यहोसु 10 - लिम्बुएमोरिहाॽ हारिमे़द्ये़ 1 यहोसुःल्ले़ ऐ ये़क्यक्किन् हुक्काप् चोगुआङ् खाप्पुथ्यःङ् चोगुल्ले़ यरिहोन् नु खे़प्मोबा हाङ्ङिन् खाप्पुथ्यःङ् चोगुबा हे़क्केए ऐबा हाङ्ङिन् नु ये़क्यक्किन्नाङ् खाप्पुथ्यःङ् चोगु फाॽआङ् यरुसले़मबा हाङ् अदोनिसेदेकरे़ खे़प्सु हे़क्क्याङ् गिबोन के़युङ्बाहाॽरे़ इस्राइलिहाॽनु नादङ् मे़जोगुआङ् मे़युङ् के़लॽबा इङ्घङ्ङिन्नाङ् खे़प्सु॥ 2 खुने़ॽ नु कुमनाहाॽ साॽरिक् मे़गिसे़, थेआङ्भे़ल्ले़ गिबोने़न् लत्छा यम्बा ये़क्यक् ने़स्से़, हाङ्युक्ना ये़क्यक् हे़क्के खे़न् ऐ ये़क्यक्किन्नुःल्ले़आङ् यम्बा चोगे़ हे़क्क्याङ् खे़प्मोबा के़रे़क् मनाहाॽ मुक्के़गुबा मे़जोगे़॥ 3 कल्ले़चोगुल्ले़ यरुसले़मबा हाङ् अदोनिसेदेकरे़ हेब्रोनबा हाङ् होहाम, यर्मुतबा हाङ् पिराम, लाकिसबा हाङ् यापि नु एग्लोनबा हाङ् दबिरे़न् पेलि फाक्तुसि, 4 “खिनिॽ आङ्गाॽओ फे़रे़म्मे़ॽ हे़क्क्याङ् गिबोने़न् थङ्ङो फप्मा आभाॽरे़ॽ, थेआङ्भे़ल्ले़ खे़ल्ले़ यहोसुन् हे़क्क्याङ् इस्राइलिहाॽनु नादङ् चोगुरे़त्छ॥” 5 खे़ब्याङ् एमोरिहाॽरे़ खुन्छिॽ ङासि हाङ्, इग्र यरुसले़म, हेब्रोन, यर्मुत, लाकिस नु एग्लोनबा ङासि हाङ्हाॽरे़ खुन्छिॽ आप्फेक् आप्फेक् के़रे़क् थक्सुबाहाॽरे़आङ् गिबोनरे़ कुबेसाङ् साःङ्गाहिम् मे़जोगुआङ् खे़न्नु थङ् मे़जोगे़॥ 6 कल्ले़चोगुल्ले़ गिबोनबा मनाहाॽरे़ गिलगालबा साःङ्गाहिम्मो मनाहाॽ अक्खे मे़मे़त्तुसिआङ् यहोसुओ मे़बाङ्घु मे़देसुसि, “आनिगे़ओ हारा फे़रे़म्मे़ॽआङ् आनिगे आसे़ःप्ते़ॽ, हे़क्क्याङ् आभाॽरे़ॽ॥ खिनिॽ योःग्बाहाॽ लाप्आम्भेसे़म्मिन्ने़ॽ, थेआङ्भे़ल्ले़ कोःक्मा लाजेॽओ के़युङ्बा एमोरिहाॽरे़ खुन्छिॽ के़रे़क् हाङ्हाॽ आनिगे तक्ले़ङ्वाओ मे़जुप्से़आङ् मे़वाॽ॥” 7 कल्ले़चोगुल्ले़ के़रे़क् थक्सुबाहाॽ नु मुक्के़गुबा थक्लिहाङ्हाॽ याङ्सिङ्ङाङ् गिलगाललाम् यहोसुन् पे॥ 8 हे़क्क्याङ् यहवे दाङ्बे़ल्ले़ यहोसुन् मे़त्तु, “खे़ने़ॽ खे़ङ्हाॽनु मे़गिसे़न्ने़ॽ थेआङ्भे़ल्ले़ आङ्गाॽ खे़ङ्हाॽ खे़ने़ॽ के़हुक्को थासुङ्सिङ्ङाङ् मे़वाॽ॥ खे़ने़ॽ के़दगि खे़ङ्हाॽ लत्छाआङ् ताङ्मा मे़न्छुक्ने़न्॥” 9 यहोसुन् से़न्दिक् नाम्दाःत्दाःत् गिलगाललाम् लाङ्घेगे़ पेआङ् थिक्ले़ङ्मे़ल्ले़ एमोरिहाॽ चिफत् फत्तुसि॥ 10 यहवे दाङ्बे़ल्ले़ इस्राइलिहाॽरे़ खुन्छिॽ तगि खे़ङ्हाॽ मे़नाक्ते़ मे़बेर याःन्दुसि हे़क्क्याङ् इस्राइलिहाॽरे़ खे़ङ्हाॽ गिबोनओ थ्यःङ् मे़नाःन्दुसिआङ् हारिमे़जाःत्तुसि, खे़ब्याङ् बेथ-होरोनबा थाङ्माङ्बा लाम्मो मे़नाःत्तुसिआङ् आजेका नु मक्केदा थारिक् मे़स्ये़रुसिर मे़देॽरुसि॥ 11 इस्राइलिहाॽरे़ खुन्छिॽ तगिलाम् खे़ङ्हाॽ बेथ-होरोनलाम् आजेका थारिक्के सङ्माङ्ङो मे़घे़त्छिङ्ल मे़बत्छे़ल्ले़, यहवे दाङ्बे़ल्ले़ खे़ङ्हाॽरे़ खुन्छिॽ सम्धाङ् यम्बयम्बा फःन्हाॽ थासु॥ इस्राइलिहाॽरे़ खे़ङ्हाॽ ताभेःल्ले़ मे़से़रुसिबानुःल्ले़ यरिक् फःन्निल्ले़ थगु से़रुसिरो॥ 12 यहवे दाङ्बे़ल्ले़ एमोरिहाॽ इस्राइलिहाॽरे़ खुन्छिॽ हुक्को थासुसिल्ले़ याःम्मा यहोसुन् यहवे दाङ्बे़न्नु पारे़॥ खुने़ॽ इस्राइलिहाॽरे़ खुन्छिॽ तगि अक्खे पाःत्तुरो, “नाम्मे, खे़ने़ॽ गिबोनरे़ कुसम्धाङ्, हे़क्क्याङ् लाबाए, खे़ने़ॽग अय्यालोनबा ने़ने़बादे़न्निल्ले़ कुसम्धाङ् पत्छे़ॽओ॥” 13 हे़क्केलॽरिक् इस्राइलिहाॽरे़ निङ्मिहाॽओ कुले़क्वा मे़न्नुःक्के थारिक् नाम्मिन् नु लाबे़न् फन्ने़सि॥ कन् पाःन्निन् यासाररे़ कुसाप्पन्नोआङ् साप्ते़आङ् पत्॥ नाम्मिन् ताङ्साङ्बे़ल्ले़ कुलुम्मो पत्छे़गरे़, हे़क्क्याङ् नाम्धाधा थारिक्के नाम्धामा सुसे़॥ 14 यहवे दाङ्बे़ल्ले़ मना पान् खे़म्मा हेःक्तुआङ्धो कम्भलॽरिक् आभे़ल्ले़आङ् नाम्धामा सुसे़बा ये़न् होःप्ते़॥ से़क्खासाङ् इस्राइलिहाॽरे़ खुन्छिॽ लागि यहवे दाङ्बे़न् ते़न्धङ् चोगे़॥ 15 खे़ब्याङ् यहोसुन् हे़क्क्याङ् खुने़ॽनु सोरिक् के़रे़क् इस्राइलिहाॽ गिलगालबा थक्सुबा ने़त्ना साःङ्गाहिम्मो मे़नुःक्खे़रो॥ यहोसुःल्ले़ ङासि एमोरि हाङ्हाॽ ते़म्सुसि 16 आल्ल खे़न् ङासि एमोरि हाङ्हाॽ मे़घे़त्छिङ्ङाङ् मक्केदा फुक्कुओ मे़जिङ्सिङ्ङाङ् मे़युङे़॥ 17 मक्केदाबा फुक्कुओ के़जिङ्सिङ्बा खे़न् ङासिए हाङ्हाॽ मे़याङ्घुसि के़लॽबा इङ्घङ्ङिन् यहोसुओ के़रे़॥ 18 यहोसुःल्ले़ मे़त्तुसि, “यम्बयम्बा लुङ्हाॽ के़ङ्घाम्मे़ॽआङ् खे़न् फुक्कुःल्ले़ कुहङ्ङो ने़स्से़म्मे़ॽ, हे़क्क्याङ् खे़ङ्हाॽ कोमासिरे़ लागि मनाहाॽ निःत्ताङ् ये़प्से़म्सिम्मे़ॽ॥ 19 कर खिनिॽग खे़ङ्हाॽ मे़हाङ्घे़म्सिम्मिन्ने़ॽ, खिनिॽ निङ्मिहाॽ खुन्छिॽ एगाङ् एगाङ् नाःत्ते़म्सिम्मे़ॽ, खुन्छिॽ एगाङ्लाम्बा खे़ङ्हाॽ फत्ते़म्सिम्मे़ॽ॥ खुन्छिॽ ये़क्यक्को लाःप्मा खे़ङ्हाॽ मे़भाःक्ते़म्सिम्मिन्ने़ॽ, थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हुक्को खे़ङ्हाॽ थासुसिआङ् वाॽ॥” 20 आल्ल यहोसुन् नु इस्राइलिहाॽरे़ खे़ङ्हाॽ मे़ज्ये़प्तुसिआङ् मे़मे़क्खुसि, हे़क्क्याङ् के़दाङ्बा के़याःक्पाआङ् के़वाॽबाहाॽ लुङ्धाक्किल्ले़ कबुबा खुन्छिॽ ये़क्यक्हाॽओ मे़लासे़, 21 खे़ब्याङ् के़रे़क् मनाहाॽ मक्केदाबा थक्सुबा ने़त्ना साःङ्गाहिम्मो यहोसुओ थेआङ् मे़ल्लॽए मे़नुःक्खे़॥ इस्राइलिहाॽरे़ खुन्छिॽ तक्ले़ङ्वाओ पाःप्मा हाःत्ताङ् मे़आःन्छिङ्ङिन्॥ 22 यहोसुःल्ले़ मे़त्तुसि, “फुक्कुःल्ले़ कुहङ्ङिन् हन्दे़म्मे़ॽ हे़क्क्याङ् खे़न् ङासि हाङ्हाॽ फुक्कुओलाम् लःत्ते़म्सिम्मे़ॽआङ् आङ्गाॽओ तारे़म्सिम्मे़ॽ॥” 23 हे़क्केलॽरिक् खे़ङ्हाॽरे़ यरुसले़मबा हाङ्, हेब्रोनबा हाङ्, यर्मुतबा हाङ्, लाकिसबा हाङ् नु एग्लोनबा हाङ् कन् ङासि हाङ्हाॽ फुक्कुओलाम् मे़लःत्तुसिआङ् मे़दारुसि॥ 24 खे़ङ्हाॽरे़ खे़न् हाङ्हाॽ यहोसुओ मे़दारुसिआङ् एगाङ् यहोसुःल्ले़ इस्राइलबा के़रे़क् मनाहाॽ नु खुन्छिॽनु के़दाबा थङ्ङोबा थक्मोबाहाॽ उःत्तुसिआङ् मे़त्तुसि, “कत्ना फे़रे़म्मे़ॽआङ् खिनिॽ लाङ्ङिल्ले़ कन्हाॽरे़ खुन्छिॽ सिक्कुमाओ तोॽरे़म्सिम्मे़ॽ॥” हे़क्क्याङ् खे़ङ्हाॽ मे़भे़रे़आङ् लाङ्ङिल्ले़ खे़न्हाॽरे़ खुन्छिॽ सिक्कुमाओ मे़दोॽरुसि॥ 25 यहोसुःल्ले़ थक्मोबाहाॽ मे़त्तुसि, “मे़गिसे़म्मिन्ने़ॽ, खिनिॽ निङ्साङ् मे़बुगे़म्मिन्ने़ॽ॥ आःन्नासिम्मे़ॽआङ् के़धुम्बा पोःक्खे़म्मे़ॽ, थेआङ्भे़ल्ले़ खिनिॽ थङ् चोःक्मा के़बोङ्बा खिनिॽ निङ्मिहाॽ के़रे़क् यहवे दाङ्बे़ल्ले़ अक्खेए मे़त्तुसिॽ॥” 26 खे़ब्याङ् यहोसुःल्ले़ खे़ङ्हाॽ थगु से़रुसि, हे़क्क्याङ् ङासि सिङ्बुङ्ङो खे़ङ्हाॽ फोःन्दुसि, खम्भ्याङ् खे़ङ्हाॽ युःन्छिक् थारिक्के सिङ्बुङ्ङो ते़ल्ले़म् मे़भोःन्दुसिआङ् मे़बत्छे़॥ 27 नाम्ध्ये़बा ये़म्मो यहोसुःल्ले़ मुरा मे़त्तुसि, हे़क्क्याङ् सिङ्बुङ्ङोनु मे़धासुसिआङ् खे़ङ्हाॽ मे़जिङ्सिङ्बा हाबा खे़न् फुक्कुओ लाप्मे़देसुसि, हे़क्क्याङ् लुङ्फुक्कोःल्ले़ कुहङ्ङो यम्बयम्बा लुङ्हाॽ मे़ने़स्सु, खे़न् लुङ्हाॽ आइन् थारिक् हाबा ने़रो॥ इस्राइलिहाॽरे़ यो ले़प्माङ्बा ये़क्यक्हाॽ मे़मे़क्खु 28 हे़क्क्याङ् आम्भा खे़ल्ले़ याःन्दिक् यहोसुःल्ले़ मक्केदाःन् हुक्काप् चोगु, खे़ब्याङ् खे़न् लाजेन् नु खे़प्मोबा हाङ्ङिन्नाङ् ताभेःल्ले़ च्ये़प्तु से़रु॥ खुने़ॽ खे़प्मो के़वाॽबा के़रे़क् मनाहाॽ मे़क्खुसि, खुने़ॽ कुहिङ्वे़त् आत्तिन्हाॽआङ् मे़ले़रुसिन्॥ खुने़ॽ यरिहोबा हाङ्ङिन् मे़त्तुबा हे़क्केए मक्केदाबा हाङ्ङिन्नाङ् मे़त्तुरो॥ 29 खे़न् एगाङ् यहोसुन् के़रे़क् इस्राइलिहाॽनु सोरिक् मक्केदालाम् लिब्ना पेआङ् खे़न् थङ्ङो फत्तु॥ 30 यहवे दाङ्बे़ल्ले़ खे़न् नु खे़प्मोबा हाङ्ङिन् इस्राइलिहाॽ हुक्सुप्तुसि, हे़क्क्याङ् खे़न् नु खे़प्मो के़वाॽबा के़रे़क् मनाहाॽ ताभेःल्ले़ च्ये़प्तु से़रुसि॥ खुने़ॽ खे़प्मो आत्तिन्हाॽआङ् कुहिङ्वे़त् मे़ले़रुसिन्॥ यरिहोबा हाङ्ङिन् खुने़ॽ आक्खे मे़त्तुआङ् वये़ खे़प्मोबा हाङ्ङिन्नाङ् खुने़ॽ हे़क्केए मे़त्तु॥ 31 खे़ब्याङ् यहोसुन् के़रे़क् इस्राइलिहाॽनु सोरिक् लिब्नालाम् लाकिसओ पे, हे़क्क्याङ् किर्गप् कबुआङ् खे़न् थङ्ङो फत्तु॥ 32 यहवे दाङ्बे़ल्ले़ लाकिस ये़क्यक्किन् इस्राइलिहाॽरे़ खुन्छिॽ हुक्को थासु, हे़क्क्याङ् कुदाःन्दिक्मा खुन्छिॽ खे़न् हुक्काप् मे़जोगु, खम्भ्याङ् खे़न् नु खे़प्मो के़युङ्बा के़रे़क् मनाहाॽ खुने़ॽ ताभेःल्ले़ मे़क्खुसिआङ् लिब्नाओ चोगुबा कुइसिःक्के मे़त्तुसि॥ 33 हाबा खे़न् ये़म्मो गेजेरबा होराम हाङ्ङिन् लाकिसरे़ कुभाॽसे़ त्ये़॥ कर यहोसुःल्ले़ आत्तिन्हाॽआङ् कुहिङ्वे़त् मे़ल्ले़त्छिङ्ङे खे़न् नु खे़ल्ले़ कुधक्सुबाहाॽ नाःन्दुसि॥ 34 खे़न् एगाङ् यहोसुन् के़रे़क् इस्राइलिहाॽनु सोरिक् लाकिसलाम् एग्लोनओ पे, हे़क्क्याङ् खे़ङ्हाॽरे़ खे़न् किर्गप् मे़गबुआङ् थङ्ङो मे़भत्तु॥ 35 खे़ल्ले़ याःन्दिक् खुने़ॽ खे़न् हुक्काप् चोगुआङ् ताभेःल्ले़ मे़क्खु॥ खे़ङ्हाॽरे़ लाकिस ये़क्यक्किन् कुइसिक् खे़प्मोबा के़रे़क् ताभेःल्ले़ मे़मे़क्खुसि॥ 36 खे़ब्याङ् यहोसुन् के़रे़क् इस्राइलिहाॽनु सोरिक् एग्लोनलाम् थो थोःक्सिङ्ङाङ् हेब्रोनओ पे, हे़क्क्याङ् खे़ङ्हाॽरे़ खे़न् ये़क्यक्किन् थङ्ङो मे़भत्तु॥ 37 खे़ङ्हाॽरे़ खे़न् ये़क्यक्किन् हुक्काप् मे़जोगु हे़क्क्याङ् खे़न् नु खे़प्मोबा हाङ्ङिन् खे़ब्याङ् खे़प्मोबा के़रे़क् पाङ्भेॽहाॽ नु खे़प्मो के़वाॽबा के़रे़क् मनाहाॽ ताभेःल्ले़ मे़मे़क्खुसि॥ खे़ङ्हाॽरे़ आत्तिन्हाॽआङ् मे़ल्ले़रुसिन्॥ एग्लोनओ कुइसिःक्के खे़ङ्हाॽरे़ खे़न् नु खे़प्मो के़वाॽबाहाॽ के़रे़क् वरे़ङ्ले़ङ् मे़मे़क्खुसि॥ 38 खे़ब्याङ् यहोसुन् के़रे़क् इस्राइलिहाॽनु सोरिक् नुःक्खे़आङ् दबिर ले़प्माङ् पे, हे़क्क्याङ् खे़न् थङ्ङो फत्तु॥ 39 खे़ङ्हाॽरे़ खे़न्, खे़प्मोबा हाङ्ङिन् नु खे़ल्ले़ के़रे़क् कुबाङ्भेॽहाॽ हुक्काप् मे़जोगु, हे़क्क्याङ् खे़ङ्हाॽ ताभेःल्ले़ मे़ले़ःक्खुसि॥ खे़प्मो के़वाॽबा के़रे़क् मनाहाॽ युम्रे़क् मे़मे़क्खुसि॥ खे़ङ्हाॽरे़ आत्तिन्हाॽआङ् कुहिङ्वे़त् मे़ल्ले़रुसिन्॥ खे़ङ्हाॽरे़ हेब्रोन नु लिब्ना हे़क्क्याङ् खे़प्मोबा हाङ्ङिन् मे़मे़त्तुबा कुइसिःक्के दबिर नु खे़प्मोबा हाङ्ङिन्नाङ् मे़मे़त्तु॥ 40 कम्भलॽरिक् यहोसुःल्ले़ के़रे़क् लाजेॽ, इग्र कोःक्मा फाङ्जङ्बा ते़ङ्गप्, नेगेव मे़प्मनाबा यो ले़प्माङ्बा लाजेॽ, ते़म्बे नु थे़गु माङ्वा हे़क्क्याङ् खे़प्मोबा के़रे़क् हाङ्हाॽआङ् नाःन्दुसि॥ खुने़ॽ आत्तिन्हाॽआङ् कुहिङ्वे़त् मे़ले़रुसिन्॥ यहवे दाङ्बा इस्राइलबा निङ्वाॽफुमाङ्ङिल्ले़ कुइङ्जाङ् कुइसिक् सक्मा के़सोःन्छिङ्बा के़वाॽवाॽबा के़रे़क् खुने़ॽ मे़क्खुसि॥ 41 यहोसुःल्ले़ कादेस-बर्नेलाम् गाजा थारिक् नु गोसेनलाम् गिबोन थारिक्पा के़रे़क् ते़ङ्गप्हाॽ नाःन्दुसि॥ 42 कन् के़रे़क् हाङ्हाॽ खुन्छिॽ लाजेॽहाॽनु सोसोरिक् यहोसुःल्ले़ थिक्ले़ङ्ले़ नाःन्दुदेॽरुसि, थेआङ्भे़ल्ले़ यहवे दाङ्बा इस्राइलबा निङ्वाॽफुमाङ्ङिन्ने इस्राइलिहाॽरे़ खुन्छिॽ लागि थङ् थक्ते़॥ 43 खे़न् एगाङ् यहोसुन् के़रे़क् इस्राइलिहाॽनु सोरिक् गिलगालबा थक्सुबा ने़त्ना साःङ्गाहिम्मो नुःक्खे़द्ये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.