यहोसु 11 - लिम्बुइस्राइलिहाॽरे़ थो ले़प्माङ्बा थक्सुबाहाॽ मे़नाःन्दुसि 1 हासोरबा हाङ् याबिनरे़ कन् खे़प्सुआङ् खुने़ॽ मादोनबा हाङ् योबाब, सिम्रोनबा हाङ्, अछ्यापबा हाङ्, 2 थाङ्गे़त् ले़प्माङ् कोःक्मा फाङ्जङ् लाजेॽबा हाङ्हाॽ नु किन्नेरेत यो ले़प्माङ्बा अराबाबा नु ते़म्बेबा हे़क्क्याङ् नाम्धा ले़प्माङ् दोर थे़गु माङ्वाबा हाङ्हाॽ, 3 नाङ्गे़न् नु नाम्धा ने़प्माङ् पिसाङ् के़युङ्बा कनानि, कोःक्मा लाजेॽबा एमोरि, हित्ति, परिज्जिहाॽ, यबुसिहाॽ नु मिस्पा लाजेॽबा हेर्मोन कोःक्मा सिगाङ् के़युङ्बा हिब्बिहाॽ इङ्घङ् हाक्तुसि॥ 4 खे़ङ्हाॽ नु खुन्छिॽ के़रे़क् थक्सुबाहाॽ सोरिक्, वरःङ्ङिल्ले़ कुयाओबा ये़ःङ्घा यारिक्के यरिक् अन्हाॽ हे़क्क्याङ् अन्लाधाहाॽनु सोसोरिक् चिहुॽ चिहुॽ मे़लःन्दे़ मे़ये़॥ 5 कन् के़रे़क् हाङ्हाॽ मे़जुप्से़, हे़क्क्याङ् खे़ङ्हाॽ मे़ये़आङ् इस्राइलिहाॽनु थङ् चोःक्मारे़ लागि मेरोम मे़प्मनाबा वरक् निःत्ताङ् सोरिक् थक्सुबा ने़त्ना साःङ्गाहिम् मे़जोगु॥ 6 यहवे दाङ्बे़ल्ले़ यहोसुन् मे़त्तु, “खे़ङ्हाॽनु मे़गिसे़न्ने़ॽ, थेआङ्भे़ल्ले़ ताःन्दिक् हाबा कन् ये़म्मो खे़ङ्हाॽ के़रे़क् से़रुङ्सिङ्ङाङ् आङ्गाॽ इस्राइलिहाॽ हुक्सुप्तुङ्सिङ्ॽ॥ खे़ने़ॽ खे़ङ्हाॽरे़ खुनिॽ अन्हाॽरे़ खुन्छिॽ सावेत्हाॽ च्ये़प्ते़ पिरे़से़ॽ, हे़क्क्याङ् खे़ङ्हाॽरे़ खुन्छिॽ अन्लाधाहाॽ मिधिक्खे़ पिरे़से़ॽ॥” 7 खे़ब्याङ् यहोसुन् के़रे़क् थक्लिहाङ्हाॽनु सोरिक् मेरोम मे़प्मनाबा वरक्को चघप् के़रे़आङ् खे़ङ्हाॽनु थक्मा हेःक्ते़॥ 8 हे़क्क्याङ् यहवे दाङ्बे़ल्ले़ इस्राइलिहाॽरे़ खुन्छिॽ हुक्को खे़ङ्हाॽ थासुसि, हे़क्क्याङ् खे़ङ्हाॽ मे़नाःन्दुसि, हे़क्क्याङ् खे़ङ्हाॽ यम्बा सिदोन थारिक् नु मिस्रपोत-मैम थारिक्, खे़ब्याङ् नाङ्गे़न् पिसाङ् मिस्पाबा ने़ने़बादे़न् थारिक् मे़नाःत्तुसि, हे़क्क्याङ् खे़ङ्हाॽरे़ लत्छाआङ् कुहिङ्वे़त् मे़ल्ले़त्छिङ्ङे खे़ङ्हाॽ मे़से़रुसि॥ 9 यहवे दाङ्बे़ल्ले़ इङ्जाङ् पिरुबा कुइसिक् यहोसुःल्ले़ खे़ङ्हाॽ से़रुसि॥ खुने़ॽ खे़ङ्हाॽरे़ खुन्छिॽ अन्हाॽरे़ खुन्छिॽ सावेत्हाॽ च्ये़प्तु पिरुसि, हे़क्क्याङ् खे़ङ्हाॽरे़ खुन्छिॽ अन्लाधाहाॽ मिधिक्खुदेसु पिरुसि॥ 10 खे़न् ये़म्मो यहोसुःल्ले़ हासोर ये़क्यक्किन् हुक्काप् चोगु, हे़क्क्याङ् खे़प्मोबा हाङ्ङिन् ताभेःल्ले़ च्ये़प्तु, थेआङ्भे़ल्ले़ तगि हासोरे़न् खे़न् के़रे़क् हाङ्जुम्हाॽओ लाम्लोबा ने़स्से़॥ 11 हे़क्क्याङ् खे़प्मो के़वाॽबा के़रे़क् ताभेःल्ले़ से़रुसि॥ खे़ङ्हाॽरे़ खे़प्मो सक्मा के़सोःन्छिङ्बा लत्छाआङ् मे़ल्ले़त्छिङ्ङे वरे़ङ्ले़ङ् मे़मे़क्खुसि॥ हे़क्क्याङ् खुने़ॽ हासोरओ मि याक्तु॥ 12 खे़न् हाङ्युक्ना ये़क्यक्हाॽ नु खे़प्मोबा के़रे़क् हाङ्हाॽआङ् यहोसुःल्ले़ हुक्काप् चोगुसि, हे़क्क्याङ् यहवे दाङ्बे़ल्ले़ कुसे़वारोबा मोसाःल्ले़ इङ्जाङ् चोगुबा कुइसिक् के़रे़क् ताभेःल्ले़ च्ये़प्तु से़रुसि॥ 13 यहोसुःल्ले़ हासोर ये़क्यक्किन्लक् मिधिक्खु कर उःक्चम्जम्बादे़न्हाॽओ के़ने़बा वेॽ आत्तिन् ये़क्यक्किन्नाङ् इस्राइलिहाॽरे़ मि मे़न्धिक्खुन्॥ 14 कन् ये़क्यक्हाॽओबा के़रे़क् थक्साहाॽ नु याङ्साकुन्धे सामाहाॽ इस्राइलिहाॽरे़ आप्फेक् खुन्छिॽ लागि मे़देॽरु॥ कर मनाहाॽग के़रे़क् ताभेःल्ले़ मे़ज्ये़प्तुसिआङ् मे़मे़क्खुसि॥ सक्मा के़सोःन्छिङ्बा थे़माःन्नाङ् खे़ङ्हाॽरे़ मे़ल्ले़रुन्॥ 15 यहवे दाङ्बे़ल्ले़ कुसे़वारोबा मोसान् इङ्जाङ् पिरुआङ् वये़बा कुइसिःक्के, मोसाःल्ले़ यहोसुन् मुरा मे़त्तुआङ् वये़, हे़क्क्याङ् यहोसुःल्ले़ के़रे़क् इःत्तु नाःत्तु॥ यहवे दाङ्बे़ल्ले़ मोसान् पिरुबा के़रे़क् इङ्जाङ्हाॽओ यहोसुःल्ले़ आत्तिन्नाङ् मे़ङ्गे़प्मनाबा मे़जोगुन्लो॥ यहोसुःल्ले़ हुक्काप् चोगुबा लाजेॽ 16 कम्भलॽरिक् यहोसुःल्ले़ खे़न् के़रे़क् लाजेॽहाॽ, इग्र कोःक्मा फाङ्जङ्बा ते़ङ्गप्हाॽ, नेगेव मे़प्मनाबा यो लाङ्गे़प्पा के़रे़क् लाजेॽहाॽ नु गोसेनबा के़रे़क् लाजेॽहाॽ, ते़म्बे, अराबा, इस्राइलबा थे़गु माङ्वा लाजेॽ नु खे़न्नु सोरिक्पा ते़म्बे, 17 सेइरबा थाम्माङ्ङो के़ने़बा हालाक मे़प्मनाबा कोःक्माओलाम् तेॽरुआङ् हेर्मोन कोःक्मा सिगाङ् ले़बनानबा ने़ने़बादे़न्नो बाल-गाद थारिक् नाःन्दुआङ् हुक्काप् चोगु, हे़क्क्याङ् खे़प्मोबा के़रे़क् हाङ्हाॽ ते़म्सुसिआङ् से़रुसि॥ 18 खे़न् के़रे़क् हाङ्हाॽनु यरिक् ये़न् थे़म्बा यहोसुन् ते़न्धङ् चोगे़॥ 19 इस्राइलिहाॽनु नादङ् के़जोःक्पा गिबोन के़युङ्बा हिब्बिहाॽनुःल्ले़ वेॽ आत्तिन् ये़क्यक्हाॽरे़आङ् पाःन्दङ् मे़न्जोगुन्, इस्राइलिहाॽरे़ के़रे़क् ये़क्यक्हाॽ थङ्लाम्बा हुक्काप् मे़जोगु॥ 20 यहवे दाङ्बे़ल्ले़ मोसान् इङ्जाङ् पिरुआङ् वये़बा कुइसिक् खे़ङ्हाॽ के़रे़क् इस्राइलिहाॽरे़ खुन्छिॽ तक्ले़ङ्वाओ थङ् चोःक्से़ मे़दार हे़क्क्याङ् लुङ्माॽ स्याःत् मे़ल्लॽए खे़ङ्हाॽ के़रे़क् वरे़ङ्ले़ङ् मे़मे़क्ल के़लॽबा यहवे दाङ्बे़ल्ले़ कुनिङ्वाॽ वये़॥ 21 खे़न् ये़म्मो यहोसुन् कोःक्मा फाङ्जङ्बा लाजेॽओ के़रे़ हे़क्क्याङ् हेब्रोन, दबिर, अनाब खम्भ्याङ् यहुदा नु इस्राइलबा के़रे़क् थे़गु माङ्वा लाजेॽओ के़युङ्बा अनाकिहाॽ युम्रे़क् मे़क्खुसि, यहोसुःल्ले़ खे़ङ्हाॽरे़ खुन्छिॽ ये़क्यक्हाॽनु सोसोरिक् खे़ङ्हाॽ खाप्पुथ्यःङ् मे़क्खुसि॥ 22 इस्राइलिहाॽरे़ खुन्छिॽ लाजेॽओ लत्छाआङ् अनाकिहाॽ मे़न्याःक्ते़न्, गाजा, गाद नु अस्दोदओरक् कुभा मे़याःक्ते़॥ 23 कम्भलॽरिक् यहवे दाङ्बे़ल्ले़ मोसान् मे़त्तुबा कुइसिःक्के यहोसुःल्ले़ के़रे़क् लाजेॽहाॽ नाःन्दुसिआङ् हुक्काप् चोगु, हे़क्क्याङ् खे़ङ्हाॽरे़ खुन्छिॽ थाःक्थाःक् कुइसिक् कुलक् कुलक् चोगुआङ् मे़युक्तुर फाॽआङ् इस्राइलिहाॽ फःक्खु पिरुसि॥ हे़क्क्याङ् लाजेन् थङ् चोःक्मालाम् नाःम्सिङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.