यहोसु 18 - लिम्बुके़नम्बा लाजेन् मे़भःक्खु 1 हे़क्क्याङ् इस्राइलबा के़रे़क् सङ्जुम्भोहाॽ सिलोओ मे़जुप्से़, हे़क्क्याङ् खे़प्मो तुम्मादे़न् साःङ्गाहिम् मे़घिङ्घु॥ खे़न् लाजेन् खे़ङ्हाॽरे़ खुन्छिॽ युक्को त्ये़ चुरे़आङ् ने़स्से़, 2 कर इस्राइलिहाॽओ आल्लसाङ् नुसि थाःक्हाॽरे़ खुन्छिॽ लक्खोमा युक् मे़ङ्घोए मे़वये़॥ 3 कल्ले़चोगुल्ले़ यहोसुःल्ले़ इस्राइलिहाॽ मे़त्तुसि, “यहवे दाङ्बा खिनिॽ पाधे़बाहाॽरे़ खुन्छिॽ निङ्वाॽफुमाङ्ङिल्ले़ के़बिरिबा लाजेन् युक्मारे़ लागि खिनिॽ आक्ख्याक् थारिक् के़सुसिबे? 4 आल्ल थाःक्थक्मा सुम्सि सुम्सि मनाहाॽ खिनिॽ लागि युक्तिङ् चोगे़म्सिम्मे़ॽ॥ आङ्गाॽ खे़ङ्हाॽ पाङ्घुङ्देसुङ्सिङ्ॽ, हे़क्क्याङ् खे़ङ्हाॽ मे़बेःक्काङ् लाजेॽओ ताक्मे़गन् खे़ब्याङ् आप्फेक् आप्फेक् खुन्छिॽ लक्खोमा लक्किन् मे़साप्तुआङ् आङ्गाॽओ मे़नुःङ् मे़दारो॥ 5 खे़न् लाजेन् खिनिॽ कुलक् नुसिओ फःक्खे़म्मे़ॽ॥ यहुदान् लाङ्गे़त् ले़प्माङ् आबाङे कुइःन्दो नु योसेफरे़ कुहिम्सयङ्ङिन् थाङ्गे़त् ले़प्माङ् खुन्छिॽए इःन्दोओ मे़युङ्ल पोङ्ॽ॥ 6 खिनिॽ खे़न् नुसि कुलक्हाॽरे़ पाःन्हाॽ साप्मा के़सुरुम्माङ् आङ्गाॽओ तारे़म्मे़ॽ॥ हे़क्क्याङ् यहवे दाङ्बा आनिॽ निङ्वाॽफुमाङ्ङिल्ले़ कुदगि खिनिॽ लागि आङ्गाॽ तॽयाःन्सोन् के़सुङ् पिनिङ्ॽ॥ 7 “कर ले़बिहाॽरे़ खुन्छिॽ लागि खिनिॽलाम् थे़माआङ् लक् मे़ङ्घोसुन्, थेआङ्भे़ल्ले़ यहवे दाङ्बे़ल्ले़ कुलागि निङ्वाॽफुसाम्बा ताक्फाःन्ने खे़ङ्हाॽरे़ खुन्छिॽ लागि लक्खोमारो॥ गाद, रुबेन नु मनस्सेरे़ कुभ्रे़ःङ् थाःक्हाॽरे़ नाङ्गे़न् पिसाङ् यर्दन नाधाःम्बि, यहवे दाङ्बे़ल्ले़ कुसे़वारोबा मोसाःल्ले़ पिरुसिबा खे़ङ्हाॽरे़ खुन्छिॽ आप्फेक् आप्फेक् लक्खोमान् मे़घोसुआङ्ङे वाॽ॥” 8 खे़ब्याङ् खे़न् मनाहाॽ मे़बोगे़आङ् मे़बेःल्ले़ यहोसुःल्ले़ खे़न् लाजेःल्ले़ कुइत्छाप् चोःक्माआङ् ताःप्मारे़ लागि अक्खे मे़त्तुसिआङ् इङ्जाङ् पिरुसि, “पेगे़म्मे़ॽ, खे़न् लाजेॽओ के़रे़क् ताक्कन्दे़म्मे़ॽ, हे़क्क्याङ् खे़प्मोबा पाःन्हाॽ साप्ते़म्मे़ॽआङ् आङ्गाॽओ नुःक्खे़म् त्ये़म्मे़ॽ, खे़ब्याङ् आम्भा कन् सिलोओए यहवे दाङ्बाल्ले़ कुदगि खिनिॽ लागि आङ्गाॽ तॽयाःन्सोन् के़सुङ् पिनिङ्ॽ॥” 9 खे़ब्याङ् खे़न् मनाहाॽ मे़बेआङ् खे़न् लाजेन् कुले़ःम् ताक्मे़गन्दे़, हे़क्क्याङ् ये़क्यक् ये़क्यक् ओसेःन्धाङ् मे़जोगु खे़ब्याङ् कुलक् नुसि मे़जोगुआङ् के़रे़क्ले़ कुयाःम्बेओ मे़बाःत्तु मे़जे़क्खु, हे़क्क्याङ् यहोसुरे़ॽओ सिलोओ के़ने़बा थक्सुबा ने़त्ना साःङ्गाहिम्मो मे़नुःक्खे़॥ 10 हे़क्क्याङ् यहोसुःल्ले़ यहवे दाङ्बे़ल्ले़ कुदगि सिलोओ खे़ङ्हाॽरे़ खुन्छिॽ तॽयाःन्सोन् के़सु, हे़क्क्याङ् हाबा खे़प्मोए यहोसुःल्ले़ खे़ङ्हाॽरे़ खुन्छिॽ लक् कुइसिक् इस्राइलिहाॽ खे़न् लाजेन् फःक्खु पिरुसिरो॥ बेन्यामिनरे़ कुलक् 11 बेन्यामिनरे़ कुधाःक्हाॽरे़ खुन्छिॽ हिम्सयङ् कुइसिक् अक्खेलॽरिक् तॽयाःन्सोन् थ्ये़॥ खे़ङ्हाॽरे़ खुन्छिॽ लक्किल्ले़ इःन्दोन् यहुदा नु योसेफरे़ खुन्छिॽ थाःक्हाॽरे़ लुम्मो थ्ये़॥ 12 खे़ङ्हाॽरे़ खुन्छिॽ थाङ्गे़त् पिसाङ्बा इःन्दोन् यर्दनलाम् हेःक्सिङ्ङाङ् यरिहो निःत्ताङ्लाम् थाङ्गे़त् पिसाङ् पेर, नाम्धा पिसाङ्बा कोःक्मा फाङ्जङ् लाजेॽओ थोःक्सिङ्ङाङ् बेथ-आवनबा मुरे़क् खारे़क् थेआङ् के़होप्पादे़न्नो के़रे़आङ् ने़स्से़॥ 13 खे़न् इःन्दोन् खे़प्मोलाम् लुज थारिक् (कन् बेथेल मे़मे़त्तु) खे़प्मोबा लाङ्गे़त् ले़प्माङ् के़रे़आङ् योसमा बेथ-होरोनबा लाङ्गे़त् ले़प्माङ्बा कोःक्मा फाङ्जङ्लाम् अतारोत-अद्दार थारिक् थ्ये़आङ् ने़स्से़॥ 14 हे़क्क्याङ् खे़प्मोलाम् खे़न् इःन्दोन् नाम्धा ले़प्माङ् पेआङ् लाङ्गे़त् ले़प्माङ् इरे़र बेथ-होरोन तगाङ्बा लाङ्गे़त् ले़प्माङ्बा कोःक्मालाम् यहुदारे़ कुमुॽइदाङ्साहाॽरे़ खुन्छिॽ किर्यत-बाल थारिक् (आम्भा कन् किर्यत-यारिम मे़मे़त्तु) के़रे़आङ् ने़स्से़॥ नाम्धा पिसाङ्बा इःन्दोन् हाबा कन्लो॥ 15 लाङ्गे़त् ले़प्माङ्बा इःन्दोन् किर्यत-यारिम कुयाओलाम् नाम्धा ले़प्माङ् पेआङ् नेप्तोहबा च्वाःत् वाबुन्दाक्वाहाॽओ लःन्दे़आङ् ने़स्से़॥ 16 खे़न् इःन्दोन् बेन-हिन्नोमबा ने़ने़बादे़न्निल्ले़ कुदगि नु रपाइबा ने़ने़बादे़न्निल्ले़ थाङ्गे़त् ले़प्माङ्बा कोःक्माल्ले़ नासमा कुयाओ थासिङ् हे़क्क्याङ् यबुसि ये़क्यक् लाङ्गे़त् ले़प्माङ्बा हिन्नोमबा ने़ने़बादे़न्नोलाम् यो थासिङ्ल एन-रोगेल थासिङ्ङाङ् ने़स्से़॥ 17 खे़न् थाङ्गे़त् ले़प्माङ् खिङ्सिङ्ङाङ् एन-सेमेस ले़प्माङ् पेआङ् अदुम्मिमबा थाम्माङ्बाल्ले़ कुदगाङ् गलिलोत लःन्दे़र रुबेन हिम्सयङ्बा बोहनरे़ कुलुङ्ङो थ्ये़आङ् ने़स्से़॥ 18 खे़प्मोलाम् खे़न् बेथ-अराबाबा कुदोःप्मा थाङ्गे़त् ले़प्माङ् के़रे़आङ् अराबाओए थ्ये़आङ् ने़स्से़॥ 19 खे़न् इःन्दोन् याम्मो बेथ-होग्लाबा थाङ्गे़त् कुयान् लस्सुआङ् यर्दन नाम्धा ले़प्माङ् के़ने़बा युम्लाःक्खाङ् वरःङ्ङोबा थाङ्गे़त् ले़प्माङ् कुयाओ नुबे़आङ् ने़स्से़॥ लाङ्गे़त् ले़प्माङ्बा इःन्दोन् हाबा कन्लो॥ 20 खे़ल्ले़ नाङ्गे़न् पिसाङ्बा इःन्दोःन्ग यर्दन वहःङ्ङिन्ने़ पोःक्खे़॥ बेन्यामिनरे़ कुधाःक्हाॽरे़ खुन्छिॽ लक्खोमा लक्किल्ले़ के़रे़क् पिसाङ्बा इःन्दोहाॽ हाबा कन्हाॽरो॥ 21 बेन्यामिनरे़ कुधाःक्हाॽ खे़ङ्हाॽरे़ खुन्छिॽ हिम्सयङ्हाॽ कुइसिक् मे़घोसुबा ये़क्यक्हाॽ हाबा कन्हाॽरो॥ यरिहो, बेथ-होग्ला, एमेक-कसिस, 22 बेथ-अराबा, समारैम, बेथेल, 23 अब्बिम, पारा, ओप्रा, 24 कपर-अमोनि, ओप्नि नु गेबा॥ खे़प्मोबा पाङ्भेॽहाॽनु सोसोरिक् थिबोङ्ङाङ् ने़त्छि ये़क्यक्हाॽ ने़स्से़॥ 25 गिबोन, रामा, बेरोत, 26 मिस्पा, कपिरा, मोसा, 27 रेकेम, यिर्पल, तरला, 28 सेलाह, एलेप, यबुसि ये़क्यक् (इग्र यरुसले़म), गिबा नु किर्यत-यारिम॥ खे़प्मोबा पाङ्भेॽहाॽनु सोसोरिक् थिबोङ्ङाङ् लिसि ये़क्यक्हाॽ ने़स्से़रो॥ बेन्यामिनरे़ कुमुॽइदाङ्साहाॽरे़ खुन्छिॽ लक्खोमान् खे़ङ्हाॽरे़ खुन्छिॽ हिम्सयङ्हाॽरे़ लागि हाबा कन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.