यहोसु 22 - लिम्बुयहोसुःल्ले़ नाङ्गे़न् पिसाङ्बा थाःक्हाॽ से़म्मुॽइ पिरुसि 1 खे़ब्याङ् यहोसुःल्ले़ रुबेन, गाद नु मनस्सेरे़ कुभ्रे़ःङ् कुधाःक्हाॽ उःत्तुसि, 2 हे़क्क्याङ् खुने़ॽ खे़ङ्हाॽ मे़त्तुसि, “यहवे दाङ्बे़ल्ले़ कुसे़वारोबा मोसाःल्ले़ खिनिॽ के़बिरिबा के़रे़क् इङ्जाङ्हाॽ खिनिॽ के़इःत्तुम् के़नाःत्तुम्माङ् के़वयि हे़क्क्याङ् आङ्गाॽ आइङ्जाङ्हाॽआङ् के़रे़क् के़इःत्तुम्माङ् के़वयिॽ॥ 3 यरिक् ये़म्माङ्धो आइन् थारिक् खिनिॽ फुॽनुसाॽहाॽ मे़ल्ले़त्ते के़गत्तुम्सिम्ॽ, कर यहवे दाङ्बा खिनिॽ निङ्वाॽफुमाङ्ङिल्ले़ के़बिरिबा याःम्बक्हाॽ के़गे़त्तुम्माङ् के़वयिॽ॥ 4 आल्ल यहवे दाङ्बा खिनिॽ निङ्वाॽफुमाङ्ङिल्ले़ पाःत्तुबा कुइसिक् खिनिॽ फुॽनुसाॽहाॽ नाःम्सिङ्मा के़बिरुम्सिम्माङ् वाॽ॥ कल्ले़चोगुल्ले़ आल्ल खिनिॽ नुःक्खे़म्मे़ॽआङ् यहवे दाङ्बे़ल्ले़ कुसे़वारोबा मोसाःल्ले़ यर्दन नाधाःम्बि खिनिॽ युक्मारे़ लागि के़बिरिबा खिनिॽ आप्फेक् लाजेॽओ पेगे़म्मे़ॽ॥ 5 यहवे दाङ्बा खिनिॽ निङ्वाॽफुमाङ्ङिन् मिःम्जि मे़त्ते़म्मे़ॽ, खुने़ॽ के़रे़क् कुलाम्हाॽओ लाङ्घेगे़म्मे़ॽ, खुने़ॽ कुइङ्जाङ्हाॽ इःत्ते़म् नाःत्ते़म्मे़ॽ, खुने़ॽओए पत्छे़म्मे़ॽ, खिनिॽ सिक्लुङ्माॽ नु निङ्वाःल्ले़ खुने़ॽओ माङ्से़वा याःम्बक् चोगे़म्मे़ॽ फाॽआङ् यहवे दाङ्बे़ल्ले़ कुसे़वारोबा मोसाःल्ले़ खिनिॽ के़बिरिबा इङ्जाङ्ङिन् नु साम्योथिम् इङ्जाङ्ङिन् निङ्वाॽ पिरे़म्मे़ॽआङ् इःत्ते़म् नाःत्ते़म्मे़ॽ॥” 6 खे़ब्याङ् यहोसुःल्ले़ खे़ङ्हाॽ हाङ्वागे़न् मुॽइसाम् पिरुसिआङ् लाम्मे़त्तुसि, हे़क्क्याङ् खे़ङ्हाॽ खुन्छिॽ आप्फेक् आप्फेक् खुन्छिॽ हिम्हाॽओ मे़बे॥ 7 (मनस्सेरे़ कुभ्रे़ःङ् कुधाःक्हाॽग मोसाःल्ले़ बासानओ युक् पिरुसिआङ् ने़स्से़, कर वेॽ कुभ्रे़ःङ्हाॽ यहोसुःल्ले़ यर्दन कत्नाहाङ्दाङ् नाम्धा ले़प्माङ् खे़ङ्हाॽरे़ खुन्छिॽ फुॽनुसाॽहाॽरे़ खुन्छिॽ लुम्मो पिरुसि॥) खे़ङ्हाॽ खुन्छिॽ आप्फेक् आप्फेक् हिम्हाॽओ पेःक्मारे़ लागि लाम्मे़त्तुसिल्ले़ यहोसुःल्ले़ खे़ङ्हाॽ हाङ्वागे़न् मुॽइसाम्माङ् पिरुसि, 8 हे़क्क्याङ् खे़ङ्हाॽ अक्खे मे़त्तुसि, “यरिक् याङ्साकुन्धे नु यरिक् थक्साहाॽ याङ्ङासिम्मे़ॽ हे़क्क्याङ् साम्म्याङ्, युप्पा, कासा, फे़न्जेॽ नु यरिक् चाङ्हाॽ तेॽरे़म्मे़ॽआङ् खिनिॽ आप्फेक् आप्फेक् हिम्हाॽओ नुःक्खे़म् पेगे़म्मे़ॽ॥ खिनिॽ निङ्मिहाॽओलाम् के़नाप्तुम्सिम्बा के़रे़क् पाःन्हाॽ खिनिॽ आप्फेक् फुॽनुसाॽहाॽओ फःक्खे़म्मे़ॽ॥” 9 खे़ब्याङ् रुबेनि, गादि नु मनस्सेरे़ कुभ्रे़ःङ् कुधाःक्हाॽ, यहवे दाङ्बे़ल्ले़ कुइङ्जाङ् इसिःक् मोसान् लाम्बा खे़ङ्हाॽरे़ युक् मे़घोसुबा लाजेॽ गिलाद पेःक्मारे़ लागि इस्राइलिहाॽनु से़म्मुॽइ मे़बोःक्खे़आङ् कनान लाजेॽबा सिलोलाम् खे़ङ्हाॽ मे़नुःक्खे़रो॥ यर्दन कुयाओबा ले़त्ति तोःम्मादे़न् 10 खे़ङ्हाॽ कनान लाजेॽओबा यर्दन कुया कुया गलिलोतओ मे़गे़रे़ल्ले़, रुबेनि, गादि नु मनस्सेरे़ कुभ्रे़ःङ् कुधाःक्हाॽरे़ यर्दन निःत्ताङ् ओमे़प्मे़ल्ले़ यम्बा निगे़दे़प्पा ले़त्ति तोःम्मादे़न् थिक् मे़जोगु॥ 11 हे़क्क्याङ् रुबेनि, गादि नु मनस्सेरे़ कुभ्रे़ःङ् कुधाःक्हाॽरे़ कनान लाजेॽबा इःन्दोओ यर्दन निःत्ताङ्, इस्राइलिहाॽरे़ खुन्छिॽ लक् ले़प्माङ् ले़त्ति तोःम्मादे़न् मे़जोगु के़लॽबा पान् इस्राइलिहाॽरे़ मे़घे़प्सु॥ 12 खे़ब्याङ् नाङ्गे़न् ले़प्माङ्बा थाःक्हाॽनु थङ् चोःक्मारे़ लागि इस्राइलबा के़रे़क् सङ्जुम्भोहाॽ सिलोओ मे़जुप्से़॥ 13 हे़क्क्याङ् इस्राइलिहाॽरे़ गिलादबा लाजेॽओ रुबेनि, गादि नु मनस्सेरे़ कुभ्रे़ःङ् कुधाःक्हाॽओ निङ्वाॽफुसाम्बा एलाजाररे़ कुस्सा पिनहासे़न् मे़बाङ्घु, 14 हे़क्क्याङ् खुने़ॽनु सोरिक् नाम्धा पिसाङ्बा इस्राइलबा लाम्लोबा मनाहाॽओबा थिबोङ् मनाहाॽ थाःक् थक्मालाम् थिक्पा थिक्पा मे़बाङ्घुसि॥ खे़ङ्हाॽ इस्राइलि थाःक्हाॽओबा लत्छा लत्छा हिम्सयङ्बा लाम्लोबा मे़वये़॥ 15 हे़क्क्याङ् रुबेनि, गादि नु मनस्सेरे़ कुभ्रे़ःङ् कुधाःक्हाॽग गिलाद लाजेॽओ मे़बेआङ् खे़ङ्हाॽ अक्खे मे़मे़त्तुसि, 16 “निङ्वाॽफुमाङ्ङिल्ले़ के़रे़क् कुसङ्जुम्भोहाॽरे़ अक्खे मे़बाःत्तुॽ—‘इस्राइलबा निङ्वाॽफुमाङ्ङिल्ले़ कुदक्ले़ङ्वाओ खिनिॽ आक्खेलॽरिक् अक्तङ्बा ताप्फे़ःम्बा याःम्बक् के़जोगुम्माङ् के़वयिॽ? खिनिॽ आल्लो आक्खेलॽरिक् यहवे दाङ्बे़ल्ले़ कुदक्ले़ङ्वाओ पिफ्युङ्बा के़बोःक्खिॽ हे़क्क्याङ् खुने़ॽ तिम्मा नाःप्मा के़नाॽरुम्माङ् खिनिॽ आप्फेक् लागि कन् ले़त्ति तोःम्मादे़न्निन् के़जोगुम्माङ् युङ्बाबे? 17 थे पोरबा फे़न्याःम्बक्किल्ले़ आनिॽ आङ्घुमे़न्बि? खे़प्मोलाम् यहवे दाङ्बे़ल्ले़ कुसङ्जुम्भोओ यम्बा मिङ्देॽ पोगे़ हे़क्केसाङ् आनिॽ आइन् थारिक् खे़न् फे़न्याःम्बक्कोलाम् सुत्थो चोःक्सिङ्मा मे़न्छुक्सिङ्ङे आवाॽ॥ 18 थे आइन् याम्मो यहवे दाङ्बे़न् लाम्बा खिनिॽ माःङ्घा के़बोःक्खिर के़बत्छिबि? आइन् यहवे दाङ्बे़ल्ले़ कुदक्ले़ङ्वाओ खिनिॽ पिफ्युङ्बा के़बोक्खिने़भग्र, ताःन्दिक् इस्राइलबा के़रे़क् सङ्जुम्भोहाॽनु खुने़ॽ कुयाःक्ले़ॽ॥ 19 “‘कर खिनिॽ के़युक्तुम्बा लाजेन् आसुत्थो चोःक्ने़भग्र, यहवे दाङ्बे़ल्ले़ कुसेसेदे़न् के़ने़बा, यहवे दाङ्बे़ल्ले़ कुलाजेॽओ खिनिॽ खे़प्मो फे़रे़म्मे़ॽ, हे़क्क्याङ् आनिॽ लाजेन् कुदङ्बा युक्ते़म्मे़ॽ॥ कर यहवे दाङ्बा आनिॽ निङ्वाॽफुमाङ्ङो ले़त्ति तोःम्मादे़न्निन् मे़ले़रे़म्मिन्ने़ॽ खे़ब्याङ् खिनिॽ लागि वेॽ ले़त्ति तोःम्मादे़न् मे़जोगे़म्मिन्ने़ॽआङ् यहवे दाङ्बे़ल्ले़ कुदक्ले़ङ्वाओ इग्र आनिगे तक्ले़ङ्वाओ पिफ्युङ्बा मे़बोःक्खे़म्मिन्ने़ॽ॥ 20 जेरहरे़ कुस्सा आकानरे़ खाप्पुथ्यःङ् मे़ङ्माआङ् तोःम्मनाबा चिगक्वाहाॽओ फे़न्याःम्बक् चोगुल्ले़ थे यहवे दाङ्बे़ल्ले़ कुस्साक्के़न्निन् इस्राइलबा के़रे़क् सङ्जुम्भोहाॽओ मे़ध्ये़ने़म्बि? कुभे़न् याःम्बक्किल्ले़ चोगुल्ले़ खे़न् मनाःन्लक् मे़स्ये़ने़न्॥’” 21 खे़ब्याङ् रुबेनि, गादि नु मनस्सेरे़ कुभ्रे़ःङ् कुधाःक्हाॽरे़ इस्राइलि थाःक्हाॽओबा थाःक्लाम्लोबाहाॽ मे़मे़त्तुसि, 22 “निङ्वाॽफुमाङ्ङिन् मुक्साम्दाङ्बा चोक्! यहवे दाङ्बे़न् मुक्साम्दाङ्बा चोक्! खुने़ॽए के़रे़क् पाःन्हाॽ कुसिङ्निःत्तुॽ! हे़क्क्याङ् इस्राइलिहाॽरे़ कुसिङ् मे़निःत्तुर! आनिगे पिफ्युङ्बा पोःक्खिगे़आङ् यहवे दाङ्बे़ल्ले़ कुदक्ले़ङ्वाओ फे़न्याःम्बक् चोगुम्बे़आङ् वयिगे़ने़भग्र, आइन् आनिगे कुहिङ्वे़त् आल्ले़रे़न्ने़ॽ॥ 23 यहवे दाङ्बे़न् आनिगे तिम्मा नाॽरुम्बे़आङ् आनिगे आप्फेक् लागि ले़त्ति तोःम्मादे़न् चोगुम्बे़आङ् युङ्रे़त्छ, इग्र खे़प्मो मिधिङ्मनादेमनाबा वयागे़न् सिदुङ्जभाहाॽ इग्र पोगुगे़न् कुजा सिदुङ्जभाहाॽ किग्र तङ्जुम् वयागे़न् सिदुङ्जभाहाॽ तोःम्मारे़ लागि चोगुम्बे़बाने़भग्र, यहवे दाङ्बे़ल्ले़ खुने़ॽ आप्फेक् खुम्दिङ् पिरिगे़ररो॥ 24 “हे़क्के मेःन्, कुभा ये़म् ताये़म्मो खिनिॽ मुॽइदाङ्साहाॽरे़ आनिगे मुॽइदाङ्साहाॽ अक्खे मे़मे़त्तुसिबिला फाॽआङ् आनिगे कन् चोगुम्बे़बारो—‘यहवे दाङ्बा इस्राइलबा निङ्वाॽफुमाङ्ङिन् खिनिॽ थेआङ् माङ्से़वा के़मे़त्तुम्बाबे? 25 थेआङ्भे़ल्ले़ खिनिॽ रुबेनिहाॽ नु गादिहाॽरे़ खुन्छिॽ मुॽइदाङ्साहाॽ हे़क्क्याङ् आनिगे लुम्मो यहवे दाङ्बे़ल्ले़ यर्दन वहःङ्ङिन् इःन्दो ने़स्सु आबिरे़आङ् ने़रो॥ यहवे दाङ्बाओ खिनिॽ खोमा लक् थेआङ् होप्॥’ अक्खे मे़मे़त्तुसिआङ् खिनिॽ मुॽइदाङ्साहाॽरे़ आनिगे मुॽइदाङ्साहाॽ यहवे दाङ्बे़न् माङ्से़वा मे़म्मे़प्मनाबा मे़जोगुसिॽ फाॽआङ् किसिगे़॥ 26 “कल्ले़चोगुल्ले़ आनिगे अक्खे चोगुम्बे़बारो, ‘मिधिङ्मनादेमनाबा इग्र सिदुङ्जभारे़ लागि मेःन्छाङ्, लत्छा ले़त्ति तोःम्मादे़ङ्ग आनिगे चोःक्माए पोङ्ॽ॥’ 27 कर आनिगे नु खिनिॽ लुम्मो हे़क्क्याङ् आनिॽ ताःन्दिबा थाःक्हाॽरे़ खुन्छिॽ लुम्मो कन् लत्छा तोःन्दिरे़ लागि पोङ्ल, हे़क्केलॽरिक् आनिॽ मिधिङ्मनादेमनाबा वयागे़न् सिदुङ्जभाहाॽ, सिदुङ्जभाहाॽ नु तङ्जुम् वयागे़न् सिदुङ्जभाहाॽ आयाङ्ङासिआङ् यहवे दाङ्बाओ खुने़ॽ कुदगिए आनिॽ माङ्से़वा आजोगुम्ॽ॥ हे़क्क्याङ् खिनिॽ मुॽइदाङ्साहाॽरे़ आनिगे मुॽइदाङ्साहाॽ अक्खे मे़प्मा मे़ङ्घोसुसिन्ल, ‘यहवे दाङ्बाओ खिनिॽ खोमा लक् थेआङ् होप्॥’ 28 “हे़क्क्याङ् खे़ङ्हाॽरे़ आनिगे इग्र आनिगे मुॽइदाङ्साहाॽ ताये़म्मो हे़क्के मे़मे़त्तुसिल्ले़ आनिगे अक्खे मे़त्तुम्सिम्बे़ फाॽआङ् निङ्वाॽ इःत्तुम्बे़, ‘ओमे़त्ते़म्मे़ॽ, आनिगे पाधे़बाहाॽरे़ यहवे दाङ्बाओ ले़त्ति तोःम्मादे़न् हे़क्तङ्बा थिक् मे़जोगुआङ् युङ्ॽ, कन् मिधिङ्मनादेमनाबा वयागे़न् सिदुङ्जभाहाॽ नु सिदुङ्जभाहाॽरे़ लागि मेःन्, कर आनिगे नु खिनिॽ लुम्मो तोःन्दिरे़ लागि मे़जोगुबारो॥’ 29 यहवे दाङ्बे़ल्ले़ कुदक्ले़ङ्वाओ आनिगे पिफ्युङ्बा पोङ्माआङ् खुने़ॽ कुसेसेदे़न्निल्ले़ कुदगाङ् के़युङ्बा यहवे दाङ्बा आनिगे निङ्वाॽफुमाङ्ङो ले़त्ति तोःम्मादे़न्निन् ले़प्मा, हे़क्क्याङ् मिधिङ्मनादेमनाबा वयागे़न् सिदुङ्जभाहाॽ, पोगुगे़न् कुजा सिदुङ्जभाहाॽ नु सिदुङ्जभाहाॽ तोःम्मारे़ लागि वेॽ ले़त्ति तोःम्मादे़न् चोःक्माआङ् आइन् यहवे दाङ्बे़न् तिम्मा नाःप्मा ले़प्मा ये़न्ग आभे़ल्ले़आङ् मे़दाने़न्लरो॥” 30 आल्ल रुबेन, गाद नु मनस्सेरे़ कुमुॽइदाङ्साहाॽरे़ मे़बाःत्तुबा पाःन्निन् निङ्वाॽफुसाम्बा पिनहास हे़क्क्याङ् खुने़ॽनु के़वाॽबा इस्राइलबा थाःक्लाम्लोबाहाॽरे़ मे़घे़प्सुआङ् साॽरिक् खुन्छिॽ निङ्वाॽ त्ये़॥ 31 हे़क्क्याङ् निङ्वाॽफुसाम्बा एलाजाररे़ कुस्सा पिनहासरे़ रुबेन, गाद नु मनस्सेरे़ कुमुॽइदाङ्साहाॽ अक्खे मे़त्ते़सुसि, “यहवे दाङ्बे़न् आनिॽनु वाॽरे़त्छ फाॽआङ् आइन् आनिगे निङ्वाॽ खोसुम्बे़, थेआङ्भे़ल्ले़ यहवे दाङ्बे़ल्ले़ कुदक्ले़ङ्वाओ खिनिॽ ताप्फे़ःम्बा याःम्बक् के़जोगुम्बा मे़ःन्लत्छ॥ आल्ल यहवे दाङ्बे़ल्ले़ कुहुक्कोलाम् इस्राइलिहाॽ खिनिॽ के़से़ःप्तुम्सिम्माङ् मे़वाॽ॥” 32 खे़ब्याङ् गिलाद लाजेॽबा रुबेनि हे़क्क्याङ् गादिहाॽलाम् निङ्वाॽफुसाम्बा एलाजाररे़ कुस्सा पिनहासे़न् नु खे़न् थाःक्लाम्लोबाहाॽ कनान लाजेॽओ इस्राइलिहाॽरो मे़नुःक्खे़, खम्भ्याङ् के़रे़क् पाःन्हाॽ खे़ङ्हाॽ मे़जे़क्तुसि॥ 33 खे़न् पाःन्निन् इस्राइलिहाॽरे़ खुन्छिॽ सिराॽथाङे़, हे़क्क्याङ् खे़ङ्हाॽरे़ निङ्वाॽफुमाङ्ङिन् कुनारा मे़भोसु॥ याम्मो खे़ङ्हाॽरे़ खुन्छिॽ तक्ले़ङ्वाओ थङ् चोःक्से़ पेःक्मा, हे़क्क्याङ् रुबेनि नु गादिहाॽ मे़युङ्बा लाजेन् खाप्पुथ्यःङ् चोःक्से़ पेःक्मा पान् पाःप्मा मे़नाॽरे़॥ 34 हे़क्क्याङ् रुबेनिहाॽ नु गादिहाॽरे़ “यहवे दाङ्बे़न् निङ्वाॽफुमाङ्लो के़लॽबा आनिॽ लुम्मो तोःन्दिरो,” फाॽआङ् खे़न् ले़त्ति तोःम्मादे़न्निल्ले़ कुमिङ् मे़युक्खुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.