यहोसु 24 - लिम्बु1 खे़ब्याङ् यहोसुःल्ले़ इस्राइलिहाॽरे़ खुन्छिॽ के़रे़क् थाःक्हाॽ सकेमओ फुक्खुसि हे़क्क्याङ् इस्राइलबा साम्योसिक्साम्बाहाॽ, थाःक्लाम्लोबाहाॽ, खासे़न्लोःम्बाहाॽ नु सुहाङ्युक्पाहाॽ उःत्तुसि, हे़क्क्याङ् खे़ङ्हाॽ आप्फेक् निङ्वाॽफुमाङ्ङिल्ले़ कुदगि मे़दोःन्छिङ्॥ 2 यहोसुःल्ले़ के़रे़क् मनाहाॽ मे़त्तुसि, “यहवे दाङ्बा इस्राइलबा निङ्वाॽफुमाङ्ङिल्ले़ पाःत्तुॽ, ‘उन्छोन् अब्राहाम नु नाहोररे़ कुम्बा तेरह, खिनिॽ पाधे़बाहाॽ युफ्रेतिस वहःङ् नाधाःम्बि मे़युङे़, हे़क्क्याङ् खे़ङ्हाॽरे़ वेॽ माङ्हाॽ से़वा मे़मे़त्तुसि॥ 3 कर आङ्गाॽ खिनिॽ पाधे़बा अब्राहाम्मिन् युफ्रेतिस वहःङ् नाधाःम्बिलाम् फे़त्तुङ्, हे़क्क्याङ् खुने़ॽ कनान लाजेॽ के़रे़क् पिसाङ् लाम्लोसुङ्ङाङ् खुने़ॽ कुस्सा कुएहाॽ फोसुङ्सिङ्॥ आङ्गाॽ खुने़ॽ इसहाक्के़न् पिरुङ्॥ 4 याम्मो आङ्गाॽ इसहाक्के़न् याकुब नु एसाव ने़प्फु कुस्सा पिरुङ्॥ हे़क्क्याङ् आङ्गाॽ एसाबे़न् लक्खोमारे़ लागि सेइरबा कोःक्मा फाङ्जङ् लाजेन् पिरुङ्॥ कर याकुब नु खुने़ॽ कुस्साहाॽग मिस्र लाजेॽ यो ले़प्माङ् मे़बे॥ 5 “‘खे़ब्याङ् आङ्गाॽ मोसान् नु हारुने़न् पाङ्घुङ्सिङ्ङाङ् खे़प्मो आङ्गाॽ चोगुङ्बा याःम्बक्लाम् मिस्र लाजेॽओ ये़त्तुक्खे त्ये़र याःन्दुङ्, हे़क्क्याङ् ताःन्दि आङ्गाॽ खिनिॽ लःत्निङ् फे़त्निङ्॥ 6 आङ्गाॽ खिनिॽ पाधे़बाहाॽ मिस्रलाम् लःत्तुङ् फे़त्तुङ्सिङ्ङिल्ले़ हे़ःत्ताङ्बा वरःङ्ङो थारिक् खिनिॽ के़गे़रि के़भे़रि, मिस्रिहाॽरे़ खिनिॽ पाधे़बाहाॽ अन्लाधा हे़क्क्याङ् अन्गे़लोङ्बाहाॽनु सोसोरिक् हे़ःत्ताङ्बा वरःङ्ङो थारिक् मे़नाःत्तु मे़भे़त्तुसि॥ 7 कर खिनिॽ पाधे़बाहाॽरे़ यहवे दाङ्बे़न् पेलि मे़भाक्तु, हे़क्क्याङ् खुने़ॽ खिनिॽ नु मिस्र के़युङ्बाहाॽरे़ खुन्छिॽ लुम्मो खामाक्ते़र याःन्दुआङ् मिस्रिहाॽओ वरःङ्ङिन् नुःक्तुआङ् खे़ङ्हाॽ हुम्सु केःत्तुसि॥ मिस्र लाजेॽओ आङ्गाॽ थे़मा चोगुङ्, खे़न् खिनिॽ आप्फेक् मिक्किल्ले़ के़निसुम्॥ खे़ब्याङ् खिनिॽ यरिक् ये़न् थारिक् मुरे़क् खारे़क् थेआङ् के़होप्पादे़न्नो के़वयि॥ 8 “‘आङ्गाॽ यर्दन नाधाःम्बि के़युङ्बा एमोरिहाॽरे़ खुन्छिॽ लाजेॽओ खिनिॽ फे़त्निङ्॥ खे़ङ्हाॽ खिनिॽनु थङ् मे़जोगे़, खे़ब्याङ् आङ्गाॽ खे़ङ्हाॽ खिनिॽ हुक्को थासुङ्सिङ्ङाङ् खिनिॽ खे़ङ्हाॽरे़ खुन्छिॽ लाजेन् के़युक्तुम्॥ आङ्गाॽ खिनिॽ तगि खे़ङ्हाॽ मे़क्खुङ्सिङ्॥ 9 खे़ब्याङ् मोआबबा हाङ् सिप्पोररे़ कुस्सा बालाक्के़न् इस्राइलिहाॽनु थक्ते़॥ हे़क्क्याङ् खिनिॽ माङ्दे साङ्ग्रा मे़प्मारे़ लागि बालाके़ल्ले़ बओररे़ कुस्सा बालामे़न् उःप्मा पाङ्घुसि॥ 10 कर बालामरे़ कुबेलिन् आङ्गाॽ मे़ङ्घे़म् मे़म्बिबा॥ खे़ल्ले़चोगुल्ले़ खुने़ॽग खिनिॽ चक्मे़ल्लॽए हाङ्वागे़न् मुॽइसाम्नि के़बिरि॥ कम्भलॽरिक्के आङ्गाॽ खिनिॽ बालाके़ल्ले़ कुहुक्कोलाम् से़ःप्निङ्॥ 11 “‘खे़न् एगाङ् यर्दन वहःङ्ङिन् के़गाःक्तुम्माङ् यरिहो के़भे़रि॥ हे़क्क्याङ् यरिहोबा मनाहाॽ, एमोरि, परिज्जि, कनानि, हित्ति, गिर्गासि, हिब्बि नु यबुसिहाॽ खिनिॽनु थङ् मे़जोगे़॥ कर आङ्गाॽ खे़ङ्हाॽ खिनिॽ हुक्को थासुङ्सिङ्॥ 12 आङ्गाॽ खिनिॽ तगितगि सावा सक्वा थिक् पाङ्घुङ्देसुङ्, खे़ल्ले़ खे़ङ्हाॽ, एमोरिहाॽरे़ खुन्छिॽ ने़त्छि हाङ्हाॽआङ् खिनिॽ तगिलाम् नाःत्तुदेसुसि॥ खे़न् खिनिॽ आप्फेक् ताभे नु लिःल्ले़ चोःक्मा मे़बोःक्खे़न्॥ 13 कम्भलॽरिक् खिनिॽ स्याङ्मे़न्दाङ् याःम्बुदिक् मे़न्जोःक्केबा लाजेन् नु खिनिॽ आप्फेक् के़न्जोगुम्मिम्बा ये़क्यक्हाॽ खिनिॽ पिनिङ्॥ खिनिॽ खे़प्मो के़युङिर के़वयिॽ, हे़क्क्याङ् खिनिॽ आप्फेक् के़ल्लेःत्तुम्मिम्बा चे़ल्ले़क्सेॽहाॽ नु चैतुन सिङ्सेॽहाॽ के़जाम्ल के़वयिॽ॥’ 14 “कल्ले़चोगुल्ले़ आल्ल यहवे दाङ्बे़न्नु खिनिॽ किसे़म्मे़ॽ, हे़क्क्याङ् नसाःन्साबा पोःक्खे़म्मे़ॽआङ् खुने़ॽ माङ्से़वा मे़त्ते़म्मे़ॽ॥ खिनिॽ पाधे़बाहाॽरे़ युफ्रेतिस वहःङ् नाधाःम्बि नु मिस्र लाजेॽओ से़वा मे़मे़त्तुसिबा माङ्हाॽ लाप्फुसे़म्सिम्मे़ॽ, हे़क्क्याङ् यहवे दाङ्बाओ माङ्से़वा याःम्बक् चोगे़म्मे़ॽ॥ 15 कर यहवे दाङ्बे़ल्ले़ कुलागि माङ्से़वा याःम्बक् चोःक्मा खिनिॽ सिराॽमे़धाङ्ने़न्ने़भग्र खिनिॽ हाःत्ले़ कुसे़वा याःम्बक् के़जोगुम्ॽ, खिनिॽ पाधे़बाहाॽरे़ युफ्रेतिस वहःङ् नाधाःम्बि से़वा मे़मे़त्तुसिबा माङ्हाॽ से़वा के़मे़त्तुम्सिम्बि इ खिनिॽ आल्लो के़युङिबा एमोरिहाॽरे़ खुन्छिॽ माङ्हाॽ से़वा के़मे़त्तुम्सिम्बि खिनिॽ आइन्छा निःन्धो चोगे़म्मे़ॽ॥ कर आङ्गाॽ नु आङ्गाॽ आहिम्सयङ्हाॽरे़ग यहवे दाङ्बाओए माङ्से़वा याःम्बक् चोगुम्बे़रो॥” माङ्हुप्पिन् याम्मो कुसङ् मे़जोगु 16 खे़ब्याङ् मनाहाॽरे़ मे़बाःत्तु, “यहवे दाङ्बे़न् ले़प्माआङ् आभे़ल्ले़आङ् वेॽ माङ्हाॽ आनिगे से़वा मे़प्मासि मे़बोङ्ने़न्ल॥ 17 थेआङ्भे़ल्ले़ यहवे दाङ्बा आनिगे निङ्वाॽफुमाङ्ङिल्ले़ए आनिगे नु आनिगे पाधे़बाहाॽ मिस्र लाजेॽबा योक् पोङ्मा हिम्मोलाम् चोःक्युम्भो पिरुसिआङ् लःत्तु फे़त्तुसिबारो, हे़क्क्याङ् आनिगे मिक्किल्ले़ निसुरए हे़क्तङ्बा यम्बा निङ्वाॽ के़माबा याःम्बक् चोगु॥ खम्भ्याङ् आनिगे आत्ति पेगिगे़साङ्, आत्तिन् सुवाङ्हाॽरे़ खुन्छिॽ लुम्मोलाम् आनिगे फे़रिगे़साङ् खुने़ॽ आनिगे ताङ्से़ःप्तिगे़॥ 18 यहवे दाङ्बे़ल्ले़ आनिगे तगिलाम् के़रे़क् सुवाङ्हाॽ कन् लाजेॽओ के़युङ्बा एमोरिहाॽआङ् नाःत्तुदेसुसि॥ कल्ले़चोगुल्ले़ आनिगे़आङ् यहवे दाङ्बाओ माङ्से़वा याःम्बक् चोगुम्बे़, थेआङ्भे़ल्ले़ खुने़ॽए आनिगे निङ्वाॽफुमाङ्लो॥” 19 यहोसुःल्ले़ मनाहाॽ मे़त्तुसि, “यहवे दाङ्बाओ खिनिॽ माङ्से़वा चोःक्मा के़न्छुक्तुम्मिन्॥ खुने़ॽ सेसे निङ्वाॽफुमाङ् नु कुनागे़हे़म्बा निङ्वाॽफुमाङ् चोःक्पाल्ले़ चोगुल्ले़ खिनिॽ फे़न्याःम्बक्हाॽ नु खिनिॽ लायोहाॽलाम् ले़प्मि के़म्बिरिन्ॽ॥ 20 यहवे दाङ्बे़न् खिनिॽ के़ले़रुम्माङ् वेॽ माङ्हाॽ से़वा के़मे़त्तुम्सिम्ने़भग्र आल्लो थारिक् खुने़ॽ खिनिॽ लागि नुबा चोगुसाङ् खिनिॽ लागि ताप्फे़ःम्बा चोःक्से़ खुने़ॽ नुःङ्ङाङ् खिनिॽ युम्रे़क् के़मे़क्खिॽ॥” 21 कर मनाहाॽरे़ यहोसुन् मे़मे़त्तु, “मेःन्, यहवे दाङ्बाओए आनिगे माङ्से़वा याःम्बक् चोगुम्बे़॥” 22 खे़ब्याङ् यहोसुःल्ले़ खे़ङ्हाॽ मे़त्तुसि, “यहवे दाङ्बाओ माङ्से़वा चोःक्मा खिनिॽ आप्फेक्के निःन्धो के़जोगुम्बा पाःन्नो खिनिॽ आप्फेक् तोःन्दि के़बोःक्खिआङ् के़वयिॽ॥” खे़ङ्हाॽरे़ मे़बाःत्तु, “आनिगे आप्फेक्के तोःन्दि वयिगे़रो॥” 23 यहोसुःल्ले़ मे़त्तुसि, “कल्ले़चोगुल्ले़ आल्ल खिनिॽनु के़वाॽबा वेॽ माङ्हाॽ लःत्ते़म्दे़से़म्सिम्मे़ॽ, हे़क्क्याङ् खिनिॽ निङ्वान् यहवे दाङ्बा इस्राइलबा निङ्वाॽफुमाङ् ले़प्माङ् हिसे़म्मे़ॽ॥” 24 हे़क्क्याङ् मनाहाॽरे़ यहोसुन् मे़मे़त्तु, “यहवे दाङ्बा आनिगे निङ्वाॽफुमाङ्ङो आनिगे माङ्से़वा चोगुम्बे़ खे़ब्याङ् आनिगे खुने़ॽए इःत्तुम्बे़ नाःत्तुम्बे़॥” 25 यहोसुःल्ले़ आम्भा खे़ल्ले़ याःन्दिक् मनाहाॽनु माङ्हुप् चोगु, हे़क्क्याङ् सकेमओ खे़ङ्हाॽरे़ खुन्छिॽ लागि साम्योसाक्थिम् नु इङ्जाङ्हाॽ साप्तु॥ 26 कन् के़रे़क् पाःन्हाॽ यहोसुःल्ले़ निङ्वाॽफुमाङ्ङिल्ले़ कुसाम्योथिम् इङ्जाङ्ङो साप्तु॥ हे़क्क्याङ् खुने़ॽ यम्बा लुङ्धिक् तारुआङ् यहवे दाङ्बे़ल्ले़ कुसेसेदे़न्निल्ले़ कुबेसाङ्बा यहिबा सिङ्बुङ् सिगाङ् ये़प्सु॥ 27 यहोसुःल्ले़ के़रे़क् मनाहाॽ मे़त्तुसि, “ओमे़त्ते़म्मे़ॽ, कन् लुङ्ङिन् आनिॽ तक्ले़ङ्वाओ तोःन्दि पोङ्ॽ, थेआङ्भे़ल्ले़ यहवे दाङ्बे़ल्ले़ आनिॽ आमे़त्ते़बा के़रे़क् पाःन्हाॽ कल्ले़ खे़प्सुआङ् वाॽ॥ खिनिॽ आबाङे निङ्वाॽफुमाङ्ङिन् के़नाॽरुम्ने़भग्र खे़न् खिनिॽ तक्ले़ङ्वाओ तोःन्दि पोङ्ॽ॥” 28 कम्भलॽरिक् यहोसुःल्ले़ खे़ङ्हाॽ खुन्छिॽ आप्फेक् आप्फेक् लक्खोमा लाजेॽहाॽओ पाङ्घुदेसुसिरो॥ यहोसुन् नु एलाजारे़न् माने़सि 29 कन् एगाङ् यहवे दाङ्बे़ल्ले़ कुसे़वारोबा नुनरे़ कुस्सा यहोसुन् किप् थिक्काङ् थिबोङ् तङ्बे योरे़ल्ले़ मासिङ्॥ 30 हे़क्क्याङ् खे़ङ्हाॽरे़ गास कोःक्माल्ले़ थाङ्गे़त् ले़प्माङ् एफ्राइमबा कोःक्मा फाङ्जङ् लाजेॽओबा खुने़ॽ आप्फेक् कुलक्खोमा तिम्नथ-सेरह इःन्दोओ मे़जिक्खु॥ 31 यहोसुःल्ले़ कुहिङ्हिङ् नु खुने़ॽ मासिङ्ङाङ् एगाङ् इस्राइलबा मनाहाॽरे़ लागि यहवे दाङ्बे़ल्ले़ चोगुबा के़रे़क् याःम्बक्हाॽरे़ कुयाःम्बेओ निङ्वाॽ के़घोबा साम्योसिक्साम्बाहाॽरे़ खुन्छिॽ हिङ्हिङ्ङाङ् इस्राइलिहाॽरे़ यहवे दाङ्बाओए माङ्से़वा मे़जोगु॥ 32 याकुबरे़ किप् थिक् युप्पा कुआःत्हाॽरे़ सकेमरे़ कुम्बा हमोररे़ कुस्साहाॽलाम् इङुबा कुलक् थिक् लाजेॽओ इस्राइलिहाॽरे़ मिस्र लाजेॽलाम् मे़भे़त्तुबा योसेफरे़ कुये़प् कुलुङ्सिहाॽ मे़लुप्तु॥ खे़न् ते़न्निन् योसेफरे़ कुमुॽइदाङ्साहाॽरे़ खुन्छिॽ लक्खोमो थ्ये़॥ 33 हे़क्क्याङ् हारुनरे़ कुस्सा एलाजारे़न्नाङ् मासिङ्, हे़क्क्याङ् खुने़ॽ कुस्सा पिनहासे़न् मे़बिरुबा एफ्राइमबा कोःक्मा फाङ्जङ्बा गिबाओ खे़ङ्हाॽरे़ खुने़ॽ मे़जिक्खुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.