यहोसु 3 - लिम्बुइस्राइलिहाॽरे़ यर्दन वहःङ्ङिन् मे़गाःक्तु 1 यहोसुन् तानाम् आन्देन् पोगे़, हे़क्क्याङ् खुने़ॽ नु के़रे़क् इस्राइलिहाॽ सित्तिमलाम् यर्दन मे़भे़रे़, खे़प्मो खुन्छिॽ नाधाःम्बि काःक्मानुःल्ले़ तगि याङ्मे़धोःक्ते़॥ 2 सुम्यान् एगाङ् सुहाङ्युक्पाहाॽ साःङ्गाहिम् लुम्मो मे़बे, 3 हे़क्क्याङ् मनाहाॽ अक्खे मे़मे़त्तुसिआङ् इङ्जाङ् मे़बिरुसि, “आल्ल यहवे दाङ्बा खिनिॽ निङ्वाॽफुमाङ्ङिल्ले़ कुमाङ्हुप् सन्दोक्किन् के़निसुम्ॽ, हे़क्क्याङ् खे़न् के़बङ्बाआङ् के़देॽबा निङ्वाॽफुसाम्बा ले़बिहाॽ के़निसुम्सिम्ॽ, खे़बे़ल्ले़ खिनिॽ के़युङिबादे़न्हाॽ ले़रे़म्मे़ॽआङ् सन्दोक्किल्ले़ कुएगाङ् थाआसिम्मे़ॽ॥ 4 कम्भलॽरिक् पेःक्मा के़बोङ्बा लाम्मिन् खिनिॽ के़निसुम्ॽ, थेआङ्भे़ल्ले़ खे़न् लाम्मो खिनिॽ तगि लाङ्मे़ङ्घेःक्के के़वयिॽ॥ कर खिनिॽ नु खे़ल्ले़ कुलुम्मो हप्मे़न् हे़न्छिङ् ने़त्छि हुक्सिक् लाःत्लाःत् ने़र याःन्दे़म्मे़ॽ॥ खे़ल्ले़ कुबेसाङ् मे़बेगे़म्मिन्ने़ॽ॥” 5 यहोसुःल्ले़ मनाहाॽ मे़त्तुसि, “खिनिॽ आप्फेक् सेसेबा चोःक्कासिम्मे़ॽ, थेआङ्भे़ल्ले़ ताःन्दिक् यहवे दाङ्बे़ल्ले़ खिनिॽ लुम्मो निङ्वाॽ के़माबा याःम्बक् चोगुॽ॥” 6 यहोसुःल्ले़ निङ्वाॽफुसाम्बाहाॽ अक्खे मे़त्तुसि, “माङ्हुप् सन्दोक्किन् पक्खे़म्मे़ॽआङ् मनाहाॽरे़ खुन्छिॽ तगि तगि लाङ्घेगे़म्मे़ॽ॥” खे़ब्याङ् खे़ङ्हाॽरे़ माङ्हुप् सन्दोक्किन् मे़बक्खुआङ् मनाहाॽरे़ खुन्छिॽ तगि तगि मे़बे॥ 7 हे़क्क्याङ् यहवे दाङ्बे़ल्ले़ यहोसुन् मे़त्तु, “आक्खेलॽरिक् आङ्गाॽ मोसाःन्नु सोरिक् वयाङ् हे़क्केलॽरिक्के आङ्गाॽ खे़ने़ॽनुआङ् सोरिक् वाॽआ फाॽआङ् कन्हाॽरे़ निङ्वाॽ खोमारे़ लागि आइन्बा ये़न्नाङ्धो के़रे़क् इस्राइलिहाॽरे़ खुन्छिॽ तगि खे़ने़ॽ यम्बा लाम्लोबा चोःक्ने़रो॥ 8 माङ्हुप् सन्दोक् के़बङ्बा निङ्वाॽफुसाम्बाहाॽ खे़ने़ॽ अक्तङ्बा इङ्जाङ् पिरे़से़ॽ, ‘यर्दन वहःङ्ङिल्ले़ कुयाओ खिनिॽ के़गे़रिआङ् च्वाःत्तो लासाम्मे़ॽआङ् ये़बे़म्मे़ॽ॥’” 9 यहोसुःल्ले़ इस्राइलिहाॽ मे़त्तुसि, “कत्ना फे़रे़म्मे़ॽ, हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ पाःत्तुबा पाःन्निन् खे़प्से़म्मे़ॽ॥ 10 कुहिङ्वे़त् निङ्वाॽफुमाङ्ङिन् खिनिॽ लुम्मो वाॽ हे़क्क्याङ् खिनिॽ तगिलाम् कनानि, हित्ति, हिब्बि, परिज्जि, गिर्गासि, एमोरि नु यबुसिहाॽ से़क्खाए नाःत्तुदेसुसि के़लॽबान् हाबा कन्लाम्बाए खिनिॽ निङ्वाॽ के़घोसुम्ॽ॥ 11 ओमे़त्ते़म्मे़ॽ, काक् इक्सादिङ् खाम्बेःक्मोबा यहवे दाङ्बे़ल्ले़ कुमाङ्हुप् सन्दोक्किन् खिनिॽ तगि तगि यर्दन नाधाःम्बि पेक्॥ 12 आल्ल इस्राइलबा थाःक् थक्मालाम् लत्छा लत्छा थिबोङ्ङाङ् ने़त्छि ये़म्बित्छा सेगे़म्सिम्मे़ॽ॥ 13 आल्ल काक् इक्सादिङ् खाम्बेःक्मोबा यहवे दाङ्बे़ल्ले़ कुमाङ्हुप् सन्दोक् के़बङ्बा निङ्वाॽफुसाम्बाहाॽरे़ खुन्छिॽ लाङ्दाप्पेन् यर्दन वहःङ्ङोबा च्वाःत्तो चुक्किल्ले़, आम्भा खे़न् ये़म्मो थो नु के़गुङ्बा के़युबा यर्दन वहःङ्ङोबा च्वाःत्तिन् कुङ्मा नाॽ हे़क्क्याङ् लुम्सिङ्ङाङ् ये़प्लो॥” 14 कल्ले़चोगुल्ले़ आल्ल यर्दन वहःङ्ङिन् काःक्मारे़ लागि मनाहाॽरे़ खुन्छिॽ आबाङे आबाङे साःङ्गाहिम् खाप्माहाॽ मे़याङ्सिङ्, हे़क्क्याङ् निङ्वाॽफुसाम्बाहाॽरे़ माङ्हुप् सन्दोक्किन् मे़बक्खुआङ् खे़ङ्हाॽ मनाहाॽरे़ खुन्छिॽ तगि तगि मे़धासिङ् मे़बे॥ 15 कुजा सुम्मा ये़म् खाराक् यर्दनबा च्वाःत्तिन् कुङ्युआङ् पत्॥ हे़क्केसाङ् माङ्हुप् सन्दोक् के़बङ्बा निङ्वाॽफुसाम्बाहाॽ यर्दनओ मे़गे़रे़आङ् खुन्छिॽ लाङ्दाप्पेल्ले़ कुयाओबा च्वाःत्तिन् मे़सुसुनुमे़ःन्ने 16 थोलाम्बा के़युबा च्वाःत्तिन् साॽरिक् नानाक्, सार्तानलाम् निःत्ताङ् आदम मे़प्मनाबा ये़क्यक्कोए कुङ्मा नाॽरे़ हे़क्क्याङ् लुम्सिङ्ङाङ् ने़स्से़ॽ, खम्भ्याङ् अराबाबा वरःङ्, इग्र युम्लाःक्खाङ् वरःङ् ले़प्माङ् के़गुङ्बा के़बेःक्पा च्वाःत्तिन् स्याक् पुॽरे़आङ् चप्प्रे़क् चबे़॥ कल्ले़चोगुल्ले़ मनाहाॽरे़ कत्नाहाङ्दाङ्लाम् यरिहो ले़प्माङ् मे़गाःक्तुआङ् मे़बे॥ 17 के़रे़क् इस्राइलिहाॽ से़ङ्से़ङ्बा खाम्बाङ्ङोलाम् मे़गाःक्तुआङ् खे़न् सुवाङ्बा काक् मनाहाॽ यर्दन नाधाःम्बि मे़म्बेःक्के थारिक् यहवे दाङ्बे़ल्ले़ कुमाङ्हुप् सन्दोक् के़बङ्बा निङ्वाॽफुसाम्बाहाॽ यर्दन वहःङ्ङिल्ले़ कुलुम्मोबा से़ङ्से़ङ्बा खाम्बाङ्ङो थधप् मे़ल्लॽए मे़ये़बे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.