योना 2 - लिम्बुयोनाःल्ले़ कुबेलिगे़न् तुवा 1 योनाःल्ले़ ङाःल्ले़ कुसाप्पोःक्पोलाम् यहवे दाङ्बा कुनिङ्वाॽफुमाङ्ङिन् अक्खेलॽरिक् पेलि फाक्तु— 2 “यहवे दाङ्बाए, आङ्गाॽ आदुक्खेओ खे़ने़ॽ पेलि फाक्ने़रो हे़क्क्याङ् खे़ने़ॽ नुगप् के़बिराङ्लो॥ आङ्गाॽ यो लुम्बाःत्तोलाम्बा कुभाॽरे़ लागि अःक्ताङ्ङाङ् पेलि फाक्ने़रो हे़क्क्याङ् खे़ने़ॽ आबेलिन् के़घे़प्सुरो॥ 3 खे़ने़ॽ आङ्गाॽ वरःङ्ङिल्ले़ कुसिगाङ्, खे़ल्ले़आङ् यो कुसिगाङ् ले़प्माङ् लाप्के़भुसाङ्लो, खे़ॽयो आङ्गाॽ च्वाःत्तिल्ले़ कब्रिङ् कबाङ्लो, हे़क्क्याङ् खे़ने़ॽ के़मुक्साम्बा वाभे़ल्ले़ङ्हाॽ आसम्धाङ् हुःक्ते़रो॥ 4 के़दक्क्रुम्बोलाम् के़नाःत्ताङ् के़देसाङ् के़लॽबा आङ्गाॽ इःत्तुङ्लो, हे़क्क्याङ् याम्मो आप्फाल्ले़आङ् के़सेसे माङ्हिम्मिन् मे़निआन्बिला लॽराङ्लो॥ 5 आसम्धाङ् च्वाःत्तिन् हुःक्ते़आङ् आसक्मा साक्ताङ् पिराङ्लो, वरःङ्ङिन्ले़ खक्पे़त् निःप्साङ्लो, आध्गेक्ओ वरःङ्ङोबा याःन्हाॽ कित्छिङ्लो॥ 6 आङ्गाॽ कोःक्मा फाङ्जङ्हाॽरे़ कुसिगाङ्बा मु कुहाक्को के़राङ्लो, इक्सादिङ् खाम्बेक् सिगाङ् के़राङ्लो, खे़ल्ले़ कुलाम्धेःत्हाॽ सदादिङ्ले़ लागि सुबे़आङ् पत्लो॥ कर यहवे दाङ्बा आनिङ्वाॽफुमाङ्ङे, खे़ने़ॽ कुदिःम्बे केःम्बा लुम्बाःत्तोलाम् कुहिङ्वे़त् के़नुःक्ताङ् के़धाक्ताङ्लो॥ 7 आङ्गाॽ आयाम्साम्मिन् पेर पत्छे़रो हे़क्केःल्ले़ यहवे दाङ्बाए आङ्गाॽ खे़ने़ॽ पेलि फाक्ने़रो हे़क्क्याङ् के़सेसे माङ्हिम्मो आबेलिगे़न् तुवान् के़घे़प्सुरो॥ 8 आत्तिन्हाॽरे़ हने़बा नावा चइःत्हाॽ माङ्मे़घयुसिॽ, खे़ङ्हाॽरे़ खे़ने़ॽ के़से़वा चोःक्मा मे़ले़रुआङ् मे़वाॽरो॥ 9 कर आङ्गाॽ खे़ने़ॽ के़नारा फोसुङ्लो, खे़ने़ॽओ सिदुङ्जभा तोःन्दुङ्लो हे़क्क्याङ् आङ्गाॽ चोगुङ्बा माङ्हुप्पिन् के़त्तुङ्लो॥ से़न्लप्पिन् यहवे दाङ्बान्लाम् तारो॥” 10 हे़क्केःल्ले़ यहवे दाङ्बे़ल्ले़ खे़न् ङाःन् इङ्जाङ् पिरु, हे़क्क्याङ् ङाःल्ले़ योनान् वरःङ्ङिल्ले़ कुयाओ लाक्काःत् असु लःत्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.