यहोसु 4 - लिम्बुइःत्लुङ् 1 आल्ल के़रे़क् मनाहाॽरे़ यर्दन वहःङ्ङिन् मे़गाःक्तु मे़सुरु, खे़ब्याङ् यहवे दाङ्बे़ल्ले़ यहोसुन् मे़त्तु, 2 “मनाहाॽलाम् थिबोङ्ङाङ् ने़त्छि ये़म्बित्छाहाॽ, थाःक्थक्मा लत्छा लत्छा ये़म्बित्छा तेॽरे़से़ॽआङ् 3 खे़ङ्हाॽ अक्तङ्बा इङ्जाङ् पिरे़से़ॽ, ‘यर्दन वहःङ्ङिल्ले़ कुलुम्मो निङ्वाॽफुसाम्बाहाॽरे़ खुन्छिॽ लाङ्दाप्पेल्ले़ मे़दोॽरुबादे़न्नोलाम् थिबोङ्ङाङ् ने़त्छि लुङ्हाॽ याङ्सिङ्ङे़म्मे़ॽ हे़क्क्याङ् खिनिॽ खे़ङ्हाॽ पक्खे़म् फे़त्ते़म्मे़ॽ, खे़ब्याङ् आक्खोक् से़न्दिक् खिनिॽ आत्ति साःङ्गाहिम् के़लेःत्तुम्माङ् के़युङि हाबा खे़प्मो खे़ङ्हाॽ ने़स्से़म् थ्ये़म्मे़ॽ॥’” 4 कल्ले़चोगुल्ले़ इस्राइलिहाॽलाम् यहोसुःल्ले़ थाःक्थक्मा लत्छा लत्छा सेगुसिबा थिबोङ्ङाङ् ने़त्छि ये़म्बित्छाहाॽ उःत्तुसि॥ 5 यहोसुःल्ले़ खे़ङ्हाॽ मे़त्तुसि, “यहवे दाङ्बा खिनिॽ निङ्वाॽफुमाङ्ङिल्ले़ कुमाङ्हुप् सन्दोक्किल्ले़ कुबेसाङ् यर्दन वहःङ्ङिल्ले़ कुलुम्मो पेगे़म्मे़ॽ, हे़क्क्याङ् इस्राइलि थाःक्हाॽरे़ खुनिॽ खानिःत् कुइसिक् के़रे़क्ले़ लत्छा लत्छा लुङ् खिनिॽ फक्ताङ्ङो युक्खे़म्मे़ॽआङ् थाक्ते़म्मे़ॽ॥ 6 खिनिॽ लुम्मो कन् लत्छा मिक्सेन् पोङ्ल, हे़क्क्याङ् याङ्सि ताये़म्मो खिनिॽ साएहाॽरे़ ‘कन् लुङ्हाॽरे़ कुबेन् थे़माबे?’ फाॽआङ् सेःन्के़म्दोसिल्ले़, 7 खिनिॽ खे़ङ्हाॽ अक्खे मे़त्ते़म्सिम्मे़ॽ, ‘यहवे दाङ्बे़ल्ले़ कुमाङ्हुप् सन्दोक्किल्ले़ कुबेसाङ् यर्दनबा च्वाःत्तिन् कुङ्मा नाॽरे़आङ् ने़स्से़॥ सन्दोक्किल्ले़ यर्दन वहःङ्ङिन् काःक्तुल्ले़ यर्दनबा च्वाःत्तिन् कुङ्मा नाॽरे़आङ् ने़स्से़॥’ कन् लुङ्हाॽ इस्राइलिहाॽरे़ खुनिॽ लागि सदादिङ्बा इःत्लुङ् पोङ्ङाङ् ये़प्॥” 8 यहवे दाङ्बे़ल्ले़ यहोसुन् मे़त्तुबा हे़क्के यहोसुःल्ले़ कुइङ्जाङ्ङिन् मे़घे़प्सुआङ् इस्राइलि थाःक्हाॽरे़ खुन्छिॽ खानिःत् कुइसिक् इस्राइलिहाॽरे़ यर्दन लुम्मोलाम् थिबोङ्ङाङ् ने़त्छि लुङ्हाॽ मे़धाक्तु हे़क्क्याङ् खुन्छिॽ मे़युङे़बादे़न्नो इःत्लुङ् मे़युक्खु॥ 9 माङ्हुप् सन्दोक् के़बङ्बा निङ्वाॽफुसाम्बाहाॽरे़ खुन्छिॽ लाङ्दाप्पेल्ले़ मे़दोॽरुबादे़न्, इग्र यर्दन लुम्मोआङ् वेॽ थिबोङ्ङाङ् ने़त्छि लुङ्हाॽ यहोसुःल्ले़ ये़प्सु॥ खे़ङ्हाॽ आइन् थारिक् हाबा खे़प्मोए ये़प्॥ 10 मनाहाॽ मे़प्मासिरे़ लागि मोसाःल्ले़ यहोसुन् मुरा मे़त्तुआङ् वये़बा हे़क्के, यहवे दाङ्बे़ल्ले़ यहोसुन् पिरुबा इङ्जाङ्ङोबा के़रे़क् याःम्बक्हाॽ मे़न्जुःत्ते थारिक् माङ्हुप् सन्दोक् के़बङ्बा निङ्वाॽफुसाम्बाहाॽ यर्दन लुम्मोए हाबा मे़ये़बे़ मे़गरे़, खे़ब्याङ् मनाहाॽ हाराहारा नाधाःम्बि मे़गाःक्तुआङ् मे़बे॥ 11 हे़क्क्याङ् आल्ल के़रे़क् मनाहाॽरे़ नाधाःम्बि मे़गाःक्तु मे़सुरु, खे़ब्याङ् यहवे दाङ्बे़ल्ले़ कुमाङ्हुप् सन्दोःक्किन्नु सोरिक् निङ्वाॽफुसाम्बाहाॽआङ् मनाहाॽरे़ ओमे़मे़त्तु मे़भत्छुसिरए तगाङ् मे़गाःक्तुआङ् मे़भे़रे़॥ 12 मोसाःल्ले़ खे़ङ्हाॽ मे़त्तुसिआङ् वये़बा कुइसिक् रुबेनरे़ कुधाःक्हाॽ, गादरे़ कुधाःक्हाॽ नु मनस्सेरे़ कुभ्रे़ःङ् कुधाःक्हाॽ वेॽ इस्राइलिहाॽनुःल्ले़ तगि फे़जुम्भे़या खजुम्घया मे़हेॽसिङ्ङाङ् नाधाःम्बि मे़गाःक्तु॥ 13 ते़न्धङ्ले़ लागि हप्मे़न् लिबोङ् हे़न्छिङ् यारिक् फे़जुम्भे़या खजुम्घया के़हेॽसिङ्बा ये़म्बित्छाहाॽ थङ् चोःक्मारे़ लागि यहवे दाङ्बे़ल्ले़ कुदगि नाधाःम्बि मे़गाःक्तुआङ् यरिहोबा ने़ने़बादे़न्नो मे़बे॥ 14 खे़ल्ले़ याःन्दिक् के़रे़क् इस्राइलिहाॽरे़ खुनिॽ निमो यहवे दाङ्बे़ल्ले़ यहोसुन् यम्बा लाम्लोबा चोगु हे़क्क्याङ् खे़ङ्हाॽरे़ खुने़ॽ कुहिङ्हिङ् मोसान् हे़क्केए यहोसुन् मिङ्सो इङ्धाङ् मे़बिरु॥ 15 खे़ब्याङ् यहवे दाङ्बे़ल्ले़ यहोसुन् मे़त्तु, 16 “माङ्हुप् साप्लुङ् के़याक्पा सन्दोक्किन् के़बङ्बा निङ्वाॽफुसाम्बाहाॽ यर्दनलाम् मे़धोःक्सिङ् मे़धाङ्ल फाॽआङ् इङ्जाङ् पिरे़से़ॽ॥” 17 कल्ले़चोगुल्ले़ यहोसुःल्ले़ निङ्वाॽफुसाम्बाहाॽ अक्खेलॽरिक् इङ्जाङ् पिरुसि, “खिनिॽ यर्दनलाम् थो थोःक्सिङ् थाङे़म्मे़ॽ॥” 18 यहवे दाङ्बे़ल्ले़ कुमाङ्हुप् सन्दोक् के़बङ्बा निङ्वाॽफुसाम्बाहाॽ यर्दन लुम्मोलाम् मे़धोःक्सिङ् मे़जुरे़आङ् खुन्छिॽ लाङ्दाङ्पेल्ले़ से़ङ्से़ङ्बा खाम्बाङ्ङिन् मे़दोॽरुनुमे़ःन्ने यर्दनबा च्वाःत्तिन् कुलाम्मो नुःक्खे़ ये़ हे़क्क्याङ् तगिबा हे़क्केए कुयाहाॽ थिम्सुर कुङ्मा हेःक्ते़॥ 19 थिक्सिगेक्पा लाओबा थिबोङ् ये़न्नो मनाहाॽ यर्दनलाम् मे़धोःक्सिङ् मे़धाङे़आङ् यरिहो नाङ्गे़न् ले़प्माङ् इःन्दोओ गिलगाल मे़प्मनाबादे़न्नो खुन्छिॽ साःङ्गाहिम् मे़जोगु॥ 20 खे़ङ्हाॽरे़ यर्दन वहःङ्ङोलाम् मे़लःत्तु मे़धाक्तुबा खे़न् थिबोङ्ङाङ् ने़त्छि लुङ्हाॽ यहोसुःल्ले़ गिलगालओ हागुयुक्सु॥ 21 हे़क्क्याङ् खुने़ॽ इस्राइलिहाॽ अक्खे मे़त्तुसि, “याङ्सि खिनिॽ साएहाॽरे़ ‘कन् लुङ्हाॽरे़ कुबे थे़माबे?’ फाॽआङ् सेःन्के़म्दोसिल्ले़ 22 खिनिॽ खे़ङ्हाॽ मे़प्मा के़सुक्तुम्सिम्ॽ, ‘इस्राइलिहाॽरे़ यर्दन वहःङ्ङिन् से़ङ्से़ङ्बा खाम्बाङ्ङो मे़दोॽरुआङ् मे़गाःक्तुआङ् वये़॥’ 23 आक्खेलॽरिक् यहवे दाङ्बा खिनिॽ निङ्वाॽफुमाङ्ङिल्ले़ हे़ःत्ताङ्बा वरःङ्ङिन् आनिगे मे़ङ्गाक् मे़न्छुःत्ते थारिक् आनिगे तगि चप्प्रे़क् चबे़र याःन्दु, हे़क्केलॽरिक्के खिनिॽ तगिए खिनिॽ नाधाःम्बि मे़ङ्गाक् मे़न्छुःत्ते थारिक् यर्दनबा च्वाःत्तिन्नाङ् चप्प्रे़क् चबे़र याःन्दुआङ् वये़॥ 24 इक्सादिङ् खाम्बेःक्मोबा के़रे़क् मनाहाॽरे़ यहवे दाङ्बे़ल्ले़ कुहुक्कोबा मुक्साम्मिन् निङ्वाॽ मे़घोसुर, हे़क्क्याङ् यहवे दाङ्बा खिनिॽ निङ्वाॽफुमाङ्ङिन्नु खिनिॽ आभे़ल्ले़साङ् किसे़म्मे़ॽ फाॽआङ् कन् के़रे़क् पोःक्खे़बारो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.