योना 3 - लिम्बुयोनारे़ इङ्जाङ्ङिन् इःत्तु 1 यहवे दाङ्बे़ल्ले़ कुइङ्घङिन् याम्मो थिक्ले़ङ् योनाओ के़रे़॥ 2 खुने़ॽ मे़त्तु, “साॽरिक् यम्बा निनबे ये़क्यक्को खे़ने़ॽ पेगे़ॽ हे़क्क्याङ् आङ्गाॽ पिमा इःत्ने़बा इङ्घङ्ङिन् खे़प्मोबा मनाहाॽ चे़क्ते़से़ॽ॥” 3 योनान् यहवे दाङ्बे़ल्ले़ कुबाःन्जाक्किन् इःप्मा नाःप्मा ते़न्दे़ हे़क्क्याङ् निनबे पे॥ निनबे ये़क्यक्किन् साॽरिक् यम्बा चोगे़, खे़ल्ले़चोगुल्ले़ खे़न् ये़क्यक्किन् सुम् ये़न्ले़रक् खाराक् लमा सुक्के़दे़प्पा चोगे़॥ 4 योनान् ये़क्यक्को लासे़आङ् थिक्याःन्बा लाःम्दिक् लाङ्घेगे़ खे़ब्याङ् अक्खे पाःत्तुर इङ्भन् चोगु, “आल्ल के़दाबा लिबोङ् ये़न्नो निनबेःन् चिल्ले़क् ले़ङ्॥” 5 निनबेबा मनाहाॽरे़ निङ्वाॽफुमाङ्ङिल्ले़ कुबाःन्जाःक्को नसान् मे़जोगु॥ खे़ल्ले़चोगुल्ले़ खुन्छिॽ निङ्वाॽ लोरे़बा पाःन्निन् ओसेःन्धाक्मारे़ लागि के़रे़क् चाने़त्तो युङ्मा पोङ् फाॽआङ् खे़ङ्हाॽरे़ निःन्धो मे़जोगु॥ खे़ङ्हाॽ यम्बा चुक्पा के़रे़क्ले़ सागि तेत् मे़जाक्खुआङ् आबाङे मे़हिन्दे़बा पाःन्निन् ओसेःन्दाङ् मे़जोगु॥ 6 निनबेबा हाङ्ङिल्ले़ कन् पाःन्निन् खे़प्सुआङ् कुहाङ् युक्नाओनु पोगे़ हे़क्क्याङ् कुहाङ्जाङ्ङिन् फे़न्दु खे़ब्याङ् सागि तेत् चाक्सिङ्ङाङ् खाप्पुओ युङ्सिङ्॥ 7 खुने़ॽ निनबेसमा मनाहाॽ अक्तङ्बा इङ्जाङ् हाक्तुसि, “कन् हाङ्ङिन् नु हाङ्यम्बु सुहाङ्युक्पाहाॽरे़ खुन्छिॽ इङ्जाङ्लो॥ हाःत्ले़आङ् हे़न्नाङ् मे़जने़न्ल॥ के़रे़क् मनाहाॽ, पित्हाॽ हे़क्क्याङ् मे़ल्लुक् मे़ःन्दाक्हाॽरे़ चामा थुङ्मा मे़नुॽने़न्॥ 8 के़रे़क् मना नु थक्साहाॽरे़ मे़रिङ् थक्मारे़ लागि सागि तेत् चाङ्मा पोङ्ॽ॥ के़रे़क्ले़ निङ्वाॽ पिमाआङ् तुवा चोःक्मा पोङ्ॽ हे़क्क्याङ् आबाङे फे़न् याःम्बक्हाॽ नु ताप्फे़ःम्बा ये़प्ले़क्हाॽ ले़प्मा पोङ्ॽ॥ 9 हे़क्केःल्ले़ निङ्वाॽफुमाङ्ङिल्ले़ कुनिङ्वान् नुःक्तुॽ हे़क्क्याङ् आनिॽ ले़प्माङ्बा कुसाक्के़न्निन् चक् थासुबिला खे़ब्याङ् आनिॽ आम्मे़क्ने़न्॥” 10 खे़ङ्हाॽरे़ थे मे़जोगु हे़क्क्याङ् आभेलॽरिक् खुन्छिॽ ताप्फे़ःम्बा चोःक्मा पाःन्लाम् मे़नुःक्खे़ के़लॽबा पाःन्निन् निङ्वाॽफुमाङ्ङिल्ले़ निसु॥ खे़ब्याङ् कुलुङ्माॽ स्याःत् लॽरे़ हे़क्क्याङ् खिनिॽ खाप्पुथ्यःङ् चोःक्निङ् मे़त्तुसिबा कुइसिक् खुने़ॽ मे़जोगुन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.