यहोसु 15 - लिम्बुयहुदाःल्ले़ खोसुबा ते़ङ्गप् 1 यहुदा थाःक्कोबाहाॽरे़ खुन्छिॽ लक्किन् खुन्छिॽ हिम्सयङ् कुइसिक् एदोमबा इःन्दो थारिक्, हे़क्क्याङ् लाङ्गे़त् पिसाङ् सिनबा मुरे़क् खारे़क् थेआङ् के़होःप्पादे़न् थारिक् ने़स्से़रो॥ 2 खे़ङ्हाॽरे़ खुन्छिॽ लाङ्गे़त् ले़प्माङ्बा इःन्दोन् युम्लाःक्खाङ् वरःङ्ङिल्ले़ लाङ्गे़त् ले़प्माङ्बा योसमा कुयाओनु हेःक्सिङ्ङाङ् ने़स्से़॥ 3 खे़न् अक्रब्बिमबा थाम्माङ्ङो लाङ्गे़त् ले़प्माङ्लाम् पोःक्खे़आङ् सिने़न् लस्सुर कादेस-बर्ने लाङ्गे़त्लाम् थाम्माङ् हिसिङ् हे़क्क्याङ् हेस्रोने़न् लस्सुर अद्दार थारिक् थाम्माङ् हिसिङ्ङाङ् कर्काओ इरे़र नुःक्खे़आङ् ने़स्से़॥ 4 खे़प्मोलाम् खे़न् इःन्दोन् अज्मोने़न् लस्सुर मिस्रबा वहःङ्ङो लःन्दे़आङ् ने़स्से़॥ खे़न् इःन्दोन् लुम्बाङ् वरःङ्ङो नुबे़आङ् ने़स्से़॥ खे़ल्ले़ लाङ्गे़त् ले़प्माङ्बा कुइःन्दोन् आम्भा कन्लो॥ 5 नाङ्गे़न् पिसाङ्बा इःन्दोन् युम्लाःक्खाङ् वरःङ् यर्दनरे़ कुनुप्मो थारिक्के ने़स्से़॥ थो थाङ्गे़न् पिसाङ्बा इःन्दोन् यर्दनरे़ वहःङ् कुनुप्मो युम्लाःक्खाङ् वरःङ्ङिल्ले़ थोसमा कुयाओ हेःक्सिङ्ङाङ्, 6 बेथ-होग्ला थोःक्सिङ् हे़क्क्याङ् बेथ-अराबालाम् थाङ्गे़त् लस्सुआङ् ने़स्से़, खे़ब्याङ् खे़न् इःन्दोन् रुबेन थाःक्कोबा बोहन लुङ्ङो थारिक् थोःक्सिङ् पेआङ् ने़स्से़॥ 7 खे़न् इःन्दोन् आकारबा ने़ने़बादे़न्लाम् दबिर थारिक् थोःक्सिङ् पेआङ् ने़स्से़, हे़क्क्याङ् कम्भलॽरिक् थाङ्गे़त् ले़प्माङ्, वहःङ् लाङ्गे़त् ले़प्माङ् के़ने़बा अदुम्मिमबा थाम्माङ्ङो कुदोःप्मा गिलगाल ले़प्माङ् पेआङ् ने़स्से़॥ खम्भ्याङ् खे़न् इःन्दोन् एन-सेमेस मे़प्मनाबा वरक्किल्ले़ कुया कुया पोःक्खे़र एन-रोगेलओ लःन्दे़आङ् ने़स्से़॥ 8 याम्मो हाबा खे़न् इःन्दोन् बेनहिन्नोमबा ने़ने़बादे़न्नो पोःक्खे़र यबुसि इग्र, यरुसले़म लाङ्गे़त् ले़प्माङ् थाम्माङ् पेआङ् ने़स्से़॥ हे़क्क्याङ् खे़न् इःन्दोन् हिन्नोमबा ने़ने़बादे़न् नाम्धा ले़प्माङ् के़ने़बा नु रपाइहाॽरे़ खुन्छिॽ ने़ने़बादे़न्निल्ले़ नासमा कुया ले़प्माङ् थाङ्गे़त् ले़प्माङ्बा कोःक्माल्ले़ कुजङ्ङो थारिक्के के़रे़आङ् ने़स्से़॥ 9 आम्भा खे़न् इःन्दोन् कोःक्माल्ले़ कुजङ्ङोलाम् नेप्तोह मे़प्मनाबा च्वाःत् वाबुन्दाक्वाओ के़रे़आङ् एप्रोन कोःक्मा फाङ्जङ्ङोबा ये़क्यक्हाॽओ थारिक् पेआङ् ने़स्से़॥ याम्मो खे़न् इःन्दोन् बाला, इग्र किर्यत-यारिम थारिक् के़रे़आङ् ने़स्से़॥ 10 बालालाम् खे़न् इःन्दोन् सेइर कोःक्मा फाङ्जङ् थारिक् नाम्धा ले़प्माङ् हिसिङ्, हे़क्क्याङ् यारिम थे़गुओ (खे़न् कसालोनआङ् मे़मे़त्तुॽ) थाङ्गे़त् कुया पोःक्खे़र बेथ-सेमेस थारिक् थासिङ्ङाङ् तिम्ना लःन्दे़आङ् ने़स्से़॥ 11 खे़न् इःन्दोन् याम्मो एक्रोन थाङ्गे़त् ले़प्माङ् के़रे़आङ् ने़स्से़, हे़क्क्याङ् याम्मो सिक्करोनओ के़रे़आङ् बाला कोःक्मान् लस्सुआङ् यब्नेलओ लःन्दे़र खे़न् इःन्दोन् लुम्बाङ् वरःङ्ङिल्ले़ कुयाओ थारिक् के़रे़आङ् ने़स्से़॥ 12 नाम्धा पिसाङ्बा इःन्दोःङ्ग लुम्बाङ् वरःङ्ङिल्ले़ कुयाःन्ने पोःक्खे़॥ यहुदाःल्ले़ कुमुॽइदाङ्साहाॽरे़ खुन्छिॽ हिम्सयङ् कुइसिक् के़रे़क् पिसाङ्बा इःन्दोहाॽ हाबा कन्हाॽरो॥ कालेबरे़ हेब्रोन नु दबिरे़न् नाःन्दुसि ( खालो १:११-१५ ) 13 यहोसुःल्ले़ यहवे दाङ्बालाम् इङ्जाङ् खोसुबा कुइसिक् खुने़ॽ यपुन्नेरे़ कुस्सा कालेबे़न् यहुदाओ कन् लक्किन् पिरु, इग्र अनाकरे़ कुधाःक्थे़बा अर्बारे़ कुये़क्यक्, किर्यत-अर्बा, खे़न् हेब्रोनआङ् मे़मे़त्तु॥ 14 सुम्सि अनाकिहाॽ, सेसै, अहिमन नु तल्मै अनाकबा हिम्सयङ्हाॽ कालेबरे़ खे़प्मोलाम् लःत्तुदेसुसि॥ 15 खे़प्मोलाम् खुने़ॽ दबिर के़युङ्बाहाॽरे़ खुन्छिॽ तक्ले़ङ्वाओ थक्ते़र पे॥ तगिग दबिररे़ कुमिङ् किर्यत-सेपेर ने़स्से़॥ 16 कालेबरे़ पाःत्तु, “हाःत्ले़ किर्यत-सेपेरे़न् नाःन्दुआङ् हुक्काप् चोगुॽ, खे़न् आङ्गाॽ आस्सा मे़न्छिन् अक्सान् ते़न्धाम् मेःक्खिम् मे़प्मा पिरुङ्ॽ॥” 17 खे़ब्याङ् कालेबरे़ कुन्साॽ कनजरे़ कुस्सा ओत्निएलरे़ खे़न् हुक्काप् चोगु हे़क्क्याङ् कालेबरे़ कुस्सा मे़न्छिन् अक्साःन्नु खे़न् ते़न्धाम् मेःक्खिम् मे़त्तु॥ 18 थिक्यान् अक्सान् ओत्निएलरो पेबा ये़म्मो खुने़ॽ कुम्बा लत्छा लाजेॽ नाःक्मारे़ लागि खे़न् हुसु॥ आल्ल अक्सान् खुने़ॽ कुअदङ्ङोलाम् यो थासिङ् हे़क्केःल्ले़ कालेबरे़ खुने़ॽ मे़त्तु, “खे़ने़ॽ थे चाहा के़जोक्?” 19 खुने़ॽ मे़त्तु, “आङ्गाॽ लत्छा मिक्पेॽ पिराङ्ङे़ॽ॥ खे़ने़ॽ आङ्गाॽ नेगेवओ लाजेॽ के़बिराङ्बे़ल्ले़ चोगुल्ले़ आल्ल आङ्गाॽ च्वाःत् वाबुन्दाक्वाहाॽआङ् पिराङ्ङे़ॽ॥” खे़ब्याङ् कालेबरे़ खुने़ॽ थोसमा नु योसमा ने़प्माङ् वाबुन्दाक्वाहाॽ पिरुरो॥ यहुदाबा ये़क्यक्हाॽ 20 यहुदा थाःक्हाॽरे़ खुन्छिॽ हिम्सयङ् कुइसिक् खे़ङ्हाॽरे़ खुनिॽ खोमा लक्किन् हाबा कन्लो— 21 नेगेव साॽरिक् यो ले़प्माङ् एदोमरे़ कुइःन्दो पिसाङ् यहुदारे़ कुधाःक्कोबा नासमा कुयाओ ले़प्माङ्बा ये़क्यक्हाॽ हाबा कन्हाॽए ने़स्से़—कब्सेल, एदेर, यागुर, 22 किना, दिमोना, अदादा, 23 केदेस, हासोर, यित्नान, 24 जिप, तेलेम, बालोत, 25 हासोर-हादत्ता, किर्योत-हेस्रोन (खे़न् हासोर), 26 अमाम, सेमा, मोलादा, 27 हसर-गद्दा, हेस्मोन, बेथ-पालेत, 28 हसर-सुआल, बेर्सेबा, बिज्योत्या, 29 बाला, इम, एसेम, 30 एल्तोलद, कसिल, होर्मा, 31 सिक्लग, मदमन्ना, सन्सन्ना, 32 लबाओत, सिल्हिम, ऐन नु रिम्मोन॥ खे़ङ्हाॽरे़ खुन्छिॽ पाङ्भेॽहाॽनु सोसोरिक् के़रे़क्ले़ निबोङ्ङाङ् फाङ्सि ये़क्यक्हाॽआङ् ने़स्से़॥ 33 थे़गुगुबादे़न्नो के़ने़बा ये़क्यक्हाॽग—एस्तोल, सोरा, अस्ना, 34 जानोह, एन-गन्निम, तप्पुह, एनाम, 35 यर्मुत, अदुल्लाम, सोको, आजेका, 36 सारैम, अदितैम, गदेरा नु गेदेरोतेम॥ कप्मो के़ने़बा पाङ्भेॽहाॽनु सोसोरिक् थिबोङ्ङाङ् लिसि ये़क्यक्हाॽआङ् ने़स्से़॥ 37 सनान, हदासा, मिग्दल गाद, 38 दिलान, मिस्पा, योक्तेल, 39 लाकिस, बोस्कत, एग्लोन, 40 कोब्बन, लहमास, कितलिस, 41 गदेरोत, बेथ-दागोन, नामा नु मक्केदा॥ कप्मोबा पाङ्भेॽहाॽनु सोसोरिक् थिबोङ्ङाङ् तुक्सि ये़क्यक्हाॽ ने़स्से़॥ 42 लिब्ना, एतेर, आसान्, 43 यिप्ताह, अस्ना, नसिब, 44 किलाह, अक्जिब नु मारेसा॥ कप्मोबा पाङ्भेॽहाॽनु सोसोरिक् फाङ्सि ये़क्यक्हाॽ ने़स्से़॥ 45 खे़प्मोबा ये़क्यक्हाॽ नु पाङ्भेॽहाॽ सोसोरिक् एक्रोन, 46 एक्रोनलाम् नाम्धा ले़प्माङ् अस्दोद निःत्ताङ्बा के़रे़क् ये़क्यक्हाॽ, खे़प्मोबा पाङ्भेॽहाॽनु सोसोरिक्, 47 अस्दोद, खे़प्मोबा ये़क्यक्हाॽ नु पाङ्भेॽहाॽ सोसोरिक्, गाजा, खे़प्मोबा ये़क्यक्हाॽ नु पाङ्भेॽहाॽ सोसोरिक्, मिस्रबा वहःङ् नु लुम्बाङ् वरःङ् थारिक् के़रे़आङ् ने़स्से़॥ 48 कोःक्मा फाङ्जङ् लाजेॽओबा ये़क्यक्हाॽग—समिर, यत्तिर, सोको, 49 दन्ना, किर्यत-सन्ना (खे़न् दबिर), 50 अनाब, एस्तमोह, अनिम, 51 गोसेन, होलोन नु गिलोह॥ खे़प्मोबा पाङ्भेॽहाॽनु सोसोरिक् थिबोङ्ङाङ् थिक् ये़क्यक्हाॽ ने़स्से़॥ 52 अरब, दुमा, एसान, 53 यानुम, बेथ-तप्पुह, अपेका, 54 हुम्ता, किर्यत-अर्बा (खे़न् हेब्रोन) नु सिओर॥ खे़प्मोबा पाङ्भेॽहाॽनु सोसोरिक् फाङ्सि ये़क्यक्हाॽ ने़स्से़॥ 55 माओन, कर्मेल, जिप, युत्ता, 56 यिजरेल, योक्दाम, जानोह, 57 कैन, गिबा नु तिम्ना॥ खे़प्मोबा पाङ्भेङ्हाॽनु सोसोरिक् थिबोङ् ये़क्यक्हाॽ ने़स्से़॥ 58 हल्हुल, बेथ-सर, गदोर, 59 मारात, बेथ-अनोत नु एल्तकोन॥ खे़प्मोबा पाङ्भेॽहाॽनु सोसोरिक् तुक्सि ये़क्यक्हाॽ ने़स्से़॥ 60 किर्यत-बाल (खे़न् किर्यत—यारिम) नु रब्बा॥ खे़प्मोबा पाङ्भेॽहाॽनु सोसोरिक् ये़क्यक् ने़त्छि ने़स्से़॥ 61 मुरे़क् खारे़क् थेआङ् के़होप्पा ये़ःङ्घादे़न्नो—बेथ-अराबा, मिद्दिन नु सकाका, 62 निब्सान, युम् ये़क्यक् नु एन-गदि॥ खे़प्मोबा पाङ्भेॽहाॽनु सोसोरिक् तुक्सि ये़क्यक् ने़स्से़॥ 63 यहुदाःल्ले़ कुमुॽइदाङ्साहाॽरे़ यरुसले़म के़युङ्बा यबुसिहाॽ नाःप्मादेमा मे़न्छुक्तुसिन्॥ खे़न् यबुसिहाॽ आइन्बा ये़न् थारिक् यरुसले़मबा यहुदाःल्ले़ कुमुॽइदाङ्साहाॽनु सोरिक् खे़प्मो मे़युङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.