यहोसु 17 - लिम्बुनाम्धा ले़प्माङ् मनस्सेरे़ खोसुबा ते़ङ्गप् 1 योसेफरे़ कुस्सा तुम्बा मनस्सेरे़ कुभा कुधाःक्हाॽ यर्दन नाम्धा पिसाङ्बा लाजेॽबा लक्किन् मे़बिरुसिआङ् ने़स्से़॥ गिलादरे़ कुम्बा माकिर मनस्सेरे़ कुस्सा तुम्बे़न् लत्छा थक्ले़ङ् वये़॥ कल्ले़चोगुल्ले़ यर्दन नाङ्गे़न् ले़प्माङ् गिलाद नु बासान ते़ङ्गप्हाॽ खुने़ॽ मे़बिरुआङ् ने़स्से़॥ 2 यर्दन नाम्धा पिसाङ्बा ते़ङ्गप्पिन् के़नम्बा मनस्सेरे़ कुहिम्सयङ्हाॽ मे़बिरुसिआङ् ने़स्से़॥ खे़न् हिम्सयङ्हाॽ अबिएजेर, हेलेक, अस्रिएल, सकेम, हेपेर नु समिदारे़ कुमुॽइदाङ्सा मे़वये़॥ खे़ङ्हाॽ योसेफरे़ कुस्सा, कुम्मे़न्छाॽ नु खुन्छिॽ आप्फेक् आप्फेक् हिम्सयङ्ङोबा लाम्लोबा मना मे़वये़रो॥ 3 कर मनस्सेरे़ कुस्सा माकिर, माकिररे़ कुस्सा गिलाद, गिलादरे़ कुस्सा हेपेर, हेपेररे़ कुस्सा सलोफाद, सलोफादरे़ कुस्सा मे़न्छुमारक् मे़वये़॥ खे़ल्ले़ कुस्सा मे़न्छुमाहाॽरे़ खुन्छिॽ मिङ् अक्तङ्बा वये़—महला, नोआह, होग्ला, मिल्का नु तिर्सा॥ 4 निङ्वाॽफुसाम्बा एलाजार, नुनरे़ कुस्सा यहोसु नु लाम्लोबाहाॽरे़ खुन्छिॽ तगि खे़ङ्हाॽ मे़द्ये़आङ् अक्खे मे़बाःत्तु, “आनिगे फुॽनुसाॽहाॽरे़ खुन्छिॽ लुम्मोए आनिगे लक्खोमान् मे़बिरिगे़र फाॽआङ् यहवे दाङ्बे़ल्ले़ मोसान् इङ्जाङ् पिरुआङ् वये़॥” यहवे दाङ्बे़ल्ले़ कुइङ्जाङ् कुइसिक् यहोसुःल्ले़ खे़ङ्हाॽ खुन्छिॽ फुॽनुसाॽहाॽनु सोरिक् लक्खोमा पिरुसि॥ 5 खे़ब्याङ् मनस्सेरे़ यर्दन नाधाःम्बिबा गिलाद लाजेन् नु बासान लाजेन् सोसोरिक् थिबोङ्लक् खोसु, 6 थेआङ्भे़ल्ले़ मनस्सेरे़ कुधाःक्कोबा मे़न्छुमा साहाॽरे़आङ् खे़ल्ले़ कुस्सा ये़म्बित्छाहाॽरे़ खुन्छिॽ लुम्मो लक्मे़घोसुआङ् ने़स्से़॥ गिलाद लाजेन् मनस्सेरे़ के़नम्बा कुस्साहाॽरे़ खुन्छिॽ लक्को थ्ये़रो॥ 7 आल्ल मनस्सेरे़ कुलक्कोबा इःन्दोन् आसेरलाम् सकेम नाङ्गे़न् पिसाङ्बा मिक्मतात थारिक् ने़स्से़॥ खे़न् इःन्दोन् लाङ्गे़त् ले़प्माङ् पेआङ् एन-तप्पुहबा यक्युङ्बाहाॽरे़ खुन्छिॽ ते़न्नो थारिक् के़रे़आङ् ने़स्से़॥ 8 तप्पुहिहाॽरे़ खुन्छिॽ लाजेन् मनस्सेरे़ कुलक्को थ्ये़, कर मनस्सेरे़ कुइःन्दोओ के़युङ्बा तप्पुह ये़क्यक्किन् एफ्राइमरे़ कुलक्को थ्ये़॥ 9 हे़क्क्याङ् खे़न् इःन्दोन् लाङ्गे़त् ले़प्माङ् कनाबा यहःङ्ङो थारिक् पेआङ् ने़स्से़॥ मनस्सेरे़ कुभा कुये़क्यक्हाॽ एफ्राइमरे़ कुलक्को थ्ये़, कर मनस्सेरे़ कुइःन्दोन् वहःङ्ङिल्ले़ थाङ्गे़त् ले़प्माङ् ने़स्से़, हे़क्क्याङ् लुम्बा वरःङ्ङो खे़न् पेआङ् नुबे़आङ् ने़स्से़॥ 10 लाङ्गे़त् ले़प्माङ् एफ्राइमरे़ हे़क्क्याङ् थाङ्गे़त् ले़प्माङ् मनस्सेरे़ कुलक् ने़स्से़॥ मनस्सेरे़ कुइःन्दोन् लुम्बा वरःङ्ङो पेआङ् ने़स्से़, हे़क्क्याङ् खे़न् थाङ्गे़त् ले़प्माङ् आसेर नु नाङ्गे़न् ले़प्माङ् इस्साखार थारिक् के़रे़आङ् ने़स्से़॥ 11 इस्साखार नु आसेरओ मनस्सेरे़ कम्म्याक् खोसु—बेथ-सान नु खे़प्मोबा पाङ्भेॽहाॽ, यिबलाम नु खे़प्मोबा पाङ्भेॽहाॽ हे़क्क्याङ् दोरबा (दोरे़ङ्ग वरःङ्ङिल्ले़ कुया), एन्दोरबा, तानाकबा नु मगिद्दोबा यक्युङ्बाहाॽ नु खे़ङ्हाॽरे़ खुन्छिॽ पाङ्भेॽहाॽ॥ 12 हे़क्केसाङ् मनस्सेरे़ कुमुॽइदाङ्साहाॽरे़ खे़न् ये़क्यक्हाॽओबा यक्युङ्बाहाॽ नाःप्मादेमा मे़न्छुक्तुसिन्, थेआङ्भे़ल्ले़ खे़न् कनानिहाॽरे़ खे़न् लाजेॽओ युङ्मा निङ्वाॽ मे़जोगुआङ् वये़॥ 13 कर मे़युङे़र मे़बेःल्ले़ इस्राइलिहाॽ मुक्साम्बा मे़बोःक्खे़आङ् खे़ङ्हाॽ योक् चोःक्मा याःम्बक्को फम्मा मे़हेःक्तुसि, कर खक्पे़त् मे़न्नाःत्तुन् मे़न्देसुसिन्लो॥ एफ्राइम नु नाम्धाबा मनस्सेरे़ यरिक् लाजेॽ नाःक्ते़सु 14 योसेफरे़ कुमुॽइदाङ्साहाॽरे़ यहोसुन् अक्खे मे़मे़त्तु, “यहवे दाङ्बे़ल्ले़ आनिगे आल्लो थे़म्बा यरिक् मुॽइसाम् पिरिगे़बाल्ले़ चोगुल्ले़ आनिगे खानिःत्तो यरिक् योरिगे़ के़लॽबा के़निसुसाङ् आनिगे लक्खोमारे़ लागि खे़ने़ॽ थेआङ् लत्छारक् कुलक् आनिगे याप्मि के़बे़रे़बे?” 15 खे़ब्याङ् यहोसुःल्ले़ खे़ङ्हाॽ मे़त्तुसि, “खिनिॽ खानिःत्तो यरिक् के़योरि, हे़क्क्याङ् एफ्राइमबा कोःक्मा फाङ्जङ्बा लाजेन् खिनिॽ लाजेन् चिहुॽहुॽ लॽने़भग्र परिज्जि नु रपाइहाॽरे़ खुन्छिॽ लाजेॽबा ताम्भुङ्ङो पेगे़म्मे़ॽआङ् खिनिॽ लागि फाःत्ले़ःक्खे़म्मे़ॽ॥” 16 योसेफरे़ कुमुॽइदाङ्साहाॽरे़ मे़बाःत्तु, “कोःक्मा फाङ्जङ्बा लाजेॽओ आनिगे मे़हत्तिगे़न्॥ हे़क्क्याङ् बेथ-सान नु खे़प्मोबा पाङ्भेॽहाॽओ के़युङ्बाहाॽरे़ खे़ब्याङ् यिजरेलबा ने़ने़बादे़न्नो के़युङ्बा के़रे़क् कनानिहाॽरे़ फे़न्जेॽ अन्लाधाहाॽ मे़गत्तु॥” 17 खे़ब्याङ् यहोसुःल्ले़ योसेफरे़ कुहिम्सयङ्, इग्र एफ्राइम नु मनस्सेन् अक्खे मे़त्तुसि, “खिनिॽ यरिक् के़वयिॽ हे़क्क्याङ् के़धुम्बाआङ् के़जोगिॽ॥ खिनिॽ लागि कुलक् थिक्लक् मेःन्, 18 कर कोःक्मा फाङ्जङ् लाजेॽबा ताम्भुङ्ङिन्नाङ् खिनिॽइन् पोङ्ॽ॥ खे़प्मोबा सिङ्बुङ्हाॽ ले़ःक्खे़म्मे़ॽ, हे़क्क्याङ् खे़ल्ले़ कुया कुदिङ्बा लाजेःन्नाङ् खिनिॽइन्ने पोङ्ॽ॥ खे़न् कनानिहाॽरे़ फे़न्जेॽ अन्लाधाहाॽ मे़गत्तुॽ खम्भ्याङ् खे़ङ्हाॽ के़धुम्बा मे़जोक् हे़क्केसाङ् खिनिॽ खे़ङ्हाॽ नाःप्मादेमा के़सुक्तुम्सिम्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.