यहोसु 16 - लिम्बुएफ्राइम नु नाम्धा ले़प्माङ् मनस्सेरे़ खुन्छिॽ लाजेॽ 1 योसेफरे़ कुमुॽइदाङ्हाॽरे़ मे़घोसुबा लक्किन् हाबा कन्लो—खे़ल्ले़ कुइःन्दोन् यरिहो नाङ्गे़न् ले़प्माङ्बा च्वाःत्तिन्, इग्र यरिहो निःत्ताङ्लाम् हेःक्सिङ्ङाङ् थाम्माङ् लाम् पेःक्मा मुरे़क् खारे़क् थेआङ् के़होःप्पादे़न् पोःक्खे़र बेथेलबा कोःक्मा फाङ्जङ्बा लाजेॽ थारिक् के़रे़आङ् ने़स्से़॥ 2 याम्मो बेथेललाम् लुजओ लस्सुआङ् अरकिहाॽरे़ खुन्छिॽ इःन्दोओबा अतारोत थारिक्के के़रे़आङ् ने़स्से़॥ 3 खे़ब्याङ् नाम्धा ले़प्माङ् यो थासिङ्ङाङ् यल्पेतिबा इःन्दो पोःक्खे़र योसमा बेथ-होरोनरे़ कुया पोःक्खे़र पे हे़क्क्याङ् गेजेर थारिक् के़रे़आङ् लुम्बा वरःङ्ङो नुबे़आङ् ने़स्से़॥ 4 कम्भलॽरिक् योसेफरे़ ने़त्छि कुमुॽइदाङ्सा, मनस्से नु एफ्राइमरे़ खुन्छिॽ लक्खोमान् खोसे़त्छुरो॥ एफ्राइमरे़ कुलक् 5 एफ्राइमरे़ कुमुॽइदाङ्साहाॽरे़ खुन्छिॽ इःन्दोन् खे़ङ्हाॽरे़ खुनिॽ हिम्सयङ् कुइसिक् हाबा कन्लो— खे़ङ्हाॽरे़ खुन्छिॽ लक्किल्ले़ नाङ्गे़न् पिसाङ्बा इःन्दोन् अतारोत-अद्दारलाम् नाहाङ्बा बेथ-होरोन पोःक्खे़र 6 लुम्बा वरःङ्ङो थारिक् ने़स्से़॥ खे़न् इःन्दोन् थाङ्गे़त् मिक्मतात पोःक्खे़आङ् नाङ्गे़न् ले़प्माङ् हिसिङ्ङाङ् तानत-सिलो के़रे़ खे़ब्याङ् कल्ले़ कुया कुया पोःक्खे़र यानोह थारिक् लस्सुआङ् ने़स्से़॥ 7 खे़ब्याङ् खे़न् यानोहलाम् अतारोत नु नारा थारिक् यो थ्ये़र यरिहो के़रे़आङ् यर्दन लःन्दे़आङ् ने़स्से़॥ 8 खे़न् इःन्दोन् तप्पुहलाम् नाम्धा ले़प्माङ् पेआङ् कनाबा याक्साङ्वा थारिक् थासिङ्ङाङ् लुम्बा वरःङ्ङो नुबे़आङ् ने़स्से़॥ एफ्राइमबा थाःक्हाॽरे़ खुन्छिॽ लक्खोमान् खे़ङ्हाॽरे़ खुन्छिॽ हिम्सयङ् कुइसिक् हाबा कन्लो॥ 9 कन्नुःल्ले़ वेॽ, मनस्सेरे़ कुमुॽइदाङ्हाॽरे़ खुन्छिॽ लक्खोमालाम् एफ्राइमरे़ कुमुॽइदाङ्साहाॽरे़ खुन्छिॽ लागि मे़से़न्दुआङ् ने़स्से़बान् के़रे़क् ये़क्यक्हाॽ नु खे़प्मोबा पाङ्भेॽहाॽआङ् ने़स्से़॥ 10 कर खे़ङ्हाॽरे़ गेजेरओ के़युङ्बा कनानिहाॽ मे़न्नाःत्तुसिन्॥ आइन्बा ये़न् थारिक् कनानिहाॽ एफ्राइमबा मनाहाॽरे़ खुन्छिॽ लुम्मो मे़युङ्, कर खे़ङ्हाॽरे़ योक् पोङ्माआङ् याःम्बक् चोःक्मा के़बोङ्बा पोःक्खे़आङ् वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.