यहोसु 21 - लिम्बुले़बिहाॽरे़ खुन्छिॽ ये़क्यक्हाॽ 1 खे़न् एगाङ् निङ्वाॽफुसाम्बा एलाजार, नुनरे़ कुस्सा यहोसुन् नु इस्राइलि हिम्सयङ्बा लाम्लोबाहाॽरे़ खुन्छिॽ पेसाङ् ले़बिहाॽरे़ खुन्छिॽ लाम्लोबाहाॽ मे़द्ये़आङ् 2 कनान लाजेॽबा सिलोओ खे़ङ्हाॽ अक्खे मे़मे़त्तुसि, “आनिगे युङ्मारे़ लागि ये़क्यक्हाॽ नु आनिगे थक्साहाॽ चाराम्मासिरे़ लागि कब्रिङ् पिसाङ्बा ते़न्हाॽ मे़बिरिगे़र फाॽआङ् यहवे दाङ्बे़ल्ले़ मोसान् लाम्बा इङ्जाङ् चोगुआङ् वाॽ॥” 3 कल्ले़चोगुल्ले़ यहवे दाङ्बे़ल्ले़ कुइङ्जाङ् कुइसिक् इस्राइलिहाॽरे़ ले़बिहाॽ खुन्छिॽ लक्खोमालाम् कन् ये़क्यक्हाॽ नु थक्सा चाराम्दे़न्हाॽ मे़बिरुसि॥ 4 हे़क्क्याङ् कहातिहाॽरे़ खुन्छिॽ हिम्सयङ्हाॽरे़ खुनिॽ मिङ्ङो थिक्सिगेक्पा तॽयाःन्सोन्निन् थ्ये़॥ ले़बिहाॽओबा निङ्वाॽफुसाम्बा हारुनरे़ कुमुॽइदाङ्हाॽरे़ यहुदारे़ कुधाःक्कोलाम्, सिमियोनरे़ कुधाःक्कोलाम् नु बेन्यामिनरे़ कुधाःक्कोलाम् थिबोङ्ङाङ् सुम्सि ये़क्यक्हाॽ मे़घोसु॥ 5 कहातरे़ के़नम्बा कुमुॽइदाङ्साहाॽरे़ एफ्राइमरे़ कुधाःक्कोलाम्, दानरे़ कुधाःक्कोलाम् नु मनस्सेरे़ कुभ्रे़ःङ् कुधाःक्हाॽरे़ खुन्छिॽ हिम्सयङ्हाॽलाम् थिबोङ् ये़क्यक्हाॽ मे़घोसु॥ 6 गेर्सोनरे़ कुमुॽइदाङ्हाॽरे़ इस्साखाररे़ कुधाःक्हाॽलाम्, आसेररे़ कुधाःक्हाॽलाम्, नप्तालिरे़ कुधाःक्हाॽलाम् नु बासानओ मनस्सेरे़ कुभ्रे़ःङ् कुधाःक्हाॽरे़ खुन्छिॽ थाःक्हाॽरे़ खुनिॽ हिम्सयङ्हाॽलाम् थिबोङ्ङाङ् सुम्सि ये़क्यक्हाॽ मे़घोसु॥ 7 मरारिरे़ कुमुॽइदाङ्हाॽरे़ खे़ङ्हाॽरे़ खुन्छिॽ हिम्सयङ् कुइसिक् रुबेन, गाद नु जबुलुनरे़ खुन्छिॽ थाःक्हाॽलाम् थिबोङ्ङाङ् ने़त्छि ये़क्यक्हाॽ मे़घोसु॥ 8 निङ्वाॽफुमाङ्ङिल्ले़ मोसान् लाम्बा इङ्जाङ् चोगुबा कुइसिक् इस्राइलिहाॽरे़ थक्सा चाराम्दे़न्हाॽ सोसोरिक् खे़न् ये़क्यक्हाॽ ले़बिहाॽ मे़बिरुसि॥ 9 खे़ङ्हाॽरे़ यहुदारे़ कुधाःक्हाॽ नु सिमियोनरे़ कुधाःक्हाॽलाम् कन् यो साप्ते़आङ् के़बप्पा ये़क्यक्हाॽ मे़बिरुसि॥ 10 कन् ये़क्यक्हाॽ ले़बिहाॽरे़ खुन्छिॽ थाःक्हाॽओबा कहातिहाॽरे़ खुन्छिॽ हिम्सयङ्हाॽओबा हारुनरे़ कुमुॽइदाङ्हाॽरे़ खुन्छिॽ लागि मे़बिरुसि, थेआङ्भे़ल्ले़ तॽयाःन्सोन्निन् तगि खे़ङ्हाॽरे़ खुन्छिॽ मिङ्ङोए थ्ये़आङ् वये़॥ 11 हे़क्क्याङ् खे़ङ्हाॽरे़ खुन्छिॽ यहुदाबा थे़गु माङ्वा लाजेॽ किर्यत-अर्बा (खे़न् हेब्रोन) मे़प्मनाबा ये़क्यक्किन् नु खे़न् कब्रिङ्बा थक्सा चाराम्दे़न्हाॽ मे़बिरुसि॥ (अर्बान् अनाकरे़ कुधाःक्थे़बा वये़॥) 12 कर खे़न् ये़क्यक्कोबा इक्ताप्हाॽ नु खे़प्मोबा पाङ्जुम्हाॽग खे़ङ्हाॽरे़ यपुन्नेरे़ कुस्सा कालेबे़न् लक्खोमा मे़बिरुआङ् ने़स्से़॥ 13 निङ्वाॽफुसाम्बा हारुनरे़ कुमुॽइदाङ्साहाॽ, मना के़से़प्पे़ल्ले़ कुलागि से़ःप्सिमाङ्दे़न् निःन्धो के़बोङ्बा हेब्रोन ये़क्यक्किन्, खे़प्मोबा थक्सा चाराम्मादे़न्हाॽनु सोसोरिक्, हे़क्क्याङ् लिब्ना, 14 यत्तिर, एस्तमो, 15 होलोन, दबिर, 16 ऐन, युत्ता नु बेथ-सेमेस, खे़प्मोबा थक्सा चाराम्दे़न्हाॽनु सोसोरिक् खे़न् ने़त्छि यहुदा नु सिमियोन थाःक्हाॽलाम् फाङ्सि ये़क्यक्हाॽ खे़ङ्हाॽरे़ मे़बिरुसि॥ 17 हे़क्क्याङ् बेन्यामिनरे़ कुधाःक्कोलाम् गिबोन, गेबा, 18 अनातोत नु अल्मोनबा थक्सा चाराम्दे़न्हाॽनु सोसोरिक् लिसि ये़क्यक्हाॽ मे़बिरुसि॥ 19 निङ्वाॽफुसाम्बा हारुनरे़ कुमुॽइदाङ्साहाॽरे़ खुन्छिॽ थिबोङ्ङाङ् सुम्सि ये़क्यक्हाॽ खे़प्मोबा थक्सा चाराम्दे़न्हाॽनु सोसोरिक् ने़स्से़॥ 20 ले़बिहाॽरे़ खुन्छिॽ थाःक् कहातिबा के़नम्बा हिम्सयङ्हाॽरे़ एफ्राइमबा थाःक्हाॽरे़ खुन्छिॽ लक्कोलाम् कन् ये़क्यक्हाॽ मे़घोसु॥ 21 खे़ङ्हाॽरे़ खुन्छिॽ एफ्राइमबा थे़गु माङ्वा लाजेॽओ मना के़से़प्पे़ल्ले़ लागि से़ःप्सिङ्मा सकेम ये़क्यक्किन्, खे़प्मोबा थक्सा चाराम्मादे़न्हाॽ सोसोरिक् नु गेजेर, 22 किब्सैम, बेथ-होरोन खे़प्मोबा थक्सा चाराम्मादे़न्हाॽनु सोसोरिक् लिसि ये़क्यक्हाॽ मे़बिरुसि॥ 23 दानरे़ कुधाःक्कोलाम् खे़ङ्हाॽरे़ एल्तके, गिब्बतोन, 24 अय्यालोन, गात-रिम्मोन खे़प्मोबा थक्सा चाराम्दे़न्हाॽनु सोसोरिक् लिसि ये़क्यक्हाॽ मे़घोसु॥ 25 मनस्सेरे़ कुभ्रे़ःक् कुधाःक्हाॽलाम् खे़ङ्हाॽरे़ तानाक नु गात-रिम्मोन खे़प्मोबा थक्सा चाराम्दे़न्हाॽनु सोसोरिक् ने़त्छि ये़क्यक्हाॽ मे़घोसु॥ 26 कहातिरे़ के़नम्बा कुधाःक्हाॽरे़ खुन्छिॽ के़रे़क् थिबोङ् ये़क्यक्हाॽ थक्सा चाराम्दे़न्हाॽनु सोसोरिक् ने़स्से़॥ 27 ले़बि थाःक्कोबा गेर्सोनिहाॽ—मनस्सेरे़ कुभ्रे़ःक् कुधाःक्हाॽलाम् बासानओ मना के़से़प्पे़ल्ले़ कुलागि से़ःप्सिङ्मादे़न् ये़क्यक् निःन्धो के़बोङ्बा गोलान, खे़प्मोबा थक्सा चाराम्दे़न्हाॽनु सोसोरिक्, हे़क्क्याङ् बे-ए़स्तरा, खे़प्मोबा थक्सा चाराम्दे़न्हाॽनु सोसोरिक् ने़त्छि ये़क्यक्हाॽ मे़बिरुसि॥ 28 इस्साखाररे़ कुधाःक्कोलाम् किस्योन, दाबरत, 29 यर्मुत नु एन-गन्निम खे़प्मोबा थक्सा चाराम्दे़न्हाॽनु सोसोरिक् लिसि ये़क्यक्हाॽ मे़बिरुसि॥ 30 आसेररे़ कुधाःक्लाम् मिसाल, अब्दोन, 31 हेल्कत नु रहोब खे़प्मोबा थक्सा चाराम्दे़न्हाॽनु सोसोरिक् लिसि ये़क्यक्हाॽ मे़बिरुसि॥ 32 नप्तालिरे़ कुधाःक्कोलाम् गालिलओ मना के़से़प्पे़ल्ले़ कुलागि से़ःप्सिङ्मादे़न् ये़क्यक् निःन्धो के़बोङ्बा केदेस, खे़प्मोबा थक्सा चाराम्दे़न्हाॽनु सोसोरिक् हे़क्क्याङ् हम्मोत-दोर नु कर्तान खे़प्मोबा थक्सा चाराम्दे़न्हाॽनु सोसोरिक् सुम्सि ये़क्यक्हाॽ मे़बिरुसि॥ 33 खे़ङ्हाॽरे़ खुन्छिॽ थाःक्हाॽ कुइसिक् गेर्सोनिहाॽरे़ खुन्छिॽ के़रे़क् थिबोङ् ये़क्यक्हाॽ खे़प्मोबा थक्सा चाराम्दे़न्हाॽनु सोसोरिक् ने़स्से़॥ 34 ले़बिहाॽरे़ खुन्छिॽ के़नम्बा मरारि हिम्सयङ्हाॽग जबुलुनरे़ कुधाःक्कोलाम् योक्नाम, कर्तह, 35 दिम्ना नु नहलल खे़प्मोबा थक्सा चाराम्दे़न्हाॽनु सोसोरिक् लिसि ये़क्यक्हाॽ मे़बिरुसि॥ 36 रुबेनरे़ कुधाःक्कोलाम् बेसेर, यहसा, 37 कदेमोत नु मेपात खे़प्मोबा थक्सा चाराम्दे़न्हाॽनु सोसोरिक् लिसि ये़क्यक्हाॽ मे़बिरुसि॥ 38 गादरे़ कुधाःक्कोलाम् गिलादओ मना के़से़प्पे़ल्ले़ कुलागि से़ःप्सिङ्मादे़न् निःन्धो के़बोङ्बा ये़क्यक् रामोत, खे़प्मोबा थक्सा चाराम्दे़न्हाॽनु सोसोरिक्, हे़क्क्याङ् महनोम, 39 हेस्बोन नु याजेर, खे़प्मोबा थक्सा चाराम्दे़न्हाॽनु सोसोरिक् के़रे़क्ले़ लिसि ये़क्यक्हाॽ मे़बिरुसि॥ 40 खे़ङ्हाॽरे़ खुन्छिॽ हिम्सयङ् कुइसिक् ले़बिरे़ के़नम्बा मरारिरे़ के़रे़क् थिबोङ्ङाङ् ने़त्छि कुये़क्यक्हाॽ, थक्सा चाराम्दे़न्हाॽनु सोसोरिक् ने़स्से़॥ 41 इस्राइलिहाॽरे़ खुन्छिॽ युक्को के़ने़बा लाजेॽ सिङ्बुङ्ङो ले़बिहाॽरे़ खुन्छिॽ थक्सा चाराम्दे़न्हाॽनु सोसोरिक् के़रे़क्ले़ लिबोङ्ङाङ् ये़त्छि ये़क्यक्हाॽ ने़स्से़॥ 42 कन् ये़क्यक्हाॽरे़ कुगब्रिङ् ले़प्माङ् थक्सा चाराम्दे़न्हाॽ ने़स्से़॥ के़रे़क् ये़क्यक्हाॽ कन् परिक्ले़न्ने ने़स्से़रो॥ इस्राइलरे़ लाजेन् युक्को तारु 43 कम्भलॽरिक् यहवे दाङ्बे़ल्ले़ इस्राइलिहाॽ पिरुङ्सिङ् फाॽआङ् खे़ङ्हाॽरे़ खुन्छिॽ पाधे़बाहाॽनु माङ्हुप् चोगुबा के़रे़क् लाजेॽहाॽ पिरुसि, हे़क्क्याङ् खे़ङ्हाॽरे़ खे़न् मे़युक्तुआङ् खे़प्मो मे़युङे़॥ 44 हे़क्क्याङ् यहवे दाङ्बे़ल्ले़ खे़ङ्हाॽरे़ खुन्छिॽ पाधे़बाहाॽनु माङ्हे़क् चोगुबा कुइसिक्, खे़ङ्हाॽ के़रे़क् पिसाङ्लाम् नाःम्सिङ्मा पिरुसि॥ खे़ङ्हाॽरे़ खुन्छिॽ के़रे़क् निङ्मिहाॽओबा लत्छाआङ् खुन्छिॽ तगि ये़प्मा मे़न्छुक्ते़न्॥ यहवे दाङ्बे़ल्ले़ खे़ङ्हाॽरे़ खुन्छिॽ निङ्मिहाॽ खे़ङ्हाॽए हुक्सुप्तुसि॥ 45 यहवे दाङ्बे़ल्ले़ इस्राइलिहाॽनु माङ्हुप् चोगुआङ् वये़बा नुबा पाःन्हाॽ लत्छाआङ् मे़ङ्गे़प्मनाबा मे़म्बोङ्ङे के़रे़क् के़रे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.