यहोसु 5 - लिम्बु1 इस्राइलिहाॽरे़ वहःङ्ङिन् मे़ङ्गाःक्के थारिक् खुन्छिॽ तगि यहवे दाङ्बे़ल्ले़ यर्दन वहःङ्ङोबा च्वाःत्तिन् चप्प्रे़क् चबे़र याःन्दु के़लॽबा पाःन्निन् यर्दन कत्नाहाङ्दाङ् नाम्धा पिसाङ्बा एमोरिहाॽरे़ खुनिॽ के़रे़क् हाङ्हाॽ नु खाम्दोःक्लुम् वरःङ्ङिल्ले़ कुबेसाङ्बा कनानिहाॽरे़ खुन्छिॽ के़रे़क् हाङ्हाॽरे़ मे़घे़प्सु, खे़ब्याङ् खे़ङ्हाॽ इस्राइलिहाॽनु मे़गिसे़बाल्ले़ चोगुल्ले़ खुन्छिॽ सिक्लुङ्माॽ यङ्मा हेःक्ते़ हे़क्क्याङ् खे़ङ्हाॽ इस्राइलिहाॽनु थक्मारे़ लागि आःन्छिङ्मा मे़न्छुक्ते़न्लो॥ गिलगालओ हर्दो हे़क्मा याःम्बक् पोःक्खे़ 2 खे़न् ये़म्मो यहवे दाङ्बे़ल्ले़ यहोसुन् मे़त्तु, “लुङ्से़रुङ्बान् कुहे़क्मा चोगे़ॽआङ् याम्मो इस्राइलिहाॽ हर्दो हे़गे़ पिरे़से़ॽ॥” 3 खे़ब्याङ् यहोसुःल्ले़ लुङ्से़रुङ्बाहाॽ कुहे़क्मा चोगुआङ् गिबियथ-हाअरालोथओ इस्राइलिहाॽ हर्दो हे़गु पिरुसि॥ 4 यहोसुःल्ले़ हर्दो हे़क्मासि पिमासि के़बोङ्बा पाःन्निन् हाबा कन् वये़, मिस्रलाम् आक्ख्यारिक् मनाहाॽ, इग्र थक्सुबा पोङ्मा के़लाॽबाहाॽ मे़लःन्दे़ मे़भे़रे़आङ् मे़वये़, खे़ङ्हाॽ के़रे़क् मिस्रलाम् मे़लःन्दे़आङ् एगाङ् मुरे़क् खारे़क् थेआङ् के़होप्पादे़न्नो मे़स्ये़ मे़घे़रे़॥ 5 मिस्रलाम् आक्ख्यारिक् मे़लःन्दे़ मे़भे़रे़आङ् मे़वये़, खे़ङ्हाॽ के़रे़क्ले़न् हर्दो हे़क्मा याःम्बक् पोःक्खे़आङ् वये़॥ कर मिस्र लाजेॽलाम् मे़लःन्दे़ मे़भे़रे़आङ् एगाङ् मुरे़क् खारे़क् थेआङ् के़होप्पा एःक्सादे़न्नोबा लाम्दिःक्को सागे़वाःन्छिङ्बा आत्तिन्हाॽरे़न्नाङ् हर्दो मे़न्हे़क्के वये़॥ 6 इस्राइलिहाॽरे़ यहवे दाङ्बे़ल्ले़ कुइङ्जाङ्ङिन् मे़न्इःत्तुन् मे़न्नाःत्तुम्बाल्ले़ चोगुल्ले़ मिस्रलाम् के़लःम्बा के़भे़म्बा के़रे़क् मनाहाॽ, इग्र थक्सुबा पोङ्मा के़लाॽबाहाॽ मे़म्मे़क्के थारिक् खे़ङ्हाॽ मुरे़क् खारे़क् थेआङ् के़होप्पादे़न्नो लिबोङ् तङ्बे खाराक् लाङ्मे़घेगे़आङ् मे़वये़॥ थेआङ्भे़ल्ले़ खे़ङ्हाॽरे़ खुन्छिॽ पाधे़बाहाॽ पिनिङ् मे़त्तुसिआङ् माङ्हुप् चोगुबा पित्नु नु सक्वाघु के़गुङ्बा लाजेन् खे़ङ्हाॽरे़ निमा मे़ङ्घोसुन्ॽ फाॽआङ् खुन्छिॽनु यहवे दाङ्बे़ल्ले़ माङ्हे़क् चोगुआङ् वये़॥ 7 कल्ले़चोगुल्ले़ खे़ङ्हाॽरे़ खुन्छिॽ ले़क्वा यहवे दाङ्बे़ल्ले़ याम्मो सामे़वाःन्छिङ्ल याःन्दुसिबा मुॽइदाङ्साहाॽ यहोसुःल्ले़ हर्दो हे़गु पिरुसि, थेआङ्भे़ल्ले़ खे़ङ्हाॽ लाम्दिःक्को हर्दो मे़न्हे़क् मे़म्बिसिङ्ङे मे़वये़बाल्ले़ चोगुल्ले़ हर्दो मे़न्हे़क्केबा मना मे़वये़॥ 8 हे़क्क्याङ् के़रे़क् मनाहाॽरे़न् हर्दो हे़क्मा चुरे़आङ् एगाङ् खे़ङ्हाॽ मे़न्वेःत्ते थारिक् साःङ्गाहिम्मो खुन्छिॽ आप्फेक् आप्फेक् ते़न्हाॽओ मे़युङे़॥ 9 हे़क्क्याङ् यहवे दाङ्बे़ल्ले़ यहोसुन् मे़त्तु, “आङ्गाॽ आइन् मिस्रबा खिनिॽ इङ्दोन् खे़त्तुङ् पिनिङ्ङाङ् वाॽ॥” कल्ले़चोगुल्ले़ खे़न् ते़न्निल्ले़ कुमिङ् आइन् थारिक्साङ् गिलगाल मे़मे़त्तु॥ 10 आल्ल इस्राइलिहाॽरे़ गिलगालओ साःङ्गाहिम् मे़जोगुआङ् मे़युङे़, खे़ब्याङ् खे़ङ्हाॽरे़ खे़न् लाओबा थिबोङ्ङाङ् लिसिगेक्पा ये़न्निल्ले़ याःन्दिक् युसिक् यरिहोबा ने़ने़बादे़न्नोए चोःक्युम्भो तङ्नाम् मे़दोसु॥ 11 चोःक्युम्भो तङ्नाम्मिल्ले़ कुदाःन्दिक्मा, हाबा खे़न् ये़न्नो खे़ङ्हाॽरे़ खे़न् लाजेॽओ के़बोःक्पा कुजालाम्बा के़भङ्बा सिदाॽ मे़न्याक्मनाबा खरे़ःङ् नु सिप्फङ्ग्रा कुजा मे़ज॥ 12 खे़ङ्हाॽरे़ खे़न् लाजेॽओ के़बोःक्पा कुजान् मे़जबा कुदाःन्दिक्माआङ्धोए मन्न थामा चक् लॽरे़, हे़क्क्याङ् खे़न् एगाङ् इस्राइलिहाॽरे़ आप्फाल्ले़आङ् मन्न मे़ङ्घोसुन्॥ कर खे़न् तङ्बेओ खे़ङ्हाॽरे़ कनान लाजेॽओबा कुजान् मे़जरो॥ यहोसुन् नु ताभे के़हेबा मना 13 यहोसुन् यरिहो निःत्ताङ् वये़ल्ले़ खुने़ॽ थो ओमये़, हे़क्क्याङ् कुहुक्को ताभे के़बङ्बा मनाधिक् कुदगाङ् ये़बे़गरे़बा निसु॥ यहोसुन् खुने़ॽओ पेआङ् सेःन्दोसु, “खे़ने़ॽ आनिगे तेःङ्बाने़बि इ निङ्मिने़बि?” 14 हे़क्क्याङ् खे़ल्ले़ पाःत्तु, “तेःङ्बाआङ् मेःन्, निङ्मिआआङ् मेःन्, कर यहवे दाङ्बे़ल्ले़ कुधक्सुबा थक्मोबा पोःक्खाङ्ङाङ् कॽयो त्याङ्ङाङ् वाॽआ॥” खे़ब्याङ् यहोसुन् खाम्बाङ्ङो साम्बोन् हबत् फन्छिङ् हे़क्क्याङ् से़वा मे़त्तुआङ् खुने़ॽ अक्खे मे़त्तु, “आदाङ्बे, खे़ने़ॽ के़से़वारोबाल्ले़ थे़मा चोगुङ्ल के़लॽबा के़निङ्वाॽ वाॽबे?” 15 हे़क्क्याङ् यहवे दाङ्बे़ल्ले़ कुधक्सुबा थक्मोबाल्ले़ यहोसुन् मे़त्तु, “खे़ने़ॽ के़लाङ्हाॽओबा लाङ्सुःप्हाॽ फे़न्दे़ॽ, थेआङ्भे़ल्ले़ खे़ने़ॽ के़ये़प्पा दे़न्निन् सेसेबा चोक्॥” खे़ब्याङ् यहोसुःल्ले़ हे़क्केए चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.