यहोसु 2 - लिम्बुयहोसुःल्ले़ यरिहोओ थोःम्जिबा पाङ्घुसि 1 खे़ब्याङ् नुनरे़ कुस्सा यहोसुःल्ले़ सित्तिमलाम् थोःम्जिबा ने़त्छि स्वाःत् पाङ्घुसिआङ् मे़त्तुसि, “खे़न् लाजेन् नु से़क्खाःल्ले़ यरिहोबा सिबिॽ पाःन्हाॽ फे़त्ते़से़ॽआङ् फे़रे़से़ॽ॥” हे़क्केलॽरिक् खुन्छिॽ पेसि, हे़क्क्याङ् राहाब मिङ् के़वाःप्मा के़त्निमे़ल्ले़ कुहिम्मो के़रे़सि, खे़ब्याङ् आम्भा खे़प्मो याङ्धोःक्ते़सि॥ 2 हे़क्क्याङ् कुभारे़ यरिहोबा हाङ्ङिन् अक्खे मे़मे़त्तु, “ओमे़त्ते़ॽओ, इस्राइलि थाःक्कोबा कुभा मनाहाॽ कन् लाजेन् थोःम्मारे़ लागि आइन् से़न्दिक् कत्ना मे़भे़रे़आङ् मे़वाॽ॥” 3 कल्ले़चोगुल्ले़ यरिहोबा हाङ्ङिल्ले़ राहाबरो कन् इङ्घङ्ङिन् हाङुदेसु, “खे़ने़ॽओ के़भे़म्बाआङ् के़हिम्मो के़लाःप्पा मनाहाॽ लःत्ते़ फे़त्ते़से़ॽ, थेआङ्भे़ल्ले़ के़रे़क् लाजेन् थोःम्मारे़ लागि खे़ङ्हाॽ मे़भे़रे़आङ् मे़वाॽ॥” 4 कर खे़न् मे़न्छुमाःल्ले़ खे़न् ने़त्छि मनाहाॽ तेॽरुसिआङ् चिक्खु युक्खुसिआङ् युङे़सि॥ खे़ल्ले़ पाःत्तु, “ओरो, मना ने़त्छि आङ्गाॽओ फे़रे़सिआङ् वये़सि, कर खे़ङ्हाॽ आत्तिलाम् त्ये़सिआङ् वये़सि आङ्गाॽ निङ्वाॽ मे़ङ्घोबा॥ 5 युःन्छिक् ये़क्यक्कोबा यम्बा लाम्धेःत्तिन् सुप्मा ये़म्मो खुन्छिॽ लःन्दे़ पेसि॥ खे़न् ने़प्फु मनाहाॽ आत्तान् पेसि, आङ्गाॽ मे़निआन्॥ खिमो खुन्छिॽ एगाङ् के़बेगिने़भग्र खे़निॽ खुन्छिॽ के़दुमुम्सिम्ॽ॥” 6 (कर खे़ल्ले़ खे़न् ने़त्छि मनाहाॽ थाःङ् कौसिओ चिक्खु युक्खुसिआङ् युङे़सि, हे़क्क्याङ् कौसिओ खुने़ॽ तङ्घु ने़स्सुबा चयाङ्सिङ् लाङ्हाॽरे़ कुसिगाङ् खे़न्हाॽ चिक्खुसिआङ् युङे़सि॥) 7 के़नाःप्पा मनाहाॽग खुन्छिॽ मे़नाःत्तुसिर यर्दन वहःङ्ङिल्ले़ कुयाओबा पित्लुङ्माहाॽ ले़प्माङ् मे़धासिङ्॥ के़नाःप्पाहाॽ लाःक्कात् मे़लःन्दे़ मे़बेनुमे़ःन्ने यरिहोबा यम्बा लाम्धेःत्तिन् चिसुप् मे़सुबु॥ 8 खे़न् थोःम्जिबा मनाहाॽ खुन्छिॽ इम्मानुःल्ले़ तगि खे़न् मे़न्छुमान् थाःङ् कौसिओ थोःक्सिङ् थाङे़, 9 हे़क्क्याङ् खुने़ॽ खे़न् मनाहाॽ मे़त्तुसि, “कन् लाजेन् यहवे दाङ्बे़ल्ले़ खिनिॽ के़बिरिआङ् ने़रो फाॽआङ् आङ्गाॽ निसुङ्ॽ, खे़ब्याङ् आनिगे लुम्मो खे़निॽ के़जोगुम्बाल्ले़ चोगुल्ले़ साॽरिक् किमा यङ्मा पोःक्खे़आङ् वाॽ, हे़क्क्याङ् कॽयो के़युङ्बा मनाहाॽ खिनिॽ के़म्गिरिआङ् यङ्मा मे़हेःक्ते़आङ् मे़वाॽ॥ 10 मिस्र लाजेॽलाम् खिनिॽ के़लःन्दि के़भे़रिल्ले़ खिनिॽ तगि निङ्वाॽफुमाङ्ङिल्ले़ हे़ःत्ताङ्बा वरःङ्ङोबा च्वाःत्तिन् चप्प्रे़क् चबे़र याःन्दुबा नु यर्दन नाङ्गे़न् पिसाङ्बा एमोरिहाॽरे़ खुन्छिॽ ने़प्माङ् हाङ्हाॽ, सिहोननु ओगे़न् खिनिॽ वरे़ङ्ले़ङ् के़मे़क्खुम्सिम्बान्नाङ् आनिगे खे़प्सुम्बे़आङ् वाॽ॥ 11 कन् खे़प्सुम्बे़नुमे़ःन्ने आनिगे किसिगे़ हे़क्क्याङ् खिनिॽ के़जोगुम्बाल्ले़ चोगुल्ले़ आनिगे आत्तिन्हाॽरे़आङ् आःन्छिङ्मा मे़सुक्तिगे़न्, थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिन्ने थाःङ् साङ्ग्राम्पेदाङ्ङो नु मु इक्सादिङ् खाम्बेःक्मोबा निङ्वाॽफुमाङ्लो॥ 12 कल्ले़चोगुल्ले़ आल्ल आङ्गाॽ खे़न्छिॽ पेलि फाक्ने़सिङ्, आङ्गाॽ खे़न्छिॽ नुरिक् मे़त्ने़सिङ्बाल्ले़ चोगुल्ले़ आङ्गाॽनु सोरिक् यहवे दाङ्बे़न्नु माङ्हे़क् चोगे़से़ॽ, आङ्गाॽ आहिम्सयङ्हाॽआङ् लुङ्माॽ तुक्ते़से़ॽ॥ आङ्गाॽ लत्छा से़क्खाबा मिक्सेःन् आबिरे़ॽ, 13 हे़क्केलॽरिक् आङ्गाॽ आम्मा नु आम्बा, आङ्गाॽ आम्भुॽ आन्साॽ, आन्ने़ॽ आन्साॽ हे़क्क्याङ् खे़ङ्हाॽनु आक्ख्यारिक् मे़वाॽ, के़रे़क् कुहिङ्वे़त् ताङ्घे़म्सिम्मे़ॽआङ् आनिगे सिमालाम् ताङ्आसे़ःप्ते़ॽ॥” 14 खे़न् मनाहाॽरे़ खुने़ॽ आःन्छिङ्मा पिरे़त्छु, “खिनिॽ हिङ्मारे़ लागि आनिगे सिमासाङ् यारिप् वयिगे़॥ आनिगे कन् याःम्बक्किन् खिनिॽ हाःत्ताङ् के़म्मे़त्तुम्मिन्ने भग्र यहवे दाङ्बे़ल्ले़ आनिगे कन् लाजेन् पिरिगे़आङ् एगाङ् खिनिॽ आनिगे लुङ्माॽ तुक्कासिगे़ हे़क्क्याङ् नसाःन्साबा याःम्बक् चोगुम् पिआसिगे़रो॥” 15 खे़ब्याङ् खे़ल्ले़ खे़न्हाॽ पेधाःप्पोलाम् थाक्पाःल्ले़ नाम्मे़त्तुसिआङ् यो थासुसि, थेआङ्भे़ल्ले़ खे़न् युङे़बा हिम्मिन् ये़क्यक्कोबा लुङ्धाक्कोओए युङे़॥ 16 खे़ल्ले़ खे़न्हाॽ मे़त्तुसि, “खिन्छिॽ कोःक्मा ले़प्माङ् पेसे़ॽ, मेःन्ने़भग्र के़नाःप्पाहाॽरे़ के़म्सिॽसिॽ॥ के़नाःप्पाहाॽ मे़न्नुःङ्ने़ल्ल थे़म्बा सुम्यान् थारिक् हाबा खे़प्मो चिङ्ने़से़ॽ, हे़क्क्याङ् खे़न् एगाङ् खे़न्छिॽ आप्फेक् लाम्मिन् नाःत्ते़से़ॽ॥” 17 खे़न् ने़त्छि मनाहाॽरे़ खुने़ॽ मे़त्ते़सु, “खे़ने़ॽ मे़त्ने़सिगे़बा कन् पाःन्हाॽ के़न्जोगुन्ने़भग्र आन्छिगे चोगे़सुगे़बा माङ्हे़क्किल्ले़ मे़घेःङ्सिगे़न्॥ 18 आन्छिगे कन् लाजेॽओ फे़रे़सिगे़ल्ले़ आत्तिन् पेधाःप्पोलाम् याप्मि यो के़धासे़, हाबा खे़न् पेधाःप्पो कन् हे़ःत्ताङ्बा थाक्पान् इघेःङ्मा फम्मा पोङ्ॽ, हे़क्क्याङ् खे़ने़ॽ के़म्बा, के़म्मा, के़म्भुॽ के़न्साॽ नु के़म्बारे़ के़रे़क् कुहिम्सयङ्हाॽ के़हिम्मो फुङ्मासिआङ् युङ्मासि पोङ्ॽ॥ 19 खे़ने़ॽ के़हिम्मोलाम् आत्तिन् लाःक्कात् माराम्मो लःन् खे़ल्ले़ कुमाक्खिन् खुने़ॽ कुधे़गेःक्पोए थारो, हे़क्क्याङ् आन्छिगे आप्तिक् मे़धासिगे़न्॥ हे़क्क्याङ् कन् हिम्मो खे़ने़ॽनु आत्तिन् युङ्ॽ खे़ल्ले़ कुसम्धाङ् कुभारे़ हुक् याक्तुने़भग्र खे़ल्ले़ कुमाक्खिन् आन्छिगे सम्धाङ् थारो॥ 20 कर आन्छिगे चोगे़सुगे़बा याःम्बक्किन् खे़ने़ॽ के़बाःत्तुने़भग्र खे़ने़ॽ आन्छिगे चोःक्मा याप्मि के़बाङ्घे़बा कन् माङ्हे़क्किन्लाम् आन्छिगे चोःक्युम्भो खोसिगे़रो॥” 21 खे़ल्ले़ मे़त्तुसि, “खे़न्छिॽ के़बाःत्ते़सुबा कुइसिःक्के पोङ्ल॥” हे़क्क्याङ् खे़ल्ले़ खुन्छिॽ से़म्मुॽइ पिरुसि, खे़ब्याङ् खे़न्हाॽ पेसिआङ् खे़ल्ले़ खे़न् हे़ःत्ताङ्बा थाक्पान् पेधाःप्पो खेःक्खु॥ 22 खे़न् थोःम्जिबाहाॽ पेसिआङ् कोःक्माओ के़रे़सि, खुन्छिॽ नाःत्छे़ के़भे़म्बाहाॽरे़ लाम् कुले़ःम् के़रे़क् मे़गोःत्तुसिसाङ् खे़न्हाॽ खोमा मे़न्छुक्तुन्सिन्नाङ् मे़न्नुःङ् मे़म्बेःक्के थे़म्बा सुम्यान् थारिक् हाबा खे़प्मो युङे़सि॥ 23 खे़ब्याङ् खे़न् ने़प्माङ् नुःक्खे़सिआङ् कोःक्माओलाम् थ्ये़सि, हे़क्क्याङ् नाधाःम्बि ले़प्माङ् नुनरे़ कुस्सा यहोसुओ पेसि, खम्भ्याङ् खे़न्हाॽरे़ तुमे़सुबा के़रे़क् पाःन्हाॽ थे़प्पे़त् खुने़ॽ चे़क्ते़सु॥ 24 यहोसुन् खे़न्हाॽरे़ मे़त्ते़सु, “से़क्खाए यहवे दाङ्बे़ल्ले़ कन् के़रे़क् लाजेन् आनिॽ हुक्को आबिरे़आङ् ने़रो॥ आनिॽ आजोगुम्मिल्ले़ खे़प्मो के़युङ्बा के़रे़क् यक्युङ्बाहाॽरे़ खुन्छिॽ लुम्मो किमा यङ्मा पोःक्खे़आङ् वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.