योना 4 - लिम्बुयोनाःल्ले़ कुसाक्के़न् 1 कर कन् पाःन्निन् योनारे़ साॽरिक् कुसिराॽ मे़धाङे़न् हे़क्क्याङ् खुने़ॽ कुयाःक्ले़ॽरे़॥ 2 हे़क्क्याङ् खुने़ॽ अक्खेलॽरिक् पेलिगे़न् तुवा चोगु, “यहवे दाङ्बाए, थे आसेःन्छा आङ्गाॽ हिम्मोनु लःम्मा तगिए खे़ने़ॽ अक्खेए के़जोगु फाॽआङ् आङ्गाॽ मे़म्बाःप्पान्बि? खे़ल्ले़चोगुल्ले़ आङ्गाॽ तर्सिस ले़प्माङ् खे़त्छिङ्मा पेःक्मा आसुक्सुक् निङ्वाॽ चोगुङ्॥ खे़ने़ॽ मिःम्जिदाङ्बा, लुङ्गुम्साबा, सदादिङ् नासि के़धःप्पा, सदादिङ् लुङ्माॽ आदुक्तुक्पा निङ्वाॽफुमाङ्ने़रो, खे़ने़ॽ आबाङे के़निङ्वान् के़नुःक्तुॽ खे़ब्याङ् खुम्दिङ् के़म्बिरुसिन्ॽ फाॽआङ् आङ्गाॽ निसुङ्॥ 3 यहवे दाङ्बाए, आल्ल आयाम्साम्मिन् तेॽरे़ॽ॥ आल्ल आङ्गाॽ हिङ्मानुःल्ले़ सिमाए नुबा पोङ्लो॥” 4 यहवे दाङ्बे़ल्ले़ नुगप् पिरु, “खे़ने़ॽ याःक्ले़ॽमा युक् के़गत्तुबि?” 5 खे़ब्याङ् योनान् ये़क्यक्किल्ले़ नाम्गे़त् ले़प्माङ् लःन्दे़बेआङ् थिक्ते़न्नो युङ्सिङ्॥ खुने़ॽ आबाङे कुलागि लत्छा ताराम्धिक् ताॽरुआङ् खे़न् नाम्जिःक्खोॽओ युङ्सिङ्॥ हे़क्क्याङ् निनबे ये़क्यक्किन् हे़न् पोङ्ङि फाॽआङ् खे़न् ओमे़प्मारे़ लागि हाङ्घुर युङे़॥ 6 हे़क्केःल्ले़ योनाःल्ले़ नाम्जिखोॽ खोसुर फाॽआङ् यहवे दाङ्बा निङ्वाॽफुमाङ्ङिल्ले़ लत्छा फुङ्वे़त्तिल्ले़ कुबुङ्धिक् लिङे़र याःन्दु॥ खे़न् फुङ्वे़त्तिल्ले़ कुबुङ्ङिन् निसुआङ् योनान् साॽरिक् सःत्ते़॥ 7 कर कुनाम्दाःप्मा खाओःप्मा इःत्ते़ल्ले़ निङ्वाॽफुमाङ्ङिल्ले़ खे़न् फुङ्वे़त्तिल्ले़ कुबुङ्ङिन् खक्तुर फाॽआङ् लत्छा खाॽवदिःक्पा थिक् पाङ्घु॥ खे़ब्याङ् खे़ल्ले़ खे़न् खक्तु हे़क्क्याङ् खे़न् फुङ्वे़त्तिल्ले़ कुबुङ्ङिन् इरे़मे़आङ् स्ये़॥ 8 नाम् के़रे़आङ् निङ्वाॽफुमाङ्ङिल्ले़ नाम्गे़त् पिसाङ्लाम्बा के़गोबा सुरिःत्मान् हुसु हे़क्क्याङ् साॽरिक् आओॽओॽबा नाम्से़ःक्मान् योनारे़ कुधे़गेःक्को चुक्ते़॥ हाङ्वामाल्ले़ खुने़ॽ कुधना ले़क्खे़॥ खुने़ॽ सिमा निङ्वाॽ चोगुआङ् पाःत्तु, “आङ्गाॽ आलागिग हिङ्मानुःल्ले़ सिमाए नुबा पोङ्लो॥” 9 कर निङ्वाॽफुमाङ्ङिल्ले़ योनान् मे़त्तु, “खे़न् फुङ्वे़त्तिल्ले़ कुबुङ्ङिल्ले़ कुयाःम्बेओ के़याःक्ले़ॽमा थे़मा युक् के़गत्तु?” योनाःल्ले़ याम्मो नुगप् पिरुआङ् मे़त्तु, “आङ्गाॽ आसिसि थारिक् आयाःक्ले़ॽमा युक् कत्तुङ्ॽ॥” 10 यहवे दाङ्बे़ल्ले़ योनान् मे़त्तु, “खे़न् फुङ्वे़त्तिल्ले़ कुबुङ्ङिन् थिक्से़न्ले़सा लिङे़ हे़क्क्याङ् वेॽसमा से़न्दिक् स्ये़॥ खे़ल्ले़ लागि खे़ने़ॽ थेआङ् के़न्जोगुन्, खे़न् खे़ने़ॽ के़लेःत्तुबाआङ् मेःन् लिङ्मा के़बाङ्घुबाआङ् मेःन् हे़क्केसाङ् खे़ल्ले़ लागि के़लुङ्माॽ तुक्किल्ले़ 11 खे़प्मो नुबा नु ताप्फे़ःम्बा से़म्मा मे़न्छुक्मनाबा १,२०,००० नुःल्ले़आङ् यरिक् कुदोःप्मा मनाहाॽ मे़वाॽ खे़ब्याङ् हाबा खे़म्याक्के थक्साहाॽआङ् मे़वाॽ॥ थे खे़न् साॽरिक् यम्बा निनबे ये़क्यक्किन् लुङ्माॽ मे़दुक्तुङ्ङिन्बाबि?” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.