योना 1 - लिम्बुयोनान् खे़त्छिङ् 1 थिक्ये़न् अमित्तैरे़ कुस्सा योनाओ यहवे दाङ्बे़ल्ले़ कुइङ्घङिन् के़रे़॥ 2 खुने़ॽ मे़त्तु, “खे़न् साॽरिक् यम्बा ये़क्यक् निनबेओ पेगे़ॽ हे़क्क्याङ् खे़ल्ले़ कुदक्ले़ङ्वाओ पारे़ॽ॥ खे़प्मोबा मनाहाॽ आख्यारिक् साॽरिक् ताक्के़भे़ॽबा मे़जोक् के़लॽबा पाःन्निन् आङ्गाॽ कुसिङ् निःत्तुङ्ङाङ् वाॽ॥” 3 कर योनान् यहवे दाङ्बालाम् खे़त्छिङ्मा पेःक्मारे़ लागि वेॽ ले़प्माङ् थासिङ्॥ खुने़ॽ यो योप्पा ये़क्यक्को के़रे़ हे़क्क्याङ् खे़प्मो खुने़ॽ तर्सिस ले़प्माङ् के़बेःक्पा लत्छा वालाधाधिक् खोसु॥ हे़क्क्याङ् तर्सिस पेःक्मा फाॽआङ् फाॽयाङ् हुङुआङ् वालाधाओ लासे़॥ तर्सिसओ निङ्वाॽफुमाङ्लाम् माःङ्घा पोङ्ङाॽ के़लॽबा खुने़ॽ इःत्तुआङ् वये़॥ 4 कर यहवे दाङ्बे़ल्ले़ वरःङ्ङो साॽरिक् यम्बा सुरित् केजङ् हुसु॥ वरःङ्ङो साॽरिक् यम्बा सुरित् केजङ् हुरे़ हे़क्क्याङ् वालाधान् खप्मे़न् यरे़बे॥ 5 वालाधाओ याःम्बक् के़जोःक्पाहाॽ मे़गिसे़ हे़क्क्याङ् कुभाॽरे़ लागि आबाङे आबाङे खुन्छिॽ माङ्हाॽ पेलि फाक्मा मे़हेःक्तुसि॥ खे़न् एगाङ् वालाधान् मे़निःप्ने़ल्ल फाॽआङ् चिगक्वाहाॽ वरःङ्ङो लाप्फुमा मे़हेःक्तु॥ कर योनान् वालाधाःल्ले़ यो कुसिगाङ्बा चिगक्वा युङ्मादे़न्नो मुरुक् खारुक् इप्से़आङ् ने़स्से़॥ 6 वालाधा के़लोङ्बा थक्तुम्बे़ल्ले़ खुने़ॽ खे़प्मो तुमुआङ् मे़त्तु, “खे़ने़ॽ के़इम्माङ् थे के़जोःक्काङ् के़ने़बा? पोगे़ॽआङ् के़निङ्वाॽफुमाङ्ङिन् कुभाॽरे़ लागि पेलि फाक्ते़ॽ॥ खुने़ॽ आनिॽ लुङ्माॽ आदुक्काङ् आनिॽ हिङ्मे़न् से़ःप्तु आबिबि॥” 7 वालाधा के़लोङ्बाहाॽ अक्खे मे़मे़त्छिङ्, “आनिॽ सिङ्जेःक् ए़क्खुम् साॽरुम् हाःत्ले़ चोगुल्ले़ कन् तुक्खेन् आनिॽ सम्धाङ् त्ये़बाबे॥” खे़ङ्हाॽरे़ सिङ्जेःक् मे़ए़क्खु हे़क्क्याङ् योनारे़ कुमिङ्ङो चुक्ते़॥ 8 खे़ङ्हाॽरे़ खुने़ॽ मे़मे़त्तु, “लु, आल्ल आमे़त्ते़ॽ हाःत्ले़ चोगुल्ले़ कन् ये़त्तुक्खेन् आनिॽ सम्धाङ् चुक्ते़बाबे? खे़ने़ॽ थे़मा याःम्बक् के़जोक्? आत्तान्नु के़द्ये़बा? खे़ने़ॽ आत्ति लाजेबाने़? खे़ने़ॽ आत्तिन् सुबाङ्समाने़बे?” 9 योनाःल्ले़ नुगप् पिरुसि, “आङ्गाॽ हिब्रुआ॥ च्वाःत् नु इक्सादिङ् खाम्बेक् ने़प्माङ् के़जोःक्पा साङ्ग्राम्पेदाङ्बा यहवे निङ्वाॽफुमाङ्ङिन् से़वा मे़त्तुङ्॥” 10 यहवे दाङ्बालाम् खे़त्छिङ्बा पाःन्निन् योनारे़ खे़ङ्हाॽ चे़क्तुसि॥ वालाधा के़लोङ्बाहाॽ साॽरिक् मे़गिसे़ हे़क्क्याङ् खुने़ॽ मे़मे़त्तु, “खे़ने़ॽग किप्मा के़घुबा याःम्बक्ने़ के़जोगुरे़त्छ॥” 11 सुरित् केजङ्ङिन् चक्मे़ल्लॽए पोरे़र पत्छे़॥ खे़ल्ले़चोगुल्ले़ वालाधा के़लोङ्बाहाॽरे़ खुने़ॽ सेःन्मे़लाप्तु, “सुरित् केजङ्ङिन् चक् थार चोःक्मारे़ लागि आनिगे खे़ने़ॽ थे़मा मे़त्तासिगे़बाबे?” 12 योनारे़ नुगप् पिरुसि, “आङ्गाॽ वरःङ्ङो लाप्आभुसे़ॽ हे़क्क्याङ् वरःङ्ङिन् चिजि ये़म्ये़म् पोङ्ॽ॥ आङ्गाॽ चोगुङ्ङिल्ले़ कन् सुरित् केजङ्ङो खिनिॽ के़ध्ये़ॽइबा फाॽआङ् निसुङ्॥” 13 हे़क्केसाङ् वालाधान् कुसुक्पो थारिक् तेॽमा फाॽआङ् वालाधा के़लोङ्बाहाॽरे़ चाल्लिक् मे़जागु॥ कर सुरित् केजङ्ङिन् आल्लसाङ् चाल्लिक् पोरे़र पत्छे़ हे़क्क्याङ् खे़ङ्हाॽरे़ हे़न्नाङ् चोःक्मा मे़न्छुक्तुन्॥ 14 खे़ल्ले़चोगुल्ले़ खे़ङ्हाॽरे़ यहवे दाङ्बे़न् पेलि मे़भाक्तुर मे़अःक्ते़, “यहवे दाङ्बाए! आनिगे पेलि फाक्कासिगे़, कन् मनाःल्ले़ कुहिङ्मे़ल्ले़ कुले़क्वाओ आनिगे हिङ्मन् मे़देॽरे़न्ने़ॽओ! कन् के़रे़क् पाःन्हाॽरे़ लागि खे़ने़ॽए लक्पे़न्साबा के़वाॽ॥ कन् के़रे़क् हाबा खे़ने़ॽए पोङ्मा के़बाङ्घुबारो॥” 15 खे़न् एगाङ् खे़ङ्हाॽरे़ योनान् मे़बक्खुआङ् के़हुःक्पार के़बप्पा वरःङ्ङो लाप्मे़भुसु हे़क्क्याङ् वरःङ्ङिन् खिमो चिजि ये़म्ये़म् पोःक्खे़आङ् चिप्तु॥ 16 हे़क्के पोःक्खे़बाल्ले़ खे़न् वालाधा के़लोङ्बाहाॽरे़ यहवे दाङ्बे़न् साॽरिक् मे़गिरु हे़क्क्याङ् खुने़ॽओ सिदुङ्जभा मे़दोन्दुआङ् कुसे़वा चोःक्मा माङ्हे़क् मे़जोगु॥ 17 यहवे दाङ्बे़ल्ले़ कुइङ्जाङ् कुइसिक् लत्छा साॽरिक् यम्बा ङाःल्ले़ योनान् लरुदेसु हे़क्क्याङ् खे़न् ङाःल्ले़ कुसाक्पोःक्पो खुने़ॽ सुम्ये़न् नु सुम्से़न् थारिक् यागे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.