यहोसु 13 - लिम्बुआल्लसाङ् नाःम्मासि के़बोङ्बा लाजेॽहाॽ 1 आल्ल यहोसुन् काप्पोबा तुम्से़, हे़क्क्याङ् यरिक् तङ्बे के़रे़मारे़आङ् वये़, यहवे दाङ्बे़ल्ले़ खुने़ॽ मे़त्तु, “खे़ने़ॽ काप्पोबा के़दुम्से़आङ् यरिक् तङ्बे के़गे़रे़, कर आल्लसाङ् यरिक् लाजेॽहाॽ युक्को ताःप्मासि याःक्ते़आङ् वाॽ॥ 2 आल्लसाङ् के़याःक्पा लाजेॽहाॽ हाबा कन्हाॽएरो—पलिस्तिहाॽरे़ खुन्छिॽ के़रे़क् ते़ङ्गप्हाॽ नु गसुरिहाॽ, 3 मिस्र लाजेॽ नाङ्गे़न् ले़प्माङ्बा सिहोर वहःङ्लाम् कत्ना एक्रोनबा इःन्दो थारिक्—कन्हाॽ के़रे़क् कनानिहाॽरे़ खुन्छिॽ लक्को चुक्ते़आङ् ने़रो, (ङासि पलिस्ति युक्साबाहाॽरे़ खुन्छिॽ ते़ङ्गप्हाॽ गाजा, अस्दोद, अस्कलोन, गात नु एक्रोन), हे़क्क्याङ् लाङ्गे़त् ले़प्माङ्बा अब्बिहाॽरे़ खुन्छिॽ लाजेन् सोसोरिक्, 4 लाङ्गे़त् ले़प्माङ् कनानिहाॽरे़ खुन्छिॽ के़रे़क् लाजेॽहाॽ, सिदोनिहाॽरे़ खुन्छिॽ आरा मे़प्मनाबा लाजेॽलाम् अपेक नु एमोरिहाॽरे़ खुन्छिॽ इःन्दो थारिक्, 5 याम्मो गबालिहाॽरे़ खुन्छिॽ लाजेॽ, हे़क्क्याङ् नाङ्गे़न् ले़प्माङ् हेर्मोन कोःक्मा फाङ्जङ् कुसिगाङ्बा बाल-गादलाम् हेःक्सिङ्ङाङ् ले़बो-हमातबा ने़ने़बादे़न् थारिक् लेबनान लाजेन् के़रे़क्॥ 6 “हे़क्क्याङ् ले़बनानलाम् मिस्रपोत-मैम थारिक्पा कोःक्मा फाङ्जङ् लाजेॽ के़युङ्बा के़रे़क्, इग्र सिदोनिहाॽ॥ आङ्गाॽ कन्हाॽ के़रे़क् इस्राइलिहाॽरे़ खुन्छिॽ तगिलाम् लःत्तुङ्देसुङ्सिङ्ॽ॥ आङ्गाॽ खे़ने़ॽ मे़त्ने़बा कुइसिक् कन् लाजेन् लक्खोमारे़ लागि इस्राइलिहाॽ फःक्खे़ पिरे़से़ॽ॥ 7 आल्ल कन् लाजेन् फाङ्सि थाःक्हाॽ नु मनस्सेरे़ कुभ्रे़ःङ् थाःक्हाॽ लक्खोमारे़ लागि फःक्खे़ पिरे़से़ॽओ॥” यर्दन नाङ्गे़न् पिसाङ्बा लाजेन् मे़भःक्खु 8 यहवे दाङ्बे़ल्ले़ कुसे़वारोबा मोसाःल्ले़ खे़ङ्हाॽ पिरुसिबा कुइसिक् रुबेनिहाॽ नु गादिहाॽ हे़क्क्याङ् मनस्सेबा कुभ्रे़ःङ् थाःक्हाॽरे़ नाङ्गे़न् पिसाङ् यर्दन नाधाःम्बि खे़ङ्हाॽरे़ खुन्छिॽ खोमा लक्किन् मे़घोसुरो॥ 9 अर्नोन वहःङ्ङिल्ले़ कुयाओ के़ने़बा अरोएर नु हाबा खे़न् ने़ने़बादे़न्निल्ले़ कुलुम्मोबा ये़क्यक्कोनु मेदबाबा के़रे़क् ते़ल्लक्किन् दिबोन थारिक्, 10 हेस्बोनओ हाङ्युक् के़जोःक्पा एमोरिहाॽरे़ खुन्छिॽ हाङ् सिहोनरे़ के़रे़क् कुये़क्यक्हाॽ अम्मोनिहाॽरे़ खुन्छिॽ इःन्दोओ थारिक्, 11 गिलाद लाजेन् हे़क्क्याङ् गसुरि नु माकातिबा इःन्दोओ थारिक्, खे़ब्याङ् के़रे़क् हेर्मोन कोःक्माहाॽ नु सलका थारिक् बासान के़रे़क्— 12 इग्र खे़न् रपाइहाॽलाम् के़दाङ्बा के़याःक्पा अस्तारोत नु एद्रइओ हाङ्युक् के़जोःक्पा ओग हाङ्ङिल्ले़ के़रे़क् बासानबा कुहाङ्जुम्मो थारिक्, थेआङ्भे़ल्ले़ कन्हाॽ मोसाःल्ले़ नाःन्दुसिआङ् नाःत्तुदेसुसिआङ् मे़वये़॥ 13 कर इस्राइलिहाॽरे़ गसुरिहाॽ नु माकातिहाॽ मे़न्नाःत्तुसिन्॥ आइन्बा ये़न् थारिक् इस्राइलिहाॽरे़ खुन्छिॽ लुम्मो गसुरिहाॽ नु मकातिहाॽ मे़युङ्लो॥ 14 कर मोसाःल्ले़ ले़बि थाःक्हाॽ थे़माआङ् लक्खोमा युक् मे़बिरुसिन्, थेआङ्भे़ल्ले़ यहवे दाङ्बा इस्राइलबा निङ्वाॽफुमाङ्ङिल्ले़ कुलागि मे़दोन्दुबा मि लाम्बाबा सिदुङ्जभाहाॽ खुने़ॽ कुबाःन्जाक् कुइसिक् खे़ङ्हाॽरे़ खुन्छिॽ लक्खोमा युक्लो॥ रुबेनरे़ खोसुबा ते़ङ्गप् 15 मोसाःल्ले़ रुबेनरे़ कुधाःक्हाॽ हिम्सयङ् कुइसिक् खे़ङ्हाॽ अक्खेलॽरिक् फःक्खु पिरुसिरो— 16 खे़ङ्हाॽरे़ खुन्छिॽ इःन्दोन् अक्तङ्बा ने़स्से़—अर्नोन वहःङ्ङिल्ले़ कुयाओ के़ने़बा अरोएर नु हाबा खे़न् ने़ने़बादे़न्निल्ले़ कुलुम्मोबा ये़क्यक्किन्, हे़क्क्याङ् मेदबाबा के़रे़क् ते़ल्लक्हाॽलाम् हेःक्सिङ्ङाङ् 17 हेस्बोन नु खे़न् ते़ल्लक्कोबा के़रे़क् ये़क्यक्हाॽ, दिबोन, बामोत-बाल, बेथ-बाल-मोन, 18 यहसा, कदेमोत, मेपात, 19 किर्यातैम, सिब्मा नु ने़ने़बादे़न्नोबा कोःक्माओ के़ने़बा सेरेथ-सेहार, 20 बेथ-पोर, पिसगाबा याक्केःक्केःक्पा ते़न्निन्, हे़क्क्याङ् बेथ-यसिमोत थारिक्के— 21 ते़ल्लक्कोबा के़रे़क् ये़क्यक्हाॽ नु हेस्बोनओ हाङ्युक् के़जोःक्पा एमोरिहाॽरे़ खुन्छिॽ हाङ् सिहोनरे़ के़रे़क् कुहाङ्जुम्मिन् हे़क्क्याङ् मिद्यानबा युक्साबाहाॽ, इग्र सिहोननु नादङ् के़जोःक्पा खे़न् लाजेॽओ के़युङ्बा एबि, रेकेम, सुर, हुर नु रेबाबाहाॽनु सोसोरिक् मोसाःल्ले़ से़रुसिआङ् वये़॥ 22 थङ्ङो मे़से़रुसिबाहाॽनुःल्ले़ वेॽ बओररे़ कुस्सा, थुम्म्या के़इबा बालाम्मे़न्नाङ् इस्राइलिहाॽरे़ ताभेःल्ले़ मे़से़रु॥ 23 रुबेनिहाॽरे़ खुन्छिॽ इःन्दो यर्दन वहःङ्ङिल्ले़ कुयान् पोःक्खे़आङ् ने़स्से़॥ रुबेनिहाॽरे़ खुन्छिॽ लक्खोमा लक्किन् खुन्छिॽ हिम्सयङ्हाॽ कुइसिक् ये़क्यक्हाॽ नु पाङ्भेॽहाॽ हाबा कन्हाॽरो॥ गादरे़ खोसुबा ते़ङ्गप् 24 याम्मो मोसाःल्ले़ गादरे़ कुधाःक्हाॽ खे़ङ्हाॽरे़ खुन्छिॽ हिम्सयङ् कुइसिक् खुन्छिॽ लक्खोमा लक्किन् कम्भलॽरिक् फःक्खु पिरुसिरो— 25 खे़ङ्हाॽरे़ खुन्छिॽ इःन्दोन् अक्तङ्बा ने़स्से़—याजेर नु गिलादबा के़रे़क् ये़क्यक्हाॽ हे़क्क्याङ् अम्मोनिहाॽरे़ खुन्छिॽ लाजेन् कुभ्रे़ःङ्, रब्बा निःत्ताङ्बा अरोएर थारिक्, 26 हे़क्क्याङ् हेस्बोनलाम् रामत-मस्पा नु बेतोनिम थारिक्, हम्भ्याङ् महनोमलाम् दबिरबा इःन्दो थारिक् 27 हे़क्क्याङ् ने़ने़बादे़न्नोबा बेथ-हाराम, बेथ-निम्रा, सुक्कोत, सापोन नु हेस्बोनबा हाङ् सिहोनरे़ कुहाङ्जुम् के़नम्बाआङ् के़ने़बा (यर्दन नाङ्गे़न् पिसाङ्बा किन्नेरेत वरःङ्ङिल्ले़ नासमा कुयाओ थारिक् याङ्घु)॥ 28 गादिहाॽरे़ खुन्छिॽ लक्खोमा लक्किन् खे़ङ्हाॽरे़ खुन्छिॽ हिम्सयङ् कुइसिक्, ये़क्यक्हाॽ नु पाङ्भेॽहाॽ हाबा कन्हाॽरो॥ मनस्सेरे़ नाङ्गे़न् पिसाङ् खोसुबा ते़ङ्गप् 29 याम्मो मोसाःल्ले़ मनस्सेरे़ कुभ्रे़ःङ् कुधाःक्हाॽ, इग्र मनस्सेरे़ कुभ्रे़ःङ् कुमुॽइदाङ्साहाॽ खे़ङ्हाॽरे़ खुन्छिॽ हिम्सयङ् कुइसिक् खे़ङ्हाॽ कम्भलॽरिक् फःक्खु पिरुसिरो— 30 कन्हाॽरे़ खुन्छिॽ इःन्दोन् अक्तङ्बा ने़स्से़—महनोमलाम् बासान थारिक्, बासानबा हाङ् ओगरे़ के़रे़क् कुहाङ्जुम्हाॽ, बासानओ के़ने़बा याइररे़ के़रे़क् कुबाङ्भेॽहाॽ, के़रे़क् तुक्पोङ् ये़क्यक्हाॽ, 31 हे़क्क्याङ् गिलादरे़ कुलक् कुभ्रे़ःङ्, अस्तारोत नु एद्रइ (बासानओ के़ने़बा ओगरे़ हाङ् कुये़क्यक्हाॽ)॥ कन् के़रे़क् मनस्सेरे़ कुस्सा ये़म्बित्छा माकिररे़ कुमुॽइदाङ्साहाॽरे़ लागि, इग्र माकिररे़ कुभ्रे़ःङ् कुमुॽइदाङ्साहाॽरे़ लागि खुन्छिॽ हिम्सयङ् कुइसिक् पिरुसिआङ् ने़स्से़॥ 32 यरिहो नाङ्गे़न् ले़प्माङ्, यर्दन नाधाःम्बि मोआबबा ने़ने़बादे़न्नो मोसाःल्ले़ लक्खोमारे़ लागि फःक्खु पिरुसिबान् हाबा कन्हाॽरो॥ 33 कर ले़बि थाःक्हाॽ मोसाःल्ले़ थे़माआङ् लक्खोमा मे़बिरुसिन्॥ यहवे दाङ्बा इस्राइलबा निङ्वाॽफुमाङ्ङिल्ले़ माङ्हुप् चोगुबा कुइसिक् खुने़ॽए खे़ङ्हाॽरे़ खुन्छिॽ लक्खोमा पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.