यहोसु 14 - लिम्बुयर्दन नाम्धा पिसाङ्बा लाजेॽ 1 निङ्वाॽफुसाम्बा एलाजार, नुनरे़ कुस्सा यहोसुन् नु इस्राइलबा थाःक्लाम्लोबाहाॽरे़ खे़ङ्हाॽ मे़भःक्खु मे़बिरुसिबा कुइसिक् इस्राइलिहाॽरे़ कनान लाजेॽओ लक्खोमा युक् मे़जोगुबादे़न्हाॽ हाबा कन्हाॽरो॥ 2 यहवे दाङ्बे़ल्ले़ मोसान् लाम्बा खे़न् फाङ्सिआङ् कुभ्रे़ःङ् थाःक्हाॽरे़ खुन्छिॽ लागि इङ्जाङ् पिरुबा कुइसिक् तॽयाःन्सोन् के़सुआङ् खे़ङ्हाॽरे़ खुन्छिॽ लक्हाॽ फःक्खु॥ 3 ने़त्छिआङ् कुभ्रे़ःङ् थाःक्हाॽग यर्दन नाधाःम्बि नाङ्गे़न् पिसाङ् मोसाःल्ले़ लक्खोमा पिरुसिआङ्ङे ने़स्से़, कर खे़ङ्हाॽओ ले़बिहाॽग थे़मा लक्काङ् पिरुसिबा होःप्ते़, 4 थेआङ्भे़ल्ले़ योसेफरे़ कुस्साहाॽए, मनस्से नु एफ्राइमरे़ खुन्छिॽ ने़त्छि थाःक् मे़वये़॥ ले़बिहाॽ युङ्मारे़ लागि ये़क्यक्हाॽ नु खुन्छिॽ थक्सा चाराम्मादे़न्ले़ लागि नु चिगक्वाहाॽरे़ लागिरक् लाजेॽ मे़बिरुसिआङ् ने़स्से़, वेॽ लक् मे़म्बिसिङ्ङे मे़वये़॥ 5 यहवे दाङ्बे़ल्ले़ मोसान् इङ्जाङ् पिरुआङ् वये़बा कुइसिःक्के, इस्राइलिहाॽरे़ मे़जोगु हे़क्क्याङ् लाजेन् मे़भःक्खुरो॥ कालेबरे़ हेब्रोने़न् खोसु 6 खे़ब्याङ् यहुदाबा मनाहाॽ गिलगालओ यहोसुओ मे़द्ये़, हे़क्क्याङ् कनज्जि यपुन्नेरे़ कुस्सा कालेबरे़ खुने़ॽ मे़त्तु, “कादेस-बर्नेओ खे़ने़ॽ नु आङ्गाॽ आयाःम्बेओ निङ्वाॽफुमाङ्ङिल्ले़ कुमना मोसान् यहवे दाङ्बे़ल्ले़ मे़त्तुबा पाःन्निन् खे़ने़ॽ निङ्वाॽ के़घोसुआङ्ङे वाॽ॥ 7 यहवे दाङ्बे़ल्ले़ कुसे़वारोबा मोसाःल्ले़ कादेस-बर्नेलाम् कन् लाजेन् थोःम्मारे़ लागि पाङ्घाङ्ङिल्ले़ आङ्गाॽ तङ्बे लिबोङ् के़राङ्ङाङ् वयाङ्, हे़क्क्याङ् आङ्गाॽ कुसिङ् निःत्तुङ्बा कुइसिक् इङ्घङ् फे़त्तुङ्ङाङ् खुने़ॽ मे़त्तुङ्॥ 8 कर आङ्गाॽनु सोरिक् के़बेःक्पा आङ्गाॽ आम्भुॽ आन्साॽसिरे़ मनाहाॽरे़ खुन्छिॽ निङ्वाॽओ किमा यङ्मा पोःक्खे़र मे़जोगु, हे़क्केसाङ् आङ्गाॽग के़रे़क् आनिङ्वाःल्ले़ निङ्वाॽफुमाङ्ङिन् तिम्दुङ् नाःत्तुङ्॥ 9 कल्ले़चोगुल्ले़ आम्भा खे़ल्ले़ याःन्दिक् मोसान् माङ्हे़क्सिङ्ङाङ् आङ्गाॽ अक्खे मे़त्ताङ्, ‘खे़ने़ॽ के़लाङ्ङिल्ले़ के़दोॽरु के़दारुबा ते़न्निन् से़क्खासाङ् खे़ने़ॽ नु खे़ने़ॽ के़मुॽइदाङ्साहाॽरे़ लागि पोङ्ॽ, थेआङ्भे़ल्ले़ खे़ने़ॽ के़रे़क् के़निङ्वाःल्ले़ यहवे दाङ्बा निङ्वाॽफुमाङ्ङिन् के़दिम्दु के़नाःत्तुआङ् वाॽ॥’ 10 “आल्ल ओमे़त्ते़ॽ, इस्राइलिहाॽ मुरे़क् खारे़क् थेआङ् के़होप्पादे़न्नो ताक्मे़गन्दे़आङ् मे़वये़ल्ले़ यहवे दाङ्बे़ल्ले़ कन् पाःन्निन् मोसान् मे़त्तुबा ये़म्माङ्धो आल्लो लिबोङ्ङाङ् तङ्बे ङासि के़रे़मारे़, हे़क्क्याङ् यहवे दाङ्बे़ल्ले़ कुबाःन्जाक् कुइसिक् आङ्गाॽ कुहिङ्वे़त्ते कत्ताआ॥ आल्ल ओमे़त्ते़ॽ, आङ्गाॽ ये़प्पोङ्ङाङ् तङ्बे ङासि के़राङ्ङाङ् वाॽआ॥ 11 हे़क्केसाङ् मोसाःल्ले़ आङ्गाॽ पाङ्घाङ्बा ये़न्नो यारिक्के आल्लोआङ् के़धुम्बा चोःक्का॥ थङ् चोःक्से़ लाःक्कात् पेःक्मारे़ लागि खे़न् ये़म्मो आङ्गाॽ आक्ख्याक् के़धुम्बा चोगाङ्, आङ्गाॽ आल्लोआङ् खे़म्म्याक्के थुम्आ॥ 12 कल्ले़चोगुल्ले़ आल्ल कन् कोःक्मा फाङ्जङ्बा लाजेन् आङ्गाॽ पिराङ्ङे़ॽ, खे़ल्ले़ कुयाःम्बेओ यहवे दाङ्बे़ल्ले़ खे़ल्ले़ याःन्दिक् पाःत्तुआङ् वये़॥ खे़प्मो अनाकिहाॽ मे़युङ्, खे़ङ्हाॽरे़ खुन्छिॽ यम्बयम्बा हाङ्यक् के़ने़बा ये़क्यक्हाॽ मे़जोगुआङ् ने़ के़लॽबा पाःन्निन् खे़न् ये़म्मो खे़ने़ॽ के़घे़प्सुआङ्ङे वये़॥ यहवे दाङ्बे़ल्ले़ फाॽआबालाम् खुने़ॽ कुबाःन्जाक् कुइसिक् आङ्गाॽ खे़ङ्हाॽ नाःत्तुङ्देसुङ्सिङ्ॽ॥” 13 खे़ब्याङ् यहोसुःल्ले़ यपुन्नेरे़ कुस्सा कालेबे़न् मुॽइसाम् पिरुआङ् मे़त्तु, हे़क्क्याङ् खुने़ॽ कुलक्खोमा कुइसिक् हेब्रोने़न् पिरु॥ 14 कल्ले़चोगुल्ले़ कनज्जि यपुन्नेरे़ कुस्सा कालेबरे़ कुलक्खोमा लक्किन् आइन् थारिक् हेब्रोने़न् पोःक्खे़आङ् ने़रो, थेआङ्भे़ल्ले़ खुने़ॽ के़रे़क् कुनिङ्वाःल्ले़ यहवे दाङ्बा इस्राइलबा निङ्वाॽफुमाङ्ङिन् नाःत्तु तिम्दुआङ् वये़॥ 15 हेब्रोनरे़ तगिबा कुमिङ् किर्यत-अर्बा ने़स्से़॥ हाबा कन् अर्बान् अनाकिहाॽओ के़रे़क्नुःल्ले़ पयम् यम्बा मना वये़॥ खे़ब्याङ् खे़न् लाजेन् थङ् पोङ्मालाम् नाःम्सिङ्मा खोसे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.