् मे़भन्छिङ्॥ निङ्वाॽफुसाम्बाहाॽ सादाङ्ङिन् मे़मुःत्तुर लाङ्मे़घेगे़॥ 14 कम्भलॽरिक् निसिगेक्पा ये़न्नोआङ् खे़ङ्हाॽरे़ ये़क्यक्किन् थिक्ले़ङ् मे़गबुआङ् मे़नुःक्खे़॥ तुक्सि ये़न् थारिक् खे़ङ्हाॽरे़ हे़क्केए मे़जोगु॥ 15 नुसिगेक्पा ये़न् तानाम् फदिॽ वदिॽ लॽरे़ल्ले़सा खे़ङ्हाॽ मे़बोगे़, हे़क्क्याङ् हाबा खे़न् परिक्ले़ए ये़क्यक्किन् मे़गबु, खे़ल्ले़ याःन्दिक्लक् खे़ङ्हाॽरे़ ये़क्यक्किन् नुसिले़ङ् मे़गबु॥ 16 आल्ल निङ्वाॽफुसाम्बाहाॽरे़ सादाङ्ङिन् नुसिले़ङ् मे़मुःत्तुल्ले़ यहोसुःल्ले़ मनाहाॽ मे़त्तुसि, “अःक्ते़म्मे़ॽ! थेआङ्भे़ल्ले़ यहवे दाङ्बे़ल्ले़ कन् ये़क्यक्किन् खिनिॽ के़बिरिआङ् ने़रो॥ 17 कन् ये़क्यक्किन् नु कप्मो के़वाॽबा के़रे़क् पाःन्हाॽ मे़क्मारे़ लागि यहवे दाङ्बाओ तोःम्नाआङ् वाॽ॥ के़त्निमा राहाबे़न् नु खे़ल्ले़ कुहिम्मो खुने़ॽनु के़वाॽबाहाॽरक् मे़हिङ्ॽ, थेआङ्भे़ल्ले़ आनिॽ पाङ्मनासिबा थोःम्जिबाहाॽ खे़ल्ले़ चिक्खुसिआङ् वये़॥ 18 कर खाप्पुथ्यःङ् मे़ङ्से़ तोःम्मनाबा पाःन्हाॽलाम् खिनिॽ लाःत्लाःत् वये़म्मे़ॽ, मेःन्ने़भग्र खे़न् तोःम्मनाबा पाःन्हाॽ के़याङ्ङासिआङ् खिनिॽओ मे़क्मान् के़दारुम्ॽ, हे़क्क्याङ् इस्राइलिहाॽरे़ खुनिॽ साःङ्गाहिम्मो माङ्दे साङ्ग्रा के़दारुम्ॽ खे़ब्याङ् खे़प्मो तुक्खे लाक्खे थार के़जोगुम्ॽ॥ 19 कर के़रे़क् युप्पा नु साम्म्याङ्, हे़क्क्याङ् कासा नु फे़न्जेॽ खप्प्याहाॽ यहवे दाङ्बे़ल्ले़ कुलागि सुत्थो चोक्॥ खे़ङ्हाॽ यहवे दाङ्बे़ल्ले़ कुसामा युङ्दे़न्नो के़दारुम्ल पोङ्ॽ॥” 20 आल्ल निङ्वाॽफुसाम्बाहाॽरे़ सादाङ्हाॽ मे़मुःत्तु, खे़ब्याङ् मनाहाॽ मे़अःक्ते़, हे़क्क्याङ् सादाङ्ङिल्ले़ कुइक्लान् मे़घे़प्सुनुमे़ःन्ने खे़ङ्हाॽ यम्बा इक्लाओ मे़अःक्ते़ल्ले़ खे़न् लुङ्धाक्किन् कुबुङ् थे़र्ले़ पुरुङ् लुःन्दे़, हे़क्क्याङ् के़रे़क् मनाहाॽ कुदोःप्मा तगि मे़बोरे़आङ् के़रे़क् ये़क्यक्को मे़लासे़ हे़क्क्याङ् खे़न् हुक्काप् मे़जोगु॥ 21 खे़ब्याङ् खे़ङ्हाॽरे़ खे़न् ये़क्यक्किन् खाप्पुथ्यःङ् मे़जोगुआङ् यहवे दाङ्बाओ मे़दोन्दु, हे़क्क्याङ् ये़क्यक्को के़वाॽबा ये़म्बित्छाहाॽ, मे़न्छुमाहाॽ, थाङ्बे़न्हाॽ, काप्पो तुम्साहाॽ, खम्भ्याङ् पित्हाॽ, मे़ल्लुक्हाॽ नु अदङ्हाॽ ताभेःल्ले़ के़रे़क् मे़से़रुसि॥ 22 हे़क्क्याङ् यहोसुःल्ले़ खे़न् लाजेॽओ थोःम्जिबा के़बेःक्पा खे़न् ने़त्छि मनाहाॽ मे़त्तुसि, “खे़न् के़त्निमे़ल्ले़ कुहिम्मो खे़न्छिॽ पेसे़ॽ, हे़क्क्याङ् खे़न्छिॽ खुने़ॽनु माङ्हे़क् के़जोगे़सुबा कुइसिक् खे़न् मे़न्छुमान् खे़ब्याङ् खुने़ॽनु के़वाॽबाहाॽ के़रे़क् कॽयोलाम् लःत्ते़से़त्छे़ॽ॥” 23 आल्ल खे़न् थोःम्जिबा के़जोःक्पा खे़न् ने़प्फु थाङ्बे़न्हाॽ पेसि, हे़क्क्याङ् राहाबे़न् नु खुने़ॽ कुम्बा, कुम्मा, कुम्भुॽ कुन्साॽ खे़ब्याङ् खुने़ॽनु के़वाॽबा के़रे़क् मनाहाॽ, खे़ल्ले़ के़रे़क् कुगाॽइहाॽ लाःक्कात् लाम्लोसु लःत्ते़सुसि, हे़क्क्याङ् इस्राइलिहाॽरे़ खुनिॽ साःङ्गाहिम्लाम् लाःक्कात् युक्खे़सुसि॥ 24 खे़ब्याङ् खे़ङ्हाॽरे़ खे़न् ये़क्यक्को के़वाॽबा के़रे़क् पाःन्हाॽ मिमे़धिक्खु मे़देसु, कर साम्म्याङ्, युप्पा हे़क्क्याङ् कासा नु फे़न्जेॽ खप्प्याहाॽरक् यहवे दाङ्बे़ल्ले़ कुसामा युङ्दे़न्नो खे़ङ्हाॽरे़ मे़युक्खु॥ 25 कर के़त्निमा राहाबे़न्, खे़ल्ले़ कुम्बारे़ कुहिम्सयङ्हाॽ हे़क्क्याङ् खुने़ॽनु के़वाॽबाहाॽ के़रे़क् यहोसुःल्ले़ ताङ्से़ःप्तुसि, थेआङ्भे़ल्ले़ यहोसुःल्ले़ यरिहोओ थोःम्जिबा पाङ्घुसिबा इङ्साबाहाॽ खे़ल्ले़ चिक्खुसिआङ् वये़॥ हे़क्क्याङ् आइन् थारिक्के इस्राइलिहाॽरे़ खुन्छिॽ लुम्मो राहाबे़न् वाॽ॥ 26 हाबा खे़न् ये़म्मो यहोसुःल्ले़ खे़ङ्हाॽ माङ्हे़क् चाःत्तुसिआङ् अक्खे पाःत्तुरो, “कन् यरिहो ये़क्यक्किन् चोःक्मारे़ लागि आत्तिन् ये़म्सिङ्ॽ, यहवे दाङ्बे़ल्ले़ कुदगि खे़न् साङ्ग्रा माङ्देरे़ ते़त्तुररो॥ कल्ले़ कुबुङ् युक्खुल्ले़ खे़ल्ले़ खुने़ॽ कुस्सा तुम्बे़न् सिरो, खे़ल्ले़ कुस्सा फोःक्वाःल्ले़ कुमे़न्नो कप्मोबा यम्बा लाम्धेःप्पान् ये़म्सिङ्लो॥” 27 कम्भलॽरिक् यहवे दाङ्बे़न् यहोसुन् नु सोरिक् वये़, हे़क्क्याङ् खे़ल्ले़ कुमिङ्सो कुधाःङ्सो लाजेॽ के़रे़क् से़रे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.