यहोसु 23 - लिम्बुयहोसुःल्ले़ चोगुबा कुनुप्मा उवा 1 आल्ल यरिक् ये़न् एगाङ्, कब्रिङ् पिसाङ्बा के़रे़क् निङ्मिहाॽनु थङ् चोःक्मालाम् यहवे दाङ्बे़ल्ले़ इस्राइलिहाॽ नाःम्सिङ्मा पिरुसिआङ् वये़, हे़क्क्याङ् यहोसुन् यरिक् तङ्बे के़रे़मारे़आङ् काप्पोबा तुम्से़आङ् वये़, 2 यहोसुःल्ले़ के़रे़क् इस्राइलिहाॽ, खे़ङ्हाॽरे़ खुन्छिॽ साम्योसिक्साम्बाहाॽ, थाःक्लाम्लोबाहाॽ, खासे़न्लोःम्बाहाॽ नु युक्साबाहाॽ उःत्तुसिआङ् मे़त्तुसि, “आङ्गाॽ काप्पोबा तुम्साङ् हे़क्क्याङ् यरिक् तङ्बे के़राङ् माराङ्॥ 3 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ लागि कन् मे़न्छाम् सुवाङ्हाॽ थे़मा थे़मा मे़त्तुसि, खे़न् खिनिॽए आप्फेक् के़निसुम्माङ् वाॽ॥ खिनिॽ लागि थङ् के़जोःक्पा खुने़ॽए, यहवे दाङ्बा खिनिॽ निङ्वाॽफुमाङ्लो॥ 4 खिनिॽ निङ्वाॽ इःत्ते़म्मे़ॽ, यर्दनलाम् नाम्धा ले़प्माङ् लुम्बा वरःङ्ङो थारिक् कन् के़दाङ्बा के़याःक्पा मे़न्छाम् सुवाङ्हाॽरे़ इग्र आङ्गाॽ नाःन्दुङ्सिङ्बा मे़न्छाम् सुवाङ्हाॽरे़ खुन्छिॽ लाजेन् खिनिॽ थाःक्हाॽरे़ खुन्छिॽ युक्को फःक्खुङ् पिरुङ्सिङ्ङाङ् ने़रो॥ 5 यहवे दाङ्बा खिनिॽ निङ्वाॽफुमाङ्ङिल्ले़ आप्फेक्के खिनिॽ तगिलाम् खे़ङ्हाॽ लःत्तुदेसुसिॽ, हे़क्क्याङ् खिनिॽ के़निसुम्ल खुने़ॽ खे़ङ्हाॽ नाःत्तुदेसुसिॽ, हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ पाःत्तुबा कुइसिःक्के खिनिॽ खे़ङ्हाॽरे़ खुन्छिॽ लाजेन् के़युक्तुम्ॽ॥ 6 “कल्ले़चोगुल्ले़ मोसाःल्ले़ कुसाम्योथिम् इङ्जाङ्ङो साप्ते़आङ् के़बप्पा के़रे़क् पाःन्हाॽ हाङ्हाङ् लॽरिक् इःत्ते़म् नाःत्ते़म्मे़ॽ हे़क्क्याङ् तिम्दे़म् नाःत्ते़म्मे़ॽ, खे़ब्याङ् खे़प्मोलाम् खिनिॽ चुक्वा फे़ङ्वा मे़बेगे़म्मिन्ने़ॽ॥ 7 खिनिॽ लुम्मो के़युङ्बा वेॽ मे़न्छाम् सुवाङ्हाॽनु मे़भःन्नासिम्मन्ने़ॽ, खुन्छिॽ माङ्हाॽरे़ मिङ्हाॽ मे़इङ्से़म्मिन्ने़ॽ, माङ्हाॽरे़ खुन्छिॽ मिङ्ङो माङ्हे़क् मे़जोगे़म्मे़न्ने़ॽ॥ खे़ङ्हाॽ से़वा मे़मे़त्ते़म्सिम्मे़न्ने़ॽ हे़क्क्याङ् साम्बोन्नाङ् खे़ङ्हाॽ माङ्से़वा मे़मे़त्ते़म्सिम्मे़न्ने़ॽ॥ 8 कर खिनिॽ आइन्बा ये़न् थारिक् के़वयिबा हे़क्के यहवे दाङ्बा खिनिॽ निङ्वाॽफुमाङ्ङो थधप् मे़ल्लॽए वये़म्मे़ॽ॥ 9 “यहवे दाङ्बे़ल्ले़ खिनिॽ तगिलाम्बाए साॽरिक् मुक्के़गुबा मे़न्छाम् सुवाङ्हाॽ नाःत्तुदेसुसिआङ् वाॽ॥ आइन् थारिक् खिनिॽ तगि हाःत्ताङ् ये़प्मा मे़न्छुक्के वाॽ॥ 10 खिनिॽओबा लत्छारे़ हे़न्छिङ् मनाहाॽ नाःप्मादेमा सुक्तुसि, थेआङ्भे़ल्ले़ खुने़ॽ खिनिॽनु माङ्हुप् चोगुबा इसिःक् खिनिॽ लागि ते़न्धङ् के़जोःक्पाग यहवे दाङ्बा खिनिॽ निङ्वाॽफुमाङ्ङिन्ने वाॽ॥ 11 कल्ले़चोगुल्ले़ यहवे दाङ्बा खिनिॽ निङ्वाॽफुमाङ्ङिन् मिःम्जि मे़प्मारे़ लागि साॽरिक् सिङ्सिङ् ये़क्ये़क् लॽरे़म्मे़ॽ॥ 12 “कर कुभा परिक्पा पाःन्नो खिनिॽ थिक्नाहाङ् के़हिआसिआङ् खे़न् के़दाङ्बा के़याःक्पा वेॽ मे़न्छाम् सुवाङ्हाॽनु, इग्र खिनिॽ लुम्मो के़युङ्बाहाॽनु के़बत्छिॽ, हे़क्क्याङ् खे़ङ्हाॽनु ते़न्धाम् मेःक्खिम् के़जोगिआङ् के़भुत्तासिने़भग्र, 13 कन् पाःन्नो निःन्धो पोःक्खे़म्मे़ॽ, यहवे दाङ्बा खिनिॽ निङ्वाॽफुमाङ्ङिल्ले़ खे़न् मे़न्छाम् सुवाङ्हाॽ खिनिॽ तगिलाम् याम्मो मे़नाःत्तुन् मे़देसुसिन्ॽ, कर यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़बिरिबा कन् नुबा लाजेॽओलाम् खिनिॽ के़म्मे़गिन्ल थारिक् खे़ङ्हाॽ खिनिॽ लागि चे़न् नु इदाक्, खम्भ्याङ् खिनिॽ एःक्थाःक्मो ते़ःम्भुक् नु खिनिॽ मिक्को साक्चिॽ मे़बोङ्ॽ॥ 14 “आल्ल आङ्गाॽ के़रे़क् मे़न्छाम् याप्मिहाॽ पेःक्मा के़बोङ्बा लाम्मो पेःक्कार पत्ता॥ यहवे दाङ्बा निङ्वाॽफुमाङ्ङिल्ले़ खिनिॽ मे़न्नो पाःत्तुबा के़रे़क् नुबा पाःन्हाॽ लत्छाआङ् योधो मे़म्बोङ्ङे वाॽ॥ खिनिॽ लागि के़रे़क् के़रे़आङ् वाॽ, हे़क्क्याङ् लत्छाआङ् खे़न् लाम्बा मे़गे़रे़म्बा होप् फाॽआङ् खिनिॽ आप्फेक् के़रे़क् सिक्लुङ्माॽ नु के़रे़क् निङ्वाःल्ले़ के़निसुम्माङ् के़वयिॽ॥ 15 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़मे़त्तिबा के़रे़क् नुबा पाःन्हाॽ खिनिॽ लागि के़रे़आङ् वाॽ, हे़क्केलॽरिक्के यहवे दाङ्बे़ल्ले़ खिनिॽ के़बिरिबा कन् नुबा लाजेॽलाम् खिनिॽ युम्रे़क् के़म्मे़क्खिन्ल थारिक्, यहवे दाङ्बे़ल्ले़ खिनिॽ सम्धाङ् के़रे़क् ताप्फे़ःम्बा पाःन्हाॽआङ् तारुॽ॥ 16 यहवे दाङ्बा खिनिॽ निङ्वाॽफुमाङ्ङिल्ले़ इङ्जाङ् के़बिरिबा पाःन्हाॽलाम् खिनिॽ थिक्नाहाङ् के़हिआसिआङ् वेॽ माङ्हाॽ से़वा के़मे़त्तुम्सिम्ॽ हे़क्क्याङ् खे़ङ्हाॽ माङ्से़वा के़मे़त्तुम्सिम्ने़भग्र, यहवे दाङ्बे़ल्ले़ मि हे़क्के के़दिःप्पा कुसाक्के़न्निन् खिनिॽ सम्धाङ् थारो, हे़क्क्याङ् खुने़ॽ खिनिॽ के़बिरिबा कन् नुबा लाजेॽओलाम् खिनिॽ खिमो वरे़ङ्ले़ङ् के़मे़गिरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.