यहोसु 1 - लिम्बुयहोसुन् लाम्लोबा पोङ्ॽ 1 यहवे दाङ्बे़ल्ले़ कुसे़वारोबा मोसान् मासिङ्ङाङ् एगाङ्, मोसाःल्ले़ कुभाॽबाङ् नुनरे़ कुस्सा यहोसुन् यहवे दाङ्बे़ल्ले़ अक्खे मे़त्तु, 2 “आङ्गाॽ आसे़वारोबा मोसान् मासिङ्॥ कल्ले़चोगुल्ले़ पोगे़ॽ, खे़ने़ॽ कन् के़रे़क् मनाहाॽ तेॽरे़से़ॽआङ् यर्दन नाधाःम्बि आङ्गाॽ इस्राइलिहाॽ पिमा इःत्तुङ्सिङ्बा लाजेॽओ पेगे़ॽ॥ 3 आङ्गाॽ मोसाःन्नु माङ्हुप् चोगुङ्बा कुइसिक् खे़ने़ॽ के़लाङ् ताप्पेॽइल्ले़ तोॽरुबा के़रे़क् ते़न्हाॽ खे़ने़ॽ पिने़आङ् ने़रो॥ 4 मुरे़क् खारे़क् थेआङ् के़होःप्पादे़न्नाङ् कत्थो लेबनान थारिक् पेःक्काङ् पयम् यम्बा युफ्रेतिस वहःङ्ङाङ् ना हित्तिहाॽरे़ खुन्छिॽ के़रे़क् लाजेन् थारिक् नाम्धा ले़प्माङ् लुम्बा वरःङ् थारिक्के खिनिॽ इःन्दो पोङ्ॽ॥ 5 खे़ने़ॽ के़हिङ्हिङ् थारिक् खे़ने़ॽ के़दक्ले़ङ्वाओ हाःत्ताङ् पोःक्मा मे़सुक्ने़न्॥ आङ्गाॽ आक्खेलॽरिक् मोसाःन्नु वयाङ्, हे़क्केलॽरिक्के आङ्गाॽ खे़ने़ॽनु वाॽआ॥ आङ्गाॽ खे़ने़ॽ मे़नाॽने़न्ॽ, हे़क्क्याङ् खे़ने़ॽ लाप्मे़भुने़न्॥ 6 “के़धुम्बा नु हाङ्हाङ् के़लॽबा पोःक्खे़ॽ, थेआङ्भे़ल्ले़ आङ्गाॽ खिनिॽ पाधे़बाहाॽ पिनिङ् मे़त्तुङ्सिङ्ङाङ् माङ्हुप् चोगुङ्बा लाजेन् कन् मनाहाॽरे़ युक् चोःक्मारे़ लागि खे़ने़ॽ कन्हाॽ लाम्गे़लोसुसिॽ॥ 7 के़धुम्बा नु साॽरिक् हाङ्हाङ् के़लॽबा पोःक्खे़ॽ॥ आङ्गाॽ आसे़वारोबा मोसाःल्ले़ खे़ने़ॽ इङ्जाङ् के़बिरे़बा कुइसिक् के़रे़क् साम्योथिम् इङ्जाङ्हाॽ इःत्ते़ ने़त्तुॽ॥ खे़न् लाम्बा खे़ने़ॽ चुप्साङ् ले़प्माङ् इग्र फे़न्छाङ् ले़प्माङ् मे़बेगे़न्ने़ॽ, हे़क्क्याङ् खे़ने़ॽ आत्ति के़बेःक्साङ् कुलिङ्दो के़गे़प्पा के़बोङ्ॽ॥ 8 साम्योथिम् इङ्जाङ्ङोबा कन् साप्पन्निन् खे़ने़ॽ के़म्ब्राओलाम् मे़माने़न्ल, कर ले़न्दिक् से़न्दिक् से़वा चोगे़ॽ हे़क्क्याङ् खे़प्मो साप्ते़आङ् के़बप्पा के़रे़क् पाःन्हाॽ सिङ्सिङ् ये़क्ये़क्काङ् इःत्ते़ ने़त्तुॽ, खम्भ्याङ् खे़ने़ॽ के़रे़क् के़लाम्मो थो के़बोःक्काङ् कुलिङ्दो के़गे़प्पा के़बोङ्ॽ॥ 9 खे़ने़ॽ के़धुम्बा नु साॽरिक् हाङ्हाङ् के़लॽबा पोःक्खे़ फाॽआङ् आङ्गाॽ इङ्जाङ् पिने़आङ् वाॽ, मे़गिसे़न्ने़ॽ, यङ्मा मे़स्ये़न्ने़ॽ, थेआङ्भे़ल्ले़ खे़ने़ॽ आत्ति के़बेःक्साङ्, यहवे दाङ्बा खे़ने़ॽ के़निङ्वाॽफुमाङ्ङिन्, खे़ने़ॽनु वाॽरो॥” 10 खे़ब्याङ् यहोसुःल्ले़ मनाहाॽरे़ खुन्छिॽ सुहाङ्गे़म्बाहाॽ इङ्जाङ् पिरुसि, 11 “साःङ्गाहिम् लुम्मोलाम् पेगे़म्मे़ॽ हे़क्क्याङ् मनाहाॽ अक्खेलॽरिक् इङ्जाङ् पिरे़म्सिम्मे़ॽ, ‘खिनिॽ आप्फेक् आप्फेक् चामा थुङ्माहाॽ याङ्ङासिम्मे़ॽ, थेआङ्भे़ल्ले़ आल्ल सुम्यान्ले़ कन् यर्दन वहःङ् नाधाःम्बि खिनिॽ पेःक्माआङ् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़बिरिबा लाजेन् हुक्काप् चोःक्मा पोङ्ॽ॥’” 12 खे़ब्याङ् यहोसुःल्ले़ रुबेनि, गादि नु मनस्सेबा कुभ्रे़ःङ् थाःक्हाॽ अक्खे मे़त्तुसि, 13 “यहवे दाङ्बे़ल्ले़ कुसे़वारोबा मोसाःल्ले़ खिनिॽ के़बिरिबा इङ्जाङ्ङिन् खिनिॽ निङ्वाॽ इःत्ते़म्मे़ॽ, ‘यहवे दाङ्बा खिनिॽ निङ्वाॽफुमाङ्ङिल्ले़ खिनिॽ नाःम्सिङ्मा के़बिरिॽ हे़क्क्याङ् खुने़ॽ कन् लाजेन् के़बिरिआङ् ने़रो॥’ 14 खिनिॽ मे़ल्लिङ्गे़न् मेःत्हाॽ, अङे़ःक्वा साएहाॽ नु थक्साहाॽ मोसाःल्ले़ खिनिॽ यर्दन नाङ्गे़न् ले़प्माङ् के़बिरिबा लाजेॽओ वाॽमा मे़सुक्॥ कर खिनिॽ के़रे़क् थक्सुबाहाॽ खजुम्घया फे़जुम्भे़या हेॽआसिम्मे़ॽआङ् खिनिॽ फुॽनुसाॽहाॽरे़ खुनिॽ तगि तगि नाधाःम्बि के़बेगिर पोङ्ॽ॥ 15 हे़क्क्याङ् आल्ल खिनिॽ नाःम्सिङ्मा के़बिरिबा हे़क्केए यहवे दाङ्बे़ल्ले़ खे़ङ्हाॽआङ् नाःम्सिङ्मा मे़बिरुसिन्ल थारिक् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ पिमा के़जोगिबा लाजेन् खे़ङ्हाॽरे़ युक् मे़न्जोःक्के थारिक् खिनिॽ खे़ङ्हाॽ के़भाॽरुम्सिम्ल पोङ्ॽ॥ खे़न् एगाङ् यहवे दाङ्बे़ल्ले़ कुसे़वारोबा मोसाःल्ले़ यर्दन वहःङ् नाधाःम्बिबा नाङ्गे़न् ले़प्माङ् खिनिॽ के़म्बिरिबा लाजेॽओ नुःङ्मा फे़म्माआङ् खे़न् युक्मा के़सुक्तुम्ॽ॥” 16 हे़क्क्याङ् खे़ङ्हाॽरे़ यहोसुन् अक्खेलॽरिक् नोगप् मे़बिरु, “खे़ने़ॽ आनिगे आगे़बिबा के़रे़क् इङ्जाङ्हाॽ चोगुम्बे़ॽ, खे़ब्याङ् खे़ने़ॽ आनिगे आत्ति आत्ति याप्मि के़बाङ्, खे़प्मो आनिगे पेगिगे़ॽ॥ 17 आक्खेलॽरिक् मोसाःल्ले़ कुबाःन्हाॽ के़रे़क् आनिगे खे़प्सुम्बे़आङ् वये़ हे़क्केलॽरिक्के आनिगे खे़ने़ॽ के़बाःन्निन्नाङ् खे़प्सुम्बे़ॽ॥ यहवे दाङ्बा खे़ने़ॽ के़निङ्वाॽफुमाङ्ङिन् आक्खेलॽरिक् मोसाःन्नु वये़, हे़क्केलॽरिक्के खे़ने़ॽनुआङ् वाॽर॥ 18 खे़ने़ॽ के़इङ्जाङ्ङिन् हाःत्ले़ अत्तुॽ हे़क्क्याङ् खे़ने़ॽ इङ्जाङ् के़जोगुबा पाःन्जाःक्किन् हाःत्ले़ मे़इःत्तुन् मे़नाःत्तुन्ॽ, खे़न् से़प्मा पोङ्ॽ॥ खे़ने़ॽ के़धुम्बा नु हाङ्हाङ् के़लॽबारक् पोःक्खे़ॽओ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.